1 Dóó kʼad, shiyeʼ, díí náádidoojahígíí bídéétʼiʼgo baa hóóneʼę́ę łaʼ baa hanáádeesdzih; jó háálá, diné łaʼ Diyin God bizaad ánínígíí ndeizgiz, dóó díí biniinaa yóó aheeskai. Dóó ni ałdóʼ díí tʼáá íiyisíí baa ntsíníkeesgo baa ákonisin. Jó ndi, díí bee nił hodeeshnih.

2 Ándishní, shiyeʼ, nááʼdiijeehgo hootʼáłígíí éí Diyin God bitʼáá ákogi átʼéego hootʼáłígíí éí tsʼídá yee hazʼą́; háálá éí tsʼídá bee hazʼą́ díí tʼáá ałtsoní tʼáá ádaatʼéhę́ęgi átʼéego háádadidoolníłígíí. Jó, díí bee hazʼą́ dóó tʼáá ákótʼé, Christ binááʼdiijeeh dóó bibee adziilii bikʼehgo, diné biiʼsizíinii éí bitsʼíís bee háádidoolnííł, dóó tʼáá ałtso atsʼíís bee hadítʼéhę́ę bee háádidoolnííł.

3 Dóó diné binaanish bikʼehgo bá ndahwiidootʼáłígíí éí bee hazʼą́ Diyin God tʼáá ákogi átʼéego bohootʼááłjí; dóó binaanish díí iiná biyiʼ yáʼátʼéehgo, dóó bijéí biyiʼdóó yáʼátʼéehii deinízingo, áko éí ałdóʼ, níiníłką́ągo, yáʼátʼéehii biyiʼjįʼ kóńdoolnííł.

4 Dóó binaanish doo yáʼátʼééhgóó éí doo yáʼátʼéehii ádayiilaaígíí bikʼehgo doo yáʼátʼéehigi bił ádahodoonííł. Éí bąą, tʼáá ałtsoní tʼáá átʼéhę́ęgi átʼéego hashtʼéédadoolnííł, tʼáá ałtsoní hadadítʼéhę́ęgi átʼéego—daninéhę́ę éí doo daninée da dooleeł, dadííłdzidę́ę éí doo dadííłdzidgo áńdadoolnííł—hoolʼáágóó ił hózhóonii yichʼįʼ ńdidoojah dóó Diyin God bił hazʼą́ądi deidoołbįįł, éí doodago hoolʼáágóó doo ił hózhǫ́ǫdi chʼį́įdii beʼiiníziinii bił hazʼą́ądi deidoołbįįł, łaʼ yáʼátʼééh, łahjigo éí doo yáʼátʼéehii.

5 Łaʼ ił hózhǫ́ǫ́jígo náádidoodááł ił hózhóonii yinízinígíí bikʼehgo, éí doodago yáʼátʼééhjígo yáʼátʼéehii yinízinígíí bikʼehgo; dóó łaʼ doo yáʼátʼééhjígo náádidoodááł doo yáʼátʼéehii yinízinígíí bikʼehgo; háálá éí diné doo yáʼátʼéehii ííłʼį́įgo áyósingo beʼiinaʼ áyiilaago áko índa chahóółhéelgo doo yáʼátʼéehii yidoołbįįł.

6 Dóó łahjigo ałdóʼ tʼáá ákótʼé. Bibąąhági ádaatʼéii áyiilaahą́ą yaa náʼoozkango dóó beʼiinaʼ łahgo ánáyiidlaago, dóó tʼáá ákótʼéego honítʼiʼjí yinízingo ałtso iiná áyiilaajįʼ, áko índa éí yáʼátʼéehgo honítʼiʼígíí yidoołbįįł.

7 Diné díigi ádaatʼéii éí Bóhólníihii yá nináʼnídlá; aooʼ, díí éí bitsʼádooʼnił, chahałheełdę́ę́ʼ doo ninítʼiʼii bitsʼą́ą́dóó yisdádootʼish; dóó ákótʼáo łaʼ naazį́ nááná łaʼ éí naaʼandééh; jó háálá, tʼáá bí ádá ndahwiitʼaah, yáʼátʼéhígíí éí doodago doo yáʼátʼéhígíí deinízinígíí bikʼehgo.

8 Kʼad, Diyin God bibeehazʼáanii yee haadzíiʼii éí doo łahgo ánálnéeh da; éí bąą, tʼáá íídą́ą́ʼ hashtʼeelyaa tʼáá háiida éí atiin yikááʼ yigáłígíí éí yisdádoogáałgo.

9 Jó dóó kʼad, shiyeʼ, tʼáá łáhádi ákónáánáóʼneʼ lágo niDiyin God łahdóó binaʼnitin, kʼíinítiʼgo bąąhági íínídzaa.

10 Díí nááʼdiijeeh baa hóóneʼígíí biniinaa, tʼáadoo bąąhági átʼéii ił hózhǫ́ǫjįʼ hazʼą́ąjįʼ náádidoojah danohsin. Jó, ánihidishní, doo yáʼátʼéehii éí tsʼídá doo ił hózhǫ́ bitsʼą́ą́dę́ę́ʼ ńdidoolyéeł da.

11 Dóó kʼad, shiyeʼ, tʼáá ałtso diné éí tʼah doo yisdánáʼníiłgo bił nahazʼánígíí, éí doodago ádíshní, anoonééł bídadéétʼiʼgo bił nahazʼą́, éí éí tsʼídá tʼáá íiyisíí doo yáʼátʼéehii biiʼ dahojílǫ́ dóó bąąhági átʼéii dahótąʼ; éí éí díí nahasdzáán bikáaʼgi Diyin God tʼáá gééd, dóó Diyin God yitsʼą́ą́jí deeskai; éí bąą, ił hózhǫ́ǫ yítsʼą́ąji deeskai.

12 Jó dóó kʼad, nááʼdiijeeh haʼnínígíí daatsʼí tʼáadoo leʼé doo yisdáhaaʼnííłgóó bił hazʼą́ągo bitsʼą́ą́jígo náánáłaʼ hazʼą́ą́jí ádoolnííł, éí doodago kʼad átʼéhígíí daatsʼí bitsʼą́ąjigo átʼéhígíí bił hazʼą́ągo ádoolnííł?

13 O, shiyeʼ, díí éí doo ákótʼée da; ákondi saad nááʼdiijeeh haʼnínígíí éí tʼáá átʼéhę́ęgi átʼéego háádadilneʼ, doo yáʼáshǫ́hę́ę tʼahdii doo yáʼáshǫ́ǫ́góó dooleeł, éí doodago atsʼíískʼehgo ntsékeesę́ę tʼahdii atsʼíískʼehgo ntsékees, éí doodago chʼį́įdii beʼiiníziinii nahalinę́ę tʼahdii chʼį́įdii beʼiiníziinii nahalin dooleeł—yáʼátʼéehii tʼahdii yáʼátʼééh dooleeł; tʼáá ákogi átʼéii yę́ę tʼahdii tʼáá ákogi átʼéii dooleeł; tʼáá ákogi átʼáo yę́ę tʼahdii tʼáá ákogi átʼáo dooleeł; ajoobaʼą́ą tʼahdii ajoobaʼ dooleeł.

14 Éí bąą, shiyeʼ, tʼáá ałtso diné baa jiiníbaʼ dooleeł; tʼáá ákogi átʼéego bił ndanilnish, tʼáá ákogi átʼééjígo nihojíʼaah, dóó áłahjįʼ yáʼátʼéehii baa naniná; dóó díí tʼáá ałtso áníłʼį́įgo áko yidííłbįįłígíí naa doolyééł; aooʼ, ajoobaʼ naa nínáádoolyééł, dóó tʼáá ákogi átʼéego ntsáhákees naa nínáádoolyééł; dóó yáʼátʼééhjígo ntsáhákees naa nínáádoolyééł; dóó yáʼátʼéehii nichʼįʼ nidoolyééł.

15 Háálá haitʼáo hinínánę́ę éí nichʼįʼ kóńdoolnííł, bee hadínítʼé ńdíídleeł; éí bąą, saad nááʼdiijeeh éí tʼóó yíwohdi bąąhági átʼéii yaa naagháhí yee bikʼijįʼ ńdoodleeł, dóó tsʼídá doo bíká ańdoolwoł da.