1 Inge liye, tukun ma inge tuh nga, Jacob, luti yohk nuh sin mwet luhk ke kahs, (ac nga tiac kuh in sihmihs tuhsruhk kuhtuh srihsrihk na ke kahs luhk, ke srihpen upac in taflweyuck kahs lasr ke plwet) ac kuht etuh lah ma kuht sihmihs ke plwet inge oan in kawihl;

2 Tuhsruhk kuhtwena ma ma kuht kuh in sihmihs kac fin tiac oan ke plwet fah wacngihnlac kuh tuhlac; tuh kuht kuh in sihmihs na kuhtuh na kahs ke plwet, ma fah ituckyang nuh sin tuhlihk nahtuhsr, ac oacyacpac mwet sacohk wiyacsr, in etuh kacsr kuhtuh srihsrihk, kuh ke pahpah tuhmwaclos.

3 Inge ke ma se inge kuht engan; ac kuht kwacfeacng in kuhlwacnsap in taflwelah kahs inge ke plwet, finsraki muh mwet wiyacsr ac tuhlihk nahtuhsr fah eis ma inge ke inse engan, ac liye ma inge elos in muh lutlut ke engan ac tiac ahsor, in tiac sruhnga, ke pahpah tuhmwaclos ac ninac kiaclos emet.

4 Tuh, nuh ke srihpac se inge kuht suhmuhslah ma inge, tuh elos in etuh kac lah kuht etuh ke Kraist, ac oasr finsrak lasr ke wolacna Lal ke yac siofok pucspucs somlah met liki tuhkuh Lal; ac tiac kuht muhkwena finsrak ke wolacna Lal, tuhsruhk oacyacpac mwet pahluh muhtahl nuhkwewa met liki kuht.

5 Liye, elos luhlahlfongi ke Kraist ac alu nuh sin Pahpah ke Inel, ac oacyacpac kuht alu nuh sin Pahpah ke Inel. Ac ke srihpac se inge kuht liyacacng masap lal Moses, ma srihsrngi nguhnasr nuh Yohrohl; ac ke srihpac se inge ma inge ahkmuhtahlye kuht in suwohswohs, oacna ke tuh sruhmuhnyuck nuh sel Abraham yen mwesis elan ahkostwen nuh ke sap luhn God in kihsackuhnuhl Isaac wen nahtuhl, suc luhmweyuck nuh kacl God ac Wen Sefanna nahtuhl.

6 Ohinge, kuht suk mwet pahluh, ac kuht eis fwackyuck pucspucs ac nguhn in palye; ac ke mwe loh pucspucs inge kuht eis finsrak, ac luhlahlfongi lasr tiac kuh in usrusryak, yohkna oruh pwacyena kuht kuh in sap ke inen Jisus ac sahk uh ahkos kuht, kuh finohl, kuh noa in meoa uh.

7 Ne ohinge, Leum God El ahkkahlwemye nuh sesr muhnahs lasr tuh kuht in etuh lah ke luhng kuhlwacng Lal, ac ke puhsisacl yohk Lal nuh sin tuhlihk nuhtin mwet, pwacnwacng oasr kuh lasr in oruh ma inge.

8 Liye, yohk ac wolacna orekma luhn Leum. Fuhkah kuh koflah na in sukokyak loaliyacn ma lukmac Lal; ac tiac kuh tuh mwet in konwacack kwewa ohiyac Lal. Ac wacngihn mwet etuh ke ohiyac Lal ne ke na ahkkahlwemyeyuck nuh sel; ohinge, mwet wiyuck, nikmet koase fwackyuck luhn God.

9 Tuh liye, ke kuh luhn kahs Lal mwet uh tuhkuh nuh fin facluh, suc facluh oreklac ke kuh luhn kahs Lal. Ohinge, fin God El kuh in sramsram na facluh oasr, ac in sramsram na mwet uh oreklac, O na, efuh kuh in tiac kuh in sap nuh sin facluh, kuh orekma usrnguck luhn pahol fin facluh, in fal nuh ke luhngse ac pwacr Lal?

10 Ohinge, mwet wiyuck, nikmet suk in kai Leum, tuhsruhk in eis kaiyuck ke pahol. Tuh liye, kowos sifacna etuh lah El kai ke lahlmwetmwet, ac ke nuhnuhnkuh suwohs, ac ke pahkotwen yohk, ke orekma Lal nuhkwewa.

11 Ohinge, mwet sacohk wiyuck, ahksuwohsye nuh Sel ke iwaclah luhn Kraist, Wen Sefanna nahtuhl, ac kowos fah eis moulyak, fal nuh ke kuh luhn moulyak ma oasr in Kraist, ac ahkkahlwemyeyuck oacna fahko se emet luhn Kraist nuh sin God, ke luhlahlfongi, ac eis sie finsrak wo ke wolacna in El met liki El ahkkahlwemyacl sifacna in mahno.

12 Ac inge, mwet sacohk, tiac lut lah nga fahk nuh suwos ma inge; tuh efuh tiac sramsramkihn iwaclah luhn Kraist, ac eis sie etwacack suwohs Kacl, oacna in eis etwacack ke moulyak ac facl se tok uh?

13 Liye, mwet wiyuck, el suc palye, lwelah elan pahluh nuh ke etatwen luhn mwet; tuh Nguhn sramsram ke ma pwacye ac tiac kikiacp. Ohinge, Nguhn sramsram ke pwacyeiyacn ma uh, ac ke pwacyeiyacn ma ac fah sikyak; ohinge, ma inge ahkkahlwemyeyuck nuh sesr in kahlwem, nuh ke molwelah luhn nguhnasr. Tuhsruhk liye, kuht tiac muhkwena mwet loh ke ma inge; tuh God El oacyacpac sramsram ke ma inge nuh sin mwet pahluh mahtuh met ah.

14 Tuhsruhk liye, mwet Jew elos mwet lihkkeke; ac elos koase kahs kahlwem, ac uniyac mwet pahluh, ac suk ke ma elos tiac kuh in kahlwem kac. Ohinge, ke srihpen lohsr lalos, suc lohsr tuhkuh ke ngwetlah ahluhkwelah akucl, elos enenuh in puhtatlac; tuh God El eislah kahlwem Lal luhkwelos, ac sang nuh selos ma pucspucs ma elos tiac kuh in kahlwem kac, ke srihpen kena lalos. Ac ke srihpen elos kena kac God El oraclah ohinge, tuh elos in tikuclkucl.

15 Ac inge nga, Jacob, kolyuck sin Nguhn in palye; tuh nga nuhnkuh ke orekma luhn Nguhn suc oasr yuruk, tuh ke tikuclkucl luhn mwet Jew elos fah sruhnga Yot suc elos kuh in muhsahyak fac ac eis pwelucng wowo.

16 Tuhsruhk liye, in oacna ma suhmuhslah, Yot se inge fah yohk, ac pa sahflah, ac pa pwelucng pwacye sefanna, suc mwet Jew kuh in muhsah fac.

17 Ac inge, mwet sacohk wiyuck, fuhkah tuh kuh ma inge, tukun elos sruhnga pwelucng pwacye, elos kuh in muhsahyak fac, tuh ac muh kuh in sifac ke sroasrihk lalos?

18 Liye, mwet sacohk wiyuck, nga fah ikacslah ma lukmac se inge nuh suwos; fin nga tiac, ke kuhtwena ohiyac, usrusryak liki kuh luhk in Nguhn, ac tikuclkucl ke srihpen fosrngah yohk luhk keiwos.