1 Pea ko ʻeni, ʻe hoku foha, ʻoku ou ʻilo ʻoku toe ʻi ai mo ha meʻa ʻe niʻihi ʻoku hohaʻa ki ai ho ʻatamaí, ʻa ia ʻoku ʻikai lava ke mahino kiate koe—ʻa ia ʻoku kau ki he fakamaau totonu ʻa e ʻOtuá ʻi hono tauteaʻi ʻo e tokotaha angahalá; he ʻokú ke feinga ke mahalo ʻoku taʻetotonu ke tuku ʻa e tokotaha angahalá ki ha tuʻunga ʻo e mamahi.

2 Ko ʻeni vakai, ʻe hoku foha, te u fakamatala ʻa e meʻá ni kiate koe. He vakai, naʻe hili leva hono fekau atu ʻe he ʻEiki ko e ʻOtuá ʻa ʻetau ʻuluaki ongo mātuʻá mei he ngoue ʻo ʻĪtení, ke na ngoueʻi ʻa e kelekele, ʻa ia naʻe toʻo ʻa kinaua mei aí—ʻio, naʻá ne kapusi ki tuʻa ʻa e tangatá, peá ne tuku ki he ngataʻanga ki he hahake ʻo e ngoue ʻo ʻĪtení, ha kau selupimi, mo ha heletā ulo ʻa ia naʻe foli fakatakamilo, ke leʻohi ʻa e ʻakau ʻo e moʻuí—

3 Ko ʻeni, ʻoku tau vakai kuo hoko ʻa e tangatá ʻo hangē ko e ʻOtuá, ʻo ʻilo ʻa e leleí mo e koví; pea telia naʻá ne mafao atu hono nimá, ʻo toli foki mei he ʻakau ʻo e moʻuí, ʻo kai pea moʻui ʻo taʻengata, naʻe tuku ʻe he ʻEiki ko e ʻOtuá ha kau selupimi mo e heletā ulo, ke ʻoua naʻá ne kai mei he fuá—

4 Pea ko ia ʻoku tau ʻiloʻi, naʻe tuku ha taimi ki he tangatá ke fakatomala ai, ʻio, ko ha taimi ʻahiʻahiʻanga, ko e taimi ke fakatomala, pea tauhi ki he ʻOtuá.

5 He vakai, kapau naʻe mafao atu leva ʻe ʻĀtama ʻa hono nimá, ʻo kai mei he ʻakau ʻo e moʻuí, pehē kuó ne moʻui ʻo taʻengata, ʻo hangē ko e folofola ʻa e ʻOtuá, ʻo ʻikai maʻu hano taimi ke fakatomala ai; ʻio, pea mei taʻeʻaonga foki ai ʻa e folofola ʻa e ʻOtuá, pea taʻofi ai ʻa e palani lahi ʻo e fakamoʻuí.

6 Kae vakai, naʻe tuʻutuʻuni ki he tangatá ke mate—ko ia, koeʻuhi kuo motuhi atu ʻa kinautolu mei he ʻakau ʻo e moʻuí naʻe totonu ke motuhi atu ai ʻa kinautolu mei he funga ʻo e māmaní—pea naʻe hoko ʻo mole ai ʻa e tangatá ʻo taʻengata, ʻio, naʻa nau hoko ko e tangata kuo hinga.

7 Pea ko ʻeni, ʻokú ke vakai ʻi he meʻá ni naʻe motuhi atu ʻetau ʻuluaki ongo mātuʻá ʻi he anga fakatuʻasinó mo e fakalaumālié fakatouʻosi mei he ʻao ʻo e ʻEikí; pea ko ia ʻokú ta vakai naʻá na moʻulaloa ai ke fai ki hona loto ʻonauá.

8 Ko ʻeni vakai, naʻe ʻikai ʻaonga ke fakahaofi ʻa e tangatá mei he mate fakasino ko ʻení, koeʻuhi ʻe maumauʻi ai ʻa e palani lahi ʻo e fiefiá.

9 Ko ia, koeʻuhi ʻe ʻikai ke teitei lava ʻo mate ʻa e laumālié, pea mo e fakahoko mai ʻi he hingá ki he faʻahinga kotoa ʻo e tangatá ha mate fakalaumālie pea mo ha mate fakasino, ʻa ia ko e pehē, naʻe motuhi atu ʻa kinautolu mei he ʻao ʻo e ʻEikí, ko ia naʻe ʻaonga ai ke fakahaofi ʻa e faʻahinga ʻo e tangatá mei he mate fakalaumālie ko iá.

10 Ko ia, ko e meʻa ʻi heʻenau hoko ʻo fakakakano, pea anga-fakakakano, mo anga-fakatēvolo, ʻi honau natulá, ko ia naʻe hoko ai ʻa e tuʻunga ʻahiʻahiʻanga ko ʻení ko ha tuʻunga moʻonautolu ke teuteu ai; naʻe hoko ia ko ha tuʻunga teuteuʻanga.

11 Pea ko ʻeni manatu, ʻe hoku foha, ka ne taʻeʻoua ʻa e palani ʻo e huhuʻí (pe kuo liʻaki ia), pehē ko e hili pē ʻenau maté ʻe mamahiʻia honau laumālié, koeʻuhi ko e motuhi atu ʻa kinautolu mei he ʻao ʻo e ʻEikí.

12 Pea ko ʻeni, naʻe ʻikai ke ʻi ai ha founga ke fakahaofi ai ʻa e tangatá mei he tuʻunga ʻo e hinga ko iá, ʻa ia kuo fakahoko ʻe he tangatá kiate ia ko e tupu ʻi heʻene talangataʻa pē ʻaʻaná;

13 Ko ia, fakatatau ki he fakamaau totonú, ʻe ʻikai lava ʻo fakahoko ʻa e palani ʻo e huhuʻí, tuku kehe ʻo ka toki fakatomala ʻa e tangatá ʻi he tuʻunga ʻahiʻahiʻanga ko ʻení, ʻio, ʻa e tuʻunga teuteuʻangá ni; he kā ne ʻikai ke ʻi ai ʻa e ngaahi tuʻungá ni, he ʻikai ke ʻi ai hano ʻaonga ʻo e ʻaloʻofá ka te ne maumauʻi ʻa e ngāue ʻo e fakamaau totonú. Ko ʻeni ʻe ʻikai lava ʻo fakaʻauha ʻa e ngāue ʻo e fakamaau totonú; ka ne pehē, he ʻikai toe ʻOtua ʻa e ʻOtuá ia.

14 Pea ko ia ʻoku hā mai ai kuo hinga ʻa e faʻahinga kotoa ʻo e tangatá, pea kuo nau moʻua ki he fakamaau totonú; ʻio, ʻa e fakamaau totonu ʻa e ʻOtuá, ʻa ia naʻe tuʻutuʻuni ai ke motuhi atu ʻa kinautolu mei hono ʻaó ʻo taʻengata.

15 Pea ko ʻeni, ʻe ʻikai lava ke fakahoko ʻa e palani ʻo e ʻaloʻofá taʻefai ha fakalelei; ko ia naʻe fai ʻe he ʻOtuá tonu ʻa e fakalelei ki he ngaahi angahala ʻa e māmaní, ke fakahoko ʻa e palani ʻo e ʻaloʻofá, ke fakalato ai ʻa e ngaahi fiemaʻu ʻa e fakamaau totonú, koeʻuhi ke hoko ʻa e ʻOtuá ko ha ʻOtua haohaoa, mo angatonu, kae ʻumaʻā ko ha ʻOtua ʻaloʻofa foki.

16 Ko ʻeni, ʻe ʻikai lava ke hoko mai ʻa e fakatomalá ki he tangatá tuku kehe kapau naʻe ʻi ai ha tautea, ʻa ia ʻoku taʻengata foki mo ia ʻo hangē pē ko e moʻuí ʻa e laumālié, ʻa ia kuo fokotuʻu ʻo fehangahangai ki he palani ʻo e fiefiá, ʻa ia ʻoku taʻengata ʻo hangē ko e moʻui ʻa e laumālié.

17 Ko ʻeni, ʻe lava fēfē ha tangata ʻo fakatomala ʻo kapau ʻe ʻikai te ne fai angahala? Te ne lava fēfē ʻo fai angahala ʻo kapau ʻoku ʻikai ke ʻi ai ha fono? ʻE lava fēfē ke ʻi ai ha fono taʻe-ʻi ai ha tautea?

18 Ko ʻeni, naʻe ʻi ai ha tautea naʻe fokotuʻu, pea mo ha fono totonu kuo tuku mai, ʻa ia naʻe ʻomai ʻa e tautea ʻo e konisēnisí ki he tangatá.

19 Ko ʻeni, kapau naʻe ʻikai ke foaki mai ha fono—kapau ʻe fakapō ʻe ha tangata ʻoku totonu ke ne mate—te ne manavahē koā naʻa mate ʻo kapau te ne fakapō?

20 Pea ko e tahá foki, kapau naʻe ʻikai ke foaki mai ha fono ke taʻofi ʻa e angahalá ʻe ʻikai manavahē ʻa e tangatá ke fai angahala.

21 Pea kapau naʻe ʻikai ke foaki mai ha fono, kapau ʻe fai angahala ʻa e tangatá ko e hā ha meʻa ʻe lava ke fai ʻe he fakamaau totonú, pe ko e ʻaloʻofá, koeʻuhi he ʻikai te na maʻu ha mālohi ki he tokotaha ko iá?

22 Ka kuo foaki mai ha fono, pea fokotuʻu mo ha tautea, pea fakangofua ha fakatomala; ʻa ia ko e fakatomala, ʻoku maʻu ʻi he ʻaloʻofá; ka ʻikai, pea ʻe maʻu ʻe he fakamaau totonú ʻa e tokotaha ko iá, ʻo fakahoko ʻa e fonó, pea ʻe hilifaki ʻa e tautea ʻe he fonó; ka ne ʻikai ke pehē, ʻe fakaʻauha ʻa e ngaahi ngāue ʻa e fakamaau totonú, pea he ʻikai ke toe ʻOtua ʻa e ʻOtuá.

23 Ka ʻoku ʻikai ke tuku ʻe he ʻOtua ʻa ʻene hoko ko e ʻOtuá, pea ʻoku maʻu ʻe he ʻaloʻofá ʻa e faʻahinga ʻoku loto-fakatomalá, pea ʻoku hoko mai ʻa e ʻaloʻofá tuʻunga ʻi he fakaleleí; pea ʻoku fakahoko ʻe he fakaleleí ʻa e toetuʻu ʻo e maté; pea ʻoku hanga ʻe he toetuʻu ʻo e maté ʻo fakafoki atu ʻa e tangatá ki he ʻao ʻo e ʻOtuá; ko ia ʻoku fakafoki atu ai ʻa kinautolu ki hono ʻaó, ke fakamāuʻi ʻo fakatatau ki heʻenau ngaahi ngāué, ʻo fakatatau mo e fonó mo e fakamaau totonú.

24 He vakai, ʻoku fai ʻe he fakamaau totonú ʻa ʻene ngaahi ʻeke kotoa pē, pea ʻoku kumi foki ʻe he ʻaloʻofá ke maʻu ʻa e meʻa kotoa pē ʻoku ʻaʻaná; pea ko ia, ʻoku ʻikai ha taha ka ko ia pē ʻoku loto-fakatomala moʻoní ʻoku fakamoʻuí.

25 Ko e hā, ʻokú ke mahalo koā ʻoku toʻo ʻe he ʻaloʻofá ʻa e fakamaau totonú? ʻOku ou pehē kiate koe, ʻIkai; naʻa mo ha momoʻi meʻa. Kapau ʻe pehē, he ʻikai ke toe ʻOtua ʻa e ʻOtuá ia.

26 Pea ko ia ʻoku fakahoko ai ʻe he ʻOtuá ʻa ʻene ngaahi taumuʻa maʻongoʻonga mo taʻengata, ʻa ia naʻe teuteu talu mei hono ʻai ʻa e tuʻunga ʻo e māmaní. Pea ko ia ʻoku hoko ai ʻa e fakamoʻuí mo e huhuʻi ʻo e tangatá, kae ʻumaʻā foki honau fakaʻauhá mo e mamahí.

27 Ko ia, ʻE hoku foha, ʻilonga ia ʻe haʻú tuku ke ne haʻu ʻo inu taʻetotongi ʻi he ngaahi vai ʻo e moʻuí; pea ʻilonga ia ʻoku ʻikai haʻú ʻoku ʻikai fakamālohiʻi ia ke haʻu; ka ʻi he ʻaho fakaʻosí ʻe fakafoki kiate ia ʻo fakatatau ki heʻene ngaahi ngāué.

28 Kapau naʻá ne holi ke faikovi, pea ʻikai te ne fakatomala ʻi hono ngaahi ʻahó, vakai, ʻe fai kiate ia ʻa e kovi, ʻo fakatatau mo e fakafoki ʻa e ʻOtuá.

29 Pea ko ʻeni, ʻe hoku foha, ʻoku ou loto ke ʻoua naʻa ke tuku ke toe fakahohaʻasi koe ʻe he ngaahi meʻá ni, kae tuku pē hoʻo ngaahi angahalá ke fakahohaʻasi koe, ʻaki ʻa e hohaʻa ʻa ia ʻe ʻohifo ai koe ki he fakatomalá.

30 ʻOiauē ʻe hoku foha, ʻoku ou loto ke ʻoua naʻá ke toe fakaʻikaiʻi ʻa e fakamaau totonu ʻa e ʻOtuá. ʻOua naʻá ke feinga ke fakatonuhiaʻi koe ʻi ha kihiʻi momoʻi meʻa ʻe taha koeʻuhi ko hoʻo ngaahi angahalá, ʻaki ʻi hono fakaʻikaiʻi ʻo e fakamaau totonu ʻa e ʻOtuá; ka ke tuku ʻa e fakamaau totonu ʻa e ʻOtuá, mo ʻene ʻaloʻofá, mo ʻene faʻa kātaki fuoloá ke ne puleʻi ʻa ho lotó; pea tuku ke ne ʻohifo koe ki he efú ʻi he loto-fakatōkilalo.

31 Pea ko ʻeni, ʻE hoku foha, kuo ui koe ʻe he ʻOtuá ke malanga ʻaki ʻa e folofolá ki he kakaí ni. Pea ko ʻeni, ʻe hoku foha, ʻalu ʻi ho halá, fakahā ʻa e folofolá ʻi he moʻoni mo e loto-fakamātoato, koeʻuhí ke ke lava ʻo ʻomi ha kakai ke fakatomala, koeʻuhi ke maʻu ʻe he palani maʻongoʻonga ʻo e ʻaloʻofá ha mālohi kiate kinautolu. Pea ʻofa ke foaki kiate koe ʻe he ʻOtuá ʻo fakatatau mo ʻeku ngaahi leá. ʻĒmeni.