1 Na afei ɔbaa dɛ, ber a Amalickiah ne nsa kãa ahenman no, ɔhyɛɛ ase ntsɛmara dɛ ɔrekenyan Lamanfo no hɔn akoma etsia Nephi no dɔm no; nyew, oyii nyimpa ma wokegyinaa hɔn abantsentsen no do kasaa kyerɛɛ Lamanfo no dze tsiaa Nephifo no.

2 Na dɛm na ɔdze kenyaan hɔn akoma dze tsiaa Nephifo no araa ma atsɛmbuafo no hɔn afe a otsĩa duakron n’ewiei no mu, ber a ne nhyehyɛɛ no dzii mu ara yie no, nyew, na wɔhyɛɛ no hen wɔ Lamanfo do no, ɔpɛɛ so dɛ odzi hen wɔ asaase nyina do, nyew, wɔ nkorɔfo nyinara a wɔwɔ asaase no do, Nephifo nye Lamanfo so do.

3 Dɛm ntsi ne nhyehyɛɛ no edzi mu, osiandɛ oepirim Lamanfo no hɔn akoma na oefura hɔn adwen, na oenunu hɔn ma woenya ebufuw araa ma ɔaboaboa hɔn dɔm pii no ano dɛ wɔnye Nephifo no rokɔkõ.

4 Na osian no dɔm no hɔn dodow no ntsi, osii n’adwen tadua dɛ ɔbɛkã Nephifo ahyɛ ne tum ase na ɔdze hɔn aba nkowaasom mu.

5 Dɛm ntsi ɔyɛɛ Zoramfo hɔn mu binom asahen ekunyin, osiandɛ hɔn na wɔnye Nephifo no edzi nkitaho na wonyim mbrɛ hɔn ahoɔdzen tse nye hɔn sumabew, nye hɔn nkurow a ɔyɛ mberɛw; dɛm ntsi ɔyɛɛ hɔn asahen ekunyin wɔ no nsordaafo do.

6 Na ɔbaa dɛ wɔfaa hɔn ntamadan, na wosii mu dze faa sar no do dɛ wɔrokɔ Zarahemla asaase do.

7 Afei ɔbaa dɛ ber a Amalickiah nam ndabraba nye akɔhwi kwan do dze regye tum no, nna Moroni so risiesie nkorɔfo adwen ma woedzi nokwar ama Ewuradze hɔn Nyankopɔn.

8 Nyew, ɔrema Nephifo nsordaafo no nkuranhyɛ na orisisi aban nkakraba, anaa sumabew; ɔdze dɛtse risisi dze abɔ no nsordaafo ho ban na ɔdze abo so rotow ban etwa hɔnho, nye hɔn nkurow nye hɔn nsaase nyinara ho ehyia.

9 Na hɔn mbea a bambɔ no nnyɛ dzen no, ɔdze dɔm pii koguu hɔ; dɛm na ɔyɛe dze bɔɔ asaase a ɔyɛ Nephifo dze no ho ban yie.

10 Na dɛm na ɔyɛe dɛ ɔdze robɔ hɔn ahotɔ, hɔn nsaase, hɔn nyernom, nye hɔn mba, nye hɔn asomdwee ho ban ama woeetum atsena ase ama Ewuradze hɔn Nyankopɔn, na ama woeetum ekura dzekodze a ɔnam do ma hɔn atamfo frɛɛ hɔn Christianfo no mu dzen.

11 Na Moroni yɛ nyimpa pankor a noho yɛ dzen; ɔyɛ nyimpa a ɔwɔ ntseasee mapã; nyew, nyimpa a n’enyi nngye bɔgya kã gu ho; nyimpa a ne kra enyi gye ne man n’ahotɔ na fahodzi ho, na ɔdwen mbrɛ ɔbɛyɛ a n’enuanom befi nkowaasom nye dɔnkɔyɛ mu;

12 Nyew, nyimpa a ndaase ahyɛ n’akoma mu mã a ɔdze ma Nyankopɔn wɔ ndzinoa na nhyira pii a ohue gu no nkorɔfo do; nyimpa a odzi dwuma pii wɔ no nkorɔfo hɔn yieyɛ nye bambɔ ntsi.

13 Nyew, na ɔyɛ nyimpa a ne gyedzi a ɔwɔ Christ mu si pi, na ɔakã ntam edzi nsew dɛ ɔbɔbɔ no nkorɔfo, nye ne kyɛfa nye ne man, nye ne nyamesom ho ban, sɛ ɔba dɛ ɔwɔ dɛ ɔhwer no nkwa mpo a.

14 Afei wɔakyerɛkyerɛ Nephifo no dɛ wɔmbɔ hɔnho ban wɔ hɔn atamfo ho, sɛ ɔba dɛ ɔsɛ dɛ wɔkã bɔgya gu mpo a; nyew, na wɔakyerɛkyerɛ hɔn so dɛ mma wɔnnto fintsidua da, nyew, na mma wɔnntwe afõwa wɔ obiara do gyedɛ ɔtamfo nko, na eso gyedɛ wɔdze robɔ hɔn nkwa ho ban.

15 Na hɔn gyedzi nye dɛ sɛ wɔyɛ dɛm a Nyankopɔn bɛyɛ hɔn prɔmprɔm wɔ asaase no do, anaa ne sin ara nye dɛ, sɛ wɔdze gyedzi dzi Nyankopɔn ne mbrasɛm do a ɔbɛyɛ hɔn prɔmprɔm wɔ asaase no do; nyew, ɔabɔ hɔn kɔkɔ dɛ wonguan, anaadɛ wɔmboaboa hɔnho nkɔkõ, dɛ mbrɛ mbusu a ɔreba hɔn do tse;

16 Na eso dɛ Nyankopɔn bɛda no edzi akyerɛ hɔn, sɛ wɔnkõ mfa mbɔ hɔnho ban mfi hɔn atamfo ho a, na sɛ wɔyɛ dɛm a, Ewuradze bɛgye hɔn; na Moroni ne gyedzi nye iyi, na n’akoma hyɛɛ noho enyimnyam wɔ iyi mu; nnyɛ bɔgyakã ho, na mbom wɔ papayɛ ho, dɛ ɔrokora nkorɔfo do, nyew, na obedzi Nyankopɔn ne mbrasɛm do, nyew, na obeyi emumuyɛ akwa.

17 Nyew, nokwar, nokwar mese hom dɛ, sɛ nyimpa nyinara yɛɛ dɛ, na wɔtse dɛ, anaa nkyɛ dabi wɔbɛyɛ dɛ Moroni a, hwɛ, nkyɛ hɛl tum nyina bɔwosow afebɔɔ; nyew, nkyɛ abɔnsam rinnya tum wɔ adasamba hɔn akoma do da.

18 Hwɛ, ɔtse dɛ Mosiah ne babanyin Ammon ara pɛr, nyew, nye Mosiah ne mbabanyin nkaafo no so, nyew, ɔtse dɛ Alma na ne mbabanyin so, osiandɛ hɔn nyinara yɛ Nyame nyimpa.

19 Afei hwɛ, Helaman na n’enuanom no hɔn so soom dɔm no tse dɛ Moroni ara pɛr; na wɔkãa Nyame n’asɛm no, na nyimpa biara a otsiee hɔn nsɛm no wonumaa hɔn kɔr nnuho mu.

20 Na dɛm na wɔkɔr do, na osian hɔn nsɛm no ntsi dɔm no brɛɛ hɔnho adze araa ma wɔsɔɔ Ewuradze enyi, na dɛm ntsi akõkoekõ na wentwiwentwi biara ennsi hɔn mu, nyew, bɛyɛ mfe ebiasa ntamu mpo.

21 Na mbom dɛ mbrɛ mekãe no, afe duakron n’ewiei mu no, nyew, ammfa ho koraa dɛ wɔtse asomdwee mu, ɔbaa dɛ wɔnye hɔn enuanom Lamanfo no kɔkõ, naaso nna ɔnnyɛ hɔn pɛ.

22 Nyew, ne sin ara nye dɛ, wɔnye Lamanfo ɔkõ no kɔr do mfe pii a, ɔwɔ mu dɛ nna wɔmmpɛ.

23 Afei ɔyɛɛ hɔn yaw dɛ wɔfaa akodze na wɔnye Lamanfo no kõe, osiandɛ hɔn enyi nngye ho dɛ wɔbɛkã bɔgya egu; nyew, na nnyɛ ne nyinara nye iyi—ɔyɛɛ hɔn yaw dɛ ɔnam hɔn do na hɔn enuanom mu pii efi wiadze yi mu kɔ onnyiewiei wiadze mu a wonnsiesiee hɔnho dɛ wɔnye hɔn Nyankopɔn bedzi ehyia.

24 Naaso, wɔremma kwan mma wɔnnsɛɛ hɔn nkwa, ma dɛm ewudzifo etsirmɔdzemfo yi a nkyɛ wɔyɛ hɔn enuanom, nyew, na wɔatsew etua efi hɔn asɔr mu, na wɔagye hɔn ho, na wɔakɔdɔm Lamanfo na wɔrebɛsɛɛ hɔn na woekuku hɔn yernom na hɔn mba.

25 Nyew, wɔremmpen mma hɔn enuanom yi nndzi dɛw wɔ Nephifo bɔgyaa do, wɔ mbertsentsen a binom wɔ hɔ a wodzi Nyankopɔn ne mbrasɛm do, osiandɛ Ewuradze n’anohoba nye dɛ, sɛ wodzi ne mbrasɛm do a wɔbɛyɛ prɔmprɔm wɔ asaase no do.