1 Pea naʻe haʻu foki ʻi he ngaahi ʻaho ʻo Komú ʻa e kau palōfita tokolahi, ʻo nau kikiteʻi ʻa e fakaʻauha ʻo e fuʻu kakai lahi ko iá ʻo ka ʻikai te nau fakatomala, pea tafoki ki he ʻEikí, ʻo liʻaki ʻa ʻenau ngaahi fakapoó mo e fai angahalá.

2 Pea naʻe hoko ʻo pehē naʻe ʻikai tali ʻa e kau palōfitá ʻe he kakaí, pea naʻa nau hola kia Komu ke maʻu ha maluʻi, he naʻe feinga ʻa e kakaí ke tāmateʻi ʻa kinautolu.

3 Pea naʻa nau kikiteʻi kia Komu ha ngaahi meʻa lahi; pea naʻe tāpuakiʻi ia ʻi he kotoa hono toe ʻo hono ngaahi ʻahó.

4 Pea naʻá ne moʻui ʻo aʻu ki heʻene fuʻu taʻu motuʻa ʻaupito, pea naʻá ne fanauʻi ʻa Sipilomi; pea naʻe pule ʻa Sipilomi ko hono fetongi. Pea naʻe angatuʻu ʻa e tokoua ʻo Sipilomí kiate ia, pea naʻe kamata ke ʻi ai ha fuʻu tau lahi ʻi hono kotoa ʻo e fonuá.

5 Pea naʻe hoko ʻo pehē naʻe fekau ʻe he tokoua ʻo Sipilomí ko e kau palōfita kotoa pē ʻa ia naʻa nau kikite ʻo kau ki hono fakaʻauha ʻo e kakaí ʻoku totonu ke tāmateʻi;

6 Pea naʻe ʻi ai ʻa e fuʻu tuʻutāmaki lahi ʻi hono kotoa ʻo e fonuá, he naʻa nau fakamoʻoni ʻe hoko ʻa e fuʻu malaʻia lahi ki he fonuá, pea ki he kakaí foki, pea ʻe ʻi ai ha fuʻu fakaʻauha lahi ʻiate kinautolu, ʻo hangē ko ia kuo teʻeki ai ke hoko hano tatau ʻi he funga ʻo e māmaní, pea ʻe tatau honau ngaahi huí mo e ngaahi fokotuʻunga kelekele ʻi he funga ʻo e fonuá, ʻo ka ʻikai te nau fakatomala mei heʻenau fai angahalá.

7 Pea naʻe ʻikai te nau tokanga ki he leʻo ʻo e ʻEikí, koeʻuhi ko ʻenau ngaahi kautaha koví; ko ia, naʻe kamata ke ʻi ai ʻa e ngaahi tau mo e ngaahi fekeʻikeʻi ʻi he fonuá kotoa, kae ʻumaʻā foki mo e ngaahi honge lahi, mo e ngaahi mahaki fakaʻauha, ʻo aʻu ki he ʻi ai ʻa e fuʻu fakaʻauha lahi, ʻo hangē ko ia kuo teʻeki ai ke hā ʻi he funga ʻo e māmaní; pea naʻe hoko ʻeni hono kotoa ʻi he ngaahi ʻaho ʻo Sipilomí.

8 Pea naʻe kamata ke fakatomala ʻa e kakaí mei heʻenau ngaahi angahalá; pea ʻi heʻenau fai peheé naʻe ʻaloʻofa ʻa e ʻEikí kiate kinautolu.

9 Pea naʻe hoko ʻo pehē naʻe tāmateʻi ʻa Sipilomi, pea naʻe puke pōpula ʻa Seti, ʻo ne nofo pōpula ʻi he kotoa hono ngaahi ʻahó.

10 Pea naʻe hoko ʻo pehē, ko ʻEiha, ko hono fohá, naʻá ne maʻu ʻa e puleʻangá; pea naʻá ne pule ki he kakaí ʻi he kotoa hono ngaahi ʻahó. Pea naʻá ne fai ʻa e ngaahi faʻahinga angahala kotoa pē ʻi hono ngaahi ʻahó, ʻa ia naʻá ne fakatupu ai ʻa e fuʻu lilingi toto lahi; pea naʻe fuonounou ʻa hono ngaahi ʻahó.

11 Pea ko ʻEitemi, koeʻuhi ko ha hako ʻo ʻEiha, naʻá ne maʻu ʻa e puleʻangá; pea naʻá ne fai foki ʻa e meʻa ʻoku kovi ʻi hono ngaahi ʻahó.

12 Pea naʻe hoko ʻo pehē ʻi he ngaahi ʻaho ʻo ʻEitemí, naʻe haʻu ha kau palōfita tokolahi, ʻo nau toe kikite ʻi he kakaí; ʻio, naʻa nau kikiteʻi ʻe hanga ʻe he ʻEikí ʻo fakaʻauha ʻaupito ʻa kinautolu mei he funga ʻo e māmaní ʻo ka ʻikai te nau fakatomala mei heʻenau ngaahi angahalá.

13 Pea naʻe hoko ʻo pehē naʻe fakafefeka ʻe he kakaí ʻa honau lotó, pea naʻe ʻikai te nau tokanga ki heʻenau ngaahi leá; pea naʻe mamahi ʻa e kau palōfitá pea nau ʻalu mei he kakaí.

14 Pea naʻe hoko ʻo pehē naʻe fai ʻe ʻEitemi ʻa e fakamaau taʻetotonu ʻi he kotoa hono ngaahi ʻahó; pea ne fanauʻi ʻa Moloni. Pea naʻe hoko ʻo pehē naʻe pule ʻa Moloni ʻo fetongi ia; pea naʻe fai ʻe Moloni ʻa e meʻa ʻoku kovi ʻi he ʻao ʻo e ʻEikí.

15 Pea naʻe hoko ʻo pehē naʻe tupu hake ha angatuʻu ʻi he kakaí, koeʻuhí ko e kautaha fufū ko ia kuo fokotuʻu ke maʻu ʻa e mālohí mo e koloá; pea naʻe tupu hake ha tangata mālohi ʻi he fai hiá ʻiate kinautolu, ʻo ne tauʻi ʻa Moloni, pea naʻá ne ikuna ai ʻa hono vaeua ʻo e puleʻangá; pea naʻá ne tauhi ʻa hono vaeua ʻo e puleʻangá ʻi he ngaahi taʻu lahi.

16 Pea naʻe hoko ʻo pehē naʻe ikunaʻi ia ʻe Moloni, ʻo ne toe maʻu ʻa e puleʻangá.

17 Pea naʻe hoko ʻo pehē naʻe tupu hake ha tangata mālohi ʻe taha; pea ko e hako ia ʻo e tokoua ʻo Sēletí.

18 Pea naʻe hoko ʻo pehē naʻá ne ikunaʻi ʻa Moloni, ʻo ne maʻu ʻa e puleʻangá; ko ia, naʻe nofo ʻa Moloni ʻi he pōpula ʻi he kotoa ʻo hono toe ʻo hono ngaahi ʻahó; pea naʻá ne fanauʻi ʻa Kolianitoa.

19 Pea naʻe hoko ʻo pehē naʻe nofo ʻa Kolianitoa ʻi he pōpula ʻi he kotoa ʻo hono ngaahi ʻahó.

20 Pea ʻi he ngaahi ʻaho ʻo Kolianitoá naʻe haʻu foki ai ʻa e kau palōfita tokolahi, ʻo nau kikiteʻi ʻa e ngaahi fuʻu meʻa maʻongoʻonga mo fakaofo, pea nau kalanga ʻaki ʻa e fakatomalá ki he kakaí, pea ʻo ka ʻikai te nau fakatomala ʻe fai ʻe he ʻEiki ko e ʻOtuá ʻa e tautea kiate kinautolu ʻo aʻu ki honau fakaʻauha ke ʻosiʻosingamālie.

21 Pea ʻe hanga ʻe he ʻEiki ko e ʻOtuá ʻo fekau pe ʻomi ha kakai kehe ke nau maʻu ʻa e fonuá, ʻi hono māfimafí ʻo hangē ko e founga naʻá ne ʻomi ai ʻa ʻenau ngaahi tamaí.

22 Pea naʻa nau liʻaki ʻa e ngaahi lea kotoa pē ʻa e kau palōfitá, koeʻuhi ko ʻenau kautaha fufuú mo e ngaahi meʻa fakalieliá.

23 Pea naʻe hoko ʻo pehē naʻe fanauʻi ʻe Kolianitoa ʻa ʻEta, pea naʻá ne pekia, hili ʻene nofo pōpula ʻi he kotoa hono ngaahi ʻahó.