Fare Babyor ku Enos

1 Musap gaed, yibi buch ni gag, Enos, e gumnang ni chitamag e beeʼ nib moʼon nib mangil—ya ire fil ngog e thin rokʼ, nge ku morngaʼagen e machathowol nge fonow rokʼ fare Somoel—ma gube oge magaer ngakʼ e Got rog riy—

2 Ma gura yoeg morngaʼagen ba fathael ni gu tay u pʼoewchen Got, u mʼon ni ngan nʼaegfan e pi denen rog.

3 Musap gaed, mug waen ko mokol gamanman nga magerger; ma fapi thin niʼir e bagaʼ ni guma rungʼag ni ma weliy e chitamag u morngaʼagen e yafos ni gubinfen, nge falfalaenʼ rokʼ fapi saints, e ri rich nib toʼaer nga lan gumʼirchaʼeg.

4 Ma yaʼel rog e ri yibe bilig ngakʼ; mug ragbug nga butʼ u pʼoewchen e Anisunmiyeg, mug yoer ngakʼ u dakean e meybil rog nge wenig rog ni fan ko yaʼel rog; nge fare rran ni poloʼ e rug yoer riy ngakʼ; arragon, ma napʼan ni nepʼ ma kug be meybil nib gaaʼ lamag nge yaeni taw nga tharmiy.

5 Ma arame yib ba lam ngog, ni be gaʼar: Enos, denen rom e kan nʼaegfan, ma bay ni falʼeg waʼatham.

6 Me gag, Enos, e gumnang ni Got e dabi baen; ere, kireb rog e ke mʼay.

7 Mug gaʼar: Somoel, mang e ke rinʼ ni arragon?

8 Me gaʼar ngog: Bachan e mich rom ngakʼ Kristus, niʼir e chaʼ ni gur ma dawor mu rungʼag laman fa muguy. Ma ba yoʼor e duw nra yaen u mʼon riy ni nga fini dag ir ni bay doewngin; ere, ngam man, mich rom e ke poloʼ nigem.

9 Chiney, e yibi buch u napʼan nuggu rungʼag e pi thin ney mug tabab i thamiy rog nug baʼadag ni nge felʼ rogon e paer rokʼ pi walageg, ni fapi Nephites; ere, gu piiʼeg ni poloʼ ngakʼ Got ni fan ngoraed.

10 Ma napʼan ni be wagagaey laninʼug, ma musap gaed, fare thin rokʼ Somoel e yib nga laninʼug bayay, ni gaʼar: Bay gub gguy pi walagem ni be yaen u rogon faraed yulʼyulʼ i koel falan e pi motochiyel rog. Kug piiʼ ngoraed e giney e binaw, ni bangi binaw nib thothup; ma dab gu kireb nag waʼathan ma faʼanra nge buch ma bachan e denen; ere, bay gub gguy pi walagem ni boed rogon ni kugog faram; nge pi ngongol roraed ni kireb e gura oeg e kirbaenʼ riy nga dakean loelugraed.

11 Ma tomuren ni gag, Enos, e kug rungʼag e pi thin ney, ma mich rog e paer ni ke miyuluy ngakʼ Somoel; mug meybil ngakʼ u fithikʼ e gafgowaenʼ nib nʼuw napʼan ni fan ngakʼ pi walageg, ni fapi Lamanites.

12 Me yibi buch u tomuren ni kug meybil ma kug muruwel u poloʼ i gelingig, me gaʼar Somoel ngog: Bay gu piiʼ ngom ni boed rogon ni gabaʼadag, ni bachan e mich rom.

13 Ere chiney e musap gaed, ireray e re athap niʼug athapeg rokʼ—ni faʼanra thingari buch, ni gidiiʼ rog, ni fapi Nephites, e ngar awgaed nga fithikʼ e kireb, ma faʼanra nge buch ni ngan gatheayraed, ma fapi Lamanites e dab ni gatheayraed, ma fare Somoel ni Got e nge chaʼariy ba chep ni morngaʼagen e gidiiʼ rog, ni fapi Nephites; ni faʼanra aram rogon u dakean gelingin i paʼ nib thothup, ni gomanga yigi yog ni yib u lan boech e rran nga mʼon ngakʼ fapi Lamanites, ma, sana, gomanga rayog ni ngar thap gaed—

14 Ya ngiyalʼ i nnʼey e rib mʼay fan e pi gafgow nug tayed u napʼan ni gamaed be sulweg raed ko bin riyulʼ e mich. Ma kar micheged u fithikʼ e damomuw roraed ni, faʼan nra yog, ma yaedra gatheay e pi chep romaed nge gamaed, nge ku gubin e pi yalen e pi chitamangmaed.

15 Ere, bachan e gumnang ni fare Somoel ni Got e yog ni chaʼariy e pi chep romaed, mug yoer ngakʼ ni dagur tal, ya ke gaʼar ngog: Demutrug banʼen ni gara ning u fithikʼ e mich, ni be mich u wunʼum ni rayog ngom u fithingan Kristus, ma rayog ngom.

16 Me gag e bay e mich rog, ere gu yoer nag ngakʼ Got ni nge chaʼariy fapi chep; me michmicheg ngog ni ra fek iyaen ko fapi Lamanites ko ngiyalʼ i nʼen nib mʼagaenʼ ngay.

17 Me gag, Enos, e gumnang nra buch ni boed rogon ni micheg ko fare mʼag; ma arame gapas laninʼug.

18 Ma fare Somoel e gaʼar ngog: Pi chitamangmed e kuʼar rogon ni yaed baʼadag ni nggu rinʼ e rennʼey; ma yira rinʼ ni rogon ni yaed baʼadag u rogon e mich roraed; ya mich roraed e boed rogon e birom.

19 Me yibi buch ni gag, Enos, e guwaen iyaen u fithikʼ fapi gidiiʼ rokʼ Nephi, ni gube prophesy ni morngaʼagen e pinʼen ni bay yib, ma gube micheg morngaʼagen e pinʼen ni kug rungʼag ma kug gguy.

20 Mug yoloey babyoren ni fapi gidiiʼ rokʼ Nephi e rri gayed rogon ni ngar sulweged fapi Lamanites ko bin riyulʼ e mich ngakʼ Got. Machane pi muruwel romaed e rib mʼayfan; ya fananikan roraed e kar yuluyed u laniyaenʼraed ma ke wawliy raed e thagith roraed ngar manged gidiiʼ nib malboch, mab tagalngach, ma, ma araʼareg e puʼoeg rachaʼ, mab ta meybil ko liyos, ma yaed ba sunsungor; ni yaed ba tamalang gamanman; ni yaed ma paer u lan e tent, ni yaed ma garbael iyaen u lan wuruʼ e binaw ni kar mʼaged nochi ke oeng nib ngochngoch nga lukungraed, ma loelugraed e kan puy e piy riy ke mʼay; ma talin e cham ni yaed ba salap ko cham ngay e gatʼing, nge sayden nib achig, nge tow. Ma boʼor i yaed e dariy banʼen ni ma kay ma kemus ni ufin nib kakʼling; ma darur tal gaed i gay rogon ni ngar liiʼed gamaed.

21 Me yibi buch ni fapi gidiiʼ rokʼ Nephi e ra ngongliyed e mileayʼ, mar yunged gubin mite foeyʼ nge waʼamngin, mar chuguliyed yu ulung i gamanman, nge ulung ko gubin mite garbaw, nge kaming, nge kaming ni malboch, nge os nib yoʼor.

22 Ma rib yoʼor e profet ni i paer romaed u fithikʼmaed. Ma fapi gidiiʼ e bogi gidiiʼ nib ʼelʼel laniyaenʼ raed, ni rib moʼomawʼ ngoraed ni ngar nanged fan banʼen.

23 Ma dariy banʼen ma kemus ni maʼangech, nge machib, nge prophesy ni morngaʼagen e mael, nge pi maleʼeg thin, nge pi gafgow, nge gubin e ngiyalʼ ni yibe pug uran ngoraed e yamʼ, nge nʼumngin i napʼan e gubinechubog, nge pi pufthin nge fare gelingin Got, ma gubin e pinnʼey—e ba puguran ngoraed ni nga ur pired ma be yib nag madgun fare Somoel ngoraed. Gube yoeg ni dariy banʼen ma kemus ni mit ney e banʼen, nge welthin ni rib almarin mab tamilang, e ra tileg raed ni nga dab kur gur gaed iyaen nga butʼ ko gafgow. Ma ireray rogon nug yoloey morngaʼagraed.

24 Mu gguy e mael u thilin fapi Nephites nge Lamanites u langgin e pi rran rog.

25 Me yibi buch ni arame kug pilibthir iyaen, ma arame ke yaeni gaman raʼay nge medilipi ragag nge mereb e duw ni ke yaen ko fare ngiyalʼ innʼem ni chitamangmaed i Lehi e chuw u Jerusalem.

26 Ma arame gguy ni ke chugur ni thingar guwaen ko loew rog, ma kan gagyeg nag nga dakeanag u gelingin Got ni thingar gu machib mug prophesy nag ngakʼ e pi gidiiʼ ney, mug weliy nge nang e yoʼor fare bugithin u rogon e tin nib riyulʼ ni bay rokʼ Kristus. Mu kug weliy ni nge nang e yoʼor u lan urngin e pi rran rog, ma kug falfalaenʼ ngay nib gel nib dakean ko tin nu fayleng banʼen.

27 Ma ke chuchugur ni nggu waen nga tagilʼ e toffan rog, niʼir e bay rokʼ e Tabiyul rog; ya gumnang niʼir e gura toffan rokʼ. Ma gura falfalaenʼ u lan fare rran ni dowef rog nra yimʼ e ra chuw nga ba dowef ni dab ki yimʼ, mug sakʼiy nga pʼoewchen; ma arame gura guy oewchen ni gub falaenʼ ngay, ma ra gaʼar ngog: Moy ngog, gur e ba felʼ waʼatham, bay bangi tagilʼ ni kan ngongliy ni fan ngom u lan fapi singgil ko chitamag. Amen.