Tsir 59
Moroni kã kyerɛ Pahoran dɛ ɔmfa nsordaafo nkɔboa Helaman—Lamanfo fa Nephihah kuropɔn no—Moroni no bo fuw aban no. Bɛyɛ mfe 62 Ansaana wɔbɔwo Christ.
1 Afei ɔbaa dɛ afe a otsĩa eduasa wɔ ber a atsɛmbuafo hwɛ Nephi no nkorɔfo do no mu no, ber a Moroni ne nsa kãa Helaman ne krataa na ɔkenkanee wiei no, n’enyi gyee mbordo osiandɛ ndzɛmba kɔr do yie, nyew, Helaman no konyimdzi mbordo no a, dɛ ɔagye dɛm nsaase no a ofii hɔn nsa no.
2 Nyew, na ɔkãa kyerɛɛ no dɔm no nyinara a wɔwɔ asaase a etwa hɔnho ehyia nyinara ama hɔn so woeedzi dɛw.
3 Na ɔbaa dɛ ɔkyerɛɛw krataa ntsɛmara dze kɛmaa Pahoran, dɛ ɔnhwɛ ma wɔmboaboa dɔm no ano ama wɔaakɔboa Helaman, anaa Helaman no nsordaafo no, ama woeetum akora asaase ne bea biara a ɔnam etumdzi nwanwa do ne nsa akã no do.
4 Na ɔbaa dɛ ber a Moroni somaa ma wɔdze krataa no kɔr Zarahemla asaase do no, ɔhyɛɛ ase bio dɛ ɔreyɛ nhyehyɛɛ a ɔbɛma oetum agye dɛm ahodze nye nkurow nkaa a Lamanfo gyee fii hɔn nsamu no.
5 Na ɔbaa dɛ ber a Moroni roboaboa noho akɔ nye Lamanfo no akɔkõ no, hwɛ, Nephihafo a wɔboaboaa hɔn ano fii Moroni kuropɔn mu, nye Lehi kuropɔn mu nye Morianton kuropɔn mu dze hɔn reba no, Lamanfo no tui hyɛɛ hɔn do.
6 Nyew, hɔn mpo a wɔmaa woguanee fii Manti asaase do, nye asaase a etwa hɔnho ehyia nyinara baa bɛkãa Lamanfo a wɔwɔ dɛm bea yi do no ho.
7 Na dɛm maa wɔdɔr mbordo, nyew, nna da nyinara dɔm binom so bɛkãa hɔnho, na Ammoron hyɛɛ hɔn dɛ wɔmbra na wɔnye Nephihafo mobɔkõ, na wɔhyɛɛ ase dɛ worukuku hɔn mbordo.
8 Na hɔn nsordaafo no dɔɔ sõ araa ma nna ɔwɔ dɛ Nephihafo nkaa no guan hɔn; na wɔbaa bɛkãa Moroni no nsordaafo ho mpo.
9 Na afei dɛ mbrɛ Moroni susui dɛ wɔbɛma wɔdze dɔm akɔ Nephihah kurow mu akɔboa dɔm no ma wɔakora dɛm kurow no do, na wonyim so dɛ ebɔkora kurow do ma atamfo nsa nnkɛkã no bɛyɛ mberɛw asen dɛ ebɛgye no bio efi hɔn hɔ, dɛm ntsi osusuu dɛ ɔbɛyɛ mberɛw ama hɔn dɛ wɔbɔkora dɛm kurow no do.
10 Dɛm ntsi ɔsee no nsordaafo no dɛ wɔnka ekyir na wɔnhwɛ dɛm mbea a wɔagyegye no do.
11 Na afei, ber a Moroni hun dɛ Nephihah kurow no efi hɔn nsa no, no werɛ hoow mbordo, na n’adwen hyɛɛ ase dɛ orihihim osian dɔm no hɔn emumuyɛdze ntsi, na dɛ ana wɔronntɔ hɔn enuanom no hɔn abaa mu.
12 Afei dɛm na no nsordaafo asahen ekunyin no nyina dwenee. Hɔn adwen hihimii na wɔbɔɔ mbubuw so osian dɔm no hɔn emumuyɛ ntsi, na wɔyɛɛ iyi osian Lamanfo hɔn konyimdzi wɔ hɔn do no ntsi.
13 Na ɔbaa dɛ Moroni no bo fuuw aban no, osian hɔn man no ne fahodzi a ɔmmfa noho no ntsi.