1 Na ɔbaa dɛ ɔkyerɛɛw krataa bio dze kɛmaa ambrado no a ɔwɔ asaase no do no, ɔno nye Pahoran, na dɛm nsɛm yi na ɔkyerɛwee: Hwɛ, medze me krataa yi rema Pahoran a ɔwɔ Zarahemla asaase do no, nyia ɔyɛ ɔtsɛmbuafo na ambrado a ɔhwɛ asaase no do no, nye hɔn nyina a dɔm no eyi hɔn dɛ wɔnhwɛ ɔman no do na wɔnhyehyɛ ɔkõ yi ho dwumadzi no.

2 Na hwɛ, mowɔ nsɛm bi kã dze bu hɔn fɔ hɔn; na hwɛ, homankasa hom nyim dɛ woyii hom ma hom aaboaboa dɔm ano, na hom ama hɔn nkrantsee, nye mpea, na ɔkõ ho akodze ahorow nyina, na hom ama wɔakɔ nye Lamanfo no akɔkõ, wɔ hɛn asaase n’afã biara a wɔbɛba no.

3 Na afei hwɛ, mese hom dɛ emi, na mo dɔm so, nye Helaman so na no dɔm ehu amandze pii nyew, ɔkɔm, nsukɔm, nye ɔfona, na amandzehu ahorow pii.

4 Mbom hwɛ, na sɛ iyinom nko nye amandze a yehunii a nkyɛ yerunnhwinhwin anaadɛ yɛrennkã ho asɛm.

5 Mbom hwɛ, woekuku hɛn nkorɔfo mu piinara; nyew, mpempem atotɔr wɔ nkrantsee ano, wɔ aber a nkyɛ ɔremmba no dɛm sɛ hom brɛɛ hɛn nsordaafo a wɔdɔɔsõ na edziban so a. Nyew, hom ebu hom enyi egu hɛn do dodow.

6 Na afei hwɛ, yɛpɛ dɛ yehu siantsir a ɔnam do ma hom ebu hom enyi egu hɛn do kɛse dɛm yi; nyew, yɛpɛ dɛ yehu siantsir a ɔnam do ma hom anndwen iyi ho yi.

7 Ana hom dwen dɛ hom bɛtsena hom ahengua do tsibɔɔ wɔ ber a hom atamfo ridzi ewu bɔ homho aprɔw? Nyew, wɔ ber a worukuku hom enuanom mpempem—

8 Nyew, hɔn a hɔn enyi da hom do mpo dɛ hom bɔbɔ hɔn ho ban no, nyew, wɔdze hom esi dɛm bea yi do ama hom aaboa hɔn na wɔama hɔn edziban, nyew, nkyɛ ɔwɔ dɛ hom kɛma hɔn nsordaafo ma wɔkɔboa hɔn, ma wɔgye mpempem nkwa amma wɔanntɔ wɔ nkrantsee ano.

9 Mbom hwɛ, nnyɛ ne nyinara nye yi—hom dze hom edziban akam hɔn araa ma dodowara akõ ahwer hɔn nkwa osiandɛ wɔpɛ dɔm yi hɔn yieyɛ ntsi; nyew, na wɔyɛɛ iyi wɔ ber a nna ɔkɔm ruboku hɔn, osiandɛ hom ebu hom enyi egu hɔn do.

10 Na afei, m’enuanom adɔfo—ɔsɛ dɛ nkyɛ hom nya ɔdɔ; nyew, na ɔsɛ dɛ nkyɛ hom kenyan homho enyiber do dze ma dɔm yi hɔn yieyɛ nye hɔn fahodzi; na mbom hwɛ, hom ebu hom enyi egu do, dɛm ntsi mpempem hɔn bɔgyaa bogu hom tsir do dze edzi wer; nyew, osiandɛ hɔn sũ nye hɔn amandzehu nyinara Nyame nyim—

11 Hwɛ, hom susu dɛ hom bɛtsena hom ahengua do, a hom rennyɛ hwee na osiandɛ Nyankopɔn ne papayɛ dɔɔ sõ ntsi ɔbɛgye hom? Hwɛ, sɛ dɛm na hom susu a nna hom nsusui yɛ kwa.

12 Ana hom susu dɛ osian hom enuanom yi hɔn emumuyɛdze pii ntsi na wokum hɔn yi? Mese hom dɛ, sɛ dɛm na hom susu a nna hom nsusui yɛ kwa na mese hom dɛ, dodowara wɔ hɔ a wɔatotɔ wɔ nkrantsee ano a hwɛ afɔdzi no yɛ hom dze;

13 Na Ewuradze ma kwan ma woku atseneneefo ama ne pɛrpɛrdzi na n’atsɛmbu aaba emumuyɛfo do; dɛm ntsi mma hom nnsusu dɛ atseneneefo no ayew osiandɛ woekuku hɔn; mbom hwɛ, wɔhɛn Ewuradze hɔn Nyankopɔn n’ahomgye mu.

14 Na afei hwɛ, mese hom dɛ, mowɔ suro kɛse dɛ Nyankopɔn n’atsɛmbu bɛba dɔm yi do, osian hɔn enyihaw mbordo ntsi, nyew, hɛn aban mpo n’enyihaw, na hɔn enyi a wobu no mbordo gu hɔn enuanom do, nyew, wɔ hɔn a woeku hɔn no do.

15 Na sɛ nnyɛ emumuyɛdze a nna ahyɛse no ɔwɔ hɛn tsir mu a nkyɛ yetumii nye hɛn atamfo dzii esi ma woenntum ennya tum wɔ hɛn do.

16 Nyew, sɛ nnyɛ ɔkõ a osii hɛnankasa hɛn mu no a; nyew, sɛ nnyɛ dɛm ahensifo no a, hɔn na wɔkãa bɔgya pii gui wɔ hɛn mu no, sɛ yɛkaa wentwiwentwi a osii hɛnankasa hɛn mu no, sɛ yɛkãa hɛn ahoɔdzen bɔɔ mu dɛ mbrɛ yɛayɛ no sesei yi a; nyew, sɛ nnyɛ dɛm ahensifo yi a nna wɔrohwehwɛ hɛn do tum nye tumdzi; sɛ wodzii nokwar dze maa hɛn fahodzi, na wɔnye hɛn yɛɛ kor, ma yɛkɔree nye hɛn atamfo no kɔkõe seen dɛ wɔfaa hɔn akodze nye hɛn bɔkõe ma yɛkãa hɛnankasa hɛn bɔgya pii gui; nyew, sɛ yɛkɔr hɔn do wɔ Ewuradze n’ahoɔdzen mu a, nkyɛ yɛbɔɔ hɛn atamfo petsee, na nkyɛ ɔbɛyɛ hɔ dɛm ma n’asɛm aahyɛ mã.

17 Mbom hwɛ, afei Lamanfo no reba hɛn do, regyegye hɛn nsaase, na wɔdze nkrantsee rukuku hɛn nkorɔfo, nyew, hɛn mbaa nye hɛn mbofra, na wɔafa hɔn ndɔmmum so dze hɔn kɔ, na wɔama woehu amandze ahorow pii, na iyi nyinara fi hɔn a nna wɔreper hwehwɛ tum nye tumdzi no hɔn emumuyɛdze, nyew, ɔyɛ dɛm ahensifo no.

18 Mbom ebɛnadze ntsi na merekasa pii fa dɛm asɛm yi ho? Osiandɛ nna yennyim dza ɔnam do ma homankasa hom reper hwehwɛ tumdzi yi. Yennyim, na mbom yehu dɛ hom yɛ hom man n’atamfo.

19 Anaadɛ hom ebu hom enyi egu hɛn do osiandɛ hom hyɛ hɛn man yi ne finimfin na aweɔmfo etwa homho ehyia ntsi na hom mma wɔmmfa edziban mmbrɛ hɛn, na wɔmmfa dɔm so mmbɛkã hɛn nsordaafo ho?

20 Ana hom werɛ efir Ewuradze hom Nyankopɔn ne mbrasɛm no? Nyew, ana hom werɛ efir hɛn egyanom hɔn ndɔmmum no? Ana hom werɛ efir mpɛn pii a ɔagye hɛn efi hɛn atamfo nsa no?

21 Anaa hom susu dɛ Ewuradze bɛda ho agye hɛn, wɔ ber a yɛtsena hɛn ahengua do na dza Ewuradze dze ama hɛn no, yɛremmfa nndzi dwuma?

22 Nyew, ana hom bɛtsena enyihaw mu wɔ ber a mpempem etwa homho ehyia a hɔn so wɔtse enyihaw mu, wɔ aber a mpempem so etwa asaase n’ahe ho ehyia a wɔrotɔ wɔ nkrantsee ano, nyew, woepirapira na worikyi bɔgya?

23 Ana hom susu dɛ Nyankopɔn bɔhwɛ hom dɛ hom nndzi fɔ wɔ ber a hom da ho tse hɔ rohwɛ dɛm ndzɛmba yinom? Hwɛ mese hom dɛ, Oho. Afei mebɛpɛ dɛ hom kaa dɛ Nyankopɔn akã dɛ wobedzi kan atsew kuraba no mu ansaana, wɔatsew noho so.

24 Na afei, gyedɛ hom nu homho wɔ dza hom ayɛ ho, na hom hyɛ ase ma hom mu do yɛ biribi, na hom dze edziban na dɔm brɛ hɛn, nye Helaman so, ama ɔdze ama hɔn a wɔrohwɛ hɛn kurow n’afã bea a ne nsa akã bio no, na hɛn so yetum agye hɛn ahodze wɔ dɛm mbea so a aka no, hwɛ obeye dɛ yebegyaa dɛ yɛnye Lamanfo no bɔtwe bio kesi dɛ yebedzi kan atsew hɛn kuraba no mu, nyew, hɛn aban ne tsir kɛse no mpo.

25 Na gyedɛ hom pen me krataa yi do, na hom yi fahodzi sunsum mapã kyerɛ me na hom per ma hɛn nsordaafo na hom bɔ hɔnho ban, na hom ma hɔn edziban ma wodzi, hwɛ mebegya me fahodzifo mu yi ne fã ma wɔahwɛ hɛn asaase yi n’afã, na mebɛserɛ Nyankopɔn n’ahoɔdzen nye ne nhyira egu hɔn do, amma tum biara enntum annkõ enntsia hɔn—

26 Na iyi osian hɔn gyedzi mbordo, nye hɔn abotar a woenya wɔ hɔn abɛbrɛsɛ mu ntsi—

27 Na mebɛba hom nkyɛn, na sɛ obi wɔ hom mu a ɔpɛ fahodzi a, nyew, fahodzi kakraabi mpo a, hwɛ, mibekenyan bi wɔ hom mu, ekesi dɛ hɔn a wɔper hwehwɛ tum no mpo bɛsã koraa.

28 Nyew, hwɛ munnsuro hom tum anaaso hom tumdzi, na mbom me Nyame na musuro no; na ne mbrasɛm ntsi na mafa me nkrantsee dɛ medze robɔ me man ho ban, na osian hom emumuyɛ ntsi na yɛayew hɛn dɔm mu pii dɛm.

29 Hwɛ mber asõ, nyew, mber abɛn, na gyedɛ hom kentsen homho dɛ hom bɔbɔ hom man nye hom mbofra nkakraba ho ban, annyɛ dɛm a pɛrpɛrdzi nkrantsee no bɛsensɛn hom do; nyew, obesi hom do na ɔasɛɛ hom koraa mpo.

30 Hwɛ, morotweɔn hom mboa; na, gyedɛ hom bɔboa hɛn, hwɛ, mereba hom do wɔ Zarahemla asaase do na medze nkrantsee ebotwitwa hom araa ma hom rinnya tum bio mmfa nnsiw nkorɔfo yi hɔn fahodzi kwan.

31 Na hwɛ Ewuradze remma kwan mma hom nntsena ase, mma homho nnyɛ dzen wɔ hom bɔn mu mma hom mmfa nnsɛɛ n’atseneneefo.

32 Hwɛ, ana hom susu dɛ Ewuradze begyaa hom na oebua Lamanfo atsɛn wɔ ber a osian hɔn egyanom amambra ntsi na ama woekyir hom, nyew, na hɔn a wɔtseew etua fii hɛn mu no so ntsi na wɔama ɔtan yi ayɛ kɛse, ana osian hom enyimnyampɛ nye wiadze mu egyangyandze ntsi na hom yɛ bɔn yi?

33 Hom nyim dɛ hom atõ Nyame ne mbra, nna hom nyim so dɛ hom tsiatsia do wɔ hom ananadze. Hwɛ, Ewuradze kãa kyerɛɛ me dɛ: Sɛ hɔn a hom eyi hɔn dɛ wɔnhwɛ hom do no ennu hɔnho wɔ hɔn bɔn nye hɔn emumuyɛ ho a, ɔno hom nkɔ nye hɔn nkɔkõ.

34 Na afei hwɛ, emi Moroni, medzi ahyɛmu dɛ mibedzi me Nyame ne mbrasɛm do; dɛm ntsi mebɛpɛ dɛ hom betsie Nyame n’asɛm, na ntsɛmara hom nsoma ma wɔmfa edziban nye dɔm mbrɛ emi nye Helaman so.

35 Na hwɛ, sɛ hom annyɛ iyi a, mebɛba hom do ntsɛmara; na hwɛ, Nyankopɔn remma kwan mma ɔkɔm nnku hɛn; dɛm ntsi ɔbɛma hɛn hom edziban no bi, sɛ ɔba no dɛ nkrantseetwe mu mpo a. Afei hom nhwɛ ma Nyame n’asɛm nhyɛ mã.

36 Hwɛ, emi nye Moroni, hom nsordaanyi ɔsahen panyin no. Meremmper nnhwehwɛ tum, na mbom dɛ mebɛbrɛ no adze. Moronnhwehwɛ wiadze enyimnyam, mbom me Nyankopɔn n’enyimnyam, nye me man ne fahodzi nye ne yieyɛ a. Dɛm ntsi medze mo nwoma yi aba ewiei.