1 Afei yɛbɛsan yɛn akyiri wɔ yɛn twerɛtohɔsɛm no mu akɔ Amalikaea ne wɔn a wɔne no adwane kɔ ɛserɛ no so no, na hwɛ, ɔfaa wɔn a wɔne no kɔɔeɛ, no de wɔn kɔ Lamanfoɔ no mu wɔ Nifae asaase so, na ɔkanyann Lamanfoɔ no maa wɔn bo fuu Nifae nkurɔfoɔ no ara maa ɛno nti, Lamanfoɔ hene no maa wɔbɔɔ dawuro wɔ ne nkurɔfoɔ no mu wɔ asaase no nyina ara so sɛ wɔmmoaboa wɔn ano bio na wɔne Nifaefoɔ no nkɔko.

2 Na ɛbaa sɛ mmerɛ a wɔbɔɔ dawuro wɔ wɔn mu no, wɔn akoma tuu yie; aane wɔsuroo sɛ wɔbɛfom ɔhene no, na wɔsuroo nso sɛ wɔne Nifaefoɔ no bɛkɔ akɔko na wɔahwere wɔn nkwa. Na ɛbaa sɛ na wɔmpɛ sɛ wɔkɔ anaa sɛ na wɔn mu dodoɔ no ara mpɛ sɛ wɔdi ɔhene no mmaransɛm so.

3 Na afei ɛbaa sɛ ɔhene no bo fuui, ɛnam wɔn asoɔden nti; ɛno nti ɔmaa Amalikaea tumi wɔ n’asraafoɔ no a wɔyɛɛ setie maa deɛ ɔhyɛeɛ no, sɛ ɔnkɔhyɛ wɔn ma wɔmfa wɔn akodeɛ.

4 Afei hwɛ, yei ne deɛ na Amalikaea rehwehwɛ, ɛfiri sɛ na ɔyɛ nnipa a ne ho yɛ hare yie wɔ bɔneyɛ ho, ɛno nti ɔhyehyɛeɛ wɔ n’akoma mu sɛ ɔbɛtu Lamanfoɔ hene no adeɛ so.

5 Na afei wanya tumi wɔ Lamanfoɔ no a wɔne ɔhene no yɛ adwene no so, na ɔbɔɔ mmɔden sɛ ɔbɛma wɔn a wɔnnyɛ setie no apɛ n’asɛm; ɛno nti ɔkɔɔ baabi a wɔfrɛ hɔ Onida, na Lamanfoɔ no nyina ara adwane kɔ hɔ; ɛfiri sɛ wɔhunu sɛ asraafoɔ no reba, na wɔdwenee sɛ wɔreba abɛsɛe wɔn, ɛno nti wɔdwane kɔɔ Onida, kɔɔ baabi a akodeɛ wɔ no.

6 Na wɔayi ɔbarima bi sɛ ɔmera mmɛyɛ ɔhene ne ɔkandifoɔ wɔ wɔn so, ɛnam sɛ wɔasi wɔn adwene pi aweataaso sɛ wɔremma obiara nnhyɛ wɔn mma wɔne Nifaefoɔ no nkɔko.

7 Na ɛbaa sɛ wɔboaa wɔn ano wɔ bepɔ bi a wɔfrɛ no Antipa, de yɛɛ ahoboa sɛ wɔrebɛko.

8 Afei na ɛnnyɛ Amalikaea adwene sɛ ɔne wɔn rekɔko ɛfiri sɛ ɔhene no mmara nnkyerɛ saa; na mmom hwɛ, na ɛyɛ n’adwene sɛ Lamanfoɔ asraafoɔ no bɛpɛ n’asɛm, ama watumi adi wɔn anim na watu ɔhene no afiri adeɛ so na wafa aheman no.

9 Na hwɛ, ɛbaa sɛ ɔmaa n’asraafoɔ no sii wɔn ntomadan wɔ bɔnhwa no a ɛbɛn Antipa bepɔ no ho.

10 Na ɛbaa sɛ mmerɛ a adeɛ saaɛ no, ɔsomaa abɔfoɔ bi wɔ kokoa mu wɔ Antipa bepɔ no so nkɔse wɔn sɛ, ɔpɛɛ wɔn a wɔwɔ bepɔ no so no kandifoɔ no a ne din de Lehontae no sɛ ɔnsan mmra bepɔ no ase, na ɔpɛ sɛ ɔne no kasa.

11 Na ɛbaa sɛ mmerɛ a Lehontae nsa kaa nkera no, wɔampɛ sɛ ɔbɛsiane akɔ bepɔ no ase. Na ɛbaa sɛ Amalikaea somaae bio ne mprɛnu so sɛ ɔnsiane mmra fam. Na ɛbaa sɛ Lehontae ansiane amma; na ɔsomaa bio ne mprɛnsa so.

12 Na ɛbaa sɛ mmerɛ a Amalikaea hunu sɛ ne nsa nnka Lehontae ma ɔmmfiri bepɔ no so nsi fam no, ɔforoo bepɔ no, na ɛkaa kakra maa ɔduruu Lehontae nsraban no ho; na ɔsomaa bio ne mprɛnan so maa wɔkɔkaa asɛm no bio kyerɛɛ Lehontae, sɛ ɔpɛ sɛ ɔsi fam, na ɛyɛ a ɔmfa n’awɛnfoɔ nka ne ho mmra.

13 Na ɛbaa sɛ mmerɛ a Lehontae ne n’awɛnfoɔ siane baa Amalikaea hɔ no, Amalikaea see no sɛ ɔne n’asraafoɔ no nsiane mmra anadwo-berɛ mu, na wɔmɛtwa marima no a ɔhene no ama no tumi wɔ wɔn so no ho nhyia wɔ wɔn nsraban no ho, na ɔde wɔn bɛhyɛ Lehontae nsa, sɛ ɔbɛyɛ ɔno (Amalikaea) kandini a ɔtɔ so mmienu wɔ asraafoɔ no nyina ara so.

14 Na ɛbaa sɛ Lehontae ne ne marima sanee fam bɛtwaa Amalikaea marima no ho hyiaae, na ansa na wɔsɔree anɔpahema no, na Lehontae asraafoɔ no atwa wɔn ho ahyia.

15 Na ɛbaa sɛ mmerɛ a wɔhunu sɛ wɔatwa wɔn ho ahyia no, wɔkoto srɛɛ Amalikaea sɛ mma wɔne wɔn nuanom no nkɔko, ama wɔansɛe wɔn. Afei yei ne adeɛ a Amalikaea rehwehwɛ.

16 Na ɛbaa sɛ ɔde ne marima no maae, deɛ ɛtia ɔhene no mmara no koraa. Afei yei ne adeɛ a na Amalikaea rehwehwɛ, ama ne nhyehyɛeɛ a sɛ ɔbɛtu ɔhene no adeɛ so no aba mu.

17 Afei na ɛyɛ Lamanfoɔ no amammerɛ sɛ, sɛ wɔn kandifoɔ panin no wu a, wɔyi ɔkandifoɔ a ɔtɔ so mmienu no ma ɔbɛyɛ wɔn kandifoɔ panin.

18 Na ɛbaa sɛ Amalikaea hyɛɛ n’asomfoɔ no mu baako sɛ ɔmfa awuduro ngu Lehontae aduane mu nkakrankakra ma ɔnwu.

19 Afei mmerɛ a Lehontae wuiɛ no, Lamanfoɔ no yii Amalikaea ma ɔbɛyɛɛ wɔn kandifoɔ ne ɔhwɛsoni panin.

20 Na ɛbaa sɛ Amalikaea ne n’asraafoɔ no too santene (ɛfiri sɛ na ne nsa aka deɛ ɔpɛ) kɔɔ Nifae asaase so kuropɔn Nifae mu a na ɛyɛ ahenkuro.

21 Na ɔhene no ne n’awɛnfoɔ bɛhyiaa no, ɛfiri sɛ ɔdwenee sɛ Amalikaea adi n’ahyɛdeɛ so, na sɛ sɛɛ Amalikaea aboaboa asraafoɔ bebree a ɛte sei ano sɛ wɔne Nifaefoɔ nkɔko.

22 Mmom hwɛ, mmerɛ a ɔhene no pue sɛ ɔrebɛhyia no kwan no Amalikaea see n’asomfoɔ no sɛ wɔnkɔ nkɔhyia ɔhene no kwan. Na wɔkotoo ɔhene no, te sɛdeɛ wɔde anidie rema no ɛnam ne kɛseyɛ nti.

23 Na ɛbaa sɛ ɔhene no tenee ne nsa sɛ ɔresɔ wɔn mu ama wɔasɔre, sɛdeɛ Lamanfoɔ amammerɛ teɛ, a ɛyɛ asomdwoeɛ ho nsɛnkyerɛnee, amammerɛ a wɔsua firii Nifaefoɔ nkyɛn.

24 Na ɛbaa sɛ mmerɛ a ɔsɔɔ deɛ ɔdi kan no mu sɛ ɔnsɔre mfiri fam no, hwɛ ɔde sekan wɔɔ ɔhene no maa ɛwuraa n’akoma mu; na ɔhwee fam.

25 Afei ɔhene no asomfoɔ no dwanee; na Amalikaea asomfoɔ no teateaa mu kaa sɛ:

26 Hwɛ, ɔhene no asomfoɔ no de sekan awɔ n’akoma mu ama watɔ, na wɔadwane; hwɛ; momra mmɛhwɛ.

27 Na ɛbaa sɛ Amalikaea hyɛɛ n’asraafoɔ no sɛ wɔnkɔ nkɔhwɛ ade korɔ a ayɛ ɔhene no; na mmerɛ a wɔbaae no wɔhunu sɛ ɔhene no da ne mogya mu, Amalikaea yɛɛ sɛdeɛ ne bo afu no, na ɔkaa sɛ: Obiara a ɔdɔ ɔhene no, ɔnti n’asomfoɔ no na ɔnkyere wɔn mmra ma wɔnkum wɔn.

28 Na ɛbaa sɛ mmerɛ a wɔn a wɔdɔ ɔhene no nyina ara tee saa nsɛm yi no, wɔbaae na wɔbɛtii ɔhene no asomfoɔ no.

29 Afei mmerɛ a ɔhene no asomfoɔ no hunu sɛ asraafoɔ reti wɔn no, wɔn akoma tuu bio, na wɔdwane kɔɔ ɛserɛ no so, na wɔbaa Sarahɛmla asaase so na wɔbɛkaa Amon nkurɔfoɔ no ho.

30 Na asraafoɔ a wɔtii wɔn no sann wɔn akyiri a wɔn nsa anka wɔn; na Amalikaea nam naadaa kwan so de nyaa nkurɔfoɔ no akoma.

31 Na ɛbaa sɛ adeɛ kyeeɛ no, ɔne n’asraafoɔ no kɔɔ Nifae kuropɔn no mu, na ɔfaa kuropɔn no.

32 Na afei ɛbaa sɛ mmerɛ a ɔhemaa no tee sɛ wɔakum ɔhene no—ɛfiri sɛ Amalikaea somaa bɔfoɔ kɔɔ ɔhemaa no hɔ kɔbɔɔ no amaneɛ sɛ ɔhene no asomfoɔ no akum no, ama wama n’asraafoɔ ati wɔn, nso wɔn nsa anka wɔn, na wɔadwane.

33 Ɛno nti, mmerɛ a ɔhemaa no nsa kaa nkra yi no, ɔsoma maa wɔkɔka kyerɛɛ Amalikaea sɛ, ɔpɛ nso sɛ wɔde nkurɔfoɔ a wɔwɔ kuropɔn no mu hɔ no nkwa kyɛ wɔn; na ɔpɛɛ nso sɛ ɔba ne nkyɛn; na ɔpɛɛ nso sɛ ɔde adansefoɔ ba ma wɔdi adanseɛ wɔ ɔhene no wuo ho.

34 Na ɛbaa sɛ Amalikaea faa saa ɔsomfoɔ no a ɔkumm ɔhene no, ne wɔn a na wɔka ne ho nyina ara, na wɔkɔɔ ɔhemaa no hɔ, wɔ baabi a ɔte no; na wɔn nyina ara dii adanseɛ kyerɛɛ no sɛ ɔhene no ara ankasa n’asomfoɔ no na wɔkumm no; na wɔkaa nso sɛ: Wɔadwane; na yei nni adanseɛ ntia wɔn anaa? Na sei na wɔdii ɔhene no wuo no ho adanseɛ kyerɛɛ ɔhemaa no.

35 Na ɛbaa sɛ Amalikaea yɛ maa ɔhemaa no pɛɛ n’asɛm, na ɔwaree no; na sei na ɛnam n’asisie ne n’asomfoɔ no naadaa so maa ne nsa kaa aheman no; aane, obiara gyee no too mu wɔ asaase no nyina ara so, ne Lamanfoɔ nkurɔfoɔ no mu sɛ ɔno ne ɔhene, na wɔn nom ne Lamanfoɔ ne Lemuelfoɔ ne Ismaelfoɔ a wɔaka wɔn ho abɔ mu ne Nifaefoɔ atuatefoɔ no nyina ara, ɛfiri Nifae ahennie so de bɛsi saa mmerɛ yi.

36 Afei saa atuatefoɔ yi nyaa kasakyerɛ korɔ ne amanebɔ korɔ no ara firii Nifaefoɔ no, aane, wɔnyaa kasakyerɛ korɔ wɔ Awurade nimdeɛ ho, yeinom nyina ara akyiri no, ɛyɛ nnwanwa sɛ wɔbɛka sɛ wɔtee atua no, ankyɛre koraa na wɔyɛɛ wɔn akoma denden na wɔannu wɔn ho, na wɔbɛyɛɛ kekakeka, atirimuɔden na na wɔn ho yɛ hu yie kyɛn Lamanfoɔ no—Wɔne Lamanfoɔ no nomm wɔn amammerɛ no; na wɔmaa akwadworɔ baa wɔn mu, ne mmususɛm ahodoɔ nyina ara; aane, wɔn werɛ firii Awurade wɔn Nyankopɔn koraa.