1 Kʼad shiyeʼ, tʼáadoo leʼé łaʼ tʼah bee nił nááhodeeshnih; háálá daneeznánígíí náádidoojahígíí éí baa níniʼgo baa ákonisin.

2 Jó, ándishní, nááʼdiijeeh éí adin—éí doodago, kótʼáo ááłdishní, díí kʼad atsʼíískʼeh iinánígíí éí doo hoolʼáágóó hináago yiih ńdoodáał da, díí atsʼíís dííłdzidígíí éí doo hoolʼáágóó hólǫ́ǫgo yiih ńdoodáał da—Christ níyáádóó índa.

3 Jó, bí éí daneeznánígíí nááhiiʼnáago íidoolííł. Jó ndi, shiyeʼ, nááʼdiijeeh éí tʼah doo baa hoolzhíish da. Kʼad, Diyin God tʼéiyá bił bééhózinii łaʼ nił ííshją́ą́ áshłééh; ákótʼée ndi, tʼóó ahayóí Diyin God tʼéiyá bił bééhózin, tʼáá aaníinii hólǫ́ dóó baa áháyą́, diné éí doo bił bééhóziní da. Ndi łaʼ Diyin God tʼáá íiyisíí binabídéełkidígíí nił ííshją́ą́ áshłééh—díí éí nááʼdiijeeh bídéétʼiʼ.

4 Jó, tʼáá ałtso daneeznánígíí náádidoojah baa hoolzhíishgo bá nihootʼą́. Kʼad díí beidoołkáłígíí doo bił bééhóziní da; ndi Diyin God éí nihootʼánígíí bił bééhózin.

5 Kʼad, tʼááłáʼí góne, éí doodago naaki góneʼ, éí doodago tááʼ góneʼ daatsʼí, diné náádidoojahígíí, éí doo bíhólníih da, háálá Diyin God éí tʼáá ałtsoní bił bééhózin; dóó tʼóó ákóhodooníłígíí shił bééhózingo éí shił tʼáá áko—diné tʼáá ałtso anoonééłdę́ę́ʼ náádidoojahígíí bee nihootʼą́.

6 Kʼad anoonééł dóó nááʼdiijeeh bitaʼgi hazʼą́ągo biniiyéii hólǫ́ǫ dooleeł.

7 Dóó kʼad ándishní diné bitsʼíís dóó biyiʼsizíiniishąʼ éí haitʼįįh anoonééł dóó nááʼdiijeeh bitaʼgi?

8 Kʼad tʼááłáhádi daatsʼí diné náádidoojahgo bee nihootʼą́ągo éí doo bíhólníih da; háálá doo tʼáá ahąąh dazhninée da, díí éí doo bíhólníih da; tʼáá ałtso oolkiłígíí éí Diyin God tʼááłaʼajį́ bił nahalin, dóó diné tʼéiyá oolkiłígíí yikʼehgo naaghá.

9 Éí bąą, diné tʼáá ałtso daneeznánę́ę náádidoojahgo bee bá nihootʼą́; dóó anoonééł dóó nááʼdiijeeh bitaʼgi éí hazʼą́. Dóó kʼad, díí hazʼánígi, diné bitsʼíís dóó biyiʼsizíinii lá haitʼįįh nisingo tʼáá íiyisíí Bóhólníihii binabídéełkid; dóó díí éí shił bééhoozin.

10 Dóó baa hodoolzhish diné tʼáá ałtso náádidoojah, índa bił béédahodoozįįł éí Diyin God diné bá nihootʼánígíí tʼáá íídą́ą́ʼ bił bééhózinígíí.

11 Kʼad, éí anoonééł dóó nááʼdiijeeh bitaʼgi diné bitsʼíís dóó biyiʼsizíinii haitʼįįhígíí baa hashneʼ—Jó, diyin yá naalʼaʼii shił ííshją́ą́ áyiilaa, diné tʼáá ałtso biiʼsizíinii, tʼáá atsʼíís yiiʼ haagháhí, aooʼ, diné tʼáá ałtso biiʼsizíinii, łaʼ shį́į́ yáʼádaatʼééh dóó doo yáʼádaatʼéeh da ndi, hooghangóó anáhákááh Diyin God iiná baa yiizláhígíí yichʼįʼ anáhákááh.

12 Dóó índa baa hodoolzhish, yáʼátʼéehgo iiná ádayiilaa yę́ę biiʼsizíinii éí ił hózhǫ́ hazʼą́ągi doogááł, éí paradise hoolyé, hááʼáyį́įhgo hazʼą́, hodeezyeelgo hazʼą́, ákweʼé bichʼįʼ ndahwiiʼnánę́ę dóó tʼáá ałtso bidaʼdiiłʼáhą́ą dóó yikʼee yínííł ndaakai yę́ę, yitsʼą́ą́dóó háádadoolyįh.

13 Dóó índa baa hodoolzhish, éí doo yáʼátʼéehgo dahinánę́ę biiʼsizíinii, aooʼ, diné doo yáʼádajíshónę́ę—jó háálá, éí azhą́ áłtsʼíísí ndi doo Bóhólníihii biiʼSizíinii bił dahólǫ́ǫ da; jó háálá, doo yáʼáshóoniikʼeh ndaʼanishii ńdeidiilá yáʼátʼéehii éí ndagaʼ; éí bąą chʼį́įdii beʼiiníziinii biiʼsizíinii éí biih ahaaskai, dóó bighan ádaahoolaa—dóó díí éí tłʼóóʼgóó chahałheeł biyiʼ góneʼ ahoʼdínóolkał; éí cha hááʼáádóó, dóó ayóó íitsʼaʼgo daʼacha, dóó awooʼ ahídazhdikʼaash dooleeł, dóó díí éí tʼáá bí bibąąhági ádaatʼéii biniinaa, díí éí chʼį́įdii beʼiiníziinii dahałnaah dóó ndahalóozgo.

14 Kʼad díigi átʼáo doo yáʼádaatʼéehii bitsʼíís dóó biyiʼsizíinii bił nahazʼą́ą dooleeł, aooʼ, chahałheeł éí yiiʼ dahólǫ́, dóó tʼóó bił ádahayóígo, Diyin God bá háchįʼ bikʼee bił dahóyéeʼgo yíká dadéezʼį́į́ʼ; ákótʼáo díí bił nahazʼą́ą dooleeł, áádóó kéyah hózhǫ́ǫdi tʼáá ákótʼéego deíkáahii éí bił hazʼą́ągo, nááʼdiijeehjįʼ ahodoolzhish.

15 Kʼad, łaʼ atsʼíís dóó ayiʼsizíinii hózhǫ́ǫdi dahólǫ́ dóó náánáłaʼ éí doo yáʼáhootʼéehdi dahólǫ́, tʼah doo nááʼdiijeehgóó, éí áłtsé náázhdiijeehígíí átʼé danízin. Aooʼ, tʼáá shį́į́ aaníí nááʼdiijeeh bee yídóojiiłii átʼé, iiʼsizíinii éí doodago atsʼíís dóó ayiʼsizíinii ił hózhǫ́ǫjįʼ éí doodago doo ił hózhǫ́ǫ́jígo bidaʼiiłníhígíí, saad bee shił hóóneʼígíí bikʼehgo.

16 Jó áádóó, ánáádooʼniid, áłtsé nááʼdiijeehígíí hólǫ́, tʼáá ałtso hiná ńtʼę́ʼígíí, dóó kʼad hinánígíí dóó dahináa dooleełígíí éí náádidoojahgo, ńléí Christ daaztsą́ dóó náádiidzáajįʼ.

17 Kʼad, díí áłtsé nááʼdiijeeh, haʼníigo baa haneʼígíí, éí doo éí atsʼíís dóó ayiʼsizį́įjįʼ índa doo ił hózhǫ́ǫjįʼ éí doo áháʼníi da. Kótʼéego baa ntsídoohkees lágo.

18 Jó, Ndagaʼ, nihidishní; ndi díí éí áháʼní, Adam bił hoolzhish dóó wóshdę́ę́ʼ Christ náádiidzáajįʼ, diné biiʼsizíinii bitsʼíís yił ahiih náheeskaigo óolyé.

19 Kʼad, díí iiʼnaazíinii dóó atsʼíís baa hóóneʼígíí daatsʼí tʼáá ałtso tʼáá hooshchʼįʼ náádidoojah, diné doo yáʼátʼéehii dóó diné yáʼátʼéehii, éí doo ádíshníi da; bíniʼdii ndi, tʼáá ałtso éí náádidoojah dishní; éí doodago kótʼéegodóʼ, Christ náádiidzáhígíí bikééʼdę́ę́ʼ daneeznánígíí náádiijeehígíí tʼáá bítséedi díí náádidoojah.

20 Kʼad, shiyeʼ, doo éí Christ náádiidzáadi díí náádidoojah dishníi da; jó ndi, shí baa ntséskeesígíí éí kótʼé díí, yáʼátʼéehgo dahináanii, biiʼsizíinii dóó bitsʼíís ahiih náhidookah, Christ náádiidzáadi, dóó yáʼąąshgóó nádzáago.

21 Ndi náádiidzáadi daatsʼí éí doodago bikééʼdę́ę́ʼ, éí doo ádíshníi da; ndi kóníłtsogo éí baa hashneʼ, anoonééł dóó atsʼíís bee nááʼdiijeehjįʼ bitaʼgi hazʼą́, atsʼíís dóó iiʼsizíinii ił hózhǫ́ éí doodago doo ił hózhǫ́ǫdi hólǫ́ dooleeł Diyin God daneeznánígíí náádidoojahgo yee nihoníʼą́ąjįʼ, dóó ahiih náhidookah, iiʼnaazíinii dóó atsʼíís, dóó Diyin God bidááhdóó ndahidoodlóós, dóó binaanishę́ę bikʼehgo bá ndahodiyootʼááł.

22 Aooʼ, díí binahjįʼ tʼáá ałtso tʼáadoo leʼé Diyin God yá dahalneʼii yee dahaadzíʼę́ę nínáádahidoolyééł.

23 Iiʼsizíinii atsʼíís bee háádidoolnííł, dóó atsʼíís iiʼsizíinii bee háádidoolnííł; aooʼ, tʼáá ałtso ałtsʼádaazʼaʼí dóó ahadaditʼánígíí atsʼíís bee háádidoolnííł; aooʼ, azhą́ atsiighá ndi doo łaʼ yóó adoodił da; ndi tʼáá ałtso tsʼídá nizhónígo háádadidooʼnííł.

24 Dóó kʼad, shiyeʼ, díí éí nááʼdiijeeʼ daaníigo Diyin God yá dahalneʼę́ę yee dahaadzíʼę́ę átʼé—

25 Dóó índa diné yáʼátʼéehgo dahináanii Diyin God bił hazʼą́ądi bitsʼádaʼdeezdíin doo.

26 Jó ndi, anoonééł tʼóó baaʼihgo bąąhági ádajítʼéhę́ę hakʼíidooldoh, háálá tʼáá ałtso yáʼátʼéehii yitsʼą́ą́jígo ádin ndahaleeh; háálá bąąhági átʼéii hąąh dahólǫ́, dóó bąąhági átʼéii bąąh hólónígíí éí doo łaʼ Diyin God bił hazʼą́ą góneʼ yah adoogáał da; ndi éí nahjįʼ kódaalneʼ, dóó éí binaanish éí doodago bindaʼanish ádayiilaa yę́ę tʼáá éí bineestʼąʼ bichʼįʼ kódadoolnííł, éí éí doo yáʼáshóonii ńtʼę́ę́ʼ; dóó tsʼídá bitłʼáahdi baaʼih yę́ę díchʼíiʼgo dazhdoodlį́į́ł.