1 O lenei sa oo ina ua mavae atu le iuga o Kori’oa, ma ua maua e Alema ni tala e faapea ua faapi’opi’o e sa Soramā ala o le Alii, ma e faapea o Sorama, o lē sa avea ma o latou ta’ita’i, o loo ia ta’ita’i atu loto o tagata ia ifo i lalo i tupua lē magagana, sa amata ona toe faagasegasea o lona loto ona o le amioletonu o le nuu.

2 Ona sa avea ma pogai o le faanoanoa tele o Alema le iloa e uiga i le amioletonu i totonu o lona nuu; o lea sa faanoanoa tele ai lava lona loto, ona o le o ese atu o sa Soramā mai ia sa Nifaē.

3 O lenei sa faapotopoto faatasi e sa Soramā i latou lava i se laueleele sa latou ta’ua o Anetionuma, lea sa i le itu i sasae o le laueleele o Sara’emila, lea sa faalava toeitiiti ane tuaoi ma le matafaga, lea sa i le itu i saute o le laueleele o Seasona, lea sa tuaoi foi ma le vao i le itu i saute, le vao lea sa faatumulia i sa Lamanā.

4 O lenei sa popole tele sa Nifaē nei faia e sa Soramā se fesootaiga ma sa Lamanā, ma avea ai ma ala o se toesega tele o le vaega a sa Nifaē.

5 Ma o lenei, ona sa i ai i le talaiga o le upu se faamoemoega sili e ta’ita’i atu ai tagata ia latou faia le mea tonu—ioe, sa i ai sona aafiaga mamana sili atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faata’ita’ia le mana o le afioga a le Atua.

6 O lea na ia ave ai Amona, ma Arona, ma Ominea; ae o Himinae sa ia tuu i le ekalesia i Sara’emila; ae o le toatolu lea na ave muamua e ia, ma Amoleka foi ma Seseroma, o ē sa i Meleka; ma sa ia ave foi ni ona atalii e toalua.

7 O lenei sa ia le avea le ulumatua o ona atalii faatasi ma ia, ma o lona igoa o Helamana; ae o igoa o i la’ua o e na ia ave faatasi ma ia o Sepulona ma Korianetona; ma o igoa nei o i latou o ē na o atu faatasi ma ia i totonu o sa Soramā, e tala’i atu ia te i latou le upu.

8 O lenei o sa Soramā o ni tagata faatuiese mai sa Nifaē; o lea sa uma ai ona talai atu o le afioga a le Atua ia te i latou.

9 Peitai ua pa’u’ū atu i latou i sese tele lava, ona sa latou le tausisi e tausi poloaiga a le Atua, ma ana tulafono, e tusa ma le tulafono a Mose.

10 Pe sa latou fia tausia foi tu o le ekalesia, ia tatalo ma aioi atu i le Atua e le aunoa i aso taitasi, ina ia latou le ulu atu i faaosoosoga.

11 Ioe, i se aotelega, sa latou faapi’opi’o ala o le Alii i le tele o taimi; o lea, ona o lenei pogai, na o atu ai Alema ma ona uso i le laueleele e tala’i atu le upu ia te i latou.

12 O lenei, ina ua latou oo atu i le laueleele, faauta, i lo latou ofo tele, sa latou maua atu ua fausia e sa Soramā o sunako, ma ua latou faapotopoto faatasi i latou lava i se aso e tasi o le vaiaso, o se aso lea sa latou ta’ua o se aso o le Alii; ma sa latou tapuai atu i se ala sa le’i vaai muamua lava i ai Alema ma ona uso;

13 Ona sa latou fausia se mea i le totonugalemu o lo latou sunako, o se mea e tutū ai, lea sa maualuga a’e i luga o le ulu; ma o ona luga sa na’o le toatasi le tagata e mafai ona ofi ai.

14 O lea, soo se tasi e fia tapuai atu, e ao ona alu atu ma tu i luga o lenei mea, ma faaloloa ona lima agai i le lagi, ma alaga ma se leo tele, e faapea:

15 Le Atua paia, paia e; ua matou talitonu o oe o le Atua, ma ua matou talitonu ua e paia; ma sa avea oe o se agaga, ma o oe o se agaga, ma o le a avea pea oe o se agaga e faavavau.

16 Le Atua paia e, matou te talitonu o oe na e vavaeeseina i matou mai i o matou uso; ma ua matou le talitonu i uputuu a o matou uso, ia sa tuulima faasolo mai i lalo ia te i latou i manatu faatamaiti o o latou tamā; ae ua matou talitonu ua e filifilia i matou e avea ma au fanau paia; ma ua e faailoa mai foi ia te i matou o le a leai se Keriso.

17 Ae tumau pea lau afio o ananafi, o le asō, ma le faavavau; ma ua e filifilia i matou, ina ia faaolaina ai i matou; e ui o i latou uma ua siomia i matou ua filifilia e lafoaiina ifo e lou toasa i seoli; mo lenei paia, le Atua e, matou te faafetai atu ia te oe; ma e matou te faafetai atu foi ia te oe ua e filifilia i matou, ina ia le mafai ona ta’ita’i ese atu i matou e mulimuli i uputuu valea a o matou uso, ia ua saisaitia ai i latou i lalo i se talitonuga ia Keriso, lea ua taitai atu o latou loto e o ese mamao mai ia te oe, lo matou Atua.

18 Ma e matou te toe faafetai atu ia te oe, le Atua e, ona ua avea i matou o se nuu filifilia ma paia. Amene.

19 O lenei sa oo ina ua uma ona faalogo atu o Alema ma ona uso ma ona atalii i nei tatalo, sa le mafuatiaina lo latou ofo tele.

20 Aua faauta, sa o atu tagata taitoatasi uma ma ofo atu nei lava tatalo e tasi.

21 O lenei o lea mea sa ta’ua e i latou o Rameutoma, o se mea, a faaliliuina, o le pulelaa paia.

22 O lenei, mai lenei pulelaa, sa latou avae ai, e tagata taitoatasi, le tatalo lava lea e tasi i le Atua, e faafetai atu ai i lo latou Atua ua ia filifilia i latou, ma ona sa ia le ta’ita’ieseina atu i latou ia latou mulimuli i uputuu a o latou uso, ma ona ua le aveesea atu o latou loto ia talitonu i mea o le a oo mai, o mea ia sa latou le iloa se mea e uiga i ai.

23 O lenei, ina ua uma ona avatu e tagata uma le faafetai i lenei ala, sa latou foi atu i o latou fale, e le toe tautatala lava e uiga i lo latou Atua seia oo ina latou toe faapotopoto faatasi i latou lava i le pulelaa paia, e avatu le faafetai e tusa ma la latou ala.

24 O lenei ina ua vaai atu Alema i lenei mea, sa faanoanoa lava lona loto; ona sa ia vaai o i latou o se nuu amioleaga ma le faapi’opi’o; ioe, sa ia vaai ua pupū o latou loto i le auro, ma le ario, ma oloa eseese uma.

25 Ioe, ma sa vaai atu foi o ia ua faaneeneeina o latou loto i le mitamitavale tele, i lo latou faamaualuluga.

26 Ma sa ia sii ae lona leo i le lagi, ma aioi, ua faapea atu: E, o le a ea le umi, Le Alii e, e te tuu ai au auauna ia nonofo i lalo nei i la le tino, e vaai i le amioleaga tele faapea i totonu o le fanauga a tagata?

27 Faauta, Le Atua e, ua latou tagi atu ia te oe, ae ua faatumuina o latou loto i lo latou faamaualuluga. Faauta, Le Atua e, ua latou tagi atu ia te oe i o latou gutu, ae ua latou fefete a’e, ua oo ina tele lava, i mea lē aoga o le lalolagi.

28 Faauta, lo’u Atua e, i o latou ofu taugata, ma a latou mama, ma o latou taulima, ma a latou mea teuteu auro, ma a latou mea taua uma ia ua latou teuteuina ai i latou lava; ma faauta, ua pupū atu o latou loto i ia mea, ae ua latou tagi atu ia te oe ma fai mai—matou te faafetai atu ia te oe, le Atua e, ona o i matou o se nuu ua filifilia mo oe, a’o isi o le a fano.

29 Ioe, ma ua latou fai mai ua e faailoa mai ia te i latou e faapea o le a leai se Keriso.

30 Le Alii e le Atua, o le a le umi e te tuu ai ia i ai pea lena amioleaga ma le le faamaoni i totonu o lenei nuu? Le Alii e, sei e tuu mai ia te a’u le malosi, ia mafai ai ona ou onosa’ia o’u vaivaiga. Ona ua ou vaivai, ma o amioleaga faapea ua i totonu o lenei nuu, ua tiga ai lo’u agaga.

31 Le Alii e, ua faanoanoa tele lo’u loto; se’i e faamafanafanaina lo’u agaga ia Keriso. Le Alii e, se’i e tuu mai ia te a’u ina ia mafai ona ou maua le malosi, ina ia mafai ona ou talia ma le onosai nei puapuaga o le a oo mai i o’u luga, ona o le amioletonu o lenei nuu.

32 Le Alii e, se’i e faamafanafanaina lo’u agaga, ma tuu mai ia te a’u le manuia, ma o’u uso-a-faigaluega foi o e ua faatasi ma a’u—ioe, o Amona, ma Arona, ma Ominea, ma Amoleka foi ma Seseroma, ma o’u atalii foi e toalua—ioe, e oo ia i latou uma nei se’i e faamafanafanaina, le Alii e. Ioe, se’i e faamafanafanaina o latou agaga ia Keriso.

33 Se’i e tuu mai ia te i latou ia mafai ona latou maua le malosi, ina ia mafai ona latou onosaia o latou puapuaga ia o le a oo mai i o latou luga ona o amioletonu a lenei nuu.

34 Le Alii e, se’i e tuu mai ia te i matou ia mafai ona matou maua le manuia i le toe aumai o i latou ia te oe, ia Keriso.

35 Faauta, Le Alii e, ua pele lava o latou agaga, ma o le toatele o i latou o o matou uso; o lea, tuu mai ia te i matou, Le Alii e, le mana ma le poto ina ia mafai ona matou toe aumai i latou nei, o o matou uso, ia te oe.

36 O lenei sa oo ina ua uma ona fai atu e Alema o nei upu, sa pati e ia ona lima i luga o i latou uma o ē sa faatasi ma ia. Ma faauta, ina ua pati e ia ona lima i luga o i latou, sa faatumulia i latou i le Agaga Paia.

37 Ma ina ua mavae lea sa latou taapeape ese o le tasi mai le isi, e aunoa ma se manatu mo i latou lava po o a mea o le a latou aai ai, po o a mea o le a latou feinu ai, po o a mea o le a latou o’ofu ai.

38 Ma sa faia e le Alii mea mo i latou ina ia latou le fia aai, pe ina ia latou le fia feinu; ioe, ma sa ia tuu mai foi ia te i latou le malosi, ina ia latou le mafatia i soo se ituaiga o puapuaga, vagana ai ua faatumuina i le olioli ia Keriso. O lenei sa faia lava lenei mea e tusa ai ma le tatalo a Alema; ma sa faia lenei mea ona sa tatalo atu o ia i le faatuatua.