1 Pea naʻe hoko ʻo pehē naʻe fai ʻe ʻOlaihā ʻa e fakamāú ʻi he māʻoniʻoni ʻi he fonuá ʻi hono kotoa hono ngaahi ʻahó, pea ko hono ngaahi ʻahó naʻe fuoloa ʻaupito.

2 Pea naʻá ne fanauʻi ʻa e ngaahi foha mo e ngaahi ʻofefine; ʻio, naʻá ne fanauʻi ʻa e toko tolungofulu mā taha, pea naʻe kau ʻiate kinautolu ʻa e ngaahi foha ʻe toko uofulu mā tolu.

3 Pea naʻe hoko ʻo pehē naʻá ne fanauʻi foki mo Kipi ʻi heʻene toulekeleká. Pea naʻe hoko ʻo pehē naʻe pule ʻa Kipi ko hono fetongi; pea naʻe fanauʻi ʻe Kipi ʻa Kolihoa.

4 Pea ʻi he taʻu tolungofulu mā ua ʻa e motuʻa ʻo Kolihoá naʻá ne angatuʻu ki heʻene tamaí, ʻo ne ʻalu atu ʻo nofo ʻi he fonua ko Nēhoá; pea naʻá ne fanauʻi ʻa e ngaahi foha mo e ngaahi ʻofefine, ʻo nau hoko ʻo fuʻu hoihoifua ʻaupito; ko ia naʻe hanga ai ʻe Kolihoa ʻo fusiakiʻi atu ʻa e kakai tokolahi ʻaupito ʻo nau muimui ʻiate ia.

5 Pea ʻi he hili ʻene tānaki fakataha ha kau tau naʻá ne ʻalu hake leva ki he fonua ko Moloní ʻa ia naʻe ʻafio ai ʻa e tuʻí, ʻo ne puke pōpula ia, ʻa ia naʻe fakahoko ai ʻa e lea ʻa e tokoua ʻo Sēleti ʻe ʻomi ai ʻa kinautolu ki he pōpula.

6 Ko ʻeni naʻe ofi ʻa e fonua ko Moloni, ʻa ia naʻe ʻafio ai ʻa e tuʻí, ki he fonua ʻoku ui ko ʻAuha ʻe he kau Nīfaí.

7 Pea naʻe hoko ʻo pehē naʻe ʻafio ʻa Kipi ʻi he pōpula, mo hono kakai kia Kolihoa ko hono fohá, kae ʻoua kuó ne fakaʻau ʻo fuʻu toulekeleka ʻaupito; ka neongo iá naʻe fanauʻi ʻe Kipi ʻa Sule ʻi heʻene toulekeleká, pea lolotonga ʻene nofo pōpulá.

8 Pea naʻe hoko ʻo pehē naʻe tuputāmaki ʻa Sule ki hono tokouá; pea naʻe fakaʻau ʻa Sule ʻo mālohi, pea ivi lahi ʻi he mālohi fakaetangatá; pea naʻa ne fuʻu fakakaukau lelei ʻaupito foki.

9 Ko ia, naʻa ne haʻu ki he moʻunga ko ʻIfalemí, ʻo ne haka ha ngaahi maka mei he moʻungá, ʻo ne ngaohi ha ngaahi heletā mei he ukamea sitila maʻanautolu ʻa ia kuó ne takiakiʻi ke muimui kiate iá; pea hili ʻene fakamahafu ʻa kinautolu ʻaki ʻa e ngaahi heletā, naʻá ne foki atu ki he kolo ko Nēhoá, ʻo ne tauʻi ʻa hono tokoua ko Kolihoá, pea ʻi he founga ko iá naʻá ne maʻu ai ʻa e puleʻangá ʻo ne toe foaki ia ki heʻene tamai ko Kipí.

10 Pea ko ʻeni koeʻuhi ko e meʻa kuo fai ʻe Sulé, naʻe tuku ʻe heʻene tamaí kiate ia ʻa e puleʻangá; ko ia naʻá ne kamata ke pule ko e fetongi ʻene tamaí.

11 Pea naʻe hoko ʻo pehē naʻa ne fai ʻa e fakamāú ʻi he māʻoniʻoni; pea naʻá ne fakamafola atu ʻa hono puleʻangá ki he funga kotoa ʻo e fonuá, he kuo fakaʻau ʻo fuʻu tokolahi ʻaupito ʻa e kakaí.

12 Pea naʻe hoko ʻo pehē naʻe fanauʻi foki ʻe Sule mo e ngaahi foha mo e ngaahi ʻofefine tokolahi.

13 Pea naʻe fakatomala ʻa Kolihoa mei he ngaahi meʻa kovi lahi kuó ne faí; ko ia naʻe tuku kiate ia ʻe Sule ʻa e mafai ʻi hono puleʻangá.

14 Pea naʻe hoko ʻo pehē naʻe maʻu ʻe Kolihoa ʻa e ngaahi foha mo e ngaahi ʻofefine tokolahi. Pea naʻe ʻi ai ʻa e toko taha ʻi he ngaahi foha ʻo Kolihoá pea ko hono hingoa ko Noa.

15 Pea naʻe hoko ʻo pehē naʻe angatuʻu ʻa Noa kia Sule, ko e tuʻí, pea mo ʻene tamai foki ko Kolihoá, ʻo ne fusi atu mo Kohoa ko hono tokoua, pea mo hono ngaahi tokouá kotoa mo e tokolahi ʻo e kakaí.

16 Pea naʻá ne tauʻi ʻa Sule, ko e tuʻí, ʻo ne maʻu ai ʻa e fonua ʻo honau ʻuluaki tofiʻá; peá ne hoko ko ha tuʻi ki he potu ko ia ʻo e fonuá.

17 Pea naʻe hoko ʻo pehē naʻá ne toe tauʻi ʻa Sule, ko e tuʻí; peá ne puke ʻa Sule, ko e tuʻí, ʻo ʻave pōpula ia ki Moloni.

18 Pea naʻe hoko ʻo pehē ʻi he ʻamanaki ke ne tāmateʻi iá, naʻe totolo atu ʻa e ngaahi foha ʻo Sulé ki he fale ʻo Noá ʻi he poʻulí ʻo nau tāmateʻi ia, pea haeʻi ʻa e matapā ʻo e fale fakapōpulá ʻo ʻomi ki tuʻa ʻa ʻenau tamai, ʻo fokotuʻu ia ki hono nofoʻanga fakatuʻí ʻi hono puleʻanga ʻoʻoná.

19 Ko ia, naʻe langa hake ʻe he foha ʻo Noá ʻa hono puleʻangá ko hono fetongi; ka neongo iá naʻe ʻikai te nau toe maʻu ha mālohi kia Sule ko e tuʻí, pea ko e kakai ʻa ia naʻe pule ki ai ʻa Sule ko e tuʻí naʻa nau tuʻumālie ʻaupito pea fakaʻau ʻo fuʻu mālohi.

20 Pea naʻe vaeua ʻa e fonuá; pea naʻe ʻi ai ʻa e puleʻanga ʻe ua, ko e puleʻanga ʻo Sulé pea mo e puleʻanga ʻo Kohoa, ko e foha ʻo Noá.

21 Pea naʻe fekau ʻe Kohoa, ko e foha ʻo Noá, ke tauʻi ʻe hono kakaí ʻa Sule, pea naʻe ikuna ai ʻa kinautolu ʻe Sule ʻo ne tāmateʻi ʻa Kohoa.

22 Pea ko ʻeni naʻe ʻi ai ʻa e foha ʻo Kohoa ʻa ia naʻe ui ko Nimilote; pea naʻe tuku ʻe Nimilote ʻa e puleʻanga ʻo Kohoá kia Sule, pea naʻe ʻofeina ia ʻi he ʻao ʻo Sulé; ko ia naʻe tuku ʻe Sule kiate ia ʻa e ngaahi fuʻu faingamālie lalahi, ʻo ne faʻiteliha ʻi he puleʻanga ʻo Sulé ʻo fakatatau ki hono lotó.

23 Pea ʻi he lolotonga ʻa e pule foki ʻa Sulé naʻe haʻu ʻa e kau palōfita ʻi he kakaí, ʻa ia naʻe fekau mai mei he ʻEikí, ʻo nau kikiteʻi ʻoku hanga ʻe he fai angahalá mo e tauhi tamapua ʻa e kakaí ʻo ʻomi ha malaʻia ki he fonuá, pea ʻe fakaʻauha ʻa kinautolu kapau ʻe ʻikai te nau fakatomala.

24 Pea naʻe hoko ʻo pehē naʻe lea kovi ʻa e kakaí ki he kau palōfitá, ʻo nau manukiʻi ʻa kinautolu. Pea naʻe hoko ʻo pehē naʻe tauteaʻi ʻe he tuʻi ko Sulé ʻa kinautolu kotoa pē naʻe lea kovi ki he kau palōfitá.

25 Pea naʻá ne fokotuʻu ha lao ʻi he fonuá hono kotoa, ʻa ia naʻe tuku ai ʻa e mafai ki he kau palōfitá ke nau ʻalu ki ha feituʻu pē ʻoku nau loto ki aí; pea naʻe tupunga ʻi he meʻá ni hono fakatafoki ʻo e kakaí ki he fakatomalá.

26 Pea koeʻuhi ko e fakatomala ʻa e kakaí mei heʻenau ngaahi angahalá mo e ngaahi tauhi tamapuá ko ia naʻe fakahaofi ai ʻa kinautolu ʻe he ʻEikí, pea naʻa nau kamata ke toetuʻumālie ʻi he fonuá. Pea naʻe hoko ʻo pehē naʻe fanauʻi ʻe Sule ha ngaahi foha mo e ngaahi ʻofefine ʻi heʻene toulekeleká.

27 Pea naʻe ʻikai ke toe hoko ha ngaahi tau ʻi he ngaahi ʻaho ʻo Sulé; pea naʻá ne manatuʻi ʻa e ngaahi meʻa maʻongoʻonga kuo fai ʻe he ʻEikí maʻa ʻene ngaahi tamaí ʻi hono ʻomi ʻa kinautolu ke folau mai ʻi he fuʻu moana lahí ki he fonua ʻo e talaʻofá; ko ia naʻá ne fakamaau ʻi he māʻoniʻoni ʻi he kotoa hono ngaahi ʻahó.