1 Naan ko Jekab, ļeo jatin Nipai, eaar kōnono n̄an armej in Nipai, ālikin mej eo an Nipai.

2 Kiiō, ro jeiū im jatū rejitōnbōro, n̄a, Jekab, ekkar n̄an eddo eo ij pād ium̧win n̄an Anij, n̄an kōļapļo̧k kūr eo aō ilo alikkar in ļōmņak, im bwe in maron̄ karreoik men ko ballū jān jero̧wiwi ko ami, ij itok n̄an tampeļ in rainin bwe in maron̄ kwaļo̧k n̄an kom̧ naan an Anij.

3 Im kom̧ make jeļā bwe iaar tiljek ilo jikin kūr in aō; a rainin ij eddo kōn eļapļo̧k ikdeelel im inepata n̄an em̧m̧anļo̧k eo an jetōb ko ami jān jon̄an eo iaar tōpar e.

4 Bwe lo, ejjan̄in jejjet, kom̧ij jan̄in pokake naan ko an Irooj, ko iaar liwōj n̄an kom̧.

5 A lo, eo̧ron̄ e eō, im jeļā bwe jān jipan̄ an Rikōm̧anm̧an ekajoor bōtata in lan̄ im laļ imaron̄ jiron̄ kom̧ kōn ļōmņak ko ami, ekōjkan ami jino m̧ad ilo jero̧wiwi, jero̧wiwi eo emennin kajjōjō n̄an eō, aaet, im mennin kajjōjō n̄an Anij.

6 Aaet, e kabūrom̧ōj aō im kōm̧m̧an bwe in nok kōn jook im̧aan mejān aō Rikōm̧anm̧an, bwe ij aikuj kam̧ool n̄an kom̧ kōn nana eo an būruōmi.

7 Im barāinwōt e kabūrom̧ōj eō bwe ij aikuj kōjerbal wāween ekkōnono eo e kanooj eddo kōn kom̧, im̧aan kōrā ro pālleemi im ajri ro nejimi, elōn̄ iaer en̄jake ko aer rekanooj pidodo im erreo im kwōjarjar im̧aan Anij, men eo ej kam̧ōņōņō n̄an Anij.

8 Im ej kōtmāne eo aō bwe raar wanlōn̄tak ijin n̄an ron̄jake naan e jouj an Anij, aaet, naan eo ej kōmour jetōb ekinejnej.

9 Kōn menin, ej kaddoik aō bwe en kipel eō, kōn kien in epen eo iaar bōk e jān Anij, n̄an kōketak kom̧ ekkar n̄an men ko ruōmi, n̄an kōļapļo̧k kōnjan ro ededeļo̧k aer kinejnej, im jab kaenōm̧m̧an im kōmour kinej ko aer; im ro rej jan̄in kar ikkinejnej, im ijello̧kun kwōjkwōj ioon naan in jouj an Anij ewōr jāje ruo mejān ko n̄an deil jetōb ko aer im kinejnej koļmānļo̧kijeņ ko aer reub.

10 Ak, mekarta jerbal in eļap, ij aikuj kōm̧m̧an ekkar n̄an kien ko reddo an Anij, im jiron̄ kom̧ kōn jero̧wiwi im mennin jōjō ko ami, ilo im̧aan mejān ro erreo burueer, im erup burueer, im ium̧win kalimjek in māj ekkān mājan Anij Ekajoor.

11 Kōn menin, ij aikuj jiron̄ kom̧ m̧ool eo ekkar n̄an alikkar in naan an Anij. Bwe lo, ke iaar kajjitōk ippān Irooj, āindein naan eo eaar itok n̄an eō, im ba: Jekab, kwōn ilo̧k n̄an tampeļ eo ilo raan eo ilju, im kwaļo̧k naan eo Inaaj lewōj n̄an eok n̄an armej rein.

12 Im kiiō lo, ro jeiū im jatū, en̄in ej naan eo ij kwaļo̧k n̄an kom̧, bwe elōn̄ iaami raar jinō kappukot gold, im kappukot silver, im aolep mennin aorōk otemjej in ore ko, eo ilo āne in, eo ej juon āneen kallim̧ur n̄an kom̧ im n̄an ineōmi, ekanooj lōn̄ otem lōn̄.

13 Im pein oņaake eaar ettōn̄dikdik ioomi kōn eļap jouj, bwe kom̧ ar bōk eļap jeraam̧m̧an ko; im kōn jet iaami raar bōk eļapļo̧k jān ro jeiūm̧i im jātimi kom̧ij utiej ilo juwa in būruōmi, im kōņak kōnwa ko rekijn̄en̄e im kautiej bōrami kōn wōņāān ko an men ko ballemi, im matōrtōre ro jeiūm̧i im jātimi kōnke kom̧ij watōk bwe kom̧ em̧m̧anļo̧k jān er.

14 Im kiiō, ro jeiū im jatū, kom̧ij ļōmņak Anij ej rejetake kom̧ ilo men in? Lo, ij ba n̄an kom̧, Jaab. A E ej ņotaik kom̧, im eļan̄n̄e kom̧ij kakkōt wōt ilo men kein ekajet ko An renaaj m̧ōkaj aer itok ioomi.

15 O bwe E en kar kwaļo̧k n̄an kom̧ bwe Emaron̄ deil kom̧, im kōn juon kalimjek in mejān Emaron̄ m̧an kom̧ n̄an bwidej!

16 O bwe E en kar juļo̧k jān kom̧ nana im jōjō in. Im, O bwe kom̧in kar ron̄jake naan in jiron̄ ko An, im jab kōtļo̧k bwe juwa in an būruōmi en ko̧kkure jetōb ko ami!

17 Kom̧in ļōmņak kōn ro jeiūm̧i im jātimi āinwōt kom̧ make, im jeļā kōn aolep im wūjlepeļo̧k aolep ami jeraam̧m̧an, bwe ren maron̄ m̧weie āinwōt kom̧.

18 A m̧okta jān kom̧ij pukot jeraam̧m̧an ko, kom̧in pukot aelōn̄ in Anij.

19 Im ālikin ami kar bōk kōjatdikdik ilo Kraist kom̧ naaj bōk jeraam̧m̧an ko, im kom̧ naaj pukoti; im kom̧ naaj pukoti n̄an tokjān eo n̄an kōm̧m̧an em̧m̧an—n̄an ņa ballin ro rekeelwaan, im n̄an naajdik ro rekwōle, im n̄an kaanemkwōj rilokjak, im jerbale jipan̄ n̄an rinan̄inmej im riban.

20 Im kiiō, ro jeiū im jatū, iaar kōnono n̄an kom̧ kōn juwa; im ro iaami raar kōmetak ro riturumi, im matōrtōr e kōnke kom̧ ar utiej ilo būruōmi, kōn men ko Anij Eaar liwōj n̄an kom̧, ta kom̧ij ba kōn e?

21 Kom̧ij kōtmāne ke men kein rekajjōjō n̄an e eo eaar kōm̧anm̧an aolep kanniōk? Im kajjojo armej ej aorōk ilo im̧aan mejān āinwōt bar juon. Im aolep kanniōk ej jān būn̄aln̄al; im ejja kōn jem̧ļo̧k in Eaar kōm̧anm̧an er, bwe ren aikuj kōjparok kien ko An im lan̄lōn̄ ilo E indeeo.

22 Im kiiō ij kōm̧m̧ane jem̧ļo̧k in ekkōnono n̄an kom̧ kōn juwa in. Im n̄e eaar jab bwe in aikuj kōnono n̄an kom̧ kōn juon mennin kinaakļo̧k enanaļo̧k, buruō en kar kanooj m̧ōņōņō kōn kom̧.

23 A naan an Anij e kaddoik eō kōn mennin kinaakļo̧k ko ami renanaļo̧k. Bwe lo, āindein Irooj ej ba: Armej rein rej jino kajoorļo̧k ilo nana; rej jab meļeļe kōn jeje ko rekwōjarjar, bwe rej pukot n̄an jab ņa ruweer kōn kōm̧m̧ani jerbal in ļōn̄ ko, kōn men ko kar jeje kōn Devid, im Solomon ļeo nejin.

24 Lo, Devid im Solomon em̧ool eaar lōn̄ kōrā pāleer im aer konkubain, men eo eaar kajjōjō im̧aō, Irooj ej ba.

25 Kōn menin, āindein Irooj ej ba, Iaar tōlļo̧k armej rein jān āneen Jerusalem, kōn kajoor in Peiū, bwe In maron̄ kajutak n̄an Eō juon ra eweeppān jān leen lo̧jeen Josep.

26 Kōn menin, n̄a Irooj Anij Ij jamin kōtļo̧k bwe armej rein renaaj kōm̧m̧an āinwōt er ro etto.

27 Kōn menin, ro jeiū im jatū, ron̄jake eō, im eo̧ron̄ naan eo an Irooj: Bwe enaaj ejjeļo̧k jabdewōt em̧m̧aan ilubwiljimi enaaj lōn̄ pāleen en lōn̄ļo̧k jān juon; im konkubain ro naaj ejjeļo̧k;

28 Bwe n̄a, Irooj Anij, ij m̧ōņōņō ilo m̧wil erreo an kōrā ro. Im riļōn̄ rej mennin jōjō im̧aō; āindein Irooj in Inelep eo ej ba.

29 Kōn menin, armej rein renaaj kōjparok kien ko Aō, Irooj in Inelep eo ej ba, ak lia naaj an āneo kōn er.

30 Bwe eļan̄n̄e Inaaj, Irooj in Inelep eo ej ba, kajutak juon ine n̄an Eō, Inaaj jiron̄ armej ro Aō; āindein renaaj eo̧ron̄ men kein.

31 Bwe lo, n̄a, Irooj, Iaar lo kabbūrom̧ōjm̧ōj eo, im kar ron̄ jan̄ in kōrā ro nejin armej ro Aō ilo āneen Jerusalem, aaet, ilo aolep āne ko āneen armej ro Aō, kōn jero̧wiwi im mennin jōjō ko an ļōm̧aro pāleer.

32 Im Ij jamin kōtļo̧k, Irooj in Inelep eo ej ba, bwe kūr ko an kōrā ro rekarbōb jān armej rein, ko Iaar tōlļo̧k jān āneen Jerusalem, naaj itok n̄an Eō ņae ļōm̧aro jān armej ro Aō, Irooj in Inelep eo ej ba.

33 Bwe rej jamin tōlļo̧k rikōm̧akoko kōrā ro jān armej ro Aō kōn jouj eo aer, bwe Inaaj loļo̧k er kōn juon kalia emetak, em̧ool n̄an ko̧kkure; bwe ren jab naaj kōm̧m̧an jerbal in ļōn̄ ko, ejja āinwōt er ro etto, Irooj in Inelep eo ej ba.

34 Im kiiō lo, ro jeiū im jatū, kom̧ jeļā bwe kien kein kar liļo̧k n̄an jemād, Liai; kōn menin, kom̧ ar jeļā kaki m̧okta; im kom̧ ar itok n̄an liaakeļo̧k eļap; bwe kom̧ ar kōm̧m̧ani men kein ko kom̧ ar jab aikuj n̄an kar kōm̧m̧an.

35 Lo, kom̧ ar kōm̧m̧an eļapļo̧k nana jān riLeman raņ, ro jeid im jatid. Kom̧ ar rupe bōro ub ko būruōn kōrā ro pālleemi, im jako jān kōjatdikdik an ajri ro nejimi, kōn waanjon̄ok nana ko ami im̧aer; im m̧ōtato ko an burueer rej wanlōn̄ļo̧k n̄an Anij ņae kom̧. Im kōnke kanooj jejjet eo an naan in Anij, eo ej wanlaļtak ņae kom̧, elōn̄ bōro ko raar mej; deili kōn kinej ko rem̧wilaļ.