1 Kahs ma Jacob, tamuhlwel lal Nephi, sramsramkihn nuh sin mwet Nephi, tukun misac lal Nephi:

2 Inge, mwet lili wiyuck, nga, Jacob, in fal nuh ke kunohkohn ma nga oruh nuh sin God, in ahkyohkye ohfuhs luhk ke muhlahlah, ac tuh nga in sukohsohklah ke karmacn luhk ke ma koluk lowos, nga tuhkuh nuh tempuhl lwen se inge tuh nga in fahk nuh suwos ke kahs luhn God.

3 Ac kowos sifacna etuh lah ne ke pacl se inge nga oaru nuh ke ohfuhs ma nga pahng nuh kac; tuhsruhk in lwen se inge nga toasrlacna ke kena yohk ac fosrngah ke moul luhn nguhnuwos liki na ke nga puhlakihn met ah.

4 Tuh liye, ne ingena, kowos ahkostwen nuh ke kahs luhn Leum, ma nga usot nuh suwos.

5 Tuhsruhk liye, kowos lohngyuc, ac etuh lah ke kahsruh luhn El suc kuh liki nuhkwewa ac suc oraclah inkuhsrao ac facluh nga kuh in fahk nuh suwos ke nuhnak lowos an, lah fuhkah tuh kowos muhtwacwacack in oruh orekma koluk, suc ma koluk sikyak arulacna sruhngwacyuck sihk, ahok, ac sruhngwacyuck sin God.

6 Ahok, ma inge ahksuhpwacrye nguhnihk ac oruh nga in lokweni ke mwekihn ye muhtuhn El suc oreyuclac, tuh nga enenuh in fahk nuh suwos ke ma koluk luhn insiowos.

7 Ac oacyacpac ahksuhpwacryeyuc tuh nga enenuh in orekmakihn puhlaik yohk in sramsram keiwos, yurun muhtwacn kiowos ac tuhlihk nuhtuwos, puhkantwen selos suc puhla la arulacna kuhlwacng ac nwacsnwacs ac ohi ye muhtuhn God, suc ma ac ahkinsewowo nuh sin God;

8 Ac oan na sihk lah elos utyak nuh inge in lohng kahs wolacna luhn God, ahok, kahs ma unwelah nguhna kihnetuh.

9 Ohinge, ahktoasrye nguhnihk oruh nga enenuh in tiac kahingkihn, ke srihpen masap suwohs ma nga eis sin God, in kai kowos in fal nuh ke koluk lowos, in ahkyohkye kihnet kaclos suc kihnetuh tari, liki na in ahkwoye ac unwelah kihnet kaclos; ac elos suc soenna kihnet, liki na in ipeis ke kahs wolacna luhn God fihliyac mitmit kohsroh in fakihsyac insiaclos ac kantweyac nuhnak fihsrwacsr lalos.

10 Tuhsruhk, finne yohk orekma se inge, nga enenuh in oruh fal nuh ke suwohsiyacn sap luhn God, ac fahk nuh suwos ke ma koluk ac ma sruhngwacyuck lowos, yurun elos suc inse nwacsnwacs, ac inse muhsahllah, ac ye ngwet in muhta fakfuhk luhn God Kuhlacna.

11 Ohinge, nga enenuh in fahk nuh suwos ma pwacye fal nuh ke suwohsiyacn kahs luhn God. Tuh liye, ke nga siyuck sin Leum, ohinge kahs tuhkuh nuh sihk, fahk: Jacob, som nuh in tempuhl litu, ac fahkwack kahs ma Nga fah usot nuh sum nuh sin mwet inge.

12 Ac inge liye, mwet wiyuck, pa inge kahs ma nga ac fahk nuh suwos, lah puhkantwen suwos muhtwacwacack in suk ke kol, ac ke selfuh, ac ke kain in ma sacohk nuhkwewa ma oreklac ke ohr, ke acn se inge, suc acn wihlwihl se nuh suwos ac nuh sin fihtac lowos, ma yol arulacna puhs.

13 Ac poun mwe insewowo isrwacsr engankihn kowos yohk, tuh kowos eis mwe kahsruhp pucspucs; ac ke srihpen kuhtuh suwos eis puhslaclac liki mwet wiowos kowos pihsrkikowosyak nuh lucng in insefuhlwact ke insiowos, ac oruh in kwekwe kwacwac ac fuhlwactwack sifac ke srihpen yohkiyacn molin mwe yucn lowos, ac ahkkohsye mwet wiowos ke srihpen kowos muh kowos wo luhkwelos.

14 Ac inge, mwet wiyuck, yac kowos motko muh God El fuhlwelah nuh suwos ke ma se inge? Liye, nga fahk nuh suwos, Moh. Tuhsruhk El sruhngwac kowos, ac kowos fin fahfahlac na in oruh ma inge nuhnuhnkuh Lal fah sa in tuhkuh nuh yuruwos.

15 O tuh El ac ahkkahlwemye nuh suwos lah El kuh in kantwekowosi, ac ke na ngwet se ke muhtahl El kuh in srihngihl kowos nuh infohk uh!

16 O tuh El ac oruh in wacngihnlac yuruwos ma koluk ac mwe sruhngwacyuck yohk inge. Ac, O tuh kowos in porongo kahs in sap Lal, ac tiac lwelah insefuhlwact luhn insiowos in kuhnahoslah nguhnuwos!

17 Nuhnkuh ke mwet wiowos oacna kowos sifacna, ac akihlen nuhkwewa ac ahksukohsohkye kowos liki ma lowos, tuh elos in kahsruhp oacna kowos.

18 Tuhsruhk met liki kowos suk ke mwe kahsruhp, suk tohkohsrahi luhn God.

19 Ac tukun kowos eis sie finsrak ke Kraist kowos fah eis mwe kahsruhp, kowos fin suk ke ma inge; ac kowos fah suk ma inge ke srihpac in oruh ma wo—in nokomwacng mwet kohflohfohl, ac in kihte mwet masrinsrwacl, ac in ahksukohsohkye mwet srohoh, ac sang kahsruh nuh sin mwet mas ac mwet kweok.

20 Ac inge, mwet wiyuck, nga sramsram nuh suwos ke insefuhlwact; ac nuh suwos suc ahkkweokye mwet tuhlan lowos, ac ahkkohsyacl ke srihpen fuhlwact insiowos, ke ma suc God El usot nuh suwos, meac kowos fahk kac?

21 Yac kowos tiac motko muh ma inge mwe sruhngwacyuck nuh Sel suc oraclah mahno nuhkwewa? Ac kais sie mwet sacohk ye muhtahl oacna mwet ngiac. Ac mahno nuhkwewa ma ke infohk uh; ac ke ohiyac sefanna El oracloslac, tuh elos in liyacacng masap Lal ac kaksakuhnuhl ne tok ma pahtpaht.

22 Ac inge nga ahksahfye sramsram luhk nuh suwos ke insefuhlwact se inge. Ac nga fin tiac enenuh in sramsram nuh suwos ke ma koluk yohk liki inge, insiyuck ac engan yohk ke srupowos.

23 Tuhsruhk kahs luhn God ahktoasryeyuc ke srihpen ma koluk yohklacna lowos. Tuh liye, ohinge Leum El fahk: Mwet inge muhtwacwacack in koluklacna; elos tiac kahlwem ke ma suhmuhslah, tuh elos sukok srihpac in orek kosro, ke srihpen ma suc sihmlac kacl David, ac Solomon wen nahtuhl.

24 Liye, David ac Solomon pwacye puhkantwen muhtwacn kiaclos ac muhtwacn kuhlwacnsap, suc ma inge mwe sruhngwacyuck nuh Sihk, Leum El fahk.

25 Ohinge, Leum El fahk, Nga tuh kohllah mwet inge liki acn Jerusalem, ke kuh luhn pouk, tuh Nga in kuh in tuhfahlah nuh Sihk sie lah suwohswohs ke fihlin tuhlihk nahtuhl Joseph.

26 Ohinge, Nga Leum God fah tiac lwelah tuh mwet inge fah oruh oacna elos suc mahtuh.

27 Ohinge, mwet wiyuck, lohngyuc, ac porongo kahs luhn Leum: Tuh ac fah wacngihn kuhtwena mukul inmahsrlowos suc oasr sahyacn muhtwacn se na kiyac; ac in wacngihn muhtwacn kuhlwacnsap lal;

28 Tuh Nga, Leum God, engankihn nwacsnwacs luhn muhtwacn. Ac inkacnek in kosro mwe sruhngwacyuck se nuh Sihk; ohinge Leum luhn Un Mwet Mweun El fahk.

29 Ohinge, mwet inge fah liyacacng masap Luhk, Leum luhn Un Mwet Mweun El fahk, kuh selngawiyucki acn uh ke srihpaclos.

30 Tuh Nga ac fin, Leum Kuhlacna El fahk, tuhfahlah fihtac nuh Sihk, Nga fah sapkihn nuh sin mwet Luhk; ohinge elos fah porongo ma inge.

31 Tuh liye, Nga, Leum, liye ahsor, ac lohng tuhng luhn acn nuhtin mwet Luhk fin acn Jerusalem, ahok, ac ke acn nuhkwewa luhn mwet Luhk, ke srihpen ma koluk ac mwe sruhngwacyuck luhn mukul tuhmwaclos.

32 Ac Nga fah tiac kweok, Leum luhn Un Mwet Mweun El fahk, tuh tuhng luhn acn oaskuh nuhtin mwet inge, suc Nga kohllah liki acn Jerusalem, fah wowoyak nuh yuruk lain mukul luhn mwet luhk, Leum luhn Un Mwet Mweun El fahk.

33 Tuh elos fah tiac kohkohlah nuh in srohoh acn nuhtin mwet Luhk ke srihpen kuhlwacng lalos, sahyacn Nga fah som nuh yohrohlos ke sie selngawi na upac, finne nuh ke kuhnahoslah; tuh elos fah tiac orek kosro, oacna elos suc mahtuh, Leum luhn Un Mwet Mweun El fahk.

34 Ac inge liye, mwet wiyuck, kowos etuh lah masap inge ituckyang nuh sin pahpah tuhmwacsr, Lehi; ohinge, kowos etuh ma inge met; ac kowos tuhkuh nuh ke nuhnuhnkuh yohk; tuh kowos oruh ma inge suc kowos enenuh in tiac oruh.

35 Liye, kowos oruh ma koluk yohk liki na mwet Laman, mwet wiyacsr. Kowos ahkmuhsahlye insiacn muhtwacn puhsisacl kiowos, ac tuhlac luhlahlfongi luhn tuhlihk nuhtuwos, ke srihpen srihkasrak koluk lowos ye muhtahlos; ac tuhng luhn insiaclos sowack nuh yurun God lain kowos. Ac ke srihpen suwohswohs ke kahs luhn God, ma tuhkuh nuh ten lain kowos, insiac pucspucs misac, kantweyucki ke kihnet loal.