1 O upu na tautala atu e Iakopo, le uso o Nifae, i le nuu o Nifae, ina ua mavae le maliu o Nifae:

2 O lenei, o’u uso pele e, o a’u, o Iakopo, e tusa ma le tiutetauave ua ia te au mai le Atua, e faalautele ai lo’u tofiga ma le mamalu, ma ina ia mamā o’u ofu mai ia outou agasala, ua ou sau ai i le malumalu i le asō ina ia mafai ona ou ta’u atu ia te outou le afioga a le Atua.

3 Ma ua outou iloa lava sa ou filigā lava e oo mai i le taimi nei i le tofi o lo’u valaaulia; ae o a’u i le asō, ua sili atu ona mamafa ia te a’u le naunau ma le popole tele mo le manuia o o outou agaga, nai lo lo’u naunau ma le popole tele i ai i taimi ua mavae.

4 Aua faauta, e oo mai i le taimi nei, o outou usiusitai pea i le afioga a le Alii, na ou tuu atu ia te outou.

5 Ae faauta, ia outou faalogo mai ia te a’u, ma ia outou iloa o le fesoasoani mai a le Foafoa mamana-aoao o le lagi ma le lalolagi, e mafai ona ou ta’u atu ai ia te outou e uiga i o outou mafaufauga, le ala ua amata ai ona outou galulue i le agasala, o se agasala lea ua foliga mai ia te a’u ua sili ona inosia, ioe, ma inosia i le Atua.

6 Ioe, o se mea ua faanoanoa ai lo’u agaga ma ou solomuli ai i le maasiasi i luma o Lē na faia a’u, i le tatau ona ou molimau atu ia te outou e uiga i le amioleaga o o outou loto.

7 Ma ou te faanoanoa foi i le tatau ai ona ou faaaoga o le tautala tuusa’o atu e uiga ia te outou, i luma o a outou avā ma a outou fanau, o le toatele o o latou lagona ua agavaivai lava ma mamā ma maaleale i luma o le Atua, o se mea ua fiafia i ai le Atua;

8 Ma ua ou manatu ua latou o mai i luga nei e faalogologo i le afioga fimalie a le Atua, ioe, le afioga lea e faamalolo ai le agaga ua faamanu’alia.

9 O le mea lea, ua mamafa ai i lo’u agaga le tatau ona uunaia o a’u, ona o le poloaiga patino na ou maua mai le Atua, ou te apoapoai atu ia te outou e uiga ia outou solitulafono, ma faatetele atili manu’a o e ua manunu’a, nai lo le faamafanafana atu ma le faamaloloina o o latou manu’a; ma o i latou o e e lei faamanunu’alia, nai lo le taumamafa fiafia i afioga fimalie a le Atua, ua i ai polo ua tuu e tuia ai o latou agaga ma faamanunu’a ai o latou mafaufau maaleale.

10 Peitai, e ui i le tele o le galuega, e ao ina ou faia e tusa ma le poloaiga patino a le Atua, ma ta’u atu ia te outou e uiga i lo outou amioleaga ma a outou mea inosia, i luma o e ua loto mamā, ma e ua loto momomo, ma i lalo o le silafaga ati o le Atua Malosi Aoao.

11 O le mea lea, e ao ai ina ou ta’u atu ia te outou le moni e tusa ma le manino o le afioga a le Atua. Auā faauta, a’o o’u ole atu i le Alii, sa faapea ona oo mai o lana afioga ia te a’u, ua fetalai mai: Iakopo, ia e alu a’e i le malumalu a taeao, ma ta’u atu i lenei nuu le upu o le a Ou tuu atu ia te oe.

12 Ma o lenei faauta, o’u uso e, o le afioga lenei ou te ta’u atu ia te outou, o le toatele o outou ua amata ona saili mo le auro, ma le ario, ma ituaiga o ’oa taugata eseese uma, ia ua matuā tele naua i lenei laueleele, o se laueleele o le folafolaga ia te outou ma a outou fanau.

13 Ma ua fiafia tele mai le aao o le Atua i luga o outou, ua outou maua ai oloa e tele; ma ona ua maua e ni isi o outou ni oloa e sili atu ona tele nai lo o outou uso o lea ua faafefeteina ai outou i le faamaualuluga o o outou loto, ma faaali mai o ua maaa ma ulu malō ona o le taugata o o outou ofu, ma outou sauaina o outou uso ona o lo outou manatu ua outou sili a’e nai lo i latou.

14 Ma o lenei, o’u uso e, tou te manatu ea ua ta’uamamāina outou e le Atua i lenei mea? Faauta, ou te fai atu ia te outou, E leai. Ae ua ta’usalaina outou e ia, ma afai tou te faia pea nei mea, o le a vave ona oo mai o ana faamasinoga ia te outou.

15 E, ma’umau e pe a na faailoa mai e ia ia te outou e mafai ona ati lana silasila ia te outou, ma e mafai ona ia taia outou i le efuefu i le tepa tasi mai o lona fofoga.

16 E, ma’umau e pe a na aveese e ia mai ia te outou lenei amioletonu ma mea inosia. Ma, ma’umau e pe a na outou faalogo i upu o ana poloaiga, ma aua le tuua lenei faamaualuga o o outou loto e faaumatia ai o outou agaga!

17 Ia outou manatu i o outou uso e pei o outou lava, ma faamasani ma i latou uma ma lima foa’i atu ia te i latou ia outou mea, ina ia latou mauoa e pei o outou.

18 Peitai ae tou te lei saili mo le ’oa, ia outou saili mo le malo o le Atua.

19 Ma pe a uma ona outou maua o se faamoemoe ia Keriso o le a outou maua ’oa, pe afai tou te sailia ia mea; ma ia outou sailia mo le faamoemoe e fai ai mea lelei—e faaoofu ai e ua le lavalavā, ma fafaga ai e ua fia aai, ma faasaoloto e ua faatagataotauaina, ma avatu ai le fesoasoani i e ua mama’i ma puapuagatia.

20 Ma o lenei, o’u uso e, ua ou tautala atu ia te outou e uiga i le faamaualuga; ma o outou na o e ua outou faatiga i lē lua te tuaoi, ma sauaina o ia ona o lo outou faamaualuluga i o outou loto, i mea na tuuina mai e le Atua ia te outou, o le a sa outou tali i ai?

21 Tou te le manatu ea ua inosia ia mea ia te ia o lē na foafoaina tagata uma? Ma ua tutusa le pele o le tasi tagata i lana silafaga e pei o le isi. Ma o tagata uma e mai le efuefu; ma e tasi le faamoemoe na foafoa ai i latou e ia, ia latou tausi i ana poloaiga ma faamamalu ia te ia e faavavau.

22 Ma o lenei ou te faaiu le tautala atu ia te outou e uiga i lenei faamaualuga. Ma a na lē tatau ai ona ou tautala atu ia te outou e uiga i se solitulafono sili ona leaga, po ua matua olioli tele lo’u loto ia te outou.

23 Peitai ua mamafa ia te a’u le afioga a le Atua ona o a outou soligatulafono leaga tele. Auā faauta, ua faapea ona fetalai mai o le Alii: Ua amata ona ola amioletonu lenei nuu; ua latou lē malamalama i tusitusiga paia, ona ua latou saili e ta’uamiotonuina i latou lava i le faia o le faitaaga, ona o mea ua tusia e uiga ia Tavita, ma Solomona lona atalii.

24 Faauta, e moni sa tele avā ma palake a Tavita ma Solomona, o se mea sa inosia i o’u luma, ua fetalai mai ai le Alii.

25 O le mea lea, ua faapea ona fetalai mai o le Alii, ua Ou taitaiina ese lenei nuu mai le laueleele o Ierusalema, i le mana o lo’u lava lima, ina ia mafai ona Ou faatu mai mo a’u se lālā amiotonu mai le fua o sulugatiti o Iosefa.

26 O le mea lea, o A’u o le Alii le Atua, Ou te lē tuu atu ai i lenei nuu ia latou faia e pei ona faia e i latou anamua.

27 O le mea lea, o’u uso e, faalogo mai ia te a’u, ma faalogo i le afioga a le Alii: Ona ia lē i ai se tagata i totonu o outou na te faia, a ia na o le tasi le avā; ma ia lē i ai ni palake ia te ia.

28 Ona o A’u, o le Alii le Atua, e fiafia i le ola mamā o tamaitai. Ma o le faitaaga o ni mea inosia ia i o’u luma; ua faapea ona fetalai mai ai le Alii o ’Au.

29 O le mea lea, ia tausi e lenei nuu a’u poloaiga, ua fetalai mai ai le Alii o ’Au, po o le a fetuuina le laueleele ona o i latou.

30 Ona afai Ou te mana’o i ai, ua fetalai mai ai le Alii o ’Au, e faatutū mai ni fanau mo a’u, o le a Ou poloaiina ai lo’u nuu; a lē o lea, o le a latou faalogo i nei mea.

31 Auā faauta, o A’u, o le Alii, ua Ou vaaia le faanoanoa, ma faalogoina tagi a afafine o lo’u nuu i le laueleele o Ierusalema, ioe, ma laueleele uma o o’u tagata, ona o le amioleaga ma mea inosia a a latou tane.

32 Ma Ou te lē tuua lava, ua fetalai mai ai le Alii o ’Au, tagi a afafine lalelei o lenei nuu, lea na Ou taitaia ese mai le laueleele o Ierusalema, ia oo mai ia te a’u e faasaga i tane o lo’u nuu, ua fetalai mai ai le Alii o ’Au.

33 Ona o le a latou lē ta’ita’i ese atu faatagataotaua afafine o lo’u nuu ona o lo latou agavaivai, e aunoa ma lo’u asiasi atu ia te i latou i se fetuu tiga, e oo lava i le faafanoga; ona o le a latou lē faia le faitaaga, e pei o i latou anamua, ua fetalai mai ai le Alii o ’Au.

34 Ma o lenei faauta, o’u uso e, ua outou iloa sa tuuina mai nei poloaiga i lo tatou tamā, o Liae; o le mea lea, sa outou iloaina muamua; ma ua oo mai ia te outou se ta’usalaga tele; ona ua outou faia nei mea sa lē tatau ona outou faia.

35 Faauta, ua outou faia amioletonu tetele e sili atu nai lo sa Lamanā, o tatou uso. Ua outou tu’imomomoina loto o a outou avā agavaivai, ma aveesea le faatuatuaina o outou e a outou fanau, ona o a outou faataitaiga leaga i o latou luma; ma ua a’e masūsū o o latou loto i le Atua e faasaga ia te outou. Ma ona o le faamaoni o le afioga a le Atua, e alu ifo e faasaga ia te outou, ua tele fatu ua pepē, ua tuia i manu’a loloto.