1 Pea ko ʻeni naʻe hoko ʻo pehē ʻi hono fitungofulu mā ua taʻu ʻo e pule ʻa e kau fakamāú naʻe ʻāsili ʻa e ngaahi fakakikihí, ʻo aʻu ki he ʻi ai ʻa e ngaahi tau ʻi he fonuá hono kotoa ʻi he kakai kotoa pē ʻo Nīfaí.

2 Pea ko e kautaha fufū ko ʻeni ʻo e kau kaihaʻa naʻa nau fai ʻa e ngāué ni ʻo e fakaʻauhá mo e angahalá. Pea naʻe fai atu ʻa e taú ni ʻi hono kotoa ʻo e taʻu ko iá; pea naʻe fai atu ia foki ʻi hono fitungofulu mā tolu ʻo e taʻú.

3 Pea naʻe hoko ʻo pehē ʻi he taʻu ko ʻení naʻe tangi ʻa Nīfai ki he ʻEikí, ʻo ne pehē:

4 ʻE ʻEiki, ʻoua muʻa te ke tuku ke fakaʻauha ʻa e kakaí ni ʻi he heletaá; kae kehe ʻe ʻEiki, tuku muʻa ke hoko ha honge ʻi he fonuá ke ueʻi hake ʻa kinautolu ke nau manatuʻi ʻa e ʻEiki ko honau ʻOtuá, pea heiʻilo naʻa nau fakatomala mo tafoki ai kiate koe.

5 Pea ko ia naʻe hoko ia, ʻo hangē ko e ngaahi lea ʻa Nīfaí. Pea naʻe ʻi ai ʻa e fuʻu honge lahi ʻi he funga ʻo e fonuá, ʻi he kakai kotoa pē ʻo Nīfaí. Pea ko ia naʻe hoko atu ʻa e hongé ʻi hono fitungofulu mā fā ʻo e taʻú, pea naʻe ʻosi ʻa e fakaʻauha ʻi he heletaá ka naʻe fakaʻau ʻo lahi ʻi he hongé.

6 Pea naʻe hoko atu ʻa e ngāue ʻo e fakaʻauhá ni ʻi hono fitungofulu mā nima ʻo e taʻú. He naʻe taaʻi ʻa e fonuá ʻo pakupaku, pea naʻe ʻikai tupu ai ʻa e kēleni ʻi he faʻahitaʻu ʻo e kēlení; pea naʻe taaʻi ʻa e fonuá hono kotoa, ʻo tatau ʻi he kau Leimaná mo e kau Nīfaí, ko ia naʻe taaʻi ʻa kinautolu pea mate honau lau afe ʻi he ngaahi feituʻu fai angahala ange ʻo e fonuá.

7 Pea naʻe hoko ʻo pehē naʻe vakai ʻa e kakaí ʻoku ofi ke nau ʻauha ʻi he hongé, pea naʻe kamata ke nau manatuʻi ʻa e ʻEiki ko honau ʻOtuá; pea nau kamata ke manatuʻi ʻa e ngaahi lea ʻa Nīfaí.

8 Pea naʻe kamata ke tangi ʻa e kakaí ki heʻenau kau fakamaau lahí mo honau kau takí, ke nau lea kia Nīfai: Vakai, ʻoku mau ʻiloʻi ko ha tangata koe ʻa e ʻOtuá, ko ia ke ke tangi ki he ʻEiki ko hotau ʻOtuá ke ne toʻo atu meiate kitautolu ʻa e hongé ni, telia naʻa hoko ʻa e lea kotoa pē kuó ke lea ʻaki ʻo kau ki homau fakaʻauhá.

9 Pea naʻe hoko ʻo pehē naʻe lea ʻa e kau fakamāú kia Nīfai, ʻo hangē ko e meʻa naʻe kole ʻe he kakaí ke nau faí. Pea naʻe hoko ʻo pehē ʻi he vakai ʻe Nīfai kuo fakatomala ʻa e kakaí ʻo nau fakavaivaiʻi ʻa kinautolu ʻi he tauangaʻa, naʻá ne toe tangi ki he ʻEikí, ʻo pehē:

10 ʻE ʻEiki, vakai ʻoku fakatomala ʻa e kakaí ni; pea kuo nau tafiʻi atu ʻa e kautaha ʻa Katianetoní meiate kinautolu ʻo aʻu ki heʻenau ʻosiʻosingamālie, pea kuo tanu fakataha mo kinautolu ʻa ʻenau ngaahi alea fufuú ʻi he kelekelé.

11 Ko ʻeni, ʻE ʻEiki, ʻofa muʻa ʻo lolou ʻa ho houhaú koeʻuhi ko ʻenau angavaivaí ni, pea tuku ke lolou ho houhaú ʻi he fakaʻauha ʻo e kakai angahala ʻa ia kuo ʻosi hoʻo fakaʻauhá.

12 ʻE ʻEiki, ʻofa muʻa ʻo lolou ʻa ho houhaú, ʻio, ʻa ho houhau kakahá, pea fakangata ʻa e hongé ni ʻi he fonuá ni.

13 ʻE ʻEiki, ʻafio mai kiate au, ʻo tuku ke fai ʻo hangē ko ʻeku ngaahi leá, pea tuku mai ʻa e ʻuha ki he funga ʻo e fonuá, koeʻuhi ke ne toe laku mai hono fuá, mo hono kēlení ʻi he faʻahitaʻu ʻo e kēlení.

14 ʻE ʻEiki, naʻá ke ʻafio mai ki heʻeku ngaahi leá ʻi heʻeku pehē, Tuku ke ʻi ai ha honge, koeʻuhi ke ʻosi ʻa e mahaki fakaʻauha ʻo e heletaá; pea ʻoku ou ʻilo te ke hōifua, ʻi he taimí ni, ki heʻeku ngaahi leá, he naʻá ke folofola: Kapau ʻe fakatomala ʻa e kakaí ni te u fakamoʻui ʻa kinautolu.

15 ʻIo, ʻE ʻEiki, pea ʻokú ke ʻafioʻi kuo nau fakatomala, koeʻuhi ko e hongé mo e mahaki fakaʻauha pea mo e fakaʻauha ʻa ia kuo hoko kiate kinautolú.

16 Pea ko ʻeni, ʻE ʻEiki, te ke lolou koā ʻa ho houhaú, pea tuku ke nau toe ʻahiʻahi pe te nau tauhi kiate koe? Pea kapau ʻe pehē, ʻE ʻEiki, te ke lava koā ke tāpuakiʻi ʻa kinautolu ʻo hangē ko hoʻo ngaahi folofola kuó ke folofolaʻakí.

17 Pea naʻe hoko ʻo pehē ʻi hono fitungofulu mā ono ʻo e taʻú naʻe lolou ʻe he ʻEikí ʻa hono houhaú mei he kakaí, ʻo ne tuku ke tō ʻa e ʻuha ki he kelekelé, ʻo aʻu ki he tupu ai ʻa hono fuá ʻi he faʻahitaʻu ʻo hono fuá. Pea naʻe hoko ʻo pehē naʻe tupu hono kēlení ʻi he faʻahitaʻu ʻo hono kēlení.

18 Pea vakai, naʻe fiefia ʻa e kakaí ʻo nau ʻoatu ʻa e fakafetaʻi ki he ʻOtuá, pea naʻe fonu ʻa e funga hono kotoa ʻo e fonuá ʻi he fiefia; pea naʻe ʻikai te nau toe feinga ke tāmateʻi ʻa Nīfai, ka naʻa nau lau ia ko e palōfita lahi, pea ko ha tangata ʻa e ʻOtua, kuo tuku kiate ia ʻa e fuʻu mālohi mo e mafai lahi ʻe he ʻOtuá.

19 Pea vakai, naʻe ʻikai ke momoʻi siʻi hifo ʻa Līhai ko hono tokouá, ki mui ʻiate iá ʻi he ngaahi meʻa ʻoku kau ki he māʻoniʻoní.

20 Pea ko ia naʻe hoko ʻo pehē naʻe fakaʻau ke toe tuʻumālie ʻa e kakai ʻo Nīfaí ʻi he fonuá, ʻo nau kamata ke langa hake honau ngaahi feituʻu maumaú, mo kamata ke fakatokolahi mo mafola atu, ʻo aʻu ki heʻenau ʻufiʻufi hono kotoa ʻo e funga ʻo e fonua, ʻi he fakatokelaú pea mo e fakatongá fakatouʻosi, pea mei he tahi hihifó ki he tahi hahaké.

21 Pea naʻe hoko ʻo pehē naʻe ʻosi hono fitungofulu mā ono ʻo e taʻú ʻi he melino. Pea naʻe kamata ʻa e taʻu hono fitungofulu mā fitú ʻi he melino; pea naʻe mafola atu ʻa e siasí ʻi he funga kotoa ʻo e fonuá; pea naʻe kau ki he siasí ʻa e konga lahi ange ʻo e kakai, ʻo e kau Nīfaí mo e kau Leimaná fakatouʻosi; pea naʻa nau maʻu ʻa e fuʻu melino lahi ʻi he fonuá; pea naʻe ʻosi pehē ʻa hono fitungofulu mā fitu ʻo e taʻú.

22 Pea naʻe ʻiate kinautolu foki ʻa e melinó ʻi hono fitungofulu mā valu ʻo e taʻú, tuku kehe pē ha ngaahi fakakikihi ʻe niʻihi naʻe kau ki ha ngaahi tefito ʻo e tokāteline ʻa ia kuo tohi ʻe he kau palōfitá.

23 Pea ʻi hono fitungofulu mā hiva ʻo e taʻú naʻe kamata ke ʻi ai ʻa e ngaahi fakakikihi lahi. Ka naʻe hoko ʻo pehē ʻi he maʻu ʻe Nīfai mo Līhai, mo e tokolahi ʻo hona kāingá ʻa ia naʻa nau ʻiloʻi ʻa e ngaahi tefito moʻoni ʻo e tokāteliné, ʻa e ngaahi fakahā lahi ʻi he ʻaho taki tahá, ko ia naʻa nau malanga ki he kakaí, pea naʻa nau taʻofi ai ʻa ʻenau fakakikihí ʻi he taʻu pē ko iá.

24 Pea naʻe hoko ʻo pehē ʻi hono valungofulu ʻo e taʻu ʻo e pule ʻa e kau fakamāú ki he kakai ʻo Nīfaí, naʻe ʻi ai ha niʻihi ʻo e kau tafoki mei he kakai ʻo Nīfaí, ʻa ia kuo nau ʻalu atu ʻi he ngaahi taʻu ʻe niʻihi ki muʻá ki he kau Leimaná, ʻo nau ʻai kiate kinautolu ʻa e hingoa ʻo e kau Leimaná, pea naʻe ʻi ai foki mo ha niʻihi ʻa ia ko e hako moʻoni ʻo e kau Leimaná, naʻe fakaʻitaʻi ʻe kinautolú ni, ko ia naʻa nau kamata ha tau mo honau kāingá.

25 Pea nau fai ʻa e fakapō mo e vete koloa; pea nau toki hola ki he ngaahi moʻungá, pea mo e feituʻu maomaonganoá mo e ngaahi potu fufuú, ʻo nau toitoi ai ke ʻoua naʻa ʻiloʻi ʻa kinautolu, pea naʻa nau maʻu ʻi he ʻaho kotoa pē hano fakalahi ki honau tokolahí, ʻo fakatatau mo e ʻalu atu kiate kinautolu ʻa e kau tafokí.

26 Pea ko ia naʻe ʻosi atu ha taimi siʻi, ʻio, ko ha ngaahi taʻu siʻi pē, naʻa nau hoko ko e kautaha kaihaʻa tokolahi; pea nau kamata ʻa e ngaahi alea fufū kotoa pē ʻa Katianetoní; pea ko ia naʻa nau hoko ko e kau kaihaʻa ʻa Katianetoni.

27 Ko ʻeni vakai, naʻe hanga ʻe he kau kaihaʻá ni ʻo fakatupu ha maumau lahi, ʻio, ko ha fuʻu maumau lahi ʻi he lotolotonga ʻo e kakai ʻo Nīfaí, kae ʻumaʻā foki ʻi he lotolotonga ʻo e kakai ʻo e kau Leimaná.

28 Pea naʻe hoko ʻo pehē naʻe ʻaonga ke fakangata ʻa e ngāué ni ʻo e fakaʻauhá; ko ia naʻa nau fekau atu ha kau tau ʻo e kau tangata sino mālohi ki he feituʻu maomaonganoá mo e ngaahi moʻungá ke kumi ki he kautahá ni ʻo e kau kaihaʻá, pea fakaʻauha ʻa kinautolu.

29 Kae vakai, naʻe hoko ʻo pehē ʻi he taʻu pē ko iá naʻe toe tekeʻi fakafoki mai ʻa kinautolu ki honau ngaahi fonua ʻonautolú. Pea naʻe ʻosi pehē hono valungofulu ʻo e taʻu ʻo e pule ʻa e kau fakamāú ki he kakai ʻo Nīfaí.

30 Pea naʻe hoko ʻo pehē ʻi he kamataʻanga ʻo e taʻu hono valungofulu mā tahá naʻa nau toe ō atu ke tauʻi ʻa e kautaha ko ʻeni ʻo e kau kaihaʻá, pea naʻa nau fakaʻauha ʻa e tokolahi; pea naʻe ʻi ai foki mo e tokolahi ʻo kinautolu naʻe fakaʻauha.

31 Pea naʻe ʻaonga ke nau toe foki mai mei he feituʻu maomaonganoá pea mei he ngaahi moʻungá ki honau ngaahi fonua ʻonautolú, koeʻuhi ko e fuʻu lahi fau ʻo e tokolahi ʻo e kau kaihaʻa ʻa ia naʻa nau nofo ʻi he ngaahi moʻungá mo e feituʻu maomaonganoá.

32 Pea naʻe hoko ʻo pehē naʻe ʻosi pehē ʻa e taʻu ko iá. Pea naʻe kei tupu ʻo tokolahi ai pē ʻa e kau kaihaʻá ʻo nau fakaʻau ʻo mālohi, ʻo aʻu ki heʻenau poleʻi ʻa e ngaahi kau tau kotoa ʻa e kau Nīfaí, pea mo e ngaahi kau tau foki ʻa e kau Leimaná; pea naʻa nau fakatupu ʻa e fuʻu ilifia lahi ʻi he kakaí ʻi hono kotoa ʻo e funga ʻo e fonuá.

33 ʻIo, he naʻa nau ʻohofi ʻa e ngaahi potu lahi ʻo e fonuá, ʻo nau fai ʻa e fuʻu fakaʻauha lahi kiate kinautolu; ʻio, naʻa nau tāmateʻi ʻa e tokolahi, mo ʻave pōpula ʻa e niʻihi ki he feituʻu maomaonganoá, ʻio, kae tautautefito ki honau kakai fefiné mo ʻenau fānaú.

34 Ko ʻeni ko e fuʻu koví ni, ʻa ia naʻe tō ki he kakaí koeʻuhi ko ʻenau angahalá, naʻe toe ueʻi hake ai ʻa kinautolu ke nau manatuʻi ʻa e ʻEiki ko honau ʻOtuá.

35 Pea naʻe ʻosi pehē hono valungofulu mā taha ʻo e taʻu ʻo e pule ʻa e kau fakamāú.

36 Pea ʻi hono valungofulu mā ua ʻo e taʻú naʻa nau toe kamata ke fakangaloʻi ʻa e ʻEiki ko honau ʻOtuá. Pea ʻi he taʻu hono valungofulu mā tolú naʻa nau kamata ke tupulaki ʻo mālohi ʻi he fai angahalá. Pea ʻi hono valungofulu mā fā ʻo e taʻú naʻe ʻikai te nau fakatonutonu honau ngaahi hala koví.

37 Pea naʻe hoko ʻo pehē ʻi he taʻu hono valungofulu mā nimá naʻa nau fakaʻau ʻo mālohi ange ai pē ʻi heʻenau loto-hīkisia, mo ʻenau angahalá; ko ia naʻa nau toe fakaʻau ai ʻo taau mo e fakaʻauhá.

38 Pea naʻe ʻosi pehē hono valungofulu mā nima ʻo e taʻú.