1 Pea ko ʻeni naʻe hoko ʻo pehē naʻe ʻalu atu ʻa e ngaahi foha ʻo ʻAlamaá ʻi he kakaí, ke malanga ʻaki ʻa e folofolá kiate kinautolu. Pea ko ʻAlamā tonu foki, naʻe ʻikai te ne mālōlō, ʻo ne ʻalu atu foki mo ia.

2 Ko ʻeni ʻe ʻikai te tau toe fakamatala ʻo kau ki heʻenau ngaahi malangá, tuku kehe pē ʻa ʻenau malanga ʻaki ʻa e folofolá, mo e moʻoní, ʻo fakatatau ki he laumālie ʻo e kikité mo e fakahaá; pea naʻa nau malanga ʻi he lakanga toputapu ʻo e ʻOtuá ʻa ia naʻe ui ai ʻa kinautolú.

3 Pea ko ʻeni ʻoku ou toe foki ki ha fakamatala ʻo e ngaahi tau ʻi he vahaʻa ʻo e kau Nīfaí mo e kau Leimaná, ʻi hono hongofulu mā valu taʻu ʻo e pule ʻa e kau fakamāú.

4 He vakai, naʻe hoko ʻo pehē naʻe hoko ʻa e kau Sōlamí ko e kau Leimana; ko ia, ʻi he kamataʻanga ʻo e taʻu hono hongofulu mā valú naʻe vakai ʻa e kau Nīfaí ʻoku ʻoho mai ʻa e kau Leimaná kiate kinautolu; ko ia naʻa nau fai ha ngaahi teuteu ki he tau; ʻio, naʻa nau tānaki fakataha ʻenau ngaahi kau taú ki he fonua ko Selesoní.

5 Pea naʻe hoko ʻo pehē naʻe haʻu ʻa e kau Leimaná mo honau toko lau afe; pea naʻa nau hū mai ki he fonua ko ʻAniteonumí, ʻa ia ko e fonua ʻo e kau Sōlamí; pea ko e tangata naʻe hingoa ko Seilahemena ʻa honau takí.

6 Pea ko ʻeni, ko e meʻa ʻi he fai angahala mo loto-fakapō lahi ange ʻa e kau ʻAmalekaí ʻi he kau Leimaná ʻiate kinautolu pē, ko ia, naʻe fokotuʻu ʻe Seilahemena ha kau ʻeikitau lahi ki he kau Leimaná, pea ko kinautolu kotoa ko iá ko e kau ʻAmelikai mo e kau Sōlami.

7 Naʻá ne fai ʻeni foki ke ne pukepuke ʻaki ʻenau fehiʻa ki he kau Nīfaí, koeʻuhí ke ne ngaohi ʻa kinautolu ke nau fakaongoongo kiate ia koeʻuhi ke lava ʻo fakahoko ʻene ngaahi fakakaukaú.

8 He vakai, ko ʻene ngaahi fakakaukaú ke ueʻi hake ʻa e kau Leimaná ke ʻita ki he kau Nīfaí; naʻá ne fai ʻeni ke ne maʻu ha pule taʻetotonu lahi kiate kinautolu, pea koeʻuhí ke ne maʻu foki ʻa e mālohi ki he kau Nīfaí ʻi hono ʻomi ʻa kinautolu ke nofo pōpula.

9 Pea ko ʻeni ko e fakakaukau ʻa e kau Nīfaí ke nau maluʻi honau ngaahi fonuá, mo honau ngaahi falé, mo honau ngaahi uaifí, mo ʻenau fānaú, koeʻuhí ke nau lava ʻo maluʻi ʻa kinautolu mei he nima ʻo honau ngaahi filí; pea koeʻuhí foki ke nau lava ʻo maluʻi mo ʻenau ngaahi totonú mo honau ngaahi faingamālié, ʻio, pea mo ʻenau tauʻatāiná foki, koeʻuhí ke nau lava ʻo hū ki he ʻOtuá ʻo fakatatau ki honau lotó.

10 He naʻa nau ʻiloʻi kapau te nau tō ki he nima ʻo e kau Leimaná, ʻilonga ia ʻe hū ki he ʻOtuá ʻi he laumālie mo e moʻoní, ʻa ia ko e ʻOtua moʻoni mo moʻuí, ʻe fakaʻauha ia ʻe he kau Leimaná.

11 ʻIo, pea naʻa nau ʻiloʻi foki ʻa e fuʻu fehiʻa lahi ʻaupito ʻa e kau Leimaná ki honau kāinga, ʻa ia ko e kakai ʻo ʻAnitai-Nīfai-Līhaí, ʻa ia naʻe ui ko e kakai ʻo ʻĀmoní—pea naʻe ʻikai te nau fie toʻo mahafu, ʻio, naʻa nau fai ha fuakava pea naʻe ʻikai te nau fie maumauʻi ia—ko ia, kapau te nau tō ki he nima ʻo e kau Leimaná ʻe fakaʻauha ʻa kinautolu.

12 Pea naʻe ʻikai ke fie tuku ʻe he kau Nīfaí ke fakaʻauha ʻa kinautolu; ko ia naʻa nau foaki kiate kinautolu ha ngaahi potu fonua ke hoko ko honau tofiʻa.

13 Pea naʻe foaki ʻe he kakai ʻo ʻĀmoní ki he kau Nīfaí ha konga lahi ʻo ʻenau ʻū meʻá ke tauhi ʻaki ʻenau ngaahi kau taú; pea ko ia naʻe pau ai ke tuʻu, taha pē, ʻa e kau Nīfaí ke tauʻi ʻa e kau Leimaná, ʻa ia ko ha fetuiaki ʻa e kau Leimaná mo e kau Lēmiuelá, mo e ngaahi foha ʻo ʻIsimelí, mo kinautolu kotoa pē naʻe mavahe atu mei he kau Nīfaí, ʻa ia ko e kau ʻAmalekaí mo e kau Sōlamí, pea mo e ngaahi hako ʻo e kau taulaʻeiki ʻa Noá.

14 Ko ʻeni ko e ngaahi hako ko iá naʻa nau tokolahi, ʻo meimei tatau, mo e tokolahi ʻo e kau Nīfaí; pea ko ia naʻe pau ai ke tau ʻa e kau Nīfaí mo honau kāingá, ʻo aʻu ki he lilingi toto.

15 Pea naʻe hoko ʻo pehē ʻi he fakataha mai ʻa e ngaahi kau tau ʻa e kau Leimaná ʻi he fonua ko ʻAniteonumí, vakai, kuo ʻosi teuteu ʻa e ngaahi kau tau ʻa e kau Nīfaí ke fetaulaki mo kinautolu ʻi he fonua ko Selesoní.

16 Ko ʻeni, ko e taki ʻo e kau Nīfaí, pe ko e tangata kuo fili ke hoko ko e ʻeikitau lahi ki he kau Nīfaí—ko ʻeni naʻe pule ʻa e ʻeikitau lahí ki he ngaahi kau tau kotoa ʻa e kau Nīfaí—pea ko hono hingoá ko Molonai;

17 Pea naʻe maʻu ʻe Molonai ʻa e pule kotoa, mo e tuʻutuʻuni ki heʻenau ngaahi taú. Pea naʻá ne taʻu uofulu mā nima pē ʻi hono fili ia ko e ʻeikitau lahi ki he ngaahi kau tau ʻa e kau Nīfaí.

18 Pea naʻe hoko ʻo pehē naʻá ne fetaulaki mo e kau Leimaná ʻi he ngaahi ngataʻanga fonua ʻo Selesoní, pea kuo fakamahafu hono kakaí ʻaki ʻa e ngaahi heletā, mo e ngaahi hele piko, mo e faʻahinga ʻo e ngaahi mahafu tau kotoa pē.

19 Pea ʻi he mamata ʻa e ngaahi kau tau ʻa e kau Leimaná ki he kau Nīfaí, pe kuo hanga ʻe Molonai ʻo teuteuʻi ʻa hono kakaí ʻaki ʻa e ngaahi sifa-fatafata mo e ngaahi pā ki he umá, ʻio, kae ʻumaʻā foki mo e ngaahi pā ke maluʻi ʻaki honau ʻulú, pea kuo nau kofu ʻaki foki ʻa e kofu matolu—

20 Ko ʻeni naʻe ʻikai teuteu ʻa e kau tau ʻa Seilahemená ʻaki ha meʻa pehē; naʻa nau maʻu pē ʻenau ngaahi heletaá mo ʻenau ngaahi hele pikó, mo ʻenau ngaahi kaufaná mo ʻenau ngaahi ngahaú, ko ʻenau ngaahi maká mo ʻenau ngaahi maka-taá; pea naʻa nau telefua, tuku kehe pē ha kiliʻimanu naʻe nonoʻo ʻaki honau kongalotó; ʻio, naʻa nau telefua kotoa pē, tuku kehe pē ʻa e kau Sōlamí mo e kau ʻAmelikaí;

21 Ka naʻe ʻikai maluʻi ʻa kinautolu ʻaki ha ngaahi sifa-fatafata, pe ngaahi pā—ko ia, naʻa nau fuʻu ilifia ʻaupito ki he kau tau ʻa e kau Nīfaí koeʻuhi ko honau teunga taú, neongo naʻe fuʻu hulu ange ʻa honau tokolahí ʻi he tokolahi ʻo e kau Nīfaí.

22 Vakai, naʻe hoko ʻo pehē foki naʻe ʻikai te nau loto-toʻa ke ō mai ke tauʻi ʻa e kau Nīfaí ʻi he ngaahi ngataʻanga fonua ʻo Selesoní; ko ia naʻa nau ʻalu mei he fonua ko ʻAniteonumí ki he feituʻu maomaonganoá, ʻo fai ʻenau fonongá ʻo takatakai ʻi he feituʻu maomaonganoá, ʻo aʻu ki he matavai ʻo e vaitafe Saitoné, ke nau hū ai ki he fonua ko Manataí ʻo maʻu ʻa e fonuá; he naʻe ʻikai te nau ʻamanaki ʻe ʻiloʻi ʻe he ngaahi kau tau ʻa Molonaí pe kuo nau ʻalú ki fē.

23 Ka naʻe hoko ʻo pehē, ʻi he hili pē ʻenau ʻalu atu ki he feituʻu maomaonganoá naʻe fekau atu ʻe Molonai ha kau tangata mataki ki he feituʻu maomaonganoá ke fakaasiasi honau nofoʻangá; pea ko Molonai, foki, ʻi heʻene ʻiloʻi ʻa e ngaahi kikite ʻa ʻAlamaá, naʻá ne fekau atu ai ha kau tangata ʻe niʻihi kiate ia, ʻo kole kiate ia ke ne fehuʻi ki he ʻEikí pe ʻoku totonu ke ʻalu ki fē ʻa e ngaahi kau tau ʻa e kau Nīfaí ke maluʻi ʻa kinautolu mei he kau Leimaná.

24 Pea naʻe hoko ʻo pehē naʻe hoko mai ʻa folofola ʻa e ʻEikí kia ʻAlamā, pea naʻe fakahā ʻe ʻAlamā ki he kau talafekau ʻa Molonaí, ʻoku lolotonga laka takai ʻa e kau tau ʻa e kau Leimaná ʻi he feituʻu maomaonganoá, koeʻuhi ke nau hū mai ki he fonua ko Manataí, ke nau kamata hano ʻohofi ʻo e konga vaivai ange ʻo e kakaí. Pea naʻe ʻalu ʻa e kau talafekau ko iá ʻo fakahā ʻa e pōpoakí kia Molonai.

25 Ko ʻeni ko Molonai, naʻá ne tuku ha konga ʻo ʻene kau taú ʻi he fonua ko Selesoní, telia naʻa faifai pea haʻu hano konga ʻo e kau Leimaná ki he fonua ko iá ʻo maʻu ʻa e koló, ka ne ʻave hono toe ʻo ʻene kau taú ʻo nau laka atu ki he fonua ko Manataí.

26 Pea naʻá ne fekau ʻa e kakai kotoa pē ʻi he konga ko ia ʻo e fonuá ke nau fakataha mai ke tau mo e kau Leimaná, ke maluʻi honau ngaahi kelekelé mo honau fonuá, mo ʻenau ngaahi totonú mo ʻenau tauʻatāiná; ko ia naʻa nau teuteu ki he taimi ʻe haʻu ai ʻa e kau Leimaná.

27 Pea naʻe hoko ʻo pehē naʻe fekau ʻe Molonai ki heʻene kau taú ke nau toitoi ʻi he teleʻa ʻoku ofi ki he kauvai ʻo e vaitafe Saitoné, ʻa ia naʻe ʻi he tafaʻaki fakahihifo ʻo e vaitafe Saitone ʻi he feituʻu maomaonganoá.

28 Pea naʻe fokotuʻu takatakai ʻe Molonai ha kau mataki, koeʻuhi ke ne lava ʻo ʻilo ki he haʻu ʻa e kau tau ʻa e kau Leimaná.

29 Pea ko ʻeni, ko e meʻa ʻi he ʻiloʻi ʻe Molonai ʻa e fakakaukau ʻa e kau Leimaná, pea ko ʻenau fakakaukaú ke fakaʻauha honau kāingá, pe ke ikunaʻi ʻa kinautolu pea ʻomi ʻa kinautolu ke nofo pōpula koeʻuhí ke nau lava ai ʻo fokotuʻu ha puleʻanga moʻonautolu ʻi hono kotoa ʻo e fonuá;

30 Pea ʻi heʻene ʻiloʻi foki ko e holi pē taha ʻa e kau Nīfaí ke maluʻi honau ngaahi fonuá, mo ʻenau tauʻatāiná, mo honau siasí, ko ia naʻá ne fakakaukau ai ʻoku ʻikai ko ha angahala ke ne maluʻi ʻa kinautolu ʻi ha tauhele; ko ia, naʻá ne ʻiloʻi mei heʻene kau matakí ʻa e hala ʻe fou ai ʻa e kau Leimaná.

31 Ko ia, naʻá ne vahevahe ʻa ʻene kau taú, ʻo ʻomi hano konga ki he teleʻá, ʻo ne fufuuʻi ʻa kinautolu ʻi he potu hahaké, pea mo e potu tonga ʻo e moʻunga ko Līpilá;

32 Pea ko hono toé naʻá ne fufuuʻi ʻi he teleʻa fakahihifó, ʻi he fakahihifo ʻo e vaitafe Saitoné, ʻo fai hifo ki he ngaahi ngataʻanga fonua ʻo Manataí.

33 Pea ʻi heʻene fokotuʻutuʻu pehē ʻene kau taú ʻo fakatatau ki hono lotó, naʻá ne mateuteu ai ke fetaulaki mo kinautolu.

34 Pea naʻe hoko ʻo pehē naʻe ʻalu hake ʻa e kau Leimaná ʻi he tafaʻaki tokelau ʻo e moʻungá, ʻa ia naʻe toitoi ai ha konga ʻo e kau tau ʻa Molonaí.

35 Pea ko e meʻa ʻi he fakalaka mai ʻa e kau Leimaná ʻi he moʻunga ko Līpilá, ʻo nau aʻu hifo ki he teleʻá, ʻo kamata ke aʻa ʻi he vaitafe Saitoné, ko e kau tau ko ia naʻa nau toitoi ʻi he tonga ʻo e moʻunga, ʻa ia naʻe taki ʻe ha tangata ʻa ia ko hono hingoá ko Līhai, ko ia naʻá ne taki atu ʻa ʻene kau taú ʻo kāpui ʻa e kau Leimaná ʻi he potu fakahahaké ʻi mui ʻiate kinautolu.

36 Pea naʻe hoko ʻo pehē ko e kau Leimaná, ʻi heʻenau mamata ki he kau Nīfaí ʻoku feʻohofi mai kiate kinautolu mei muí, naʻa nau tafoki ki mui ʻo kamata ke tau mo e kau tau ʻa Līhaí.

37 Pea naʻe kamata ʻa e tāmaté ʻi he ongo faʻahí fakatouʻosi, ka naʻe fakamanavahē ange ia ʻi he faʻahi ʻa e kau Leimaná, he naʻe taʻemaluʻi honau sino telefuá mei he ngaahi tā mālohi naʻe fai ʻe he kau Nīfaí ʻaki ʻenau ngaahi heletaá mo ʻenau ngaahi hele pikó, ʻa ia naʻe fakahoko ha mate ʻi he meimei tā kotoa pē.

38 Ka ʻi he tafaʻaki ʻe tahá, naʻe tātātaha ʻa e tō ha tangata ʻi he kau Nīfaí, ʻi heʻenau ngaahi heletaá pea mo e mole ʻo e toto, he naʻe maluʻi ʻa kinautolu ʻi he ngaahi kupu laveangofua taha ʻo e sinó, pe naʻe maluʻi ʻa e ngaahi kupu laveangofua ange ʻo e sinó mei he tā ʻa e kau Leimaná, ʻaki ʻenau ngaahi sifa-fatafatá mo ʻenau ngaahi pā ki he nimá mo honau ngaahi tatā taú; pea ko ia naʻe fai atu ʻe he kau Nīfaí ʻa e tāmate ʻi he kau Leimaná.

39 Pea naʻe hoko ʻo pehē naʻe ilifia ʻa e kau Leimaná, koeʻuhi ko e fuʻu fakaʻauha lahi ʻiate kinautolú, ʻo aʻu ki heʻenau kamata ke hola ki he vaitafe Saitoné.

40 Pea naʻe tuli ʻa kinautolu ʻe Līhai mo ʻene kau tangatá; pea naʻe tekeʻi atu ʻa kinautolu ʻe Līhai ki he ngaahi vai ʻo Saitoné, pea naʻa nau aʻa atu ʻi he ngaahi vai ʻo Saitoné. Pea naʻe taʻofi ʻe Līhai ʻa ʻene kau taú ʻi he kauvai ʻo e vaitafe Saitoné ke ʻoua ʻe aʻa atu ai.

41 Pea naʻe hoko ʻo pehē naʻe fetaulaki ʻa Molonai mo ʻene kau taú mo e kau Leimaná ʻi he teleʻá, ʻi he kauvai ʻe taha ʻo e vaitafe Saitoné, ʻo nau kamata ke ʻoho atu kiate kinautolu ʻo tāmateʻi ʻa kinautolu.

42 Pea naʻe toe hola ʻa e kau Leimaná meiate kinautolu, ki he fonua ko Manataí; pea naʻe toe fakafetaulaki mai kiate kinautolu ʻa e ngaahi kau tau ʻa Molonaí.

43 Pea ʻi he hoko ʻení naʻe tau ʻa e kau Leimaná ʻo fuʻu mālohi ʻaupito, ʻio, kuo teʻeki ai ke hā ʻa e tau ʻaki ʻe he kau Leimaná ha fuʻu mālohi mo e loto-toʻa lahi pehē, ʻikai, kuo teʻeki ai talu mei he kamataʻangá.

44 Pea naʻe fakalotoʻi ʻa kinautolu ʻe he kau Sōlamí mo e kau ʻAmalekaí, ʻa ia ko honau kau ʻeikitau lalahí mo honau kau takí, kae ʻumaʻā mo Seilahemena, ʻa ia ko honau ʻeikitau lahí, pe ko honau taki lahí mo honau pulé; ʻio, naʻa nau tau ʻo hangē ko e fanga talākoní, pea naʻe tō ʻa e kau Nīfai tokolahi ʻi honau nimá, ʻio, naʻa nau fahiua ha konga lahi ʻo honau ngaahi tatā taú, ʻo nau tuiʻi ʻa e konga lahi ʻo honau ngaahi sifa-fatafatá, ʻo nau tuʻusi ʻa e lahi ʻo honau ngaahi nimá; pea naʻe pehē ʻa e tau ʻa e kau Leimaná ʻi heʻenau fuʻu ʻitá.

45 Ka neongo iá, naʻe ueʻi hake ʻa e kau Nīfaí ia ʻe ha ʻuhinga lelei ange, he naʻe ʻikai te nau taú ke fokotuʻu ha taha ko ha tuʻi, pe maʻu ha mālohi ka naʻa nau taú koeʻuhi ko honau ngaahi ʻapí mo ʻenau tauʻatāiná, mo honau ngaahi uaifí mo ʻenau fānaú, pea mo ʻenau ngaahi meʻa kotoa pē, ʻio, koeʻuhi ko e ngaahi ouau ʻo ʻenau lotú mo honau siasí.

46 Pea naʻa nau fai ʻa e meʻa naʻa nau ongoʻi ko honau fatongia ʻa ia naʻa nau moʻua ai ki honau ʻOtuá; he naʻe folofola ʻa e ʻEikí kiate kinautolu, kae ʻumaʻā foki ki heʻenau ngaahi tamaí; Kapau ʻoku ʻikai te mou halaia ʻi he ʻuluaki fakatupu filí, pe ko hono uá, ʻoua naʻa mou tuku ʻa kimoutolu ke tō ʻi he nima ʻo homou ngaahi filí.

47 Pea ko e tahá, kuo folofola foki ʻa e ʻEikí: Ke mou maluʻi homou ngaahi fāmilí ʻo aʻu ki he lilingi ʻo e toto. Ko ia ko e meʻa ʻeni naʻe tau ai ʻa e kau Nīfaí mo e kau Leimaná, ke maluʻi ʻa kinautolu, mo honau ngaahi fāmilí, mo honau ngaahi kelekelé, mo honau fonuá, mo ʻenau ngaahi totonú, mo ʻenau lotú.

48 Pea naʻe hoko ʻo pehē ʻi he vakai ʻe he kau tangata ʻa Molonaí ki he anga-fītaʻa pea mo e ʻita ʻa e kau Leimaná, naʻa nau meimei holomui ʻo hola meiate kinautolu. Pea ko Molonai, ʻi heʻene ʻiloʻi ʻa ʻenau fakakaukaú, naʻá ne fekau atu, ʻo poupouʻi honau lotó ʻaki ʻa e ngaahi fakakaukaú ni—ʻio, ʻa e ngaahi fakakaukau ki honau ngaahi kelekelé, mo ʻenau tauʻatāiná, ʻio, ʻa ʻenau tauʻatāina mei he nofo pōpulá.

49 Pea naʻe hoko ʻo pehē naʻa nau tafoki atu ki he kau Leimaná, ʻo nau tangi ʻi he leʻo pē taha ki he ʻEiki ko honau ʻOtuá, koeʻuhi ko ʻenau tauʻatāiná mo ʻenau tauʻatāina mei he nofo pōpulá.

50 Pea naʻa nau kamata ke fakafepakiʻi ʻa e kau Leimaná ʻaki ʻa e mālohi; pea ʻi he feituʻulaʻā pē ko ia naʻa nau tangi ai ki he ʻEikí koeʻuhi ko ʻenau tauʻatāiná, naʻe kamata ai ke hola ʻa e kau Leimaná mei honau ʻaó; ʻo nau hola ʻo aʻu ki he ngaahi vai ʻo Saitoné.

51 Ko ʻeni, naʻe tokolahi ange ʻa e kau Leimaná, ʻio, ʻo tokolahi ange ʻi hono liunga ua ʻo e tokolahi ʻo e kau Nīfaí; ka neongo iá, naʻe tekeʻi ʻa kinautolu kae ʻoua kuo nau kātoa fakataha ʻi he feituʻu pē ʻe taha ʻi he teleʻá ʻi he veʻe vaitafe Saitoné.

52 Ko ia naʻe ʻākilotoa ʻa kinautolu ʻe he ngaahi kau tau ʻa Molonaí, ʻio, ʻi he ongo kauvai fakatouʻosi ʻo e vaitafé, he vakai, naʻe tuʻu mai mei he hahaké ʻa e kau tangata ʻa Līhaí.

53 Ko ia, ʻi he vakai ʻe Seilahemena ki he kau tangata ʻa Līhaí ʻi he hahake ʻo e vaitafe Saitoné, pea mo e kau tau ʻa Molonai ʻi he hihifo ʻo e vaitafe Saitoné, pea kuo ʻākilotoa ʻa kinautolu ʻe he kau Nīfaí, naʻe tō ai kiate kinautolu ʻa e fuʻu ilifia lahi.

54 Ko ʻeni ko Molonai, ʻi heʻene vakai ki heʻenau ilifiá, naʻá ne fekau ki heʻene kau tangatá ke nau tuku ʻenau lilingi ʻa honau totó.