Ang Libro ni Enos

1 Tan-awa, natabo ini nga ako, si Enos, nga nakakilala sa akon amay nga isa sia ka matarong nga tawo—kay gintudloan niya ako sa iya lengguahe, kag amo man sa pag-atipan kag pagtudlo sang Ginuo—kag bulahan ang ngalan sang akon Dios tungod sini—

2 Kag sugiran ko kamo sang paghimakas nga akon naagyan sa atubang sang Dios antes ko nabaton ang kapatawaran sang akon mga sala.

3 Tan-awa, naglakat ako sa pagpangayam sang mga sapat sa lasang; kag ang mga pulong nga masami ko mabatian nga ginahambal sang akon amay parte sa kabuhi nga wala’y katapusan, kag sa kalipay sang mga santos, nagdulut sing madalom sa akon tagipusuon.

4 Kag ang akon kalag gingutom; kag nagluhod ako sa atubang sang akon Tagtuga, kag nagpakitluoy ako sa iya sa hugot nga pagpangamuyo kag pag-ampo para sa akon kaugalingon nga kalag; kag sa bug-os nga adlaw nagpakitluoy ako sa iya; huo, kag sang nag-abot ang gab-i ginbayaw ko sa gihapon ang akon tingug pataas sa bagay nga nakalab-ot ini sa mga langit.

5 Kag may nabatian ako nga tingug nga nagasiling: Enos, ang imo mga sala ginpatawad na, kag pagapakamaayohon ka.

6 Kag ako, si Enos, nakahibalo nga ang Dios indi mahimo nga magbutig; gani, ang akon kabasulanan nadula sing lubos.

7 Kag nagsiling ako: Ginuo, paano ini nahimo?

8 Kag nagsiling sia sa akon: Tungod sang imo pagtuo kay Cristo, nga wala pa gid nimo sadto nabatii ukon nakita. Kag madamo nga tinuig ang magalabay antes niya ipakita ang iya kaugalingon sa unod; gani, maglakat ka, ang imo pagtuo ang nagpaayo sa imo.

9 Karon, natabo ini nga sang mabatian ko ining mga pulong nagsugod ako sa pagbatyag sing handum para sa kaayohan sang akon mga kauturan, ang mga Nefinhon; gani, ginbubo ko ang akon bug-os nga kalag sa Dios para sa ila.

10 Kag samtang yara ako sa amo nga pagpanikasog sa espiritu, tan-awa, ang tingug sang Ginuo nabatian ko liwat sa akon kaisipan, nga nagasiling: Bisitahan ko ang imo mga kauturan suno sa ila katutum sa pagtuman sang akon mga kasugoan. Ginhatag ko sa ila ini nga duta, kag isa ini ka balaan nga duta; kag wala ko ini ginasumpa luwas lamang nga ini tungod sang kalainan; gani, bisitahan ko ang imo mga kauturan pareho sa akon ginsiling; kag ang ila mga kalapasan akon ipatupa sa ila kaugalingon nga mga ulo upod ang kasubo.

11 Kag pagkatapos nga ako, si Enos, nakabati sining mga pulong, ang akon pagtuo nagsugod nga mangin di-mauyog sa Ginuo; kag nagpangamuyo ako sa iya upod ang madamo kag malawig nga mga pagpanikasog para sa akon mga kauturan, ang mga Lamanhon.

12 Kag natabo ini nga pagkatapos nga nangamuyo ako kag nagpangabudlay sa bug-os nga katutum, ang Ginuo nagsiling sa akon: Hatagan ko ikaw suno sa imo mga handum, tungod sang imo pagtuo.

13 Kag karon tan-awa, amo ini ang handum nga ginhandum ko halin sa iya—nga kon matabo gid man nga ang akon katawhan, ang mga Nefinhon, mahulog sa kalapasan, kag sa ano man nga paagi magkalamatay, kag ang mga Lamanhon indi magkalamatay, nga ang Ginuong Dios magaamlig sing isa ka kasulatan sang akon katawhan, ang mga Nefinhon; bisan pa nga mangin paagi ini sa gahum sang iya balaan nga butkon, agud nga madala ini sa adlaw nga palaabuton sa mga Lamanhon, agud nga, basi pa lang, mahimo nga madala sila sa kaluwasan—

14 Kay sa subong ang amon mga pagpanikasog wala’y pulos sa pagpanumbalik sa ila sa matuod nga pagtuo. Kag nanumpa sila sa ila kaakig nga, kon mahimo pa lang, wasakon nila ang amon mga kasulatan kag kami, kag amo man ang tanan nga tradisyon sang amon mga amay.

15 Gani, bangod nakahibalo ako nga maamligan sang Ginuong Dios ang amon mga kasulatan, padayon ako nga nagpakitluoy sa iya, kag nagsiling sia sa akon: Bisan ano nga butang ang inyo pangayuon sa pagtuo, nga nagapati nga magabaton kamo sa ngalan ni Cristo, mabaton ninyo ini.

16 Kag may pagtuo ako, kag nagpakitluoy ako sa Dios nga amligan niya ang mga kasulatan; kag nakighisugot sia sa akon nga dal-on niya ini sa mga Lamanhon sa iya kaugalingon nga natalana nga tion.

17 Kag ako, si Enos, nakahibalo nga ini suno sa kasugtanan nga iya ginhimo; gani ang akon kalag nagtawhay.

18 Kag ang Ginuo nagsiling sa akon: Ang imo mga amay nangayo man sa akon sini nga butang; kag ini pagahimuon sa ila suno sa ila pagtuo; kay ang ila pagtuo pareho sang sa imo.

19 Kag karon natabo ini nga ako, si Enos, naglibot sa mga katawhan ni Nefi nga nagapropesiya sang mga butang nga magaabot, kag nagasaksi sang mga butang nga akon nabatian kag nakit-an.

20 Kag nagapamatuod ako nga ang katawhan ni Nefi nagtinguha sing matutum sa pagpanumbalik sang mga Lamanhon sa matuod nga pagtuo sa Dios. Apang ang amon mga pagpangabudlay nangin wala’y pulos; ang ila pagdumot nagpangibabaw, kag gintulod sila sang ila malain nga kinaugali sa bagay nga nangin mabangis sila, kag mapintas, kag uhaw-sa-dugo nga katawhan, nga puno sang pagsimba sa mga dios-dios kag kahigkoan; nga nagapangaon sang mga sapat nga madakop; nga nagapuyo sa mga tolda, kag nagalibot-libot sa kamingawan nga may malip-ot nga wagkos nga panit sa ila mga balikawang kag ang ila mga ulo kiniskisan; kag ang ila pagkasagad yara sa pana, kag sa sundang, kag sa wasay. Kag madamo sa ila wala sing iban nga ginakaon luwas sa hilaw nga karne; kag dalayon sila nga nagatinguha sa pagpatay sa amon.

21 Kag natabo ini nga ang katawhan ni Nefi nag-uma sang duta, kag nagsagod sang tanan nga sari sang mga uyas, kag sang bungang-kahoy, kag mga panong sang mga baka, kag mga panong sang tanan nga sari sang kasapatan, kag mga kanding, kag maila nga mga kanding, kag madamo man nga kabayo.

22 Kag may tuman kadamo nga propeta sa tunga namon. Kag ang katawhan isa ka batinggilan nga katawhan, nga mabudlay makahangop.

23 Kag wala na sing iban pa kundi luwas sa tuman kasakit nga mga pulong, nagapangwali kag nagapropesiya sang mga giyera, kag mga pagbinaisay, kag mga kalaglagan, kag dalayon nga pagpahanumdum sa ila sang kamatayon, kag sang kalawigon sang wala’y katapusan, kag sang mga paghukom kag sang gahum sang Dios, kag tanan sining mga butang—nagapukaw sa ila sing dalayon agud magpabilin sila sa kahadlok sa Ginuo. Ginasiling ko nga wala na sing iban pa luwas sining mga butang, kag tuman kadako nga kaathagan sang panghambal, ang magapugong sa ila sa madasig nga pagpanaog sa kalaglagan. Kag sa amo nga paagi nagasulat ako parte sa ila.

24 Kag nakit-an ko ang mga giyera sa tunga sang mga Nefinhon kag mga Lamanhon sa pagligad sang akon mga adlaw.

25 Kag natabo ini nga nagsugod ako sa pagtigulang, kag isa ka gatos kag sitenta’y-nuebe ka tuig ang naglabay halin sa tion nga ang amon amay nga si Lehi nagbiya sa Jerusalem.

26 Kag nakita ko nga madali na lang ako magpanaog sa akon lulubngan, kag ginhikot paagi sa gahum sang Dios nga magwali ako kag magpropesiya sa sining katawhan, kag ipahayag ang pulong suno sa kamatuoran nga yara kay Cristo. Kag ginpahayag ko ini sa tanan ko nga adlaw, kag nagkasadya sa sini labaw pa sa sinang iya sang kalibutan.

27 Kag madali na lang ako magkadto sa lugar nga akon palahuwayan, nga kaupod sa akon Manunubos; kay nahibal-an ko nga sa iya magapahuway ako. Kag nagakasadya ako sa adlaw nga ang akon lawas nga may kamatayon magasul-ob sang kawala’y kamatayon, kag magatindog sa iya atubang; dayon makita ko ang iya nawong sing may kalipay, kag magasiling sia sa akon: Magpalapit sa akon, ikaw nga ginpakamaayo, may isa ka lugar nga ginhanda para sa imo sa mga mansyon sang akon Amay. Amen.