1 K’ehomaq reetal, anajwan kik’ulman naq chirix naq ke’xaqab’aman lix tenamit laj Ammon sa’ li ch’och’ Jerxon, relik chi yaal, ut chirix naq ke’alinasiik chaq laj Lamanita sa’ li ch’och’, ut eb’ lix kamenaqeb’ ke’muqe’ xb’aaneb’ li ani wankeb’ sa’ li ch’och’—

2 Anajwan eb’ lix kamenaq moko ke’k’ehe’ ta sa’ ajl xb’aan xnimal rajlankileb’; chi moko ke’k’ehe’ sa’ ajl lix kamenaqeb’ laj Nefita—a’b’anan kik’ulman chirix naq ke’xmuqeb’ lix kamenaqeb’, ut jo’kan ajwi’ chirix li kutan re kuyuk sa’, ut yaab’ak, (ut kiwan sa’ xwaqlaju chihab’ rawa’b’ejileb’ laj raqol aatin sa’ xb’een lix tenamit laj Nefi), ki’ok chi wank tuqtuukilal chi rajlal chiru chixjunil li ch’och’.

3 Relik chi yaal, ut eb’ li tenamit k’eek’ookeb’ xch’ool chixpaab’ankil lix taqlahom li Qaawa’; ut neke’xpaab’ chi tz’aqal tz’aqal eb’ lix k’ojob’anb’il k’anjel li Dios, jo’ chanru lix chaq’rab’ laj Moises; xb’aan naq tzolb’ileb’ re te’xpaab’ lix chaq’rab’ laj Moises toj reetal naq taatz’aqloq ru.

4 Ut chi jo’kan maajun choqink kiwan sa’ xyanqeb’ li tenamit sa’ chixjunil li xwaqlaju chihab’ rawa’b’ejileb’ laj raqol aatin sa’ xb’een lix tenamit laj Nefi.

5 Ut kik’ulman naq sa’ xtiklajik li xwuqlaju chihab’ rawa’b’ejileb’ laj raqol aatin, kiwan tuqtuukilal chi rajlal.

6 A’b’anan kik’ulman naq yoo chi nach’ok xraqik li xwuqlaju chihab’, kichal jun li winq sa’ li ch’och’ Tzarahemla, ut a’an aj xik’ ilonel re li Kristo, xb’aan naq ki’ok chi jultikank aatin chiru li tenamit re xsachb’al xwankileb’ li profeetil aatin li yeeb’il chaq xb’aaneb’ li profeet, chirix lix k’ulunik li Kristo.

7 Anajwan maajun chaq’rab’ kiwan li naramok re li naxpaab’ junaq winq; xb’aan naq tz’aqal moko naxk’am ta rib’ rik’in lix taqlahom li Dios naq taawanq junaq chaq’rab’ li taa’iloq reheb’ li winq chi moko juntaq’eet ta xwankileb’.

8 Xb’aan naq jo’ka’in naxye li loq’laj hu: Sik’omaq ru sa’ li kutan a’in ani chi aj-u texk’anjelaq.

9 Anajwan wi junaq winq naraj k’anjelak chiru li Dios, kanab’anb’il chixb’aanunkil; malaj ut, wi naxpaab’ li Dios, kanab’anb’il chi k’anjelak chiru; a’ut wi ink’a’ naxpaab’, maajun chaq’rab’ wan re xk’eeb’al tojb’a-maak sa’ xb’een.

10 A’b’an wi nakamsin naxk’ul li kamk choq’ tojb’a-maak; wi ut namaq’ok naxk’ul ajwi’ tojb’a-maak; ut wi na’elq’ak naxk’ul ajwi’ tojb’a-maak, ut wi naxmux xsumsu naxk’ul ajwi’ tojb’a-maak; relik chi yaal, xb’aan chixjunil li maa’usilal a’in neke’xk’ul tojb’a-maak.

11 Xb’aan naq kiwan jun li chaq’rab’ naq taaraqe’q aatin chirixeb’ li winq jo’ chanru li maak xb’aanuhomeb’. A’b’anan maajun chaq’rab’ kiwan chirix lix paab’ahom junaq winq; jo’kan naq ka’ajwi’ nak’ehe’ tojb’a-maak sa’ xb’een junaq winq xb’aan li maak xb’aanuhom; jo’kan naq chixjunileb’ li winq ke’ile’ chi juntaq’eeteb’ xwankil.

12 Ut laj xik’ ilonel re li Kristo a’in, aj Korihor xk’ab’a’, (ut li chaq’rab’ maajun wankilal kiru wi’ chi wank sa’ xb’een) ki’ok chixjultikankil chiruheb’ li tenamit naq maajun Kristo taawanq. Ut jo’ka’in naq kijultikan aatin, kixye:

13 Laa’ex li b’ak’b’ookex taq’a rub’el jun li yo’onihom li maak’a’ ru ut maak’a’ xyaalal, k’a’ut naq nekek’ul choq’ iiqleb’ xkomon li jo’maajo’il na’leb’ a’in? K’a’ut naq nekeroyb’eni jun li Kristo? Xb’aan naq maajun winq naru chixnawb’al k’a’ruhaq li toj taachalq.

14 K’ehomaq reetal, li k’a’aq re ru a’in li profeetil aatin jo’ nekeye, li nekeye naq numsinb’il chaq eere xb’aaneb’ li santil profeet, k’ehomaq reetal, a’an jo’maajo’il na’leb’ kanab’anb’il chaq xb’aaneb’ lee yuwa’.

15 Chan ru nekenaw naq yaal? K’ehomaq reetal, ink’a’ naru teenaw chirix li k’a’aq re ru ink’a’ nekeril; jo’kan ut, ink’a’ naru teenaw naq taawanq junaq li Kristo.

16 Nekex’ilok chi uub’ej ut nekeye naq nekeril jun risinkil lee maak. A’b’an k’ehomaq reetal, a’an xk’oxlahom jun waxil ru k’a’uxlej; ut lix po’jik eek’a’uxl a’in nachal xb’aan li na’leb’ kanab’anb’il chaq xb’aaneb’ lee yuwa’, li nak’amok eere sa’ xpaab’ankil li k’a’aq re ru moko yaal ta.

17 Ut naab’al chik li k’a’aq re ru xkomon a’in kixye reheb’; ut kixye reheb’ naq moko taaruuq ta taa’uxmanq xtojb’al rix xmaakeb’ li winq, naq li junjunq chi winq nak’uluk b’an sa’ li yu’am a’in jo’ chanru naxb’eresi li tz’ejwalej; jo’kan naq li junjunq chi winq na’usa jo’ chanru xseeb’al xk’a’uxl, ut naq li junjunq chi winq nanumta jo’ chanru xmetz’ew; ut yalaq k’a’ru naxb’aanu junaq winq moko maak ta.

18 Ut chi jo’kan kijultikan aatin chiruheb’, ut kixjalb’ehi xch’ooleb’ naab’al, ut kixk’e chixtaqsiheb’ xjolom sa’ xmaa’usilaleb’; relik chi yaal, kixjalb’ehi k’iila ixq, ut winq ajwi’, re te’xb’aanu li yumb’eetak ko’b’eetak—kixye reheb’ naq jo’q’e’ nakam junaq winq, ak xraqik chaq a’an.

19 Anajwan li winq a’in xko’o ajwi’ junpak’al sa’ li ch’och’ Jerxon, re xjultikankil li k’a’aq re ru a’in sa’ xyanqeb’ lix tenamit laj Ammon, a’eb’ li ke’wan chaq choq’ xtenamiteb’ laj Lamanita.

20 A’b’an k’ehomaq reetal, eb’ a’an q’axal wi’chik ke’wan xna’leb’ chiru naab’al xkomoneb’ laj Nefita; xb’aan naq ke’xchap, ut ke’xb’ak’, ut ke’xk’am chiru laj Ammon, li kiwan choq’ taqenaqil aj tij sa’ xb’een li tenamit a’an.

21 Ut kik’ulman naq a’an kixtaqla naq taak’ame’q toj chirix li ch’och’. Ut a’an xko’o junpak’al sa’ li ch’och’ Gideon, ut ki’ok chi jultikank aatin chiruheb’ ajwi’ a’an; ut arin ink’a’ ki’usa chi naab’al, xb’aan naq kichape’ ut kib’ak’e’, ut kik’ame’ chiru li taqenaqil aj tij, ut chiru ajwi’ li xb’eenil aj raqol aatin sa’ xb’een li ch’och’.

22 Ut kik’ulman naq li taqenaqil aj tij kixye re: K’a’ut naq nakatb’eek chixpo’b’al ru lix b’e li Qaawa’? K’a’ut naq nakak’ut chiru li tenamit a’in naq maajun Kristo taawanq, re xramb’al li saho’k sa’ xch’ooleb’? K’a’ut naq nakat-aatinak re xsachb’al xwankil chixjunil lix profeetil aatineb’ li santil profeet?

23 Anajwan laj Giddonah xk’ab’a’ li taqenaqil aj tij. Ut laj Korihor kixye re: Xb’aan naq ink’a’ nink’ut li jo’maajo’il na’leb’ kanab’anb’il chaq xb’aaneb’ lee yuwa’, ut xb’aan naq ink’a’ nink’ut chiruheb’ li tenamit a’in naq te’xb’ak’ rib’ taq’a rub’el li jo’maajo’il k’ojob’anb’il k’anjel ut b’aanunb’il na’leb’, li k’ojob’anb’il chaq xb’aaneb’ li najteril aj tij, re xmaq’b’al li wankilal ut li awa’b’ejil sa’ xb’eeneb’, re te’kanaaq chi maak’a’aqeb’ xnawom, re naq ink’a’ te’xtaqsi xjolomeb’, re b’an te’kub’siiq jo’ chanru laa waatin.

24 Laa’ex nekeye naq li tenamit a’in a’an jun tenamit ach’ab’anb’il. K’ehomaq reetal, laa’in ninye naq wankeb’ sa’ moosil. Nekeye naq eb’ li najteril profeetil aatin a’an, yaaleb’. K’ehomaq reetal, laa’in ninye naq moko nekenaw ta naq yaaleb’.

25 Nekeye naq li tenamit a’in wankeb’ xmaak ut t’anenaqeb’, xb’aan li q’etok aatin kixb’aanu jun li na’b’ej yuwa’b’ej. K’ehomaq reetal, laa’in ninye naq jun li alalb’ej moko wan ta xmaak xb’aan lix na’ xyuwa’.

26 Ut nekeye naq taachalq li Kristo. A’b’an k’ehomaq reetal, ninye naq ink’a’ nekenaw naq taawanq jun li Kristo. Ut nekeye ajwi’ naq a’an taakamsiiq sa’ xk’ab’a’ lix maak li ruchich’och’—

27 Ut chi jo’kan nekejalb’ehiheb’ li tenamit a’in re xtaaqenkil li jo’maajo’il na’leb’ kanab’anb’il chaq xb’aaneb’ lee yuwa’, ut jo’ chanru lee rajom laa’ex; ut nekerameb’ taq’a, chanchan naq wankeb’ chi moosil, re taaruuq teenimob’resi eetib’el rik’in xk’anjel li ruq’eb’, re naq maak’a’aqeb’ xch’ool chi ilok taqe’q rik’in xkawileb’ xch’ool, ut re naq maak’a’aqeb’ xch’ool chixyalb’al xsahil li k’a’ru xk’ulub’eb’, ut li kanab’anb’ileb’ chixb’aanunkil.

28 Relik chi yaal, moko wankeb’ ta xch’ool chiroksinkil li k’a’ru reheb’, maare anchal te’xrahob’tesi xch’ooleb’ laj tij, li neke’k’ehok iiqleb’ sa’ xb’eeneb’ jo’ chanru ratawomeb’, ut ke’xk’ameb’ chixpaab’ankil, rik’in li na’leb’ kanab’anb’il chaq reheb’ ut lix matk’eb’ ut lix jo’maajo’il ajomeb’ ut lix k’utb’esinb’il matk’ ut lix pak’b’il muqmuukiil na’leb’, naq eb’ a’an, wi ink’a’ neke’xb’aanu jo’ chanru li raatineb’, te’xrahob’tesi xch’ool junaq winq moko nawb’il ta ru, a’an li Dios jo’ neke’xye—jun winq maajun wa ilb’il chi moko nawb’il ru, li maajo’q’e wanjenaq ut maajo’q’e taawanq.

29 Anajwan naq li taqenaqil aj tij ut li xb’eenil aj raqol aatin ke’ril lix kawil li raam, relik chi yaal, naq ke’ril naq tixhob’ ajwi’ li Dios, maajun xsumenkil li raatin ke’xk’e; ke’xtaqla b’an xb’ak’b’al; ut ke’xq’axtesi sa’ ruq’eb’ laj taql, ut ke’xtaqla sa’ li ch’och’ Tzarahemla, re taak’ame’q chiru laj Alma, ut li xb’eenil aj raqol aatin li wan choq’ aj jolominel sa’ xb’een chixjunil li ch’och’.

30 Ut naq kik’ame’ chiru laj Alma ut li xb’eenil aj raqol aatin, kik’ulman naq kikana sa’ xb’aanunkil jo’ li kixb’aanu ajwi’ chaq sa’ li ch’och’ Gideon; relik chi yaal, kikana sa’ xmajewankil li Dios.

31 Ut kiwakli rik’in ninqi taqenaqil aatin chiru laj Alma, ut kixhob’eb’ rix laj tij ut eb’ laj tzolonel, kixye naq ke’xjalb’ehiheb’ li tenamit re xtaaqenkil li jo’maajo’il na’leb’ kanab’anb’il chaq xb’aaneb’ lix yuwa’eb’, choq’ re xnimob’resinkil xtib’eleb’ rik’in xk’anjeleb’ li tenamit.

32 Anajwan laj Alma kixye re: Laa’at nakanaw naq ink’a’ naqanimob’resi qatib’el rik’in xk’anjeleb’ li tenamit a’in; xb’aan naq k’e reetal, laa’in xink’anjelak chalen chaq sa’ xtiklajik li rawa’b’ejileb’ laj raqol aatin toj anajwan, rik’in tz’aqal wuq’ re xk’ulb’al li nak’anjelak we, us ta k’a’jo’ naq xinb’eeni li ch’och’ re xch’olob’ankil li raatin li Dios chiru lin tenamit.

33 Ut us ta k’iila k’anjel kinb’aanu sa’ li iglees, maajun wa kink’ul yal ta jun seninaq choq’ reeqaj ink’anjel, chi moko anihaq reheb’ lin komon, ka’ajwi’ sa’ li raqleb’aal aatin; ut aran yal xqak’ul jo’ chanru li chaq’rab’ choq’ reeqaj li qakutan.

34 Anajwan ut, wi maak’a’ naqak’ul choq’ reeqaj li qak’anjel sa’ li iglees, k’a’ru naqara wi’ k’anjelak sa’ li iglees wi maawa’ re xch’olob’ankil li yaal, re taaruuq taawanq xsahil qach’ool rik’in xsahileb’ xch’ool li qas qiitz’in?

35 K’a’ ut nakaye laa’at naq nokojultikan aatin chiru li tenamit re xk’ulb’al tumin, naq laa’at ajwi’ nakanaw naq maajun tumin naqak’ul? Anajwan ut, ma nakapaab’ naq naqab’alaq’i li tenamit a’in, ut xb’aan a’an nasaho’ xch’ooleb’ chi jo’kan?

36 Ut laj Korihor kichaq’ok chiru, Hehe’.

37 Toja’ ut naq laj Alma kixye re: Ma nakapaab’ naq wan jun li Dios?

38 Ut a’an kichaq’ok, Ink’a’.

39 Anajwan laj Alma kixye re: Ma taatz’eqtaana wi’chik xyaalal naq wan jun li Dios, ut taatz’eqtaana wi’chik xyaalal li Kristo? Xb’aan naq k’e reetal, ninye aawe, ninnaw naq wan jun li Dios, jo’ ajwi’ naq taachalq li Kristo.

40 Anajwan ut k’a’ru wan aawik’in li naxk’ut xyaalal naq maajun Dios wan, malaj naq ink’a’ taachalq li Kristo? Ninye aawe, maak’a’ wan, ka’ajwi’ laa waatin xjunes.

41 A’b’an k’e reetal, laa’in wan chixjunil li k’a’aq re ru wik’in re xch’olob’ankil xyaalal naq yaal li k’a’aq re ru a’in; ut laa’at ajwi’ wan aawik’in chixjunil li k’a’aq re ru re xch’olob’ankil chawu naq yaal, ut ma taatz’eqtaana xyaalal? Ma nakapaab’ naq yaal li k’a’aq re ru a’in?

42 K’e reetal, ninnaw naq nakatpaab’an, a’b’anan eechaninb’ilat xb’aan jun musiq’ej aj tik’ti’, ut xawisi chawix lix Musiq’ li Dios re naq maak’a’aq xna’aj aawik’in; laj tza b’an wan xwankil sa’ aab’een, ut yalaq b’ar nakatxk’am, ut naxk’anjela li k’oxlanb’il na’leb’ re taaruuq chixsachb’aleb’ li ralal xk’ajol li Dios.

43 Anajwan ut laj Korihor kixye re laj Alma: Wi laa’at taak’ut jun li eetalil chiwu, re taaq’unb’esiiq inch’ool naq wan jun li Dios, relik chi yaal, k’ut chiwu naq a’an wan xwankil, toja’ ut naq taaq’unb’esiiq inch’ool chirix lix yaalalil laa waatin.

44 A’ut laj Alma kixye re: Ak tz’aqal li eetalil wan chawu; ma taayal rix laa Dios? Ma taaye, K’ut chiwu jun li eetalil, naq ak xak’ul lix ch’olob’ahomeb’ chixjunil laa was aawiitz’in a’in, ut jo’kan ajwi’ chixjunileb’ li santil profeet? Eb’ li loq’laj hu k’ojk’ookeb’ chawu, relik chi yaal, ut chixjunil li k’a’aq re ru naxk’ut naq wan jun li Dios; relik chi yaal, jo’kan ajwi’ li ruchich’och’, ut chixjunil li k’a’aq re ru wan chiru lix b’een, relik chi yaal, ut lix xikik, relik chi yaal, ut jo’kan ajwi’ chixjunileb’ li kok’ t’ort’ookil chahim li neke’b’eek chiru tz’aqal xb’eheb’, neke’xk’ut xyaalal naq wan jun aj Yo’ob’tesinel li nataqlan re chixjunil.

45 A’b’anan ma toj nakatxik laa’at, chixjalb’ehinkil xch’ooleb’ li tenamit a’in, ut chixch’olob’ankil chiruheb’ naq maak’a’ jun li Dios? Ut ma toj taatz’eqtaana xyaalal, chiru chixjunileb’ laj yehol nawom a’in? Ut a’an kixye: Yaal, tintz’eqtaana xyaalal, wi ink’a’ taak’ut chiwu jun li eetalil.

46 Ut anajwan kik’ulman naq laj Alma kixye re: K’e reetal, naraho’ inch’ool xb’aan xkawil aawaam, relik chi yaal, naq toj taatz’eqtaana li musiq’ej re li yaal, re taasache’q laa waam.

47 A’b’an k’e reetal, q’axal us wi’chik naq taasachq laa waam chiru naq sa’ aak’ab’a’ laa’at te’k’ame’q k’iila aamej taq’a sa’ li sache’k, xb’aan laa tik’ti’ ut xb’aan laa sahil aatin; jo’kan ut naq wi taatz’eqtaana wi’chik xyaalal, k’e reetal, li Dios tatxsak’, re naq memaqat, re naq maajun wa chik taate xtz’uumal aawe, re naq ink’a’ chik taab’alaq’i li tenamit a’in.

48 Anajwan laj Korihor kixye re: Moko ninye ta naq maak’a’ jun li Dios, a’b’an ink’a’ ninpaab’ naq wan jun li Dios; ut ninye ajwi’ naq laa’at moko nakanaw ta naq wan jun li Dios; ut wi ink’a’ taak’ut jun li eetalil chiwu, ink’a’ tinpaab’.

49 Anajwan laj Alma kixye re: A’in tink’e aawe choq’ eetalil, naq tatmemob’resiiq, jo’ chanru li waatin, ut ninye, naq sa’ xk’ab’a’ li Dios, tatmemo’q, re naq ink’a’ chik tat-aatinaq.

50 Anajwan chirix naq laj Alma kixye li aatin a’in, kimemo’ laj Korihor, jo’kan naq ink’a’ kiru chi aatinak, jo’ chanru li raatin laj Alma.

51 Ut naq kiril a’in li xb’eenil aj raqol aatin, kixye’ li ruq’ ut kitz’iib’ak chiru laj Korihor, ut kixye: Ma q’unb’esinb’il chik aach’ool chirix lix wankil li Dios? Ani aj-ik’in xawaj naq laj Alma tixk’ut lix eetalil? Ma xawaj naq tixrahob’tesi jalaneb’ chik, re xk’utb’al jun li eetalil chawu? K’e reetal, a’an xk’ut jun li eetalil chawu; anajwan ut ma toj tatwech’oq?

52 Ut laj Korihor kixye’ li ruq’ ut kitz’iib’ak, ut kixye: Ninnaw naq memin, xb’aan naq ink’a’ ninru chi aatinak; ut ninnaw naq maak’a’ chik wan, ka’ajwi’ lix wankil li Dios li kiru chixk’amb’al a’in sa’ inb’een; relik chi yaal, ut junelik xinnaw naq wan jun li Dios.

53 A’b’an k’ehomaq reetal, laj tza kinixb’alaq’i; xb’aan naq a’an kixk’ut rib’ chiwu sa’ xxaqalil jun li anjel, ut kixye we: Ayu ut k’ameb’ wi’chik li tenamit a’in, xb’aan naq chixjunileb’ xe’xsach xb’eheb’ re xtaaqenkil jun li Dios moko nawb’il ta ru. Ut kixye we: maak’a’ jun li Dios; relik chi yaal, ut a’an kixk’ut chiwu li k’a’ru tinye. Ut xink’ut li raatin; ut kink’ut xb’aan naq nasahob’resin re li tz’ejwalejil k’a’uxlej; ut kink’ut toj reetal naq k’a’jo’ kin’usa, toj reetal naq kinpaab’ chi yaal naq yaal a’an; ut xb’aan a’in naq kinyal wu rik’in li yaal, toj reetal naq kink’am li nimla majewank a’in sa’ inb’een.

54 Anajwan chirix naq kixye a’in, kixtz’aama naq laj Alma taatijoq chiru li Dios, re naq taa’isiiq li majewank sa’ xb’een.

55 A’b’an laj Alma kixye re: Wi ta taa’isiiq li majewank a’in sa’ aab’een, tat-ok raj wi’chik chixjalb’ehinkil xch’ooleb’ li tenamit a’in, jo’kan naq taa’uxq aawe jo’ chanru ajwi’ naraj li Qaawa’.

56 Ut kik’ulman naq moko ki’isiik ta li majewank sa’ xb’een laj Korihor; a’an ki’isiik chaq b’an, ut kib’eek sa’ li junjunq chi ochoch re xtz’aamankil xtib’el xwa.

57 Anajwan tikto kipuktesiman resil li k’a’ru kixk’ul chaq laj Korihor chiru chixjunil li ch’och’; relik chi yaal, kitaqlaak chi jek’imank li aatin xb’aan li xb’eenil aj raqol aatin reheb’ chixjunil li tenamit sa’ li ch’och’, re xch’olob’ankil chiruheb’ li ke’paab’ank chaq re li raatin laj Korihor naq tento te’xjal xk’a’uxl sa’ junpaat, maare anchal taachalq ajwi’ sa’ xb’eeneb’ a’an li raqb’a-aatin a’an.

58 Ut kik’ulman naq chixjunileb’ ke’q’unb’esiik xch’ool chirix lix maa’usilal laj Korihor; jo’kan naq chixjunileb’ ke’jale’ wi’chik xch’ool choq’ re li Qaawa’; ut rik’in a’an kiraqe’ li maa’usilal li wan jo’ chanru xna’leb’ laj Korihor. Ut laj Korihor xko’o sa’ li junjunq chi ochoch, re xtz’aamankil tzakemq, re taawanq k’a’ru taak’anjelaq re.

59 Ut kik’ulman, naq yoo chi xik sa’ xyanq li tenamit, relik chi yaal, sa’ xyanq jun tenamit li xjachomeb’ chaq rib’ rik’ineb’ laj Nefita ut aj Tzoramita ke’xye rib’, rik’in naq k’amb’ileb’ xb’e xb’aan jun li winq aj Tzoram xk’ab’a’—ut naq yoo chi xik sa’ xyanqeb’, k’ehomaq reetal, ke’alinak sa’ xb’een ut kiyeq’iik, toj reetal naq kamenaq.

60 Ut chi jo’kan naqil xraqik li ani napo’ok re lix b’e li Qaawa’; ut chi jo’kan naqil naq laj tza moko tixtenq’a ta li ralal xk’ajol sa’ roso’jik li kutan, chi seeb’ b’an naxkeloheb’ taq’a sa’ xb’alb’a.