1 Pea ko ʻeni naʻe hoko ʻo pehē ʻi he kamataʻanga ʻo e taʻu hono tolungofulu ʻo e pule ʻa e kau fakamāú, ʻi hono ua ʻo e ʻahó ʻi he ʻuluaki māhiná, naʻe maʻu ʻe Molonai ha tohi meia Hilamani, ʻo fakamatalaʻi mai ʻa e ngaahi meʻa kuo hoko ki he kakai ʻi he potu ko ia ʻo e fonuá.

2 Pea ko e ngaahi lea ʻeni ʻa ia naʻá ne tohí, ʻo pehē: ʻE hoku tokoua ʻofeina, ko Molonai, ʻi he ʻEikí pea ʻi he ngaahi faingataʻa foki ʻo ʻetau tau; vakai, ʻe hoku tokoua ʻofeina, ʻoku ʻi ai haʻaku meʻa ʻe niʻihi ke fakahā kiate koe ʻo kau ki heʻemau tau ʻi he potu ko ʻeni ʻo e fonuá.

3 Vakai, ko e toko ua afe ʻo e ngaahi foha ʻo e kau tangata ko ia naʻe ʻohifo ʻe ʻĀmoni mei he fonua ko Nīfaí—ko ʻeni ʻokú ke ʻilo ko kinautolu ní ko e hako ʻo Leimana ʻa ia ko e foha lahi ʻo ʻetau tamai ko Līhaí;

4 Ko ʻeni ʻoku ʻikai ʻaonga ke u toe fakamanatuʻi atu kiate koe ʻo kau ki heʻenau ngaahi talatukufakaholó pe ko ʻenau taʻetuí, he ʻokú ke ʻilo ki he ngaahi meʻa kotoa ko ʻení—

5 Ko ia ʻoku feʻunga pē kiate au ke u fakahā atu kiate koe kuo toʻo ʻe he toko ua afe ʻo e kau talavou ko ʻení ʻa ʻenau mahafu taú, pea nau loto ke u hoko ko honau takí; pea kuo mau ō mai ke maluʻi hotau fonuá.

6 Pea ko ʻeni ʻokú ke ʻilo foki ki he fuakava ʻa ia naʻe fai ʻe heʻenau ngaahi tamaí, ʻe ʻikai te nau toʻo hake ʻenau ngaahi mahafu taú ke tauʻi ʻaki honau kāingá ke lilingi toto.

7 Ka ʻi hono uofulu mā ono ʻo e taʻú, ʻi heʻenau vakai ki hotau ngaahi mamahí mo hotau ngaahi faingataʻaʻia koeʻuhi ko kinautolú, naʻa nau meimei maumauʻi ʻa e fuakava kuo nau faí ʻo toʻo hake ʻenau ngaahi mahafu taú ke maluʻi ʻa kimautolu.

8 Ka naʻe ʻikai te u fie tuku ke nau maumauʻi ʻa e fuakavá ni ʻa ia kuo nau faí, ʻi heʻeku tui ʻe poupouʻi ʻa kitautolu ʻe he ʻOtuá, ʻo aʻu ki ha ʻikai te tau toe faingataʻaʻia lahi ange koeʻuhi ko ʻenau tauhi ʻa e fuakava kuo nau faí.

9 Kae vakai, ko e meʻa ʻeni ʻe taha ʻa ia ʻoku tau lava ke maʻu ai ha fiefia lahi. He vakai, ʻi hono uofulu mā ono ʻo e taʻú, ko au Hilamani, naʻá ku laka atu ʻo taki ʻa e kau tangata talavou ko ʻeni ʻe toko ua afé ki he kolo ko Siuteá, ke tokoni kia ʻAnitipesi, ʻa ia kuó ke fakanofo ko ha taki ki he kakai ʻo e potu ko ia ʻo e fonuá.

10 Peá u fakatahaʻí ʻa hoku ngaahi foha ʻe toko ua afé, (he ʻoku feʻunga ke ui ʻa kinautolu ko e ngaahi foha) ki he kau tau ʻa ʻAnitipesí, ʻa ia ko e mālohi naʻe fiefia lahi ai ʻa ʻAnitipesi; he vakai, kuo fakatokotokosiʻi ʻene kau taú ʻe he kau Leimaná he kuo hanga ʻe heʻenau kau taú ʻo tāmateʻi ʻa e fuʻu tokolahi fau ʻo ʻetau kau tangatá, ʻa ia ko e meʻa ʻoku totonu ke tau tengihia.

11 Ka neongo iá, ko e meʻa ʻeni te tau lava ʻo fiemālie ai, kuo nau mate ʻi he mamahiʻi honau fonuá mo honau ʻOtuá, ʻio, pea ʻoku nau fiefia.

12 Pea kuo tauhi foki ʻe he kau Leimaná ʻa e kau pōpula tokolahi, ʻa ia ko e kau ʻeikitau pule kātoa, he naʻe ʻikai te nau fakamoʻui ha tokotaha kehe. Pea ʻoku mau mahalo ʻoku nau ʻi he fonua ko Nīfaí ʻi he taimí ni; ʻoku pehē ʻo kapau kuo teʻeki ai tāmateʻi ʻa kinautolu.

13 Pea ko ʻeni ko e ngaahi kolo ʻeni ʻa ia kuo maʻu ʻe he kau Leimaná ʻi he lilingi ʻo e toto ʻo e fuʻu tokolahi ʻo ʻetau kau tangata toʻá:

14 Ko e fonua ko Manataí, pe ko e kolo ko Manataí, mo e kolo ko Sisolomé, mo e kolo ko Kumenaí, mo e kolo ko ʻAnitipalá.

15 Pea ko e ngaahi kolo ʻeni kuo nau maʻu ʻi heʻeku aʻu mai ki he kolo ko Siuteá; peá u ʻiloʻi ʻa ʻAnitipesi mo ʻene kau tangatá ʻoku nau ngāue tūkuingata ke ngaohi ʻa e koló ke mālohi.

16 ʻIo, pea naʻa nau faingataʻaʻia ʻi he sino pea ʻi he laumālie foki, he kuo nau tau loto-toʻa ʻi he ʻahó pea ngāue ʻi he poʻulí ke maluʻi honau ngaahi koló; pea ko ia kuo nau kātekina ʻa e ngaahi mamahi ʻi he faʻahinga kotoa pē.

17 Pea ko ʻeni kuo nau fakapapau ke nau ikuna ʻi he feituʻu ko ʻení pe mate; ko ia ʻokú ke mahalo ne hanga ʻe he kiʻi kau tau tokosiʻi ko ia ne haʻu mo aú, ʻio, ʻa e ngaahi foha ko ia ʻoʻokú, ʻo foaki kiate kinautolu ha fuʻu ʻamanaki mo e fiefia lahi.

18 Pea ko ʻeni naʻe hoko ʻo pehē ʻi he vakai ʻa e kau Leimaná kuo maʻu ʻe ʻAnitipesi ha mālohi lahi ange ki heʻene kau taú, naʻe taʻofi ʻa kinautolu ʻi he tuʻutuʻuni ʻa ʻAmolone ke ʻoua naʻa nau ʻoho mai ki he kolo ko Siuteá, pē ko kimautolu, ke tau.

19 Pea ko ia naʻe tāpuekina ʻa kimautolu ʻe he ʻEikí; he kapau naʻa nau ʻoho mai kiate kimautolu ʻi heʻemau vaivai ko iá pehē kuo nau mei fakaʻauha ʻa ʻemau kau tau tokosiʻí; ka naʻe anga pehē ʻa homau fakahaofí.

20 Naʻe fekau kiate kinautolu ʻe ʻAmolone ke nau maluʻi ʻa e ngaahi kolo ʻa ia kuo nau faʻaó. Pea naʻe ʻosi pehē ʻa e taʻu hono uofulu mā onó. Pea ʻi he kamataʻanga ʻo hono uofulu mā fitu ʻo e taʻú kuo mau ʻosi teuteuʻi homau koló mo kimautolu foki ki he maluʻi.

21 Ko ʻeni naʻa mau fakaʻamu ke ʻoho mai ʻa e kau Leimaná kiate kimautolu; he naʻe ʻikai te mau loto ke ʻoho atu kiate kinautolu ʻi honau ngaahi kolotaú.

22 Pea naʻe hoko ʻo pehē naʻa mau tuku ʻa e kau tangata mataki ʻo takatakai, ke fakasiosio ʻa e feʻaluʻaki ʻa e kau Leimaná, koeʻuhí ke ʻoua te nau fakalaka ʻiate kimautolu ʻi he poʻulí pe ʻi he ʻahó ke fai hano ʻohofi homau ngaahi kolo kehe ʻa ia naʻe tuʻu ʻi he fakatokelaú.

23 He naʻa mau ʻiloʻi naʻe teʻeki ai ke mālohi feʻunga ʻa e ngaahi kolo ko iá ke fetaulaki mo kinautolu; ko ia naʻa mau fakaʻamu ai, ʻo kapau te nau fakalaka atu ʻiate kimautolu, te mau ʻoho atu ʻi mui ʻiate kinautolu, pea taʻofi pehē ʻa kinautolu mei mui ʻi he taimi tatau pē ʻoku tauʻi ʻa kinautolu mei muʻa. Naʻa mau ʻamanaki te mau lava ʻo ikunaʻi ʻa kinautolu; kae vakai, naʻe tō noa ʻemau ʻamanakí ʻi he meʻá ni ʻa ia naʻa mau holi ki aí.

24 Naʻa nau manavahē ke fakalaka ʻiate kimautolu mo ʻenau kau taú kotoa, pea naʻa nau manavahē foki he ʻalu mo hano konga ʻo ʻenau kau taú, telia naʻa ʻiloange kuo ʻikai ke nau mālohi feʻunga pea ikunaʻi ai ʻa kinautolu.

25 Pea naʻa nau manavahē foki ke laka atu ki he kolo ko Seilahemalá; pea naʻa nau manavahē foki ke aʻa ʻi ʻolunga ʻi Saitone, ke ʻalu ki he kolo ko Nīfaihaá.

26 Pea ko ia, kuo nau fakapapau ke maluʻi ʻaki ʻenau kau taú ʻa e ngaahi kolo ko ia kuo nau maʻú.

27 Pea ko ʻeni naʻe hoko ʻo pehē ʻi hono ua ʻo e māhiná ʻo e taʻu pē ko iá, naʻe ʻomi kiate kimautolu ʻa e ngaahi meʻakai mo e nāunau lahi mei he ngaahi tamai ʻa hoku ngaahi foha ʻe toko ua afé.

28 Pea naʻe toe ʻomai foki mo ha kau tangata ʻe toko ua afe kiate kimautolu mei he fonua ko Seilahemalá. Pea ko ia naʻa mau mateuteu ai mo e kau tangata ʻe toko taha mano, mo e ngaahi meʻakai mo e nāunau maʻanautolu, kae ʻumaʻā foki honau ngaahi uaifí mo ʻenau fānaú foki.

29 Pea ko e kau Leimaná, ʻi heʻenau vakai ʻoku fakatokolahi ʻi he ʻaho taki taha ʻa ʻemau kau taú, pea ʻoku ʻomi ʻa e ngaahi meʻakai mo e nāunau ke tauhi ʻaki ʻa kimautolú, naʻe kamata ke nau manavahē, ʻo nau kamata ke hū mai ki tuʻa, koeʻuhi ke lava nai ke taʻofi ʻemau maʻu ʻa e ngaahi meʻakai mo e nāunaú mo e tokoní.

30 Ko ʻeni ʻi heʻemau vakai ʻoku fakaʻau ke hohaʻa lahi ʻa e kau Leimaná ʻi he meʻá ni, naʻa mau fakaʻamu ke fai ha tauhele kiate kinautolu; ko ia, naʻe fekau ʻe ʻAnitipesi ke u laka atu mo hoku ngaahi foha talavou kei īkí ki ha kolo ofi mai, ʻo hangē ko haʻamau fetukutuku ʻa e ngaahi meʻakai mo e nāunau ki ha kolo ofi maí.

31 Pea naʻe fekau ke mau laka ofi atu ki he kolo ko ʻAnitipalá, ʻo hangē ko haʻamau ʻalu atu ki ha kolo hoko mai, ʻi he ngaahi ngataʻanga ʻo e fonuá ofi ki he matātahí.

32 Pea naʻe hoko ʻo pehē naʻa mau laka atu, ʻo hangē ʻoku mau ʻave ha ngaahi meʻakai mo e nāunau, ke ʻave ki he kolo ko iá.

33 Pea naʻe hoko ʻo pehē naʻe laka atu ʻa ʻAnitipesi mo ha konga ʻo ʻene kau taú, kae tuku hono toé ke maluʻi ʻa e koló. Ka naʻe ʻikai te ne laka atu kae ʻoua kuó u ʻalu atu mo ʻeku kiʻi kau taú, ʻo ofi atu ki he kolo ko ʻAnitipalá.

34 Pea ko ʻeni, naʻe nofo ʻi he kolo ko ʻAnitipalá ʻa e kau tau mālohi taha ʻa e kau Leimaná; ʻio ʻa e tokolahi tahá.

35 Pea naʻe hoko ʻo pehē ʻi he fakahā kiate kinautolu ʻe heʻenau kau tangata matakí, naʻa nau hū mai ki tuʻa mo ʻenau kau taú ʻo laka mai ke tauʻi ʻa kimautolu.

36 Pea naʻe hoko ʻo pehē naʻa mau hola ʻi muʻa ʻiate kinautolu, ki he fakatokelaú. Pea naʻe pehē ʻa ʻemau tohoakiʻi mamaʻo atu ʻa e kau tau mālohi taha ʻa e kau Leimaná;

37 ʻIo, ʻo fuʻu mamaʻo ʻaupito, ʻo aʻu ki heʻenau mamata ki he kau tau ʻa ʻAnitipesí ʻoku tuli mui ʻiate kinautolu, ʻaki honau tūkuingatá, naʻe ʻikai te nau afe ki he toʻomataʻú pe toʻohemá, ka naʻa nau fai ange pē ʻenau laka hangatonu mai kiate kimautolú; pea, hangē ko ʻemau mahaló, ko ʻenau taumuʻá ke tāmateʻi ʻa kimautolu ʻoku teʻeki ai ke aʻu mai ʻa ʻAnitipesi kiate kinautolu, pea nau fai ʻeni ke ʻoua ʻe kāpui ʻa kinautolu ʻe homau kakaí.

38 Pea ko ʻeni ʻi he vakai ʻe ʻAnitipesi, ki he fakatuʻutāmaki naʻa mau ʻi aí, naʻá ne fakatoʻotoʻo ange ʻa e laka ʻa ʻene kau taú. Kae vakai, naʻe poʻuli; ko ia naʻe ʻikai te nau maʻu ʻa kimautolu, pea naʻe ʻikai foki ke maʻu ʻa kinautolu ʻe ʻAnitipesi; ko ia, naʻa mau mālōlō ʻi he poó.

39 Pea naʻe hoko ʻo pehē ʻi he teʻeki ke mafoa ʻa e atá ʻi he hengihengi haké, vakai, naʻe tuli ʻa kimautolu ʻe he kau Leimaná. Ko ʻeni naʻe ʻikai te mau mālohi feʻunga ke fepaki mo kinautolu; ʻio, naʻe ʻikai te u fie tuku ke tō ʻa hoku ngaahi foha kei īkí ki honau nimá; ko ia, naʻa mau fai atu ʻemau laká, ʻo mau laka atu ki he feituʻu maomaonganoá.

40 Ko ʻeni naʻa nau manavahē ke afe ki he toʻomataʻú pe ki he toʻohemá telia naʻa kāpui ʻa kinautolu; pea naʻe ʻikai foki te u fie afe ki he toʻomataʻú pe toʻohemá telia naʻa nau maʻu au, pea naʻe ʻikai te mau lava ke matuʻuaki ʻa kinautolu, he ʻe tāmateʻi ai ʻa kimautolu, pea te nau hola ai ʻo hao; pea ko ia naʻa mau hola ʻi hono kotoa ʻo e ʻaho ko iá ki he feituʻu maomaonganoá, ʻo aʻu ki heʻene poʻuli.

41 Pea naʻe hoko ʻo pehē, ʻi he toe mafoa mai ʻa e ata ʻo e pongipongí, naʻa mau vakai atu ʻoku ʻoho mai ʻa e kau Leimaná kiate kimautolu, pea naʻa mau hola meiate kinautolu.

42 Ka naʻe hoko ʻo pehē naʻe ʻikai te nau tuli ʻa kimautolu ʻo loko mamaʻo pea naʻa nau tuʻu; pea naʻe hoko ia ʻi he pongipongi ʻo hono tolu ʻo e ʻaho ʻo e māhina hono fitú.

43 Pea ko ʻeni, naʻe ʻikai te mau ʻilo pe kuo maʻu ʻa kinautolu ʻe ʻAnitipesi pe ʻikai, ka naʻá ku pehē ange ki heʻeku kau tangatá: Vakai, ʻoku ʻikai te tau ʻiloʻi pe kuo nau tuʻú koeʻuhí ke tau foki ange ʻo tauʻi ʻa kinautolu, koeʻuhí ke nau maʻu ʻa kitautolu ʻi heʻenau tauhelé;

44 Ko ia ko e hā hoʻomou laú, ʻe hoku ngaahi foha, te mou ʻalu atu kiate kinautolu ke tau?

45 Pea ko ʻeni ʻoku ou pehē kiate koe, ʻe hoku tokoua ʻofeina ko Molonai, kuo teʻeki ai te u mamata ʻi ha loto-toʻa lahi pehē, ʻikai, kuo teʻeki ai ʻi hono kotoa ʻo e kau Nīfaí.

46 He hangē ko ʻeku ui maʻu ai pē ʻa kinautolu ko hoku ngaahi fohá, (he naʻa nau kei iiki kotoa pē), pea naʻa nau pehē mai kiate au: ʻE tamai, vakai ʻoku ʻiate kitautolu ʻa hotau ʻOtuá, pea ʻe ʻikai te ne tuku ke mau tō; ko ia, tau ō atu; ʻe ʻikai te tau tāmateʻi ʻa homau kāingá kapau naʻa nau tuku noa pē ʻa kitautolu; ko ia tau ō atu, telia naʻa nau ikuna ʻa e kau tau ʻa ʻAnitipesí.

47 Ko ʻeni kuo teʻeki ai ke nau tau, ka naʻe ʻikai te nau manavahē ʻi he maté; pea naʻa nau tokanga lahi ange ki he tauʻatāina ʻa ʻenau ngaahi tamaí ʻi heʻenau tokanga ki heʻenau moʻuí; ʻio, kuo akonekina ʻa kinautolu ʻe heʻenau ngaahi faʻeé, kapau ʻe ʻikai te nau taʻetui, ʻe fakahaofi ʻa kinautolu ʻe he ʻOtuá.

48 Pea naʻa nau fakamatalaʻi mai kiate au ʻa e ngaahi lea ʻa ʻenau ngaahi faʻeé, ʻo pehē: ʻOku ʻikai te mau taʻetui naʻe ʻilo ia ʻe heʻemau ngaahi faʻeé.

49 Pea naʻe hoko ʻo pehē naʻá ku foki atu mo ʻeku toko ua afé ke tau mo e kau Leimana ko ʻeni naʻa nau tuli ʻa kimautolú. Pea ko ʻeni vakai, kuo maʻu ʻa kinautolu ʻe he kau tau ʻa ʻAnitipesí, pea kuo kamata ʻa e fuʻu tau lahi fakaʻulia.

50 Ko e meʻa ʻi he ongosia ʻa e kau tau ʻa ʻAnitipesí, koeʻuhi ko ʻenau laka mamaʻo ʻi he kiʻi taimi siʻi pehē, naʻe ofi ke nau tō ki he nima ʻo e kau Leimaná; pea ka ne taʻeʻoua ʻeku foki atu mo ʻeku toko ua afé, pehē kuo nau ikunaʻi ʻa e taú.

51 He kuo tō ʻa ʻAnitipesi ʻi he heletā mo e tokolahi ʻo ʻene kau takí, ko e tupu mei heʻenau ongosiá, ʻa ia naʻe tupu ʻi hono vave ʻo ʻenau laká—ko ia naʻe tupu ʻi he puputuʻu ʻa e kau tangata ʻa ʻAnitipesí koeʻuhi ko e tō ʻa honau takí, naʻe kamata ke nau holomui mei he kau Leimaná.

52 Pea naʻe hoko ʻo pehē naʻe loto-toʻa ai ʻa e kau Leimaná, ʻo nau kamata ke tuli ʻa kinautolu; pea naʻe lolotonga tuli mālohi pehē ʻa kinautolu ʻe he kau Leimaná feʻunga mo e aʻu mai ʻa Hilamani mo ʻene toko ua afé ʻi mui ʻiate kinautolu, ʻo nau kamata ke tāmateʻi ʻa kinautolu ʻo fuʻu lahi ʻaupito, ko ia naʻe tuʻu ai ʻa e kau tau kotoa ʻa e kau Leimaná, ʻo nau tafoki hake kia Hilamani.

53 Ko ʻeni ʻi he vakai ʻa e kakai ʻo ʻAnitipesí kuo tafoki ki mui ʻa e kau Leimaná, naʻa nau tānaki fakataha ʻenau kau tangatá ʻo nau toe ʻoho fakataha atu ʻi mui ʻi he kau Leimaná.

54 Pea ko ʻeni naʻe hoko ʻo pehē ko kimautolu, ko e kakai ʻo Nīfaí, ko e kakai ʻo ʻAnitipesí, mo au mo ʻeku toko ua afé, naʻa mau kāpui ʻa e kau Leimaná, ʻo mau tāmateʻi ʻa kinautolu; ʻio, ʻo aʻu ki hono fakamālohiʻi ʻa kinautolu ke tuku ʻenau ngaahi mahafu taú pea mo kinautolu foki ko e kau pōpula ʻo e tau.

55 Pea ko ʻeni naʻe hoko ʻo pehē ʻi he hili ʻenau tukulolo kiate kimautolú, vakai, naʻá ku lau ʻa e kau tangata talavou ko ia ʻa ia naʻa mau tau mo aú, ʻi heʻeku manavahē naʻa kuo ʻi ai hanau tokolahi kuo tāmateʻi.

56 Kae vakai, naʻá ku fuʻu fiefia lahi, he naʻe ʻikai ha toko taha ʻiate kinautolu kuo tō ki he kelekelé; ʻio, pea kuo nau tau ʻo hangē kuo nau fai ia ʻi he māfimafi ʻo e ʻOtuá; ʻio, naʻe teʻeki ai ke ʻilo ha kau tangata kuo tau ʻaki ha fuʻu ivi fakaofo pehē; pea ʻi he mālohi lahi pehē naʻa nau ʻoho atu ki he kau Leimaná, ʻo nau fakamanavaheeʻi ai ʻa kinautolu; pea ko e ʻuhinga ʻeni naʻe tuku ai ʻe he kau Leimaná ke nau tukulolo ʻo hoko ko e kau pōpula ʻo e taú.

57 Pea ko e meʻa ʻi he ʻikai ha potu ke tauhi ai ʻemau kau pōpulá, ke mau leʻohi ai ʻa kinautolu ke taʻofi ʻa kinautolu mei heʻenau hola ki he kau tau ʻa e kau Leimaná, ko ia naʻa mau fekau ke ʻave ʻa kinautolu ki he fonua ko Seilahemalá, pea ke ʻalu mo kinautolu ʻa e konga ʻo e kau tangata ʻa ʻAnitipesi ʻa ia naʻe ʻikai ke maté; peá u ʻave hono toé ʻo fakatahaʻi ʻa kinautolu mo ʻeku kau talavou ʻĀmoní, pea mau laka ʻo foki atu ki he kolo ko Siuteá.