1 Ko ʻeni, naʻe hoko ʻo pehē ʻi he fakaʻosi ʻe ʻAmuleki ʻa e ngaahi lea ní, naʻa nau ʻalu atu mei he fuʻu kakaí ʻo nau haʻu ki he fonua ko Selesoní.

2 ʻIo, pea hili hono malanga ʻaki ʻa e folofolá ki he kau Sōlamí, ʻe hono toe ʻo e kāingá, naʻa nau haʻu foki ki he fonua ko Selesoní.

3 Pea naʻe hoko ʻo pehē ʻi he hili ʻa e fealeaʻaki ʻa e kau Sōlami tuʻu-ki-muʻa tahá ʻo kau ki he ngaahi lea kuo malanga ʻaki kiate kinautolú, naʻa nau ʻita koeʻuhi ko e folofolá, he naʻe fakaʻauha ʻe ia ʻa ʻenau ngāué; ko ia naʻe ʻikai te nau fie tokanga ki he ngaahi folofolá.

4 Pea naʻa nau fekau atu ki hono kotoa ʻo e fonuá ke fakataha mai ʻa e kakai kotoa pē, ʻo nau fealeaʻaki mo kinautolu ʻo kau ki he ngaahi lea kuo lea ʻakí.

5 Ko ʻeni naʻe ʻikai ke tuku ʻe honau kau pulé, mo honau kau taulaʻeikí, mo honau kau akonakí ke ʻilo ʻe he kakaí ʻo kau ki heʻenau ngaahi holí; ko ia naʻa nau ʻeke fakafufū ke ʻiloʻi ʻa e fakakaukau ʻa e kakai kotoa pē.

6 Pea naʻe hoko ʻo pehē ʻi he hili ʻenau ʻiloʻi ʻa e fakakaukau ʻa e kakai kotoa pē, naʻe kapusi ki tuʻa mei he fonuá ʻa e faʻahinga naʻe loto-fiemālie ki he ngaahi lea kuo fai ʻe ʻAlamā mo hono kāingá; pea naʻa nau tokolahi; pea naʻa nau haʻu foki ki he fonua ko Selesoní.

7 Pea naʻe hoko ʻo pehē naʻe tokoni ʻa ʻAlamā mo hono kāingá kiate kinautolu.

8 Ko ʻeni naʻe ʻita ʻa e kakai ʻo e kau Sōlamí ki he kakai ʻo ʻĀmoní ʻa ia naʻe ʻi Selesoní, pea ko e pule lahi ʻo e kau Sōlamí, koeʻuhi ko ha tangata angakovi ʻaupito ia, naʻá ne fekau atu ki he kakai ʻo ʻĀmoní ke nau kapusi ki tuʻa mei honau fonuá ʻa e faʻahinga kotoa pē kuo mavahe atu meiate kinautolu ki honau fonuá.

9 Pea naʻá ne fai atu ha ngaahi lea fakamanamana lahi kiate kinautolu. Pea ko ʻeni naʻe ʻikai manavahē ʻa e kakai ʻo ʻĀmoní ki heʻenau ngaahi leá; ko ia naʻe ʻikai te nau kapusi ki tuʻa ʻa kinautolu, ka nau tali pē ʻa e kau masiva kotoa pē ʻo e kau Sōlamí ʻa ia naʻe haʻu kiate kinautolú; pea naʻa nau fafanga ʻa kinautolu, mo fakakofu ʻa kinautolu, pea nau ʻoange kiate kinautolu ha ngaahi konga kelekele ke hoko ko honau tofiʻa; pea naʻa nau tokoni kiate kinautolu ʻo fakatatau mo ʻenau ngaahi fiemaʻú.

10 Ko ʻeni naʻe ueʻi hake ʻe he meʻá ni ʻa e kau Sōlamí ke nau ʻita ki he kakai ʻo ʻĀmoní, pea naʻa nau kamata ke fetuʻutaki mo e kau Leimaná, ʻo nau ueʻi hake mo kinautolu foki ke nau ʻita kiate kinautolu.

11 Pea ko ia naʻe kamata ke fai ʻe he kau Sōlamí mo e kau Leimaná ha ngaahi teuteu ki he tau mo e kakai ʻo ʻĀmoní, pea mo e kau Nīfaí foki.

12 Pea naʻe ʻosi pehē ʻa e taʻu hono hongofulu mā fitu ʻo e pule ʻa e kau fakamāú ki he kakai ʻo Nīfaí.

13 Pea naʻe ʻalu atu ʻa e kakai ʻo ʻĀmoní mei he fonua ko Selesoní, ʻo nau haʻu ki he fonua ko Mīlekí, ʻo fakaʻataʻatā ha potu ʻi he fonua ko Selesoní ki he ngaahi kau tau ʻa e kau Nīfaí, koeʻuhi ke nau tau mo e ngaahi kau tau ʻa e kau Leimaná mo e ngaahi kau tau ʻa e kau Sōlamí; pea naʻe kamata pehē ha tau ʻi he vahaʻa ʻo e kau Leimaná mo e kau Nīfaí ʻi hono hongofulu mā valu ʻo e taʻu ʻo e pule ʻa e kau fakamāú; pea ʻe fai ha fakamatala ki heʻenau ngaahi taú ʻamui.

14 Pea ko ʻAlamā, mo ʻĀmoni, mo hona kāingá, kae ʻumaʻā foki mo e ongo foha ʻo ʻAlamaá naʻa nau foki atu ki he fonua ko Seilahemalá, hili ʻenau hoko ko ha ngaahi meʻangāue ʻi he toʻukupu ʻo e ʻOtuá ke ʻomi ʻa e tokolahi ʻo e kau Sōlamí ki he fakatomalá; pea ʻilonga ʻa kinautolu ʻa ia naʻe ʻomi ki he fakatomalá, naʻe kapusi ki tuʻa ʻa kinautolu mei honau fonuá; ka ʻoku nau maʻu ha ngaahi fonua ke hoko ko honau tofiʻa ʻi he fonua ko Selesoní, pea kuo nau toʻo mahafu ke maluʻi ʻa kinautolu, mo honau ngaahi uaifí, mo ʻenau fānaú, mo honau ngaahi fonuá.

15 Ko ʻeni ko ʻAlamā, naʻá ne loto-mamahi lahi ko e tupu ʻi he fai hia ʻa hono kakaí, ʻio koeʻuhi ko e ngaahi taú, mo e lilingi totó, mo e ngaahi fakakikihi ʻa ia naʻe ʻiate kinautolú; pea koeʻuhi ko ʻene ʻalu ke malanga ʻaki ʻa e folofolá, pe ko hono fekauʻi atu ke malanga ʻaki ʻa e folofolá, ʻi he kakai kotoa pē ʻi he kolo kotoa pē; pea ʻi heʻene vakai kuo fakaʻau ke fefeka ʻa e loto ʻo e kakaí, pea naʻa nau kamata ke ʻita koeʻuhi ko e fefeka ʻo e folofolá, ko ia naʻe fuʻu mamahi lahi ai ʻa hono lotó.

16 Ko ia, naʻá ne fekau ke fakataha mai ʻa hono ngaahi fohá, koeʻuhi ke ne tuku kiate kinautolu taki taha ʻa ʻene enginakí, ʻi he ngaahi meʻa ʻoku kau ki he māʻoniʻoní. Pea ʻoku mau maʻu ha fakamatala ki heʻene ngaahi fekaú, ʻa ia naʻá ne fai kiate kinautolu ʻo fakatatau mo ʻene lekooti ʻaʻaná.