1 Pea ko ʻeni naʻe hoko ʻo pehē hili ʻa e fakaʻosi ʻe ʻAlamā ʻene lea ki he kakai ʻo e siasí, ʻa ia naʻe fokotuʻu ʻi he kolo ko Seilahemalá, naʻá ne fakanofo ha kau taulaʻeiki mo ha kaumātuʻa, ʻi heʻene hilifaki hono nimá ʻo fakatatau ki he founga ʻa e ʻOtuá, ke puleʻi mo leʻohi ʻa e siasí.

2 Pea naʻe hoko ʻo pehē ko kinautolu kotoa pē naʻe ʻikai kau ki he siasí ʻa ia naʻa nau fakatomala mei heʻenau ngaahi angahalá naʻe papitaiso ʻa kinautolu ki he fakatomalá, pea naʻe tali ʻa kinautolu ki he siasí.

3 Pea naʻe hoko foki ʻo pehē ʻilonga ʻa kinautolu naʻe kau ki he siasí ʻa ia naʻe ʻikai fakatomala mei heʻenau ngaahi fai angahalá ʻo fakavaivaiʻi ʻa kinautolu ʻi he ʻao ʻo e ʻOtuá—ko ʻeku lau kiate kinautolu naʻe fielahi ʻi he hīkisia ʻo honau lotó—naʻe tukuange ʻa kinautolu, pea naʻe tāmateʻi honau ngaahi hingoá, pea naʻe ʻikai toe lau honau hingoá fakataha mo e kau māʻoniʻoní.

4 Pea ko ia naʻa nau kamata ke toe fokotuʻu ʻa e lakanga ʻo e siasí ʻi he kolo ko Seilahemalá.

5 Ko ʻeni ʻoku ou loto ke mou ʻilo naʻe malanga ʻaki taʻetotongi ʻa e folofola ʻa e ʻOtuá ki he kakai fulipē, pea naʻe ʻikai taʻofi mei ha taha ʻa e faingamālie ke nau fakataha ʻo fanongo ki he folofola ʻa e ʻOtuá.

6 Ka neongo iá naʻe fekau ki he fānau ʻa e ʻOtuá ke nau faʻa fakataha, mo kau fakataha ʻi he ʻaukai pea mo e lotu lahi koeʻuhi ko e lelei ʻa e laumālie ʻo kinautolu ʻa ia naʻe ʻikai ʻiloʻi ʻa e ʻOtuá.

7 Pea ko ʻeni naʻe hoko ʻo pehē ʻi he ʻosi fai ʻe ʻAlamā ʻa e ngaahi tuʻutuʻuni ko ʻení naʻá ne ʻalu meiate kinautolu, ʻio, mei he siasi ʻa ia naʻe ʻi he kolo ko Seilahemalá, ʻo ne ʻalu atu ki he fakahahake ʻo e vaitafe ko Saitoné, ki he teleʻa ko Kitioné, kuo langa ai ha kolo, naʻe ui ko e kolo ko Kitioné, ʻa ia naʻe ʻi he teleʻa naʻe ui ko Kitioné, ʻa ia naʻe tauhingoa ki he hingoa ʻo e tangata naʻe fakapoongi ʻi he nima ʻo Nēhoá ʻaki ʻa e heletā.

8 Pea naʻe ʻalu ʻa ʻAlamā ʻo kamata ke fakahā ʻa e folofola ʻa e ʻOtuá ki he siasi kuo fokotuʻu ʻi he teleʻa ko Kitioné, ʻo fakatatau ki he fakahā ʻo e moʻoni ʻo e folofola ʻa ia kuo lea ʻaki ʻe heʻene ngaahi tamaí, pea fakatatau ki he lea ʻa e laumālie ʻo e kikite ʻa ia naʻe ʻiate iá, ʻo fakatatau ki he fakamoʻoni ʻo Sīsū Kalaisi, ko e ʻAlo ʻo e ʻOtuá, ʻa ia ʻe hāʻele mai ʻo huhuʻi hono kakaí mei heʻenau ngaahi angahalá, pea mo e lakanga toputapu ʻa ia kuo uiuiʻi ai iá. Pea kuo tohi ia. ʻĒmeni.