Te Buka a Enosa

1 Inaha, i muri a’era, ’ua ’ite au, ’o Enosa ē, e ta’ata parauti’a ’oia, ’oia ho’i, tō’u ra metua tāne—’e nāna i ha’api’i mai iā’u nei i tōna reo, ’e i te pa’ari ’e te a’o a te Fatu—’e ’ia fa’ahanahanahia te i’oa o tō’u ra Atua nō te reira.

2 ’E e fa’a’ite atu vau ia ’outou i te tōra’a tā’u i tō i mua i te Atua, hou vau i fāri’i ai i te ha’amatarara’a nō tā’u ra mau hara.

3 Inaha, ’ua haere atu vau e taparahi i te mau ’ānimara i roto i te mau uru rā’au ; ’e te mau parau tā’u i fa’aro’o pinepine i tō’u metua tāne i te paraura’a nō ni’a i te ora mure ’ore ’e te ’oa’oa ho’i o te feiā mo’a ra, ’ua puta hōhonu roa ïa i roto i tō’u ’ā’au.

4 ’E ’ua hia’ai ihora tō’u vārua ; ’e ’ua topa turi ihora vau i mua i te aro o Tei Hamani iā’u ra, ’e ’ua ti’aoro atu ra vau iāna ma te pure ’ū’ana ’e te anira’a atu i te maita’i nō tō’u ihora vārua ; ’e i taua mahana tā’āto’a ra ’ua ti’aoro noa vau iāna ; ’oia ïa, e pō ihora tē ha’apūai noa ra vau i tō’u reo i ni’a, ē tae roa atu ra te reira i ni’a i te mau ra’i ra.

5 ’E ’ua tae mai ra te hō’ē reo iā’u ra, i te nā-’ō-ra’a mai ē : E Enosa, ’ua fa’a’orehia tā ’oe mau hara, ’e e ha’amaita’ihia ’oe.

6 ’E ’ua ’ite ho’i au, ’o Enosa ē, ’aita e ti’a i te Atua ’ia parau i te parau ha’avare ; nō reira, ’ua horoi-’ē-hia tō’u mana’o oto.

7 ’E ’ua parau atu ra vau : E te Fatu, e mea nāheahia te reira ?

8 ’E ’ua parau mai ra ’oia iā’u : Nō tō ’oe fa’aro’o i te Mesia, ’o tei ’ore i fa’aro’ohia e ’aore ho’i i hi’ohia e ’oe na i te mātāmua. ’E e hope e rave rahi matahiti hou ’oia e fa’a’ite mai ai iāna iho i te tino nei ; nō reira, ’a haere na, nā tō ’oe fa’aro’o i fa’aora ia ’oe.

9 I teienei, i muri a’era, ’ia fa’aro’o a’era vau i teie nei mau parau, ’ua tupu ihora tō’u hina’aro ’ia fa’aorahia tō’u ra mau taea’e, te mau ’āti Nephi ; nō reira, ’ua nīni’i atu ra vau i te hina’aro tā’āto’a o tō’u vārua i te Atua nō rātou.

10 ’E ’a nā reira noa ai au i te pure ’ū’ana i roto i te vārua, inaha, ’ua tae fa’ahou mai ra te reo o te Fatu i roto i tō’u nei mana’o i te nā-’ō-ra’a mai ē : E hi’o aroha vau i tō ’oe mau taea’e mai te au i tō rātou itoito i te ha’apa’ora’a i tā’u ra mau fa’auera’a. Nā’u teie nei fenua i hōro’a atu nō rātou, ’e e fenua mo’a ho’i te reira ; ’e e ’ore ho’i au e ’anatema i te reira, maori rā nō te mau ’ohipa ’ī’ino ; nō reira, e fa’ahapa atu vau i tō ’oe mau taea’e mai tā’u ho’i i parau ra ; ’e e fa’atae au i tā rātou mau hapa i ni’a i tō rātou iho upo’o ma te ’oto.

11 ’E ’ia fa’aro’o a’era vau, ’o Enosa, i teie nei mau parau, ’ua ha’amata ihora tō’u fa’aro’o i te Fatu i te riro ’ei mea ’āueue ’ore ; ’e ’ua pure atu ra vau iāna ma te mau pure ’ū’ana e rave rahi nō tō’u ra mau taea’e i te mau ’āti Lamana ra.

12 ’E i muri a’era, ’ia oti a’era iā’u te pure ’e te ’ohipa ma te itoito rahi, ’ua parau mai ra te Fatu iā’u : E hōro’a atu vau ia ’oe mai te au i tō ’oe mau hina’aro, nō tō ’oe na fa’aro’o.

13 ’E i teienei, inaha, ’o te mea ho’i teie tā’u i hina’aro iāna ra—’oia ho’i, mai te mea e ’ōfati tō’u mau ta’ata, te mau ’āti Nephi, i te ture, ’e ’ua ha’amouhia ho’i, ’aita rā te mau ’āti Lamana i ha’amouhia, ’ia fa’aherehere te Fatu te Atua i te pāpa’a parau o tō’u ra mau ta’ata, te mau ’āti Nephi ; ’e e mea ti’a ïa ’ia fa’a’itehia mai e te mana o tōna ra rima mo’a i te mau ’āti Lamana i te tahi mau tau i mua nei, penei a’e ’o te ’āfa’i mai te reira ia rātou i roto i te fa’aorara’a—

14 ’E i teienei rā, ’ua faufa’a ’ore noa tā mātou mau tāmatara’a ia fa’aho’i mai ia rātou i te fa’aro’o mau. ’E ’ua tapu rātou i roto i tō rātou riri ’ū’ana, mai te mea e ti’a ia rātou, e ha’amou rātou i tā mātou mau pāpa’a parau ’e ia mātou ato’a, ’e te mau peu tumu ato’a ho’i a tō mātou ra mau metua.

15 Nō reira, nō te mea ’ua ’ite au ē, e ti’a i te Fatu te Atua ’ia fa’aherehere i tā mātou mau pāpa’a parau, ’ua ti’aoro pinepine atu ra vau iāna, ’e ’ua parau na ho’i ’oia iā’u ra ē : ’O te mea tā ’oe e ani nā roto i te i’oa o te Mesia ra ma te fa’aro’o ’e ma te ti’aturi ē e roa’a tā ’oe, e roa’a ïa ia ’oe.

16 E fa’aro’o ho’i tō’u, ’e ’ua ti’aoro atu ra vau i te Atua ’ia fa’aherehere ’oia i te mau pāpa’a parau ; ’e ’ua fafau mai ’oia iā’u ē e fa’a’ite mai ’oia i te reira i te mau ’āti Lamana i tōna ihora tau mau.

17 ’E ’ua ’ite ihora vau, ’o Enosa, e tupu te reira mai te au i te fafaura’a tāna i fafau mai ra ; nō reira, ’ua hau ihora tō’u vārua.

18 ’E ’ua parau mai ra te Fatu iā’u : ’Ua tītau ato’a mai tō ’oe mau metua i te reira iā’u nei ; ’e e ravehia te reira mai te au i tō rātou fa’aro’o ; ’ua ’aifāito ho’i tō rātou ra fa’aro’o i tō ’oe na.

19 ’E i teienei, i muri a’era, ’ua hāhaere a’era vau, ’o Enosa, i rotopū i te mau ta’ata o Nephi, i te tohura’a i te mau mea e tupu a muri a’e, ’e i te fa’a’ite-pāpū-ra’a atu ho’i i te mau mea i fa’aro’ohia na ’e i ’itehia e au ra.

20 ’E tē fa’a’ite pāpū atu nei au ē, ’ua tītau māite te mau ta’ata o Nephi ’ia fa’aho’i mai i te mau ’āti Lamana ’ia ti’aturi mau i te Atua. ’Āre’a rā ’ua faufa’a ’ore tā mātou mau ’ohipa ; ’ua vai ’āueue ’ore noa tō rātou ’ino’ino, ’e ’ua arata’ihia rātou e tō rātou iho huru ’ino i riro ai rātou ’ei mea ’ōviri, ’ei mea taehae, ’e ’ei feiā hina’aro ha’amani’i toto ; ’e tei ’ī ho’i i te ha’amori ’īdolo ’e te mau ’ohipa vi’ivi’i ; ’e tē ’amu noa ra rātou i te mau ’ānimara taehae ; ’e tē pārahi noa ra i roto i te mau ti’ahapa, ’e tē orihaere noa ra i roto i te mēdēbara ma te tā’amuhia te tau’upu i te tātua ’iri ’ānimara poto, ’e ’ua hahuhia te upo’o ; ’e tei te fana, ’e te simetera, ’e te ’ōpahi, tō rātou ’aravihi. ’E ’aita atu e mā’a i ’amuhia e tō rātou mau ta’ata e rave rahi, maori rā te ’īna’i ota ; ’e ’ua tītau tāmau noa rātou ’ia ha’amou ia mātou.

21 ’E i muri a’era, ’ua fa’a’apu te mau ta’ata o Nephi i te fenua, ’e ’ua fa’atupu i te mau huru huero sītona ato’a, ’e te mau huru mā’a hotu, ’e te mau nana pua’atoro e rave rahi, ’e te mau huru nana ’ānimara ato’a, ’e te mau pua’aniho, ’e te mau pua’aniho ’ōviri, ’e te mau pua’ahorofenua e rave rahi ato’a.

22 ’E tē vai ra e rave rahi mau peropheta i rotopū ia mātou. ’E ’ua riro te mau ta’ata ’ei feiā ’ā’au ’eta’eta, ’e ’aita roa rātou i māramarama.

23 ’E ’aita atu e rāve’a maori rā ’o te parau ha’amata’u rahi, ’e te a’ora’a ’e te tohura’a nō ni’a i te mau tama’i, ’e te mau mārōra’a, ’e te mau ha’amoura’a, ’e te fa’aha’amana’o-pinepine-ra’a ia rātou i te pohe, ’e te maorora’a nō te ao mure ’ore, ’e te mau ha’avāra’a ’e te mana o te Atua, ’e nā teie nei mau mea ato’a—i fa’ati’arepu tāmau noa ia rātou ’ia vai noa rātou i roto i te mata’u i te Fatu. Tē parau nei au ē, ’aita atu e rāve’a maori rā ’o teie nei mau mea, ’e te parau pāpū roa, tē ti’a ’ia tāpe’a mai ia rātou ’ia ’ore rātou ’ia topa ’oi’oi atu i roto i te ha’amoura’a. ’E tē nā reira nei au i te pāpa’i nō ni’a ia rātou ra.

24 ’E ’ua ’ite au i te mau ’arora’a i rōpū i te mau ’āti Nephi ’e te mau ’āti Lamana i tō’u ra pu’e mahana i te orara’a nei.

25 ’E i muri a’era, ’ua ruhiruhiā a’era vau, ’e ’ua hope ho’i hō’ē hānere e hitu ’ahuru ma iva matahiti mai te tau i fa’aru’e ai tō mātou metua tāne ’o Lehi ia Ierusalema ra.

26 ’E ’ua ’ite ihora vau ē, tē fātata ra vau i te tae i roto i tō’u mēnema, ’e i fa’auruhia na ho’i au e te mana o te Atua ia a’o atu vau ’e ’ia tohu atu ho’i i teie nei feiā, ’e ’ia a’o pāpū atu i te parau mai te au i te parau mau tei roto i te Mesia ra. ’Ua a’o pāpū atu vau i te reira i tō’u ato’a ra pu’e mahana, ’e ’ua hau atu tō’u pōpou i te reira i tō te mau mea ato’a o te ao nei.

27 ’E ’ua fātata roa vau i te haere atu i tō’u vāhi fa’afa’aeara’a, tei pīha’i iho ïa i tō’u ra Tāra’ehara ; ’e ’ua ’ite ho’i au ē, e fa’afa’aea vau i pīha’i iho iāna ra. Tē pōpou nei ho’i au i te mahana e riro ai tō’u tino tāhuti nei ’ei tino tāhuti ’ore, ’e ’a ti’a atu ai i mua iāna ra ; ’e i reira vau e ’ite atu ai i tōna ra mata ma te ’oa’oa, ’e i reira ho’i ’oia e parau mai ai iā’u : ’A haere mai iā’u nei, ’e te ta’ata ha’amaita’ihia, tē vai ra te hō’ē vāhi i fa’aineinehia nō ’oe i roto i te mau fare o tō’u ra Metua. ’Āmene.