1 Dóó kʼad, shiyeʼ, tʼáadoo leʼé tʼahdii łaʼ baa níniʼ siʼą́ nisin, éí éí doo bikʼiʼdiitįįh da—éí éí Diyin God tʼáá ákogi átʼáo bibee ánihwiitʼaahą́ą bąąhági átʼíinii atíbidiʼdilnéhígíí; háálá doo ákótʼée da nínízin Diyin God bąąhági átʼíinii achʼįʼ nahwiiʼná góneʼ yeʼiiłníihgo.

2 Jó kʼad, shiyeʼ, díí bee nił hodeeshnih. Jó háálá, Bóhólníihii Diyin God tsʼídá áłtsé nihimá dóó nihizhéʼé dáʼákʼeh Eden hoolyéédóó yíwohjįʼ yidííniid yę́ędą́ą́ʼ dóó bikʼijįʼ, niʼ bikáaʼgi kʼéé dídléeh dooleeł biniiyé, bitsʼą́ą́dóó ábiʼdiilyaaí—aooʼ, diné yíwohjįʼ yidííniid, dóó dáʼákʼeh Eden hoolyéedi haʼaʼaahjígo, bá naalʼaʼii, dóó bééshhał dookʼą́ąłii tʼáá ałtsojígo kótʼíinii, tsin bee iináanii yaa áhályą́ągo áyiilaa—

3 Kʼad, diné Diyin Godgi átʼé silį́į́ʼ, yáʼátʼéehii dóó doo yáʼátʼéehii bił bééhózin; dóó bílaʼ yee dah didoolnih, tsin bee iináanii yąąh adooyį́į́ł, dóó yiyíyą́ąʼgo dóó hoolʼáágóó hiná dooleełgo, nízingo Bóhólníihii Diyin God bá naalʼaʼii dóó bééshhał dookʼą́ąłii ákweʼé niinínil, áko doo tsin bineestʼąʼ yidooyį́įł da biniiyé—

4 Dóó ákótʼáo nihił béédahózin, nihookááʼ dineʼé beʼiinaʼ łahgo áńdeidoodlííł biniiyé bá hooʼaʼ, aooʼ, nahóʼnítaah biniiyé bá hooʼaʼ, diné beʼiinaʼ łahgo áńdeidoodlííł dóó Diyin God yá ndaalnish doo biniiyé bá hooʼaʼ.

5 Jó áko, Adam tʼáá íídą́ą́ʼ dah diilniiʼ, dóó tsin bee iináanii bineestʼąʼ łaʼ yiyíyą́ąʼgo, hoolʼáágóó hiná dooleeł ńtʼę́ę́ʼ, Diyin God bizaad bikʼehgo, beʼiinaʼ łahgo ánéidoodlíiłgi doo bá hazʼą́ą́góó; aooʼ, dóó ałdóʼ Diyin God bizaad éí doo ílį́į da silį́į́ʼ dooleeł ńtʼę́ę́ʼ, dóó ayóó átʼáo yisdánáʼiildéehgo nahatʼá yę́ę niʼkólyaa doo ńtʼę́ę́ʼ.

6 Jó ndi, Diyin God diné tʼáá ałtso dínóonéełgo yee nihoníʼą́—éí bąą, tsin bee iináanii doo bá bíighahgóó ályaaígíí biniinaa ałdóʼ nahasdzáán bikáaʼgi dínóonéełgo ályaa—dóó diné éí hoolʼáágóó yóó eekai dooleeł, aooʼ, nihookááʼ dineʼé adah hineezdee daazlį́į́ʼ.

7 Dóó kʼad, díí bitsʼą́ą́dóó daohʼį́ tsʼídá áłtsé nihimá dóó nihizhéʼé atsʼíís dóó iiʼsizíiniikʼehgo Bóhólníihii bitsʼą́ą́dóó tʼáá sáhí áhoʼdiilyaa; dóó ákótʼáo nihił bééhózingo tʼáá bí yinízinígíí yikʼehgo naaʼaash silį́į́ʼ.

8 Jó kʼad, diné díí atsʼíískʼehgo doo nínéégóó ályaago éí doo ákótʼée da, háálá díí éí ayóó átʼáo ił hózhǫ́ǫ́jí hootʼáłígíí yidoołchxǫǫł.

9 Éí bąą, atsʼíís dóó ayiʼsizíinii éí tsʼídá doo dadootsaał da ńtʼę́ę́ʼ, dóó diné asiihgo adáátłizhígíí biniinaa nihookááʼ diné tʼáá ałtso atsʼíís dóó iiʼsizíiniikʼehgo daniné silį́į́ʼ, éí éiyá, Bóhólníihii hólǫ́ǫ doo nahjįʼ kóbiʼdiilyaa, díí biniinaa nihookááʼ dineʼé biiʼsizíinii díí anoonééłdę́ę́ʼ shónéidootʼeełgo bee hooʼaʼ.

10 Éí bąą, atsʼíís, dóó atsʼíís yinízinii, dóó chʼį́įdii beʼiiníziiniikʼeh, naaldeeh silį́į́ʼ, díí nabíʼnítaah bee hooʼaʼą́ą éí biiʼ hashtʼeʼádaʼdílnéehgo biniiyé hazʼą́ silį́į́ʼ; éí hashtʼehodiʼnééh biniiyé hooʼaʼ.

11 Dóó kʼad béénílniih, shiyeʼ, díí diné bá nináʼílyáago hootʼáłígíí doo hólǫ́ǫgo, (tʼóó hónízahjįʼ díí doo hólǫ́ǫ́góó baa ntsáhákeesgo) tʼáá ádin néheleehé biiʼ naazíinii doo bił dahózhǫ́ǫ da dooleeł, Bóhólníihii bitsʼą́ą́dóó tʼáá sahdii áhoʼdiilyaa.

12 Dóó kʼad, díí bąąhági átʼéii biiʼooldéʼígíí biyiʼdę́ę́ʼ nihookááʼ dineʼé bee shónéidootʼeełígíí ádin ńtʼę́ę́ʼ, éí nihookááʼ dineʼé tʼáá bí yee ádá dahoołʼaʼ háálá doo akʼeh dahółʼínígíí biniinaa;

13 Éí bąą, tʼáá ákogi átʼáo ánihwiitʼaah bikʼehgo, á nináʼílyáago hootʼáłígíí tsʼídá doo ndoolnish da, tʼáá hazhóʼó nihookááʼ dineʼé beʼiinaʼ łahgo áńdayiidlaago tʼéiyá díí nabíʼnítaah bił hazʼą́ góneʼ, aooʼ, díí hashtʼehodílnééh biniiyé hooʼaʼ góneʼ; háálá díí doo kótʼéego, ajoobaʼ doo ndoolnish da tʼóó tʼáá ákogi átʼáo ánihwiitʼaah binaanish yidoołchxǫǫł. Kʼad tʼáá ákogi átʼáo ánihwiitʼaah éí doo doolchxǫǫł da; díí kótʼéego éí, Diyin God doo Diyin God nilį́į da dooleeł.

14 Dóó ákótʼáo diné tʼáá ałtso adaheezhtłizh dóó tʼáá ákogi átʼáo ánihwiitʼaah bílákʼejiʼaah silį́į́ʼ; áko Diyin God tʼáá ákogi átʼáo bibee ánihwiitʼaahii, éí hoolʼáágóó bichʼįʼ hadáʼdidoolkał.

15 Dóó kʼad, ajoobaʼgo nahatʼá éí doo ndoolnish da tʼáá hazhóʼó bąąhági átʼéii bikʼé nináʼílyáago tʼéiyá; éí bąą Diyin God tʼáá bí nihookááʼ dineʼé bibąąhági ádaatʼéii yikʼé nináʼnídlá, ajoobaʼgo nahatʼá ndoolnish biniiyé, tʼáá ákogi átʼáo ánihwiitʼaah yinízinígíí bíniʼ biʼdoolnííł biniiyé, áko Diyin God éí haałtʼéego, tʼáá ákogi átʼéego Diyin God nilį́į doo biniiyé, dóó ałdóʼ Diyin God ajoobaʼgo nilį́į doo biniiyé.

16 Kʼad, iiná łahgo ánálnééh éí doo diné bichʼįʼ kódoolníił da tʼáá hazhóʼó bee atídoolníiłii hólǫ́ǫgo tʼéiyá, éí iiʼsizíinii hoolʼáádę́ę́ʼ hólónígi átʼáo hólǫ́, hózhǫ́ǫ́jí hootʼáłígíí bitsʼą́ąjigo hólǫ́ǫgo átʼé, éí ałdóʼ iiʼsizíinii hoolʼáádę́ę́ʼ hólónígi átʼáo hólǫ́.

17 Kʼad, haash yitʼáo diné beʼiinaʼ łahgo ánéidoodlííł tʼáá hazhóʼó asiihgo tʼéiyá? Haash yitʼáo adoosih beehazʼáanii doo hólǫ́ǫ́góó? Haash yitʼáo éí beehazʼáanii hólǫ́ǫ dooleeł tʼáá hazhóʼó atíʼálʼį́ bee nináʼílyéii bąąh hólǫ́ǫgo tʼéiyá?

18 Kʼad, atíʼálʼį́ bee nináʼílyéego bee nihootʼą́, dóó beehazʼáanii tʼáá ákogi átʼéii niilyá, éí nihookááʼ dineʼé asiihgo yínííł nízingo áyiiłʼįįh.

19 Kʼad, beehazʼáanii tʼáadoo niilyáago—diné iisxį́įgo bídóʼ bidiʼyoolyééł doo haʼníígóó—daʼ diné łaʼ séłhį́įgo dashiyółhééł lágoósh nízingo naaldzid dooleeł?

20 Dóó ałdóʼ, niʼiilzííh doo beehazʼáanii łaʼ doo bikʼijįʼ niilyáago diné niʼiilzííh doo yéédaaldzid da dooleeł.

21 Dóó tʼáadoo beehazʼáanii niilyáago, ákoshąʼ diné ndaʼiisíihgo díí tʼáá ákogi átʼéego nahwiiʼaahiishąʼ haadoonííł, éí doodago ajoobaʼ bee nináʼílyéiishąʼ haadoonííł, háálá díí éí doo diné bídéétʼiʼ da dooleeł?

22 Ndi beehazʼáanii éí niilyá, dóó atíʼálʼį́ bee nináʼílyéego ályaa, dóó diné bidaʼiinaʼ łahgo áńdeidleʼígíí binahjįʼ baa ńdaʼdítʼáahgo ályaa; éí éí iiná łahgo áńdayiidlaaígíí, ajoobaʼ neidiyiilé; doo kótʼéego éí, tʼáá ákogo nihwiiʼaahii diné dayiisił doo dóó beehazʼáanii bikʼijįʼ kódaalneʼ, dóó beehazʼáanii bikʼehgo atíʼáłʼįįh; díí doo kótʼéégóó, éí tʼáá ákogo nihwiiʼaahii binaanish doochxǫǫł, dóó Diyin God éí doo Diyin God nilį́į da dooleeł.

23 Ndi Diyin God éí hólǫ́, dóó beʼiinaʼ łahgo ánáyiidlaaí ajoobaʼ bíká eelwod, dóó ajoobaʼ éí bąąhági átʼéii bikʼé nináʼílyáhígíí bitsʼą́ą́dóó hazlį́į́ʼ; dóó bąąhági átʼéii bikʼé nináʼílyáhígíí bee daneeznánę́ę náádidoojahgo áyiilaa; dóó daneeznánę́ę náádiijeehgo Diyin God bił hazʼą́ góneʼ yił yah anáhidookah; dóó ákótʼáo bił hazʼą́ądi nínáhidookah, dóó yindaashnish yę́ę bikʼehgo bá ndahodootʼááł, tʼáá ákogo nihwiiʼaahii bibeehazʼáanii bikʼehgo.

24 Jó háálá, tʼáá ákogo nihwiiʼaahii ałtso bíniʼ beʼelʼį́, dóó ajoobaʼ ałdóʼ tʼáá ałtso bíhígíí yidoołtsoł; dóó ákótʼáo, tʼáá aaníigo beʼiinaʼ łahgo áńdayiidlaaígíí tʼéiyá yisdádookah.

25 Haʼátʼíí, daʼ ákoósh ajoobaʼ tʼáá ákogo nihwiiʼaahii binaanish nahjįʼ kwíidoolííł nínízin? Ándishní, Ndagaʼ; azhą́ áłtsʼíísí ndi. Díí kótʼéego éí, Diyin God doo Diyin God nilį́į da dooleeł.

26 Dóó ákótʼáo Diyin God beʼayóó átʼéii dóó hoolʼáágóó dabiniiyéii łaʼ deílé, éí nahasdzáán álnéhę́ędą́ą́ʼ hashtʼedaalyaa yę́ę. Dóó ákótʼáo éí bikʼehgo diné yisdáhákááh dóó bá nináʼílyé silį́į́ʼ, dóó łaʼ ałdóʼ bił yóó ádahalneʼ dóó tiʼdahooníihgo ádaalneʼ.

27 Éí bąą, O shiyeʼ, tʼáá háiida níyáshį́į́ tʼáá jííkʼe iiná bitsʼą́ą́dóó tó yidoodlį́į́ł; dóó tʼáá háiida doo deeshááł da nízinígíí ałdóʼ doo bíʼnílchéeh da; ndi ayííłką́ągo áyiilaahą́ą ałtso bee háádidoolnííł.

28 Bąąhági átʼéii baa naashá nízingo, dóó tʼáadoo beʼiinaʼ łahgo ánáyiidlaago abiyiííłką́ągo, jó, bąąhági ábidiʼdoolnííł, Diyin God haahodiidlaaígíí bikʼehgo.

29 Dóó kʼad, shiyeʼ, díí tʼáadoo baa níniʼí dooleeł, niʼiyísíhígíí tʼéiyá bíniʼ niʼdiiłʼá, éí niʼdiiłʼáhígíí binahjįʼ neʼiinaʼ łahgo áńdíídlííł.

30 O shiyeʼ, Diyin God bitʼáá ákogo nihwiiʼaahii tʼáadoo nahjįʼ kóníłʼiní dooleełę́ę nisin. Diyin God bitʼáá ákogo nihwiiʼaahii ádin nínízinígíí bąą, tʼáadoo niʼiyísíhígíí tʼáá áko níníziní azhą́ áłtsʼíísí ndi; ndi éí bíniʼ Diyin God tʼáá ákogi átʼáo bibee ánihwiiʼaahii, dóó beʼajoobaʼii, dóó bibee haʼólníh nijéí yiiʼ naalnish; dóó bíniʼ díí hojoobaʼ áhwiinidzin niʼjįʼ ntsińdígoh.

31 Dóó kʼad, O shiyeʼ, díí diné Diyin God bizaad bee nanítin doo biniiyé Diyin God nikʼidiilniiʼ. Dóó kʼad, shiyeʼ, yínááł, saad tʼáá aaníigo dóó hojoobaʼ áhwiinidzingo baa hólneʼ, áko ninahjįʼ diné beʼiinaʼ łahgo áńdeidoodlííł, áko ayóó átʼáo ajoobaʼgo hootʼáałii dabiidoołtsoł. Dóó saad bee haasdzíʼígíí bikʼehgo Diyin God bíniʼ néididooʼááł. Amen.