1 Ma o lenei sa oo ina toe foi mai Alema mai le nuu o Kitiona, ina ua uma ona ia a’oa’o atu le nuu o Kitiona i mea e tele e lē mafai ona tusia, ina ua uma ona ia faatuina le faatulagaga o le ekalesia, e pei ona sa ia faia muamua i le laueleele o Sara’emila, ioe, sa ia toe foi atu i lona lava fale i Sara’emila e malolo ai o ia lava mai galuega na ia faia.

2 Ma sa faapea ona i’u o le lona iva o tausaga o le nofoa’iga a faamasino i le nuu o Nifae.

3 Ma sa oo i le amataga o le lona sefulu o tausaga o le nofoa’iga a faamasino i luga o le nuu o Nifae, na alu ese atu ai Alema mai iina ma alu atu lana malaga i le laueleele o Meleka, i le itu i sisifo o le vaitafe o Saitonu, i le itu i sisifo i tafatafa o tuaoi o le vao.

4 Ma sa amata ona ia aoao atu i tagata o le laueleele o Meleka e tusa ma le faatulagaga paia a le Atua, lea sa valaaulia i ai o ia; ma sa amata ona ia a’oa’o atu tagata i le laueleele atoa o Meleka.

5 Ma sa oo ina o mai tagata ia te ia mai tuaoi uma o le laueleele ia sa i tafatafa o le vao. Ma sa papatisoina i latou o i le laueleele atoa;

6 Sa oo ina ua uma lana galuega i Meleka sa alu ese atu o ia mai iina, ma malaga atu i se malaga e tolu aso i le itu i matu o le laueleele o Meleka; ma sa oo atu o ia i se aai sa ta’ua o Amonaea.

7 O lenei sa avea o se tu masani i tagata o Nifae le faaigoa o o latou laueleele, ma o latou aai, ma o latou nuu, ioe, e oo i o latou nuu laiti uma, i le igoa o ia o lē na muai nofoia i latou; ma sa faapea le tulaga sa i ai le laueleele o Amonaea.

8 Ma sa oo ina ua oo atu Alema i le aai o Amonaea sa amata ona ia tala’i atu le afioga a le Atua ia te i latou.

9 O lenei sa malosi tele aafiaga a Satani i loto o tagata o le aai o Amonaea; o lea sa latou lē fia faalogo ai i upu a Alema.

10 Ae ui i lea sa galue malosi Alema i le agaga, ma tauivi ma le Atua e ala i le tatalo malosi, ina ia ona liligi ifo lona Agaga i luga o tagata o e sa i le aai; ma ia ona tuu mai foi ia mafai ona ia papatisoina i latou i le salamo.

11 Ae ui i lea, sa latou faamaaa o latou loto, ua fai mai ia te ia: Faauta, ua matou iloa o oe o Alema; ma ua matou iloa o oe o le faitaulaga sili o le ekalesia lea ua e faatuina i le tele o vaega o le laueleele, e tusa ai ma lau masani; ma e lē o i matou o ni isi o lau ekalesia, ma e matou te lē talitonu i ni tu valea faapena.

12 Ma o lenei ua matou iloa ona o i matou e lē o ni isi o lau ekalesia ua matou iloa e leai sau pule i luga o i matou; ma ua e tuu atu le nofoa-faamasino ia Nifaea; o lea ua lē o oe o se faamasino sili i luga o i matou.

13 O lenei ina ua uma ona fai mai e tagata nei upu, ma tetee mai i ana upu uma, ma faifai mai ia te ia, ma tuufeanu i ona luga, ma faatonu ia tuli ese o ia mai lo latou aai, sa ia alu ese ai mai iina ma alu atu lana malaga agai i le aai sa ta’ua o Arona.

14 Ma sa oo ina a’o malaga atu o ia iina, ua mafatia i le mamafa o le faanoanoa, ma asa atu i le puapuaga tele ma le tigā o le agaga, ona o le amioleaga o tagata o e sa i le aai o Amonaea, sa oo ina a’o mafatia Alema i le mamafa o le faanoanoa, faauta, sa faaali ifo se agelu a le Alii ia te ia, ua fetalai mai:

15 Amuia lava oe, Alema; o lea, inā ea ia i luga lou ulu ma olioli, ona ua ia te oe se pogai tele e te olioli ai; ona sa e faamaoni i le tausiga o poloaiga a le Atua mai lava i le taimi na e maua ai lau savali muamua mai ia te ia. Faauta, o a’u o ia o lē na aumaia lena savali ia te oe.

16 Ma faauta, ua auina mai a’u e poloaiina oe, ia e toe foi atu i le aai o Amonaea, ma toe tala’i atu i tagata o le aai; ioe, tala’i atu ia te i latou. Ioe, fai atu ia te i latou, vaganā ai ua latou salamo, o le a faaumatia i latou e le Alii le Atua.

17 Auā faauta, o loo latou suesue i le taimi nei ia mafai ona latou faaumatia le saolotoga o lou nuu, (ona sa faapea ona fetalai mai ai o le Alii) o se mea ua lē tusa ai ma tulafono, ma faamasinoga, ma poloaiga, ia na ia tuuina mai i ona tagata.

18 O lenei sa oo ina ua uma ona maua e Alema lana savali mai le agelu a le Alii sa vave ona ia toe foi atu i le laueleele o Amonaea. Ma sa ia ulufale atu i le aai i se tasi auala, ioe, i le ala lea o loo i le itu i saute o le aai o Amonaea.

19 Ma a’o ulufale atu o ia i le aai, sa fia ’ai o ia, ma sa ia fai atu i se alii: E te tuuina mai ea sina meaai i se auauna faatauvaa a le Atua?

20 Ma sa fai mai lea alii ia te ia: O a’u o se sa Nifaē, ma ua ou iloa o oe o se perofeta paia a le Atua, ona o oe o le tagata lea o lē na fetalai mai ai se agelu i se faaaliga vaaia: Ia e talia o ia. O lea, ta o faatasi ma a’u i lo’u fale ma o le a ou avatu ia te oe ni a’u meaai; ma ua ou iloa o le a avea oe ma faamanuiaga ia te a’u ma lo’u aiga.

21 Ma sa oo ina talia o ia e lenei alii i lona fale; ma o le igoa o lenei alii o Amoleka; ma sa ia aumai areto ma aano o manu ma laulau atu i luma o Alema.

22 Ma sa oo ina taumafa e Alema areto ma laulelei ai; ma sa faamanuia atu o ia ia Amoleka ma lona aiga, ma sa ia avatu le faafetai i le Atua.

23 Ma ina ua uma ona taumafa o ia ma ua laulelei sa ia fai atu ia Amoleka: O a’u o Alema, ma o a’u o le faitaulaga sili i luga o le ekalesia a le Atua i le laueleele atoa.

24 Ma faauta, ua valaauina a’u e tala’i atu le afioga a le Atua i totonu o nei tagata uma, e tusa ma le agaga o faaaliga ma valoaga; ma sa ou i ai i le laueleele lenei ae sa latou lē taliaina a’u, ae sa latou tuli ese a’u ma sa toetoe ina ou fulitua atu i lenei laueleele e faavavau.

25 Peitai faauta, ua poloaiina a’u ia ou toe liliu mai ma vavalo atu i lenei nuu, ioe, ma molimau faasaga atu ia te i latou e uiga ia latou amioletonu.

26 Ma o lenei, Amoleka, ona ua e fafaga ia te a’u ma e aumai a’u i totonu o lou fale, ua faamanuiaina oe; ona sa ou fia’ai, auā sa ou anapogi i aso e tele.

27 Ma sa tele aso sa nofo ai Alema faatasi ma Amoleka a’o le’i amata ona ia tala’i atu i tagata.

28 Ma sa oo ina faateteleina le amioletonu o tagata.

29 Ma sa oo mai le afioga ia Alema, ua fetalai mai: Alu ia; ma fai atu foi i la’u auauna o Amoleka, ia alu ma vavalo atu i lenei nuu, e faapea—Ia outou salamo, ona ua faapea ona fetalai mai o le Alii, vaganā ai ua outou salamo, o le a ou asiasi atu i lenei nuu i lo’u ita; ioe, ma o le a ou lē liliu ese lo’u ita tele.

30 Ma sa alu atu Alema, ma Amoleka foi, i totonu o tagata, e alaga atu afioga a le Atua ia te i latou; ma sa faatumuina i la’ua i le Agaga Paia.

31 Ma sa ia te i la’ua se mana sa tuuina mai ia te i la’ua, sa oo ina lē mafai ona taofiofia o i la’ua i falepuipui; pe na mafai foi e se tagata ona fasioti ia te i la’ua; ae ui i lea sa la lē faaaogaina lo la’ua mana seia oo lava ina saisaia i la’ua i fusi ma lafo i totonu o le falepuipui. O lenei, sa faia lenei mea ina ia mafai ona faaali mai ai e le Alii lona mana e ala mai ia te i la’ua.

32 Ma sa oo ina la’ua o atu, ma amata ona tala’i ma vavalo atu i tagata, e tusa ai ma le agaga ma le mana na tuu mai e le Alii ia te i la’ua.