1 Ma sa poloaiina e le Alii le uso o Iareto ia alu ifo i fafo mai le mauga mai luma o le Alii, ma tusi mea na ia vaaia; ma sa faasa ona oo mai i latou i le fanauga a tagata seia mavae ona siitia a’e o ia i luga o le satauro; ma o le pogai lea na tausia ai i latou e le tupu o Mosaea, ina ia lē oo mai i le lalolagi seia mavae ona faaali mai e Keriso o ia lava i ona tagata.

2 Ma ina ua mavae ona faaali moni mai e Keriso o ia lava i ona tagata sa ia poloaiina ia faaalia i latou lava.

3 Ma o lenei, ina ua mavae lena, ua faaitiitia i latou uma i le lē talitonu; ma ua leai se tasi vagana ai sa Lamanā, ma ua latou teena le talalelei a Keriso; o lea ua poloaiina ai a’u ia ou toe natiaina i latou i le eleele.

4 Faauta, ua ou tusia i nei papatusi mea moni lava ia na vaai i ai le uso o Iareto; ma e le’i i ai lava ni mea tetele silisili atu ua faaali mai nai lo mea na faaalia i le uso o Iareto.

5 O le mea lea na poloaiina ai a’u e le Alii e tusia ia mea; ma ua ou tusiaina i latou. Ma ua ia poloaiina a’u ia ou faamaufaailogaina i latou; ma ua ia poloaiina foi a’u ia ou faamaufaailogaina lo latou faaliliuga; o le mea lea ua ou faamaufaailogaina ai faaliliu gagana, e tusa ma le poloaiga a le Alii.

6 Ona sa fetalai mai le Alii ia te a’u: O le a lē oo atu i latou i Nuuese seia oo i le aso latou te salamo ai i lo latou amioletonu, ma faamamāina i luma o le Alii.

7 Ma i lena aso o le a latou faatino ai le faatuatua ia te a’u, ua fetalai mai ai le Alii, e pei ona faia e le uso o Iareto, ina ia mafai ona faapaiaina i latou ia te a’u, o le ou faaali atu ai ia te i latou mea na vaai i ai le uso o Iareto, e oo lava i le fofola atu o a’u faaaliga uma ia te i latou, ua fetalai mai ai Iesu Keriso, le Alo o le Atua, o le Tamā o le lagi ma le lalolagi, ma mea uma o i ai.

8 Ma o ia o lē e finau tetee i le afioga a le Alii, ia anatema o ia; ma ia o lē e faafitia nei mea, ia anatema o ia; ona o le a ou le faaalia ia te i latou ni mea silisili atu, ua fetalai mai ai Iesu Keriso; ona o a’u o lē ua tautala atu.

9 Ma o la’u poloaiga e tatala ma tapunia ai le lagi; ma o la’u upu e lulū ai le lalolagi; ma o la’u poloaiga e mavae atu ai tagata o i ai, e pei lava e mavae atu i se afi.

10 Ma o ia o lē e lē talitonu i a’u upu, e lē talitonu i o’u soo; ma afai e faapea ou te le o tautala atu, faamasino outou; auā o le a outou iloa i le aso gataaga, o a’u lava lea o ia o loo tautala atu.

11 Ae o ia o lē e talitonu i nei mea ua ou tautala atu ai, o ia lea o le a ou asiasi atu i ai i faaaliga mai lo’u Agaga, ma o le a ia iloa ma molimauina. Ma o le a iloa e ia ua moni nei mea, ona o lo’u Agaga; ona e tauanauina e ia tagata ia latou faia le lelei.

12 Ma soo se mea e tauanauina tagata e fai le lelei, e mai ia te a’u lea; ona ua leai se tasi e sau ai le lelei vagana ai ua mai ia te a’u. O a’u lava lea o lē e taita’ia tagata i mea lelei uma; o ia o lē e lē talitonu i a’u upu o le a lē talitonu mai ia ia te a’u—ua Ou i ai; ma o ia e lē talitonu mai ia te a’u o le a lē talitonu i le Tamā o lē na auina mai a’u. Aua faauta, o a’u o le Tamā, o a’u o le malamalama, ma le ola, ma le upumoni o le lalolagi.

13 O mai ia ia te a’u, outou e o Nuuese, ma o le a ou faailoa atu ia te outou mea tetele silisili atu, le malamalama lea ua natia ona o le lē talitonu.

14 O mai ia ia te a’u, outou le aiga e o Isaraelu, ma o le a faaali atu ia te outou mea sili ua teuina e le Tamā mo outou, mai le faavaega o le lalolagi; ma sa le’i oo mai ia te outou, ona o le lē talitonu.

15 Faauta, pe a outou saeia lena veli o le lē talitonu lea ua pogai ai ona tumau pea i lo outou tulaga leaga o le amioleaga, ma le maaa o le loto, ma le tauaso o le mafaufau, ona faaali mai ai lea ia te outou o mea tetele ma ofoofogia ia sa natia mau mai le faavaega o le lalolagi mai ia te outou—ioe, pe a outou valaau atu i le Tama i lo’u igoa, ma le loto momomo ma le agaga salamo, ona outou iloa ai lea ua manatua e le Tama le feagaiga lea na ia faia i o outou tamā, le aiga e o Isaraelu.

16 Ma ona fofola atu ai lea i mata o tagata uma a’u faaaliga, faaaliga ia na ou poloaiina ia tusia e la’u auauna o Ioane. Ia manatua, pe a outou vaai i nei mea, o le a outou iloa ua oo mai lava le taimi o le a faaali tino moni mai ai i latou.

17 O lea, pe a outou maua lenei talafaamaumau o le a mafai ona outou iloa ua amataina le galuega a le Tamā i luga o le laueleele atoa.

18 O lea, ia outou salamo ai outou tuluiga uma o le lalolagi, ma o mai ia te a’u, ma talitonu i la’u talalelei, ma papatiso i lo’u igoa; aua o ia o lē e talitonu ma papatiso o le a faaolaina; ae o ia o lē e lē talitonu o le a faasalaina; ma o le a mulimuli atu faailoga ia te i latou o ē e talitonu i lo’u igoa.

19 Ma amuia lava o ia o lē e maua o faamaoni i lo’u igoa i le aso gataaga, ona o le a siitia a’e o ia i luga e mau i le malo ua saunia mo ia mai le faavaega o le lalolagi. Faauta foi, o a’u lava o lē ua tautala atu ai. Amene.