1 Ko ʻeni, naʻe hoko ʻo pehē ʻi hono tolungofulu ʻo e taʻu ʻo e pule ʻa e kau fakamāú ki he kakai ʻo Nīfai, hili ʻa e maʻu ʻe Molonai mo lau ʻa e tohi ʻa Hilamaní, naʻá ne fuʻu fiefia ʻaupito koeʻuhi ko e lelei, ʻio, ko e fuʻu lavameʻa lahi kuo maʻu ʻe Hilamani ʻi he maʻu ʻa e ngaahi fonua ko ia naʻe molé.

2 ʻIo, pea naʻá ne fakahā ia ki hono kakaí kotoa, ʻi he fonua kotoa ʻoku takatakai ki he potu ʻa ia naʻá ne ʻi aí, koeʻuhi ke nau fiefia foki mo kinautolu.

3 Pea naʻe hoko ʻo pehē naʻá ne ʻoatu leva ha tohi kia Peiholani, ʻo kole ke ne fekau ke tānaki ha kau tangata ke tokoni kia Hilamani, pe ko e ngaahi kau tau ʻa Hilamaní, koeʻuhi ke faingofua ʻene maluʻi ʻa e potu ko ia ʻo e fonuá ʻa ia kuo fakaofo pehē fau ʻene lava ʻo toe maʻu maí.

4 Pea naʻe hoko ʻo pehē ʻi he hili hono ʻoatu ʻe Molonai ʻa e tohí ni ki he fonua ko Seilahemalá, naʻá ne kamata ke fakakaukauʻi ha founga ke ne lava ai ʻo maʻu hono toe ʻo e ngaahi tofiʻa mo e ngaahi kolo ʻa ia kuo faʻao ʻe he kau Leimaná meiate kinautolú.

5 Pea naʻe hoko ʻo pehē ʻi he lolotonga fai ʻe Molonai ʻa e ngaahi teuteu ke ʻalu atu ʻo tau mo e kau Leimaná, vakai, ko e kakai ʻo Nīfaihaá, ʻa ia naʻa nau kātoa mai mei he kolo ko Molonaí mo e kolo ko Līhaí mo e kolo ko Molianitoní, naʻe ʻohofi ʻa kinautolu ʻe he kau Leimaná.

6 ʻIo, ʻa e faʻahinga ko ia kuo ngaohi ke hola mei he fonua ko Manataí mo e fonua takatakai ki aí, kuo nau haʻu ʻo kau fakataha mo e kau Leimana ʻi he potu ko ia ʻo e fonuá.

7 Pea ko e meʻa ʻi heʻenau fuʻu tokolahi peheé, ʻio, pea ʻi heʻenau maʻu ha tokoni mei he ʻaho ki he ʻahó, naʻa nau ō mai ʻi he fekau ʻa ʻAmolone ke tau mo e kakai ʻo Nīfaihaá, pea naʻa nau kamata ke tāmateʻi ʻa kinautolu ʻi ha fuʻu fakaʻauha lahi.

8 Pea naʻe pehē fau hono tokolahi ʻo ʻenau ngaahi kau taú, naʻe pau ke hola ʻa hono toe ʻo e kakai ʻo Nīfaihaá meiate kinautolu; pea naʻa nau haʻu ʻo fakataha mo e kau tau ʻa Molonaí.

9 Pea ko ʻeni ʻi he mahalo ʻe Molonai ʻoku totonu ke fekau ke ʻalu ha kau tangata ki he kolo ko Nīfaihaá, ke tokoni ki he kakaí ʻi hono maluʻi ʻo e kolo ko iá, pea ʻi heʻene ʻiloʻi ʻoku faingofua ange ke maluʻi ʻa e koló mei haʻane tō ki he nima ʻo e kau Leimaná ʻi hano toe faʻao ia meiate kinautolu, ko ia naʻá ne mahalo ai ʻe faingofua ke nau maluʻi ʻa e kolo ko iá.

10 Ko ia naʻá ne tauhi ʻa ʻene kau taú kotoa ke maluʻi ʻa e ngaahi feituʻu ʻa ia kuó ne toe maʻú.

11 Pea ko ʻeni, ʻi he vakai ʻa Molonai kuo mole ʻa e kolo ko Nīfaihaá, naʻá ne fuʻu loto-mamahi ʻaupito, ʻo ne kamata ke veiveiua, tuʻunga ʻi he fai angahala ʻa e kakaí, pe ʻoku ʻikai ke lelei ke nau tō ki he nima ʻo honau kāingá.

12 Ko ʻeni naʻe pehē mo ʻene kau ʻeikitau pulé kotoa pē. Naʻa nau veiveiua pea nau ofo foki koeʻuhi ko e fai angahala ʻa e kakaí, pea naʻe tupu ia ʻi he fuʻu ikuna lahi ʻa e kau Leimaná ʻiate kinautolú.

13 Pea naʻe hoko ʻo pehē naʻe ʻita ʻa Molonai ki he puleʻangá, koeʻuhi ko ʻenau taʻetokanga ki he tauʻatāina ʻo honau fonuá.