1 Vacami cʼa, xcʼulvachitej chi e cʼo e qʼuiy ri xecacʼaxaj ri ruchʼabel ri Samuel, ri aj Lamaniʼ ri xerutzijoj rijaʼ pa ruviʼ ri rutzʼak ri tinamit. E jampeʼ cʼa ri xequinimaj ri ruchʼabel rijaʼ xebe cʼa y xquicanoj ri Nefi. Tok rijeʼ xeʼapon y xquil rijaʼ, xequikʼalajirisaj ri quimac chuvech y man xequevaj ta, roma can xquirayij vi chi xekasex chuxeʼ yaʼ pa rubiʼ ri Ajaf.

2 Jacʼa e jampeʼ na ri man xequinimaj ta ri ruchʼabel ri Samuel, can xeʼoyover vi riqʼuin. Tok rijaʼ cʼa paʼel na pa ruviʼ ri tzʼak, rijeʼ xquicʼakalaʼ che abej y che chʼab. Jacʼa ri Uxlabel richin ri Ajaf can cʼo vi riqʼuin, y man xetiquir ta xquisoc quiqʼuin ri cabej ni ta chukaʼ quiqʼuin ri quichʼab.

3 Vacami cʼa, tok rijeʼ xquitzʼet chi man xetiquir ta xquisoc, e qʼuiy chic xequinimaj ri ruchʼabel. Roma cʼariʼ, xebe cʼa riqʼuin ri Nefi richin chi xekasex chuxeʼ yaʼ.

4 Roma can kitzij vi chi ri Nefi xubanalaʼ ri kasnic chuxeʼ yaʼ, y xuyalaʼ lokʼolej rutzijol, y xchʼabalin, y xubilaʼ chique ri vinakiʼ chi titzolin pe quicʼuʼx, y xerucʼutulaʼ retal y meyel tak cʼutbel chiquivech, y xerubanalaʼ meyel tak samaj chiquicojol ri vinakiʼ, richin chi xtiquetamaj cʼa chi xa jubaʼ chic man nipe ri Cristo.

5 Xubilaʼ cʼa chique rijeʼ achique ri xticʼulvachitej jubaʼ chic apon. Riqʼuin cʼari, tok xquecʼulvachitej ronojel riʼ, can xtiquetamaj vi y xtokaka cʼa chiquicʼuʼx chi can xekʼalajirisex vi chiquivech tok cʼa manjani quecʼulvachitej. Queriʼ cʼa xtibanatej richin queriʼ xtiquinimaj na cʼa. Roma cʼariʼ tok conojel ri xquinimaj ri ruchʼabel ri Samuel xebe cʼa riqʼuin ri Nefi richin chi xekasex chuxeʼ yaʼ. Xeʼapon cʼa riqʼuin rijaʼ tok xtzolin pe quicʼuʼx y xequikʼalajirisaj ri quimac chuvech.

6 Jacʼa can e janíla vi chique rijeʼ man xquinimaj ta ri ruchʼabel ri Samuel. Roma cʼariʼ tok rijeʼ xquitzʼet chi man xetiquir ta xquisoc quiqʼuin ri cabej y ri quichʼab, xecoyoj cʼa ri quiyukenelaʼ, quereʼ cʼa xquibij chique: Tichapaʼ re achin reʼ y tiximaʼ, roma can kitzij vi rijaʼ cʼo jun aj tzay riqʼuin. Y roma ri ruchukʼaʼ ri aj tzay ri cʼo riqʼuin, man yojtiquir ta nikasoc quiqʼuin ri kabej y ri kachʼab. Roma cʼariʼ, tichapaʼ cʼa, y tiximaʼ, y tiqʼuisaʼ.

7 Tok rijeʼ xebe chuchapic, jari tok xropin el pa ruviʼ ri tzʼak, y xanimej el pa ri quiruvachʼulef. Jaʼ, xbe pa ri ruvachʼulef rijaʼ y xuchop ruchʼabalixic y ri ruyaʼic lokʼolej rutzijol chire ri ruvinak rijaʼ.

8 Can kitzij vi, manjun chic xetamex chirij rijaʼ chiquicojol ri Nefiʼiʼ. Can que vi cʼariʼ ri xquibanalaʼ ri vinakiʼ riʼ.

9 Quereʼ cʼa xqʼuis ri rujumuchʼ vakiʼ junaʼ richin ri kʼatbel tzij ri xquibanalaʼ ri kʼatoy tzij pa quiviʼ ri ruvinakul ri Nefi.

10 Que cʼa chukaʼ riʼ, xqʼuis ri rujumuchʼ vukuʼ junaʼ richin ri kʼatbel tzij ri xquibanalaʼ ri kʼatoy tzij. Janíla e qʼuiy chique ri vinakiʼ e cʼo can pa ri quinimirinen y ri quetzelal, y xa e jubaʼ oc chique xebiyin choj chuvech ri Dios.

11 Que cʼa chukaʼ riʼ, quibanon can pa ri rujumuchʼ vakxakiʼ junaʼ richin ri kʼatbel tzij ri xquibanalaʼ ri kʼatoy tzij.

12 Y chupan ri rujumuchʼ belejeʼ junaʼ richin ri kʼatbel tzij ri xquibanalaʼ ri kʼatoy tzij, xa e jubaʼ oc xjalatej chire ri yecʼulvachitej chiquicojol ri vinakiʼ. Man riqʼuin vi riʼ, ri vinakiʼ xquicovirisaj chic quiʼ pa ri quetzelal y jutakel xquibanalaʼ chʼakaʼ chic ri man e rucʼamon ta chuvech ri rupixaʼ ri Dios.

13 Cʼariʼ xcʼulvachitej chi chupan ri jumuchʼ lajuj junaʼ richin ri kʼatbel tzij ri xquibanalaʼ ri kʼatoy tzij, can xekʼalajirisex vi nimalej tak retal y meyel tak cʼutbel chiquivech ri vinakiʼ, y ri quichʼabel quiyaʼon can ri e yaʼol lokʼolej rutzijol xquichop xekʼajer.

14 E cʼo takonaxelaʼ ri xquicʼut quiʼ chiquivech ri achiʼaʼ ri etamanelaʼ, y xequikʼalajirisaj chiquivech rijeʼ jebel tak rutzijol richin nimalej quicoten. Quereʼ cʼa chupan ri junaʼ riʼ, ri lokʼolej tzʼibanic xquichop yekʼajer.

15 Man riqʼuin vi riʼ, conojel ri vinakiʼ xquicovirisaj chic ri cánima. Xaxe ri janíla xquinimaj chiquicojol ri Nefiʼiʼ y chukaʼ chiquicojol ri Lamaniʼ man que ta riʼ xquiben. Y ri vinakiʼ ri xquinojij chi xaxe oc nicʼatzin ri cuchukʼaʼ rijeʼ y ri utzilej quinojibal, quereʼ xquibij:

16 Riqʼuin jubaʼ, rijaʼ xquil jubaʼ chirij ronojel ri cʼulvachitajic ri tzijon can. Man riqʼuin vi ri, roj ketaman chi checonojel re nimalej y re meyel tak samaj reʼ ri e tzijon can, xa man xquecʼulvachitej ta.

17 Rijeʼ xquinojilaʼ y xquicʼaxilaʼ quiʼ chiquicojol. Quereʼ cʼa xquibilaʼ:

18 Man rucʼamon ta cʼa chi xtipe jun Cristo. Vi nipe cʼa, y vi ja rijaʼ ri Rucʼajol ri Dios, ri Tataʼixel richin ri caj y ri ruvachʼulef, achiʼel bitajinek can, ¿achique cʼa roma tok man xtucʼut ta riʼ chikavech roj, achiʼel cʼa xtuben quiqʼuin ri e cʼo pa Jerusalem?

19 ¿Achique cami roma tok man xtucʼut ta riʼ chupan re ruvachʼulef reʼ achiʼel cʼa xtuben pa ri ruvachʼulef Jerusalem?

20 Jacʼa kitzij chi roj ketaman chi jareʼ xa jun itzel nimanic yatajinek pe chike coma ri katiʼt kamamaʼ richin chi niban chi roj nikanimaj chi jun nimalej y meyel samaj cʼo chi xticʼulvachitej. Y xa man xticʼulvachitej ta chikacojol roj, xa cʼa pa jun chic ruvachʼulef cʼanej kiqʼuin, y ja ri ruvachʼulef riʼ roj man ketaman ta ruvech. Roma cʼariʼ, rijaʼ yetiquir yojquiyaʼ can pa ri moyirinen, roma manek banel xtikatzʼet quiqʼuin ri runakʼ kavech roj vi ronojel reʼ can kitzij vi.

21 Xa quiqʼuin ri novinek y evan tak samaj richin ri itzel vinek, rijeʼ xtiquiben jun nimalej evan samaj ri man xtikʼax ta chikavech. Riqʼuin cʼariʼ, xkojquiyukʼ ka richin chi roj yojoc samajelaʼ quichin ri quichʼabel y chukaʼ quichin rijeʼ. Roma vi queriʼ, roj cʼo chi yekacanoj richin chi yojquitijoj chire ri chʼabel. Quereʼ cʼa xkojquiyaʼ can pa ri moyirinen chijun ri kacʼaslen vi nikakasaj kiʼ chiquivech rijeʼ.

22 Janíla chʼakaʼ chic tzij xequitzʼuculaʼ pa cánima ri can e nacanuc vi y manek quicʼaʼtz. Yalan e nakon cʼa rijeʼ, roma ri itzel vinek xeruyukʼ jutakel richin chi niquibanalaʼ ri itzel. Kitzij cʼa chi rijaʼ xbe chiquicojol y xeruquiraj qʼuiy tzʼucuj tzij y cʼaxinic chuvech chijun ri ruvachʼulef, richin queriʼ xquerucovirisaj cʼa ri cánima ri vinakiʼ chirij ri utz, y chirij ri xticʼulvachirej apon.

23 Jacʼa can xebanatej vi chiquicojol ri ruvinak ri Ajaf nimaʼk tak etal, y meyel tak cʼutbel, y chukaʼ xequiben qʼuiy meyel tak samaj. Man riqʼuin vi ronojel riʼ, ri Santanás can xeruchop vi ri cánima ri vinakiʼ chuvachʼulef.

24 Quereʼ cʼa xqʼuis ri rujumuchʼ lajuj junaʼ richin ri kʼatbel tzij ri xquibanalaʼ ri kʼatoy tzij pa quiviʼ ri ruvinakul ri Nefi.

25 Vaveʼ xqʼuis vi ri ruvuj ri Elaman, achiʼel cʼa ri nubij ri retal banobel cʼo can quichin ri Elaman y ri rucʼajol.