1 A lo, n̄a, Jekab, ikōņaan kōnono n̄an kom̧ ro rej ettā burueer. Reilo̧k n̄an Anij kōn koļmānļo̧kijeņ eo edim, im jar n̄an e kōn eļap tōmak, im Enaaj kaenōm̧m̧an kom̧ ilo en̄taan ko am̧, im Enaaj akweļap kōn kōttōpar eo am̧, im jilkinlaļtak idenoņe n̄an ro rej pukot ko̧kkure eo am̧.

2 O aolep kom̧ ro rej erreo ilo bōro, kom̧in kotak bōrami im bōk naan in jouj an Anij, im kwōjkwōj ioon iakwe eo An; bwe kom̧ maron̄, eļan̄n̄e ļōmņak ko ami redim, indeeo.

3 A, wo, wo, n̄an kom̧ ro rejjab erreo ilo bōro, ro rej ettoon rainin im̧aan Anij, bwe ijello̧kun n̄e kom̧ij ukeļo̧k āniin ej lia kōn kom̧, im riLeman ro, ro rejjab ettoon āinwōt kom̧, mekarta relia kōn juon lia ekōmetak, renaaj kaen̄taan kom̧ em̧ool n̄an jako.

4 Im iien eo ejidimkij an itok, bwe ijello̧kun n̄e kom̧ij ukeļo̧k renaaj bōk āne in jolōt in ami, im Irooj Anij Enaaj tōlļo̧k ro rejim̧we jān ilubwiljimi.

5 Lo, riLeman ro jeiūm̧i im jatimi, ro kom̧ij dike er kōn aer ettoon im lia eo kar itok ioon kilier, rejim̧weļo̧k jān kom̧; bwe raar jab meļo̧kļo̧k kien an Irooj, eo kar leļo̧k n̄an jemād—bwe en wōr juon wōt pāleer, im konkubain ro rej aikuj jab wōr aer, im ej aikuj jab wōr jerbal in ļōn̄ ko kōm̧m̧ani ilubwiljier.

6 Im kiiō, kien in raar dāpij n̄an kōjparoke; kōn menin, kōn dāpij in, in n̄an kōjparok kien in, Irooj Anij E jamin ko̧kkure er, a Enaaj jouj n̄an er; im juon raan renaaj juon armej ejeraam̧m̧an.

7 Lo, ļōm̧aro pālele rej iakwe lim̧aro pāleer, im lim̧aro pāleer rej iakwe ļōm̧aro pāleer; im ļōm̧aro pāleer im lim̧aro pāleer rej iakwe ro nejier; im aer jab tōmak im aer dike n̄an kom̧ ej kōn nana eo an ro jemāer; kōn menin, ewi jon̄an ami em̧m̧anļo̧k jān er, ilo mejān eo Rikōm̧anm̧an Eļap?

8 O ro jeiū im jatū, ilōļn̄o̧n̄ bwe ijello̧kun n̄e kom̧ij ukeļo̧k jān jero̧wiwi ko ami bwe kilier naaj moujļo̧k jān kilimi, n̄e bōktok kom̧ ippāer im̧aan tūroon an Anij.

9 Kōn menin, juon kien ij lewōj n̄an kom̧, eo ej naan an Anij, bwe en jem̧ļo̧k ami kajjirere kake er kōn marok in kilier; im kom̧in jab kajjirere kake er kōn aer ettoon; a kom̧ naaj keememej ettoon eo ami make, im keememej bwe aer ettoon eaar itok kōnke ro jemāer.

10 Kōn menin, kom̧ naaj keememej ro nejimi, ekōjkan ami kar kabūrom̧ōj burueer kōn waanjon̄ok eo kom̧ ar likūt im̧aer; im barāinwōt, keememej bwe kom̧ maron̄, kōn ettoonon eo ami, bōktok ro nejimi n̄an jako, im jero̧wiwi ko aer rej ejoujik ioon bōrami ilo raan eo āliktata.

11 O ro jeiū im jatū, eo̧ron̄ naan ko aō; karuj en̄jake ko ilo jetōb ko ami; idik kom̧ make bwe kom̧in maron̄ ruj jān kiki in mej, im kōtļo̧k kom̧ jān metak ko an hell bwe kom̧in maron̄ jab enjeļ ro an devil, n̄an joļo̧k ilo reba in dān im brimstone eo ej mej eo kein karuo.

12 Im kiiō, n̄a, Jekab, iaar kōnono elōn̄ļo̧k men ko n̄an armej in Nipai, kakkōl er ņae ļōn̄ im ejej, im jabdewōt jero̧wiwi otemjej, jiron̄ er jem̧ļo̧k ko renana jān i.

13 Im juon m̧ōttan jibukwi in bwebwenato ko kōn armej rein, eo kiiō ej jino kanooj ļap, jab maron̄ kar jeje ioon pileij kein; a elōn̄ bwebwenato ko kar jeje ioon pileij ko reļļap, im tariņae ko aer, im akwāālel ko aer, im iien irooj ro an kiin̄ ro aer.

14 Pileij kein ņa etaer pileij ko an Jekab, im raar kōm̧m̧an jān pein Nipai, im ij kōm̧m̧an jem̧ļo̧k in kōnono naan kein.