1 O lenei, lo’u atalii e, o ni isi lava nei o mea e tele ou te fia fai atu ai ia te oe; ona ua ou vaai ua popole lou mafaufau e uiga i le toetutū mai o e ua oti.

2 Faauta, ou te fai atu ia te oe, e leai se toetutū—pe, ou te faapea atu, i ni isi upu, o lenei tino faaletino e le faaofuina i le tino ola pea, o lenei tino lē atoatoa e lē faaofuina i le tino atoatoa—seia mavae le afio mai o Keriso.

3 Faauta, e faataunuu e ia le toetutū mai o e ua oti. Peitai faauta, lo’u atalii e, e lei oo mai le toetutū. O lenei, ou te fofola atu ia te oe se mealilo; ae ui i lea, e tele mealilo ua taofia, e leai se tasi na te iloaina vagana ai le Atua lava ia. Ae ou te faailoa atu ia te oe se mea e tasi sa ou ole atu ai ma le filigā i le Atua, ina ia mafai ona ou iloaina—o lena mea e faatatau i le toetutū.

4 Faauta, e i ai se taimi ua tuupoina o le a tutulai mai ai tagata uma mai le oti. O lenei o afea e oo mai ai lenei taimi e leai se tasi na te iloa; peitai ua silafia e le Atua le taimi ua tuupoina.

5 O lenei, pe o le a i ai se taimi e tasi, po o se taimi lona lua, po o se taimi lona tolu, o le a toetutū mai ai tagata mai le oti, ua le afaina; ona ua silafia e le Atua nei mea uma; ma ua lava ia te a’u le iloa o le tulaga lenei ua i ai—e i ai se taimi ua tuupoina e toetutū mai ai tagata uma mai le oti.

6 O lenei e tatau ona i ai se avanoa i le va o le taimi o le oti ma le taimi o le toetutū mai.

7 Ma o lenei ou te fia fesili o le a le mea e oo i agaga o tagata mai lenei taimi o le oti seia o’o i le taimi ua tuupoina mo le toetutū mai?

8 O lenei pe sili atu i le tasi le taimi ua tuupoina mo tagata e toetutū mai ai, ua le afaina lea; auā e le feoti tagata uma i le taimi e tasi, ma ua le afaina lea; o mea uma ua pei o se aso e tasi i le Atua, ma ua na’o le taimi e fuaina i tagata.

9 O lea, e i ai se taimi ua tuupoina mo tagata latou te tutula’i ai mai le oti; ma ua i ai se avanoa i le va o le taimi o le oti ma le toetutū mai. Ma o lenei, e faatatau i le va lea o le taimi, o le a le mea e o’o i agaga o tagata o le mea lena na ou ole atu ai i le Alii ma le filigā ia ou iloa; ma o le mea lenei ua ou iloa.

10 Ma pe a oo mai le taimi o le a toetutū mai tagata uma, ona latou iloa lea ua silafia e le Atua taimi uma ua tuupoina i le tagata.

11 O lenei, e faatatau i le tulaga o le agaga i le va o le oti ma le toetutū mai—Faauta, ua faailoa mai ia te a’u e se agelu, e faapea o agaga o tagata uma, o le taimi lava latou te tuua ai mai lenei tino faaletino, ioe, ia agaga o tagata uma, pe sa latou lelei pe sa leaga, e auina atu i lena Atua o le na ia tuuina ia te i latou le ola.

12 Ma ona o’o lea, o agaga o i latou o e ua amiotonu e talia i se nofoaga o le fiafia, lea ua ta’ua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa.

13 Ma ona o’o ai lea, o agaga o e ua amioleaga, ioe, o e ua leaga—auā faauta, ua latou le maua se vaega po o se mea itiiti o le Agaga o le Alii; auā faauta, sa latou filifili galuega leaga nai lo le lelei; o lea na ulu ai le agaga o le tiapolo i totonu o i latou, ma fai mona o latou fale—ma o i latou ia o le a tutuli ese atu i le pouliuli i fafo; o iina o le a i ai le taufaitagi, ma le tagiaue, ma le lilivau o nifo; ma o le pogai o lenei mea ona o lo latou lava amioletonu, ona sa ta’ita’i faatagataotauaina i latou e le loto o le tiapolo.

14 O lenei o le tulaga lenei o agaga o e ua amioleaga, ioe, i le pouliuli, ma o se tulaga o le leaga matautia tele o le faatalitali ma le matata’u i le toasa o le Atua pei o se afi mumu o le a oo mai i luga o i latou; ma e faapea ona latou i ai i lenei tulaga, faapea foi e ua amiotonu i le parataiso, seia oo i le taimi o lo latou toetutū mai.

15 O lenei, e i ai ni isi ua malamalama e faapea o lenei tulaga o le fiafia ma lenei tulaga o le pagatia o le agaga, a’o lei oo mai le toetutū, o le uluai toetutū lea. Ioe, ou te ioe atonu e mafai ona ta’ua o se toetutū, le faatuina mai lea o le agaga po o le tagata ma lo latou tofia i le fiafia po o le pagatia, e tusa ma upu ua fetalai i ai.

16 Ma faauta, ua toe fetalaia foi, e faapea ua i ai se uluai toetutū; o le toetutū mai lea o i latou uma o e na i ai, po o e o i ai, po o e o le a i ai, e oo mai lava i le toetū mai o Keriso mai le oti.

17 O lenei, tatou te le manatu faapea o lenei uluai toetutū, lea ua ta’ua mai i lenei ala, o le toetutū mai lea o tagata ma lo latou tofia i le fiafia po o le pagatia. E le mafai ona e manatu faapea o le uiga lena o lenei mea.

18 Faauta, ou te fai atu ia te oe, E leai; ae o lona uiga, o le toetuufaatasia lea o le agaga ma le tino o i latou mai i ona po o Atamu seia oo mai lava i le toetu o Keriso.

19 O lenei, pe toetuufaatasia i le taimi e tasi agaga ma tino o i latou o e ua ta’ua, o e ua amioleaga faapea foi ma e ua amiotonu, ou te le fai atu; ae ua lava ona ou fai atu, o le a latou tutū uma mai; po o i ni isi upu, o le a oo mai lo latou toetutū a’o le’i oo mai le toetutū o i latou o e ua maliliu pe a mavae le toetu mai o Keriso.

20 O lenei, lo’u atalii e, ou te le fai atu e o’o mai lo latou toetutū i le toetu mai o Keriso, ae faauta, ou te tuu atu o so’u manatu, o le a toetuufaatasia agaga ma tino, o e ua amiotonu, i le toetu mai o Keriso, ma lona afio a’e i le lagi.

21 Ae pe i lona toetu mai pe ina ua mavae atu, ou te le fai atu; ae o le tele lenei o se mea ou te fai atu, e faapea e i ai se avanoa i le va o le oti ma le toetu mai o le tino, ma se tulaga o le agaga i le fiafia po o le pagatia seia oo i le taimi ua tuupoina e le Atua e toetutū mai ai e ua oti, ma toetuufaatasia, o le agaga faapea ma le tino, ma aumai e tutula’i i luma o le Atua, ma faamasinoina e tusa ma a latou galuega.

22 Ioe, o lenei mea e faataunuu ai le toefuata’iina o mea na fetalai i ai fofoga o perofeta.

23 O le agaga o le a toefuata’ia i le tino, ma le tino i le agaga; ioe, ma o le a toefuata’ia vae ma lima ma sooga uma i lona tino; ioe, e oo i se lauulu o le ulu o le a le toesea lava; ae o le a toefuata’ia mea uma i o latou tino e tatau ai ma atoatoa.

24 Ma o lenei, lo’u atalii e, o le toefuataiga lenei lea na fetalai i ai fofoga o perofeta—

25 Ma ona susulu ai lea o e amiotonu i le malo o le Atua.

26 Ae faauta, e o’o mai se oti leaga matautia i luga o e ua amioleaga; ona e oti i latou e faatatau i mea tau i le amiotonu; ona ua latou le mamā, ma e leai se mea lē mamā e mafai ona mautofi i le malo o le Atua; ae e tutuli ese i latou i fafo, ma tofia e aai i fua o a latou mea na fai po o a latou galuega, ia sa leaga; ma latou inuina ’alu o se ipu oona.