1 Pea ko ʻeni naʻe hoko ʻo pehē, ʻi he maʻu pē ʻe ʻAmalekaia ʻa e puleʻangá naʻá ne kamata ke fakatupu ʻa e ʻita ʻa e kau Leimaná ki he kakai ʻo Nīfaí; ʻio, naʻá ne fili ha kau tangata ke malanga ki he kau Leimaná mei honau ngaahi tauá, ʻo lauʻikoviʻi ʻa e kau Nīfaí.

2 Pea naʻe pehē ʻene ueʻi hake honau lotó ke ʻita ki he kau Nīfaí, ʻo aʻu ki he konga ki mui ʻo e taʻu hongofulu mā hiva ʻo e pule ʻa e kau fakamāú, kuó ne lava ʻo fakahoko ʻene ngaahi fakakaukau kotoa pē, ʻio, kuo fakanofo ia ko e tuʻi ki he kau Leimaná, naʻá ne feinga foki ke puleʻi kotoa ʻo e fonuá, ʻio, pea mo e kakai kotoa pē naʻe ʻi he fonuá, ʻa e kau Nīfai pea mo e kau Leimaná foki.

3 Ko ia kuó ne lava ʻo fakahoko ʻene fakakaukaú, he kuó ne fakafefeka ʻa e loto ʻo e kau Leimaná pea fakakuihi honau ʻatamaí, pea ueʻi ʻa kinautolu ke ʻita, ʻo aʻu ki heʻene tānaki fakataha mai ʻa e fuʻu kakai tokolahi ʻaupito ke nau ʻalu atu ke tau mo e kau Nīfaí.

4 He kuo fakapapau hono lotó, koeʻuhi ko e fuʻu tokolahi ʻa hono kakaí, ke ikunaʻi ʻa e kau Nīfaí pea ke ʻomi ʻa kinautolu ke nofo pōpula.

5 Pea ko ia naʻa ne fili ha kau ʻeikitau pule mei he kau Sōlamí, he naʻa nau maheni taha mo e ivi ʻo e kau Nīfaí, mo honau ngaahi potu hūfangá, mo e ngaahi potu vaivai taha ʻo honau ngaahi koló; ko ia naʻá ne fili ʻa kinautolu ke hoko ko e kau ʻeikitau pule ki heʻene ngaahi kau taú.

6 Pea naʻe hoko ʻo pehē naʻa nau hiki honau nofoʻanga taú, ʻo nau hiki atu ki he fonua ko Seilahemalá ʻi he feituʻu maomaonganoá.

7 Ko ʻeni naʻe hoko ʻo pehē ʻi he lolotonga ʻa e feingaʻi pehē ʻe ʻAmalekaia ke ne maʻu ʻa e mālohi ʻi he kākā mo e tauhelé, kae lolotonga ia, naʻe teuteuʻi foki ʻe Molonai ia ʻa e fakakaukau ʻa e kakaí ke tui faivelenga ki he ʻEiki ko honau ʻOtuá.

8 ʻIo, naʻá ne langa hake ke mālohi ʻa e kau tau ʻa e kau Nīfaí, mo langa ha fanga kiʻi kolotau iiki, pe ko e ngaahi potu hūfanga; ʻo nau keli hake ha ngaahi ʻā kelekele ʻo takatakai ke ʻā takaiʻi ʻaki ʻene ngaahi kau taú, pea nau langa foki ha ngaahi ʻā maka ke ʻā takaiʻi ʻa kinautolu, ʻo takatakaiʻi honau ngaahi koló mo e ngaahi ngataʻanga ʻo honau ngaahi fonuá; ʻio, ʻo takatakai ʻi he fonuá kātoa.

9 Pea ʻi honau ngaahi kolotau vaivai tahá naʻá ne tuku ai ʻa e kau tangata tokolahi ange; pea naʻe pehē ʻene langa kolotau mo ngaohi ke mālohi ʻa e fonua ʻa ia naʻe maʻu ʻe he kau Nīfaí.

10 Pea naʻe pehē ʻene teuteu ke maluʻi ʻenau tauʻatāiná, mo honau ngaahi kelekelé, mo honau ngaahi uaifí, mo ʻenau fānaú, mo ʻenau melinó, koeʻuhí ke nau moʻui ki honau ʻEiki ko honau ʻOtuá, pea ke nau lava ʻo fakatolonga ʻa e meʻa naʻe ui ʻe honau ngaahi filí ko e ngāue ʻa e kau Kalisitiané.

11 Pea ko ha tangata sino mālohi mo kaukaua ʻa Molonai; ko ha tangata ia naʻá ne maʻu ʻa e ʻilo haohaoa, ʻio, ko ha tangata naʻe ʻikai ke manako ki he lilingi totó; ko ha tangata naʻe fiefia hono laumālié ʻi he taʻehaʻisia mo e tauʻatāina ʻa hono fonuá, mo hono kāinga mei he nofo pōpulá mo e nofo hopoaté;

12 ʻIo, ko ha tangata ʻa ia naʻe fonu hono lotó ʻi he fakafetaʻi ki hono ʻOtuá, koeʻuhi ko e ngaahi faingamālie mo e ngaahi tāpuaki lahi kuó ne foaki ki hono kakaí; ko ha tangata ʻa ia naʻe fuʻu ngāue lahi ʻaupito koeʻuhi ko e lelei mo e nofo malu ʻa hono kakaí.

13 ʻIo, pea ko ha tangata ia ʻa ia naʻe tuʻu maʻu ʻi he tui kia Kalaisí, pea kuó ne fakapapau ʻi ha fuakava ke maluʻi hono kakaí mo ʻene ngaahi totonú, mo hono fonuá, mo ʻene lotú, neongo ʻe aʻu ki ha mole ai hono totó.

14 Ko ʻeni naʻe akonekina ʻa e kau Nīfaí ke nau maluʻi ʻa kinautolu mei honau ngaahi filí, ʻo aʻu ki he lilingi ʻo e toto ʻo kapau ʻe fie maʻu; ʻio, pea naʻe akonekina foki ʻa kinautolu ke ʻoua naʻa fai hala ki ha taha, ʻio, pea ke ʻoua naʻa nau teitei hiki hake ʻenau heletaá kae ngata pē ʻi he tau mo hanau fili, tuku kehe ʻo kapau ko e maluʻi ʻenau moʻuí.

15 Pea ko e meʻa ʻeni naʻa nau tui ki aí, pea ʻi heʻenau fai peheé ʻe tali lelei ai ʻe he ʻOtuá ʻa kinautolu ʻi he fonuá, pe ko hono fakalea ʻe tahá, kapau te nau tui faivelenga ʻi hono tauhi ʻo e ngaahi fekau ʻa e ʻOtuá te ne tali lelei ʻa kinautolu ʻi he fonuá, ʻio, te ne fakatokanga kiate kinautolu ke nau hola, pe teuteu ki he tau, ʻo fakatatau ki heʻenau tuʻutāmakí.

16 Pea ko e tahá foki, ʻe fakahā ʻe he ʻOtuá kiate kinautolu ʻa e feituʻu ke nau ʻalu ki ai ke maluʻi ʻa kinautolu mei honau ngaahi filí, pea ʻi heʻenau fai peheé, ʻe fakahaofi ʻa kinautolu ʻe he ʻEikí; pea ko e meʻa ʻeni naʻe tui ki ai ʻa Molonaí, pea naʻe vīkiviki ai ʻa hono lotó; kae ʻikai ʻi he lilingi ʻo e totó ka ʻi he fai lelei, ʻi he maluʻi hono kakaí, ʻio, ʻi he tauhi ʻo e ngaahi fekau ʻa e ʻOtuá, ʻio, pea mo e taʻofi ʻa e angahalá.

17 ʻIo, ko e moʻoni, ko e moʻoni, ʻoku ou tala kiate kimoutolu, kapau kuo tatau, pe ʻoku tatau, pe ʻe tatau ʻa e kakai kotoa pē mo Molonai, vakai, kuo luluʻi ai ʻo taʻengata ʻa e ngaahi mālohi ʻo helí; ʻio, kuo ʻikai maʻu ʻe he tēvoló ha mālohi ki he loto ʻo e fānau ʻa e tangatá.

18 Vakai, ko e tangata ia naʻe hangē ko ʻĀmoni, ko e foha ʻo Mōsaiá, ʻio, pea mo e ngaahi foha kehe foki ʻo Mōsaiá, ʻio, kae ʻumaʻā foki ʻa ʻAlamā mo hono ngaahi fohá, he ko e kau tangata kinautolu kotoa pē ʻa e ʻOtuá.

19 Ko ʻeni vakai, naʻe ʻikai ke siʻi hifo ʻa e ʻaonga ʻo Hilamani mo hono kāingá ki he kakaí ʻia Molonai; he naʻa nau malanga ʻaki ʻa e folofola ʻa e ʻOtuá, pea naʻa nau papitaiso ki he fakatomalá ʻa e kakai kotoa pē naʻe fie tokanga ki heʻenau ngaahi leá.

20 Pea ko ia naʻa nau ʻalu atu, pea naʻe fakavaivaiʻi ʻe he kakaí ʻa kinautolu koeʻuhi ko ʻenau ngaahi leá, ʻo aʻu ki hono fuʻu ʻofeina lahi ai ʻa kinautolu ʻe he ʻEikí, pea ko ia naʻa nau tauʻatāina ai mei he ngaahi tau mo e ngaahi fakakikihi ʻiate kinautolú, ʻio, ʻi he taʻu ʻe fā.

21 Kae, hangē ko ia ko ʻeku leá, ʻi he konga ki mui ʻo e taʻu hono hongofulu mā hivá, ʻio, neongo ʻenau nofo melino ʻiate kinautolú, naʻe faʻa fakamālohiʻi kinautolu ke nau tau taʻeloto pē mo honau kāinga, ko e kau Leimaná.

22 ʻIo, ko hono moʻoní, naʻe ʻikai ngata ʻenau ngaahi tau mo e kau Leimaná ʻi he ngaahi taʻu lahi, neongo hono lahi ʻo ʻenau taʻeloto ki aí.

23 Ko ʻeni, naʻa nau loto-mamahi ke toʻo mahafu ke tauʻi ʻa e kau Leimaná, koeʻuhi naʻe ʻikai te nau manako ʻi he lilingi ʻo e totó; ʻio, pea naʻe ʻikai ko ia pē—ka naʻa nau loto-mamahi ke hoko ko e ʻuhinga ke fekauʻi atu ai ha fuʻu tokolahi ʻo honau kāingá mei he māmani ko ʻení ki ha maama taʻengata, ʻoku teʻeki ke nau teuteu ke feʻiloʻaki mo honau ʻOtuá.

24 Ka neongo iá, naʻe ʻikai te nau fie tuku hifo ʻenau moʻui, kae tāmateʻi honau ngaahi uaifí mo ʻenau fānaú ʻi he anga-kaivao ʻa e faʻahinga naʻa nau hoko ʻi muʻa ko honau kāingá, ʻio, pea nau mavahe mei honau siasí, ʻo nau liʻaki ʻa kinautolu pea nau toe ʻalu ke fakaʻauha ʻa kinautolu ʻi heʻenau kau mo e kau Leimaná.

25 ʻIo, naʻe ʻikai te nau faʻa kātaki ke fiefia honau kāingá ʻi he toto ʻo e kau Nīfaí, lolotonga ʻoku kei ʻi ai ha niʻihi ʻoku nau tauhi ʻa e ngaahi fekau ʻa e ʻOtuá, he ko e talaʻofa ʻa e ʻEikí, kapau te nau tauhi ʻene ngaahi fekaú te nau tuʻumālie ʻi he fonuá.