1 Na Com n’aber do no, nkɔnhyɛfo pii so soɛree, na wɔhyɛɛ nkɔm wɔ ɔsɛɛ a ɔbɛba dɛm ɔman kɛse no ho gyedɛ wonu hɔnho na wɔdan ba Ewuradze nkyɛn, na wogyaa hɔn ewudzi nye emumuyɛdze no yɛ.

2 Na ɔbaa dɛ dɔm no poow nkɔnhyɛfo no, na woguanee kɔr Com nkyɛn ama ɔaabɔ hɔnho ban, osiandɛ dɔm no pɛɛ dɛ wɔsɛɛ hɔn.

3 Na wɔhyɛɛ nkɔm wɔ ndzɛmba pii ho kyerɛɛ Com; na onyaa nhyira wɔ no nkwa nda a aka nyina mu.

4 Na onyinii ara yie, na ɔwoo Shiblom; na Shiblom bedzii ɔhen wɔ n’ananmu. Na Shiblom no nuabanyin tseew no do etua, na ɔkõ kɛse a ɔyɛ dzen hyɛɛ ase wɔ asaase no do.

5 Na ɔbaa dɛ Shiblom no nuabanyin no hyɛɛ dɛ wonku nkɔnhyɛfo nyinara a wɔhyɛɛ nkɔm wɔ ɔsɛɛ a ɔbɛba dɔm no do no nyina;

6 Na esian akɛse bi baa asaase no nyina do ma wɔgyee dase dɛ ndom kɛse bi rebɛba asaase n’enyi do, nye dɔm no so do; na dɛ ɔsɛɛ kɛse na obesi hɔn mu, dza bi mmbaa asaase no do pɛn, na hɔn mbiew bɛyɛ nkuku wɔ asaase enyi do, gyedɛ wonu hɔnho wɔ hɔn emumuyɛdze ho.

7 Na woenntsie Ewuradze ne ndze, osian hɔn emumuyɛ fɛkuw no ntsi; dɛm ntsi akõkoekõ na wentwiwentwi hyɛɛ ase wɔ asaase no nyina enyi do, na ɔkɔm pii nye ɔyardɔm so bae araa ma ɔsɛɛ kɛse a wonnhu ne nsaso dɛm da wɔ asaase no do sii hɔ; na dɛm ndzɛmba yi nyina sii wɔ Shiblom n’aber do.

8 Na dɔm no hyɛɛ ase dɛ worunu hɔnho wɔ hɔn emumuyɛ ho; na susuampaara dɛ wɔyɛɛ dɛm no, Ewuradze hun hɔn mbɔbɔr.

9 Na ɔbaa dɛ wokum Shiblom, na wɔnye Seth baa ndɔmmum, na ɔtsenaa ndɔmmum mu no nkwa nda nyina.

10 Na ɔbaa dɛ ne babanyin Ahah ne nsa kãa ahenman no; na odzii ɔhen wɔ dɔm no do no nkwa nda nyina. Na ɔyɛɛ emumuyɛ ahorow pii wɔ no nkwa nda nyina mu, na ɔnam do ɔmaa wɔkãa bɔgya pii gui; na no nkwa nda yɛɛ tsia.

11 Na Ethem, a ɔyɛ Ahah n’asenyi no ne nsa kãa ahenman no; na no so yɛɛ dza ɔyɛ emumudze wɔ no nkwa nda mu.

12 Na ɔbaa dɛ Ethem n’aber do no nkɔnhyɛfo pii bae, na wɔhyɛɛ nkɔm kyerɛɛ dɔm no bio; nyew, wɔhyɛɛ nkɔm dɛ Ewuradze bɛsɛɛ hɔn korakora efi asaase no enyi do, gyedɛ wonu hɔn ho wɔ hɔn emumuyɛ ho.

13 Na ɔbaa dɛ dɔm no piriim hɔn akoma, na woenntsie hɔn nsɛm; na nkɔnhyɛfo no dzii awerɛhow na wɔtwee hɔnho fii dɔm no mu.

14 Na ɔbaa dɛ Ethem buaa atsɛnkyew wɔ no nkwa nda nyina mu; na ɔwoo Moron. Na ɔbaa dɛ Moron dzii ɔhen wɔ n’ananmu; na Moron yɛɛ dza ɔyɛ emumuyɛdze wɔ Ewuradze enyim.

15 Na ɔbaa dɛ etuatsew sii dɔm no mu, osian dɛm nsumaamu fɛkuwbɔ no a wɔakyekyer dze rohwehwɛ tum nye ahonya ntsi no; na ɔbarimba katakyi emumuyɛnyi bi soɛree wɔ hɔn mu, na ɔnye Moron kõe, na ɔkõ no mu no, odzii ahenman no ne fã do konyim; na ɔfaa ahenman no ne fã mfe pii.

16 Na ɔbaa dɛ Moron dzii no do nkonyim, na ɔgyee ahenman no bio.

17 Na ɔbaa dɛ ɔbarimba katakyi bi so soɛree; na ɔyɛ Jared no nuabanyin no n’asenyi.

18 Na ɔbaa dɛ odzii Moron do nkonyim na ɔgyee ahenman no; dɛm ntsi Moron tsenaa ndɔmmum mu no nkwa nda a aka nyina; na ɔwoo Coriantor.

19 Na ɔbaa dɛ Coriantor tsenaa ndɔmmum mu no nkwa nda nyina.

20 Na Coriantor n’aber do no so nkɔnhyɛfo pii bae, na wɔhyɛɛ nkɔm wɔ anwanwadze akɛse ho, na wotsẽatsẽaa mu dɛ dɔm no nnu hɔnho, na gyedɛ wonu hɔn ho ɔno annyɛ a Ewuradze Nyankopɔn bobua atsɛn etsia hɔn na ɔasɛɛ hɔn korakora.

21 Na Ewuradze Nyankopɔn bɔsoma anaadɛ ɔnam no tum do, dze dɔm fofor bi bɛba ma wɔaabɛfa asaase no, na obodua dɛm kwan noara a oduaa do dze hɔn egyanom bae no do.

22 Na wɔpoow nkɔnhyɛfo no hɔn nsɛm nyinara, osian hɔn nsumaamu fɛkuwbɔ nye ekyiwadze a wɔyɛe no ntsi.

23 Na ɔbaa dɛ Coriantor woo Ether, na ɔtsenaa ndɔmmum mu no nkwa nda nyina, na owui.