1 O lenei sa oo ina amata e Alema ona tala’i atu le afioga a le Atua i tagata, muamua i le nuu o Sara’emila, ma mai iina seia oo atu i le laueleele atoa.

2 Ma o upu nei sa ia tautala atu ai i tagata i totonu o le ekalesia lea sa faatu i le aai o Sara’emila, e tusa ai ma lana lava talafaamaumau, e faapea:

3 O au o Alema, sa faapaiaina e lo’u tamā, o Alema, e avea o se faitaulaga sili i le ekalesia a le Atua, ona sa ia te ia le mana ma le pule mai le Atua e fai ai nei mea, faauta, ou te fai atu ia te outou, sa amata ona ia faatuina o se ekalesia i le laueleele sa i tuaoi o Nifae; ioe, o le laueleele lea sa taua o le laueleele o Mamona; ioe, ma sa ia papatisoina ona uso i vai o Mamona.

4 Ma faauta, ou te fai atu ia te outou, sa lavea’iina i latou mai lima o le nuu o le tupu o Noa, i le alofa mutimutivale ma le mana o le Atua.

5 Ma faauta, ina ua mavae lena, sa aumai i latou i le pologa i le vao, e lima o sa Lamanā; ioe, ou te fai atu ia te outou, sa faatagataotauaina i latou, ma sa toe lavea’iina i latou e le Alii mai le pologa, e ala i le mana o lana afioga; ma sa aumai i tatou i le laueleele lenei, ma o iinei na amata ona tatou faatulaga ai le ekalesia a le Atua, i lenei foi laueleele atoa.

6 Ma o lenei faauta, ou te fai atu ia te outou, o’u uso e, outou ua auai i lenei ekalesia, ua lava ea ona outou manatua o le faatagataotauaina o o outou tamā? Ioe, ma ua lava ea ona outou manatua o lona alofa mutimutivale ma lona tali-tigā ia te i latou? Ma e le gata i lea, ua lava ea ona outou manatua ua ia lavea’iina o latou agaga mai seoli?

7 Faauta, sa ia liua o latou loto; ioe, sa ia fafagu i latou mai se moe gase, ma sa latou ala mai i le Atua. Faauta, sa i ai i latou i totonugalemu o le pogisa; ae ui i lea, sa faapupulaina o latou agaga i le malamalama o le afioga tumau e faavavau; ioe, sa fusia faataamilo i latou i fusi o le oti, ma filifili o seoli, ma sa faatalitali mai ia te i latou se faafanoga tumau e faavavau.

8 Ma o lenei ou te fesili atu ia te outou, ou uso e, pe na faaumatia ea i latou? Faauta, ou te fai atu ia te outou, E leai, sa le’i faaumatiaina i latou.

9 Ma ou te toe fesili atu, pe na motusia ea fusi o le oti, ma filifili o seoli ia na fusi faataamilo ai i latou, pe na tatalaina ea i latou? Ou te fai atu ia te outou, Ioe, sa tatalaina i latou, ma sa faalauteleina o latou agaga, ma sa latou lagiina le alofa togiola. Ma ou te fai atu ia te outou ua faaolaina i latou.

10 Ma o lenei ou te fesili atu ia te outou o a tulaga na faaolaina ai i latou? Ioe, o a pogai sa ia te i latou sa faamoemoe ai mo le faaolataga? O le a le pogai o le tatalaina o i latou mai fusi o le oti, ioe, ma filifili foi o seoli?

11 Faauta, e mafai ona ou ta’u atu ia te outou—pe sa le’i talitonu ea lo’u tamā o Alema i upu ia na tuuina mai i le fofoga o Apinati? Ma pe sa lē o ia ea o se perofeta paia? Sa le’i fofoga mai ea e ia afioga a le Atua, ma talitonu i ai lo’u tamā o Alema?

12 Ma e tusa ma lona faatuatua, sa i ai se liuga tele na oo mai i lona loto. Faauta ou te fai atu ia te outou, ua moni nei mea uma.

13 Ma faauta, sa ia tala’i atu le afioga i o outou tamā, ma sa oo mai foi se liuga tele i o latou loto, ma sa latou faamaualalaloina i latou lava ma tuu atu lo latou faalagolago i le Atua moni ma soifua. Ma faauta, sa latou faamaoni seia oo i le iuga; o lea na faaolaina ai i latou.

14 Ma o lenei faauta, ou te fesili atu ia te outou, o’u uso e o le ekalesia, ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto?

15 Ua outou faatino ea le faatuatua i le togiola a ia o lē na foafoaina outou? O outou tulimatai ea i luma ma le mata o le faatuatua, ma vaaia le faatuina mai o lenei tino faaletino i le tino ola pea, ma le faatuina mai o lenei tinopala i le tinolēpala, e tulai i luma o le Atua e faamasinoina e tusa ma galuega na faia i le tino faaletino?

16 Ou te fai atu ia te outou, e mafai ea ona outou mafaufau ifo ia te outou lava e peiseai ua outou faalogo atu i le siufofoga o le Alii, ua fetalai mai ia te outou, i lena aso: O mai ia ia te au, outou o e ua faamanuiaina, auā faauta, o ā outou galuega o galuega ia o le amiotonu i luga o le fogaeleele?

17 Pe o outou mafaufau ifo ia te outou lava e mafai ona outou pepelo atu i le Alii i lena aso, ma fai atu—Le Alii e, o a matou galuega o ni galuega amiotonu i luga o le fogaeleele—ma faapea o le a ia faaolaina ai outou?

18 Po o i se tasi itu, e mafai ona outou mafaufau ifo i le aumai o outou lava i luma o le faamasinoga a le Atua ma o outou agaga ua tumu i le sala ma le faanoanoa, ma se manatua o lo outou sala atoatoa, ioe, o se manatua atoatoa o a outou amioleaga uma, ioe, o se manatua o lo outou teena o poloaiga a le Atua?

19 Ou te fai atu ia te outou, e mafai ea ona outou tepa a’e i le Atua i lena aso ma le loto mamā ma lima mamā? Ou te fai atu ia te outou, e mafai ea ona outou tepa a’e i luga, ma foliga o le Atua ua togitogia i luga o o outou mata?

20 Ou te fai atu ia te outou, e mafai ea ona outou mafaufau e faaolaina outou pe afai ua outou tuu atu outou lava e avea ma e e pulea e le tiapolo?

21 Ou te fai atu ia te outou, o le a outou iloa i lena aso e lē mafai ona faaolaina outou; ona e leai se tagata e mafai ona faaolaina se’i vagana ai ua tatā faasinasina ona ofu; ioe, e ao ina faamamāina ona ofu se’ia oo ina ua mamā mai pisia uma, e ala i le toto o ia o lē na tautatala mai ai o tatou tamā, o lē o le a afio mai e togiola ona tagata mai a latou agasala.

22 Ma o lenei ou te fesili atu ia te outou, o’u uso e, o le a se lagona o le a oo i soo se tasi o outou, pe afai o le a outou tutula’i i luma o le pa faamasino a le Atua, ma le pisipisia o o outou ofu i le toto ma ituaiga uma o mea eleelea? Faauta, o le a se molimau a nei mea e faasaga ia te outou?

23 Faauta, o le a latou lē molimau mai ea o outou o tagata fasioti tagata, ioe, ma ua outou sala foi i ituaiga o amioleaga eseese uma?

24 Faauta, o’u uso e, tou te manatu ea e mafai e se tasi faapena ona maua se nofoaga e talia ai i totonu o le malo o le Atua, faatasi ma Aperaamo, ma Isaako, ma Iakopo, ma perofeta paia uma foi, o e ua faamamāina o latou ofu ma ua lē pisia, ua mamā ma sinasina?

25 Ou te fai atu ia te outou, E leai; se’i vaganā ai ua outou faia lo tatou Foafoa o se pepelo mai le amataga, pe tou te manatu o ia o se pepelo mai le amataga, e lē mafai ona outou manatu e maua e se tasi faapena se nofoaga i totonu o le malo o le lagi; ae o le a tutuli i latou i fafo ona o i latou ia o fanau a le malo o le tiapolo.

26 Ma o lenei faauta, ou te fai atu ia te outou, o’u uso e, afai ua oo ia te outou se liuga o le loto, ma afai ua outou lagona le fia lagiina o le pese o le alofa togiola, ou te fia fesili atu, e mafai ea ona outou lagonaina nei?

27 Ua outou savavali ea, ma tausi outou lava i le lē ponā i luma o le Atua? E mafai ea ona outou faapea ifo, i totonu ia te outou lava, pe afai e valaaulia outou e feoti i le taimi nei, ua lava ea lo outou lotomaualalalo? Ua faamamāina o outou ofu ma ua faasinasinaina e ala i le toto o Keriso, o lē o le a afio mai e togiola ona tagata mai i a latou agasala?

28 Faauta, ua tafi ese ea le faamaualuga mai ia te outou? Ou te fai atu ia te outou, afai e leai ua outou lē saunia e fetaia’i ma le Atua. Faauta e ao ina vave ona outou saunia; ona ua lata ona oo mai o le malo o le lagi, ma o se tasi faapena e lē maua e ia le ola e faavavau.

29 Faauta, ou te fai atu, pe i ai ea se tasi o i totonu o outou e le’i tafiesea mai ai le matau’a? Ou te fai atu ia te outou o se tasi faapena ua lē saunia o ia; ma ou te manao ia vave ona saunia o ia, ona ua lata mai le itula, ma na te lē iloa po o afea e oo mai ai le taimi; ona o se tasi faapena e lē maua i le lē sala.

30 Ma ou te toe fai atu ia te outou, o i ai ea se tasi i totonu o outou ua faatauemu i lona uso, pe ua ia faaputuina i ona luga o sauaga?

31 Oi talofa i se tasi faapena, ona ua lē saunia o ia, ma ua oo mai le taimi e ao ai ona salamo o ia, po ua lē mafai ona faaolaina o ia!

32 Ioe, e oo ia te outou uma o e ua faia amioletonu oi talofa; ia salamo, ia salamo, ona ua fetalai mai ai le Alii le Atua!

33 Faauta, ua ia auina mai se valaaulia i tagata uma, ona ua faaloaloa mai ia te i latou aao o le alofa mutimutivale, ma ua ia fetalai: Ia salamo, ona ou talia lea o outou.

34 Ioe, ua fetalai mai o ia: O mai ia ia te au ma o le a outou aai ai i le fua o le laau o le ola; ioe, o le a outou aai ma feinu saoloto i le areto ma vai o le ola;

35 Ioe, o mai ia ia te au ma aumai galuega o le amiotonu, ma o le a lē vavaeeseina ai outou i lalo ma lafo i le afi—

36 Auā faauta, ua oo mai le taimi, ai soo se tasi na te lē aumai ni fua lelei, po o soo se tasi na te lē faia galuega o le amiotonu, o ia lava lea ua i ai se pogai e tagiaue ma faanoanoa ai.

37 E, outou e o e ua faia le amioletonu; outou o e ua faafefeteina i mea lē aoga o le lalolagi, outou o e ua fai mai ua outou iloa ala o le amiotonu ae ui i lea ua outou o ese mai ai, e pei o ni mamoe ua leai se leoleo mamoe, e ui ina sa valaau atu se leoleo mamoe ia te outou ma o loo valaau atu pea ia te outou, ae ua outou lē fia faalogo mai i lona siufofoga!

38 Faauta, ou te fai atu ia te outou, o loo valaau mai le leoleo mamoe lelei ia te outou; ioe, ma o lona lava suafa ua ia valaauina ai outou, o le suafa lava lea o Keriso; ma afai tou te lē faalogo i le siufofoga o le leoleo mamoe lelei, i le suafa lea ua valaauina ai outou, faauta, e lē o outou o ni mamoe a le leoleo mamoe lelei.

39 Ma o lenei afai e lē o outou o ni mamoe a le leoleo mamoe lelei, o le lafu a ai outou? Faauta, ou te fai atu ia te outou, o le tiapolo lava o lo outou leoleo mamoe lea, ma o outou o lana lafu; ma o lenei, o ai e mafai ona ia faafitia lenei mea? Faauta, ou te fai atu ia te outou, ai se tasi na te faafitia lenei mea o se pepelo lea ma o se tama ia a le tiapolo.

40 Ona ou te fai atu ia te outou soo se mea ua lelei ua sau mai le Atua, ma o soo se mea ua leaga ua sau mai le tiapolo.

41 O lea, afai e aumai e se tagata galuega lelei ua faalogo o ia i le siufofoga o le leoleo mamoe lelei, ma ua mulimuli atu o ia ia te ia; ae o soo se tasi na te aumai galuega leaga, o ia lava lea e avea o se tama a le tiapolo, ona ua faalogo o ia i lona leo, ma mulimuli atu ia te ia.

42 Ma o soo se tasi e faia lenei mea e ao lava ona ia maua ona taui mai ia te ia; o lea e maua e ia mo ona taui le oti, e faatatau i mea tau i le amiotonu, ona ua oti o ia e faatatau i galuega lelei uma.

43 Ma o lenei, o’u uso e, ou te manao ia outou lagona mai a’u, ona ou te tautala atu ma le malosi o lo’u agaga; auā faauta, ua manino ona ou tautala atu ia te outou ina ia lē mafai ona outou sesē, pe ua ou tautala atu e tusa ai ma poloaiga a le Atua.

44 Ona ua valaaulia a’u ou te tautala atu i lenei ala, e tusa ai ma le faatulagaga paia a le Atua, lea ua ia Keriso Iesu; ioe, ua poloaiina a’u ou te tulai ma molimau atu i lenei nuu mea na tautalagia e o tatou tamā, e uiga i mea o le a oo mai.

45 Ma ua lē ona pau lea. Tou te lē manatu ea ua ou iloa e a’u lava ia nei mea? Faauta, ou te molimau atu ia te outou, ua ou iloa o mea ua ou tautala atu ai, ua moni. Ma o le a so outou manatu e faapefea ona ou iloa lo latou moni?

46 Faauta, ou te fai atu ia te outou sa faailoa mai i latou ia te a’u e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo a’u lava ia. Ma o lenei ua ou iloa mo a’u lava ia ua moni nei mea; ona o le Alii le Atua na ia faailoa mai nei mea ia te a’u e ala mai i lona Agaga Paia; ma o le agaga lea o faaaliga ua ia te a’u.

47 Ma e lē gata i lea, ou te fai atu ia te outou sa faapea foi ona faaali mai ia te a’u, ua moni upu na tautatala mai ai o tatou tamā, e tusa lava ma le agaga o valoaga ua ia te a’u, lea foi na ala mai i faaaliga a le Agaga o le Atua.

48 Ou te fai atu ia te outou, ua ou iloa mo a’u lava ia o soo se mea o le a ou tautala atu ai ia te outou, e uiga i mea o le a oo mai, ua moni; ma ou te fai atu ia te outou, ua ou iloa o le a afio mai Iesu Keriso; ioe, le Atalii e Toatasi na Fanaua e le Tamā, ua tumu i le alofa tunoa, ma le alofa mutimutivale, ma le upumoni. Ma faauta, o ia lea e afio mai na te aveesea agasala a le lalolagi, ioe, agasala a tagata uma taitoatasi, o e e tutumau i le talitonu i lona suafa.

49 Ma o lenei ou te fai atu ia te outou o le faatulagaga lenei ua valaaulia i ai a’u, ioe, e tala’i atu i o’u uso pele, ioe, ma tagata uma taitoatasi ua nonofo i le laueleele; ioe, e tala’i atu i tagata uma, o e matutua ma e laiti, o e pologa ma e saoloto; ioe, ou te fai atu ia te outou o e ua matutua, ma outou foi o e ua faamatuatagata, ma le tupulaga faia’e; ioe, ou te alaga atu ia te i latou, e ao ina latou salamo ma toe fanauina.

50 Ioe, sa faapea ona fetalai mai o le Agaga: Ia salamo, outou tuluiga uma o le lalolagi, ona ua lata mai le malo o le lagi; ioe, ua afio mai le Alo o le Atua i lona mamalu, i lona malosi, maoae, mana, ma le pule. Ioe, o’u uso pele e, ou te fai atu ia te outou, ua fetalai mai le Agaga: Faauta i le mamalu o le Tupu o le lalolagi aoao; ma le Tupu foi o le lagi ua lata lava ona susulu atu i totonu o le fanauga uma a tagata.

51 Ma ua fetalai mai foi le Agaga ia te a’u, ioe, ua alaga mai ia te a’u i se siufofoga malosi, ua fetalai mai: Alu atu ia ma fai atu i lenei nuu—Ia salamo, ona se’i vagana ai ua outou salamo, e lē mafai lava i soo se ala ona outou mautofi i le malo o le lagi.

52 Ma ou te toe fai atu ia te outou, ua fetalai mai le Agaga: Faauta, ua faataatia nei le ulaoge i le tafu’e o le laau, o lea o laau uma e lē fua mai i fua lelei, o le a tatuu i lalo ma lafoa’iina i le afi, ioe, o se afi e lē mafai ona mate, o se afi lava e lē matineia. Faauta, ma ia manatua, o le Paia e Toatasi ua fetalai mai ai.

53 Ma o lenei o’u uso pele e, ou te fai atu ia te outou, e mafai ea ona outou tetee nei fetalaiga; ioe, e mafai ea ona outou tuu ese nei mea, ma solia le Paia e Toatasi i lalo o o outou vae; ioe, e mafai ea ona faafefete a’e outou i le faamaualuluga o o outou loto; ioe, tou te tausiusi pea ea i le ofuina o ofu taugata ma tuu atu o outou loto i luga o mea lē aoga o le lalolagi, i luga o a outou oa?

54 Ioe, o le a outou tausiusi pea ea i le manatu faapea ua sili atu lo outou lelei nai lo o se isi; ioe, o le a outou tausiusi pea ea i le sauaina o o outou uso, o e ua latou faalotomaualalalo i latou lava ma ua savavali e tusa ma le faatulagaga paia a le Atua, lea na aumai ai i latou i lenei ekalesia, ina ua faapaiaina e le Agaga Paia, ma ua latou aumai galuega lelei ua tatau ai mo le salamo—

55 Ioe, ma o le a outou tausiusi pea ea i le fuli atu o o outou tua i e ua matitiva, ma e ua lē tagolima, ma i le taofi o a outou mea mai ia te i latou?

56 Ma mulimuli lava, o outou uma o e e tausiusi pea i lo outou amioleaga, ou te fai atu ia te outou, o i latou ia o le a tatuu i lalo ma lafoa’iina i le afi vaganā ai ua vave ona latou salamo.

57 Ma o lenei ou te fai atu ia te outou, outou uma o e e fia mulimuli i le siufofoga o le leoleo mamoe lelei, ia outou o ese mai i e amioleaga, ma ia outou tuese, ma aua ne’i pa’i atu ia latou mea lē mamā; ma faauta, o le a soloia ese o latou igoa, ina ia lē faitauina igoa o e amioleaga i totonu o igoa o e amiotonu, ina ia mafai ona faataunuuina le afioga a le Atua, ua fai mai: O le a lē faafefiloiina igoa o e amioleaga ma igoa o o’u tagata;

58 Ona o igoa o e amiotonu o le a tusia i le tusi o le ola, ma o le a ou tuu atu ia te i latou se nofoaga i lo’u lima taumatau. Ma o lenei, o’u uso e, se a fa a outou e faasaga i lenei mea? Ou te fai atu ia te outou, afai tou te tautatala tetee i ai, e lē afaina, ona e faataunuuina lava le afioga a le Atua.

59 Ona o ai se leoleo mamoe o i totonu o outou, ua ia te ia ni mamoe e tele, ae ua ia lē leoleo i luga o i latou, ina ia lē ulu mai luko ma ’aina lana lafu? Ma faauta, afai e ulu mai se luko i lana lafu pe na te lē tuli ese ea o ia i fafo? Ioe, ma mulimuli lava, afai na te mafaia, na te fasimate o ia.

60 Ma o lenei ou te fai atu ia te outou, o loo valaau mai le leoleo mamoe lelei ia te outou; ma afai tou te faalogo i lona siufofoga, o le a ia aumai outou i lana lafu, ma o outou o ana mamoe; ma ua ia poloa’iina outou ia aua ne’i outou tuu se luko feai ia ulu mai i totonu o outou, ina ia lē mafai ona faaumatiaina outou.

61 Ma o lenei, o a’u o Alema, ou te poloai atu ia te outou i le gagana a ia o lē na poloaiina a’u, ia outou tausiusi e faia upu ia sa ou tautala atu ai ia te outou.

62 Ou te tautala atu faapoloaiga ia te outou o e ua auai i le ekalesia; ma ia i latou o e ua lē auai i le ekalesia, ou te tautala atu i ai o se valaaulia, e faapea: O mai ma ia papatiso i le salamo, ina ia avea foi outou ma ē mafai ona aai i le fua o le laau o le ola.