1 Ma o lenei sa oo i le masina e sefulu ma le tasi o le lona sefulu ma le iva o tausaga, i le aso sefulu o le masina, na vaaia ai autau a sa Lamanā ua agai latalata atu i le laueleele o Amonaea.

2 Ma faauta, sa uma ona toe fausia o le aai, ma sa tuu e Moronae se autau i tafatafa o tuaoi o le aai, ma sa latou lafo i luga le eleele faataamilo e puipuia ai i latou mai i ufanafana ma maa a sa Lamanā; auā faauta, sa latou tau i maa ma ufanafana.

3 Faauta, ua ou fai atu sa toe fausia le aai o Amonaea. Ou te fai atu ia te outou, ioe, sa toe fausia se vaega; ma ona sa faaumatia e sa Lamanā i se taimi muamua ona o le amioletonu o tagata, o lea na latou manatu ai o le a faigofie ona latou toe mauaina mo i latou.

4 Ae faauta, sa matuā tele lava lo latou faanoanoa; auā faauta, sa eli e sa Nifaē se faupuega o eleele faataamilo ia i latou, lea sa matuā maualuga tele lava sa le mafai ai e sa Lamanā ona ta a latou maa ma fana a latou ufanafana ia te i latou ina ia lavevea ai, pe na mafai foi ona latou o mai i luga o i latou vagana ai ua ala mai i lo latou nofoaga e ulufale mai ai.

5 O lenei sa matuā ofo lava kapeteni sili o sa Lamanā i le taimi lea, ona o le popoto o sa Nifaē i le sauniuniga o o latou nofoaga o le saogalemu.

6 O lenei sa manatu ta’ita’i o sa Lamanā, ona o le toatele o lo latou aofai, ioe, sa latou manatu e tatau ona latou maua le avanoa latou te o mai ai i luga o i latou e pei ona latou faia muamua; ioe, ma sa latou saunia foi i latou lava faatasi ma talitā, ma ufifatafata; ma sa latou saunia foi i latou lava faatasi ma ofu pa’u, ioe, o ofu mafiafia lava e ufiufi ai lo latou le lavalavā.

7 Ma ona sa faapea ona latou saunia, sa latou manatu ai o le a faigofie ona latou faatoilalo ma pulea o latou uso i le amo o le pologa, pe fasioti ma fasi faataugā i latou e tusa ma o latou loto.

8 Ae faauta, i lo latou ofo tele, sa saunia i latou mo i latou, i se ala sa le’i iloa lava i totonu o le fanau a Liae. O lenei sa latou saunia mo sa Lamanā, e tau e tusa ai ma faatonuga a Moronae.

9 Ma sa oo ina matuā ofo tele sa Lamanā, po o sa Amalekiā, i le ala sa latou saunia ai mo taua.

10 O lenei, a na alu ifo le tupu o Amalekia mai le laueleele o Nifae, e taimua i lana autau, atonu ua ia faatonu sa Lamanā ia latou osofaia sa Nifaē i le aai o Amonaea; aua faauta, sa le popole o ia mo le toto o ona tagata.

11 Ae faauta, sa lei alu ifo Amalekia lava ia i le taua. Ma faauta, sa fefefe ana kapeteni sili e osofai sa Nifaē i le aai o Amonaea, ona ua sui e Moronae le puleaina o mea i totonu o sa Nifaē, sa oo ai ina faanoanoa sa Lamanā i o latou nofoaga na solomuli i ai ma sa le mafai ai ona latou o atu i ai latou.

12 O lea na latou solomuli atu ai i le vao, ma alu la latou togalauapiga ma savavali atu agai i le laueleele o Noa, ua manatu o le nofoaga lena e sosoo le sili ona lelei mo i latou e osofai ai sa Nifaē.

13 Ona sa latou le iloa ua uma ona tuiolo e Moronae, pe ua uma ona ia fausia o olo puipui, mo aai taitasi i le laueleele faataamilo atoa; o lea na latou savavali atu ai i le laueleele o Noa ma se naunautaiga maumaututū; ioe, sa o mai i luma o latou kapeteni sili ma faia se tautoga o le a latou faaumatiaina tagata o lena aai.

14 Ae faauta, i lo latou ofo tele, o le aai o Noa, lea sa avea ma nofoaga vaivai i aso ua mavae, talu ai ona o Moronae, ua avea nei ma aai malosi, ioe, ua sili atu le malosi na i lo le aai o Amonaea.

15 Ma o lenei, faauta, o le poto lea sa ia Moronae; ona sa manatu o ia o le a latou matata’u i le aai o Amonaea; ma ona o le aai o Noa sa avea ma vaega aupito sili ona vaivai o le laueleele i aso ua mavae, o lea o le a latou savavali atu ai iina e tau ai; ma sa faapea lava ona oo e tusa ma ona manao.

16 Ma faauta, sa tofia e Moronae o Liae e avea ma kapeteni sili i luga o tane o lena aai; ma o Liae lava lea o le na tau ma sa Lamanā i le vanu i le itu i sasae o le vaitafe o Saitonu.

17 Ma o lenei faauta sa oo ina ua iloa e sa Lamanā o Liae ua pulea le aai sa latou toe faanoanoa, ona sa latou fefefe tele ia Liae; ae ui i lea sa faia e o latou kapeteni sili se tautoga e osofai le aai; o lea na latou sii a’e ai a latou autau.

18 O lenei faauta, sa le mafai e sa Lamanā ona o atu i totonu o o latou olo o le puipuiga saogalemu i se isi lava ala vagana ai i le faitotoa e ulufale mai ai, ona o le maualuga o le faupuega sa ati i luga, ma le loloto o le utu sa eli faataamilo ai, vagana ai i le faitotoa e ulufale mai ai.

19 Ma sa faapea ona saunia o sa Nifaē e faaumatia i latou uma o e e taumafai e fe’a’ei ae i luga e ulu mai totonu i le olo i soo se isi lava auala, e ala i le ta atu i luga o maa ma le fana atu o ufanafana ia i latou.

20 Sa faapea ona latou saunia, ioe, o se vaega o o latou tane malolosi, latou te ta i lalo i a latou pelu ma a latou maata, i latou uma o e e taumafai e o mai i totonu o lo latou nofoaga o le puipuiga saogalemu e ala mai i le faitotoa e ulufale mai ai; ma sa faapea ona latou saunia e puipui i latou lava e faasaga ia sa Lamanā.

21 Ma sa oo ina avae e kapeteni a sa Lamanā a latou autau i luma o le faitotoa e ulufale mai ai, ma amata ona tau ma sa Nifaē, ina ia o mai i totonu o lo latou nofoaga o le puipuiga saogalemu; ae faauta, sa tulia i latou e faafoi i tua mai lea taimi i lea taimi, sa oo ina fasiotia i latou i se faasauaga tele.

22 O lenei ina ua latou iloa ua le mafai ona latou maua se malosi i luga o sa Nifaē i le mea e ui mai ai, sa amata ona latou eli i lalo a latou faupuega eleele ina ia mafai ona latou maua o se ala mo a latou autau, ina ia mafai ona latou maua se avanoa tutusa e tau ai; ae faauta, i ia taumafaiga, sa tafi ese ai i latou i maa ma ufanafana na sasau ma fana atu ia te i latou; ma nai lo le faatumuina o o latou utu i le solofa i lalo o faupuega eleele, sa faatumuina se vaega o ia utu i o latou tagata oti ma tagata manunua.

23 Sa faapea ona maua e sa Nifaē le malosi atoatoa i luga o o latou fili; ma sa faapea ona taumafai o sa Lamanā e faaumatia sa Nifaē seia oo ina fasiotia uma ai o latou kapeteni sili; ioe, ma e sili atu i le afe sa Lamanā sa fasiotia; ae, i le isi itu, sa leai se tagata e toatasi o sa Nifaē na fasiotia.

24 Sa i ai pe tusa ma le limasefulu o ē na manunu’a, o ē na lē puipuia mai ufanafana a sa Lamanā i le mea e ui mai ai, peitai sa puipuia i latou ia latou talitā, ma a latou ufifatafata, ma o latou puloutau, sa oo ai ina faamanu’alia o latou vae, o le tele o ia manu’a sa matuā leaga tele lava.

25 Ma sa oo ina ua vaai sa Lamanā ua fasiotia uma o latou kapeteni sili, sa latou sosola atu i le vao. Ma sa oo ina latou toe foi atu i le laueleele o Nifae, e ta’u i lo latou tupu, o Amalekia, o lē o se sa Nifaē i lona fanau mai, e uiga i lo latou faaumatiaga tele.

26 Ma sa oo ina ita tele o ia i ona tagata, ona ua le taulau lona manao mo sa Nifaē; sa le mafai e ia ona pulea i latou i lalo o le amo o le pologa.

27 Ioe, sa ita tele o ia, ma sa ia upuvale i le Atua, ma Moronae foi, ma tauto i se tautoga o le a ia inuina lona toto; ma o le pogai o lenei mea ona sa tausi e Moronae poloaiga a le Atua i le saunia mo le saogalemu o ona tagata.

28 Ma sa oo e faapea i le tasi itu, sa faafetai atu le nuu o Nifae i le Alii lo latou Atua, ona o lona mana lē mafaatusalia i le laveaiina o i latou mai lima o o latou fili.

29 Ma sa faapea ona i’u o le lona sefulu ma le iva o tausaga o le nofoaiga a faamasino i le nuu o Nifae.

30 Ioe, ma sa faaauau pea le i ai o le filemu i totonu o i latou, ma le manuia tele lava i le ekalesia ona o lo latou ua’i atu ma le filigā sa latou tuuina atu i le afioga a le Atua, lea sa tala’i atu ia te i latou e Helamana, ma Sepulona, ma Korianetona, ma Amona ma ona uso, ioe, ma i latou uma o e na faauuina i le faatulagaga paia a le Atua, ua papatisoina i le salamo, ma auina atu e tala’i i totonu o le nuu.