1 Araw, ħuti, ma tiftakrux li qrajtu l‑kliem tal‑profeta Żenos, li kellem lid‑dar ta’ Iżrael u qalilhom:

2 Agħtu widen, O dar ta’ Iżrael, u isimgħu kliemi, jien li jien profeta tal‑Mulej.

3 Għax araw, dan jgħid il‑Mulej, jien inxebbahkom, O dar ta’ Iżrael, ma’ siġra taż‑żebbuġ ikkultivata, li raġel ħadha għandu u mantniha fl‑għalqa tiegħu; u hija kibret, u xjieħet, u bdiet tidbiel.

4 U ġara li sid il‑għalqa ħareġ u ra li s‑siġra taż‑żebbuġ tiegħu bdiet tidbiel; u huwa qal: Jien sejjer niżborha, u nagħżqilha madwarha, u nmantniha, ħalli forsi tarmi friegħi żgħar u rotob, u ma tmutx.

5 U ġara li huwa żabarha, u għażqilha madwarha, u mantniha kif kien qal li se jagħmel.

6 U ġara li wara bosta jiem hija bdiet tarmi xi ftit friegħi żgħar u rotob; imma araw, il‑friegħi ewlenin tagħha bdew imutu.

7 U ġara li sid il‑għalqa ra x’kien qed jiġri, u huwa qal lill‑qaddej tiegħu: Inħossni nitnikket li se jkolli nitlef din is‑siġra; għalhekk, mur u aqta’ l‑friegħi minn siġra taż‑żebbuġ selvaġġa, u ġibhomli hawn; u aħna naqtgħu dawk il‑friegħi ewlenin li qed jibdew jidbielu, u nixħtuhom fin‑nar biex jinħarqu.

8 U araw, jgħid Sid il‑għalqa, jien nieħu miegħi ħafna minn dawn il‑friegħi żgħar u rotob, u nlaqqamhom fejn irrid jien; u ma jimpurtax jekk l‑għerq ta’ din is‑siġra jmut, għax jien nista’ nippreserva frottha għall‑użu tiegħi; għalhekk, jiena nieħu dawn il‑friegħi żgħar u rotob, u nlaqqamhom fejn irrid jien.

9 Mela ħudu l‑friegħi tas‑siġra taż‑żebbuġ selvaġġa, u laqqmuhom minflokhom; u dawn li jiena qtajt nitfagħhom fin‑nar u naħraqhom, ħalli ma jingumbrawx l‑art tal‑għalqa tiegħi.

10 U ġara li l‑qaddej ta’ Sid il‑għalqa għamel skont kif qallu s‑Sid tal‑għalqa, u laqqam fiha l‑friegħi tas‑siġra taż‑żebbuġ selvaġġ.

11 U Sid il‑għalqa ried li l‑qaddej tiegħu jagħżqilha madwarha, jiżborha, u jmantniha, u qallu: Inħossni nitnikket li se jkolli nitlef din is‑siġra; għalhekk, biex forsi nippreserva għeruqha ħalli ma jmutux, biex inkun nista’ nippreservahom għalija, jien għamilt din il‑ħaġa.

12 Għalhekk, mur; ħu ħsieb is‑siġra, u mantniha, skont kif għidtlek.

13 U dawn jiena se npoġġi fin‑naħa l‑aktar imbiegħda tal‑għalqa tiegħi, fejn irrid jien, u mhux importanti li int tkun taf; u jien nagħmel dan ħalli nkun nista’ nippreserva għalija l‑friegħi naturali tas‑siġra; kif ukoll, ħalli nkun nista’ nwarrab għalija frottha, bi tħejjija għall‑istaġun; għax inħossni nitnikket li jkolli nitlef din is‑siġra u l‑frott tagħha.

14 U ġara li Sid il‑għalqa telaq u mar jaħbi l‑friegħi naturali tas‑siġra taż‑żebbuġ ikkultivata fil‑partijiet l‑aktar imbiegħda tal‑għalqa, ftit ġo post u ftit ġo ieħor, skont dak li ried u xtaq.

15 U ġara li għadda ħafna żmien, u Sid il‑għalqa qal lill‑qaddej tiegħu: Ejja, imxi ħa mmorru u ninżlu fl‑għalqa, ħalli nkunu nistgħu naħdmu fl‑għalqa.

16 U ġara li Sid il‑għalqa, kif ukoll il‑qaddej, niżlu fl‑għalqa biex jaħdmu. U ġara li l‑qaddej qal lil sidu: Ara, ħares ’l hawn; ħares lejn is‑siġra.

17 U ġara li Sid il‑għalqa ħares u ra s‑siġra li fiha ġew imlaqqma l‑friegħi taż‑żebbuġ selvaġġ; u hija nibtet u bdiet tagħmel il‑frott. U huwa ra li kien tajjeb; u frottha kien bħall‑frott naturali.

18 U hu qal lill‑qaddej: Ara, il‑friegħi tas‑siġra selvaġġa spiċċaw jikkontrollaw it‑tira tal‑għerq tagħha, u b’hekk l‑għerq tagħha pproduċa saħħa kbira; u minħabba li l‑għerq tagħha hu daqstant b’saħħtu, il‑friegħi selvaġġ ipproduċew frott ikkultivat. Issa, kieku aħna ma laqqamniex dawn il‑friegħi, is‑siġra li magħha tlaqqmu kienet tmut. U issa, ara, jiena se nwarrab ħafna frott, li għamlet is‑siġra; u frottha sejjer inwarrbu għalija bi tħejjija għall‑istaġun.

19 U ġara li Sid il‑għalqa qal lill‑qaddej: Ejja, imxi mmorru ħdejn in‑naħa l‑aktar imbiegħda tal‑għalqa, u ejja naraw jekk il‑friegħi naturali tas‑siġra għamlux ukoll ħafna frott, ħalli jien inkun nista’ nwarrab għalija frottha bi tħejjija għall‑istaġun.

20 U ġara li huma marru fejn is‑sid kien ħeba l‑friegħi naturali tas‑siġra, u hu qal lill‑qaddej: Ħares lejn dawn; u huwa ra li l‑ewwel waħda kienet għamlet ħafna frott; u huwa ra wkoll li frottha kien tajjeb. U hu qal lill‑qaddej: Ħu frottha, u warrbu bi tħejjija għall‑istaġun, ħalli jiena nkun nista’ nippreservah għalija; għax ara, huwa qallu, jien ili daż‑żmien kollu nmantniha, u hija għamlet ħafna frott.

21 U ġara li l‑qaddej qal lil sidu: Għalfejn ġejt hawn biex tħawwel din is‑siġra, jew din il‑fergħa tas‑siġra? Għax ara, din hi l‑anqas parti fertili li hawn fl‑għalqa kollha.

22 U Sid il‑għalqa qallu: Tagħtix lili l‑parir; jien kont naf li din kienet art xejn fertili; għalhekk jiena għidtlek li ili daż‑żmien kollu nmantniha, u int qed tara li hija għamlet ħafna frott.

23 U ġara li Sid il‑għalqa qal lill‑qaddej tiegħu: Ħares ’l hawn; ara jiena ħawwilt ukoll fergħa oħra tas‑siġra; u int taf li din il‑parti tal‑art kienet anqas fertili minn tal‑ewwel. Iżda, ħares lejn is‑siġra. Jien ili daż‑żmien kollu nmantniha, u hija għamlet ħafna frott; għalhekk, iġbru, u warrbu bi tħejjija għall‑istaġun, ħalli jiena nkun nista’ nippreservah għalija.

24 U ġara li Sid il‑għalqa reġa’ qal lill‑qaddej tiegħu: Ħares ’l hawn, u ara li hawn ukoll fergħa oħra li jiena ħawwilt; ara li lilha mantnejtha wkoll, u hija għamlet il‑frott.

25 U hu qal lill‑qaddej: Ħares ’l hawn u ara l‑aħħar waħda. Ara, din jien ħawwiltha f’art tajba; u ili daż‑żmien kollu nmantniha, u parti waħda biss mis‑siġra għamlet frott ikkultivat, u l‑parti l‑oħra tas‑siġra għamlet frott selvaġġ; ara, jiena mantnejt din is‑siġra bħall‑oħrajn.

26 U ġara li Sid il‑għalqa qal lill‑qaddej: Aqta’ l‑friegħi li ma għamlux frott tajjeb, u ixħethom fin‑nar.

27 Iżda araw, il‑qaddej qallu: Ejja niżbruha, u nagħżqulha madwarha, u nmantnuha ftit ieħor, biex forsi hija tagħtik frott tajjeb, li tkun tista’ twarrbu bi tħejjija għall‑istaġun.

28 U ġara li Sid il‑għalqa u l‑qaddej ta’ Sid il‑għalqa mantnew il‑frott kollu tal‑għalqa.

29 U ġara li għadda ħafna żmien, u Sid il‑għalqa qal lill‑qaddej tiegħu: Ejja, imxi ħa ninżlu fl‑għalqa, ħalli naħdmu għal darb’oħra fl‑għalqa. Għax ara, iż‑żmien qed joqrob, u t‑tmiem dalwaqt jasal; għalhekk, jeħtieġ li jiena nwarrab għalija l‑frott bi tħejjija għall‑istaġun.

30 U ġara li Sid il‑għalqa u l‑qaddej niżlu fl‑għalqa; u huma marru ħdejn is‑siġra li minnha kienu tqaċċtu l‑friegħi naturali, u ġew imlaqqmin fiha l‑friegħi selvaġġ; u araw, is‑siġra spiċċat mgħobbija sa ruħ ommha b’kull tip ta’ frott.

31 U ġara li Sid il‑għalqa daq il‑frott, minn kull tip skont l‑abbundanza tiegħu. U Sid il‑għalqa qal: Ara, ilna daż‑żmien kollu nmantnu din is‑siġra, u jiena warrabt għalija ħafna frott bi tħejjija għall‑istaġun.

32 Iżda ara, din id‑darba hija għamlet ħafna frott, u l‑ebda frotta li għamlet mhi tajba. U ara, hawn kull tip ta’ frott ħażin; u għalija ma jiswa xejn, lanqas ħaqq kemm ħdimna; u issa nħossni nitnikket li se jkolli nitlef din is‑siġra.

33 U Sid il‑għalqa qal lill‑qaddej: X’għandna nagħmlulha din is‑siġra, ħalli għal darb’oħra nkun nista’ nippreserva minnha frott tajjeb għalija?

34 U l‑qaddej qal lil sidu: Ara, għax inti laqqamt fiha l‑friegħi tas‑siġra selvaġġa huma sostnew l‑għeruq, fejn huma għadhom ħajjin u ma mietux; għalhekk tista’ tara li huma għadhom tajbin.

35 U ġara li Sid il‑għalqa qal lill‑qaddej tiegħu: Is‑siġra ma tiswa xejn għalija, u għeruqha ma jiswew xejn għalija sakemm hija tibqa’ tagħmel frott ħażin.

36 Madankollu, jiena naf li l‑għeruq huma tajbin, u għall‑għan proprju tiegħi jiena ppreservajthom; u minħabba li huma daqstant b’saħħithom huma s’issa għamlu mill‑friegħi selvaġġ frott tajjeb.

37 U ara, il‑friegħi selvaġġ kibru u qabżu l‑friegħi tagħha; u peress li l‑friegħi selvaġġ għelbu lill‑friegħi tagħha hija għamlet ħafna frott ħażin; u peress li għamlet daqstant frott ħażin tista’ tara li hi se tibda tmut; u hi dalwaqt se ssir misjura żżejjed, lesta biex tinxteħet fin‑nar, sakemm ma nagħmlux xi ħaġa biex nippreservawha.

38 U ġara li Sid il‑għalqa qal lill‑qaddej tiegħu: Ejja ninżlu fl‑inħawi l‑aktar imbiegħda tal‑għalqa, u naraw jekk il‑friegħi naturali għamlux ukoll frott ħażin.

39 U ġara li huma niżlu fl‑inħawi l‑aktar imbiegħda tal‑għalqa. U ġara li huma raw li l‑frott tal‑friegħi naturali spiċċa tħassar ukoll; iva, tal‑ewwel u tat‑tieni kif ukoll tal‑aħħar; u tħassar kollu kemm hu.

40 U l‑frott selvaġġ tal‑aħħar għeleb dik il‑parti tas‑siġra li għamlet frott tajjeb, tant li l‑fergħa spiċċat nixfet u mietet.

41 U ġara li Sid il‑għalqa nfaqa’ jibki, u qal lill‑qaddej: Xi stajt nagħmel aktar għall‑għalqa tiegħi?

42 Ara, kont naf li l‑frott kollu tal‑għalqa, ħlief għal dawn biss, spiċċa tħassar. U issa dawn li darba għamlu frott tajjeb ukoll spiċċaw tħassru; u issa s‑siġar kollha tal‑għalqa tiegħi mhuma tajbin għal xejn ħlief biex jitqaċċtu u jinxteħtu fin‑nar.

43 U ħares lejn din tal‑aħħar, li l‑fergħa tagħha nixfet, jiena din ħawwiltha f’art tajba; iva, sewwasew dik li għalija kienet l‑aħjar art minn fost l‑inħawi l‑oħra kollha tal‑art tal‑għalqa tiegħi.

44 U tista’ tara li jiena qtajt ukoll dak kollu li kien qed jingombra dil‑biċċa art, biex minfloku nkun nista’ nħawwel din is‑siġra.

45 U tista’ tara li parti minnha għamlet frott tajjeb, u parti minnha għamlet frott selvaġġ; u peress li l‑friegħi tagħha ma qtajthomx u ma xħetthomx fin‑nar, ara, huma għelbu l‑fergħa t‑tajba li spiċċat biex nixfet.

46 U issa, ara, minkejja li l‑għalqa tiegħi ħadna daqstant ħsiebha, is‑siġar tagħha spiċċaw tħassru, fejn huma ma għamlu l‑ebda frott tajjeb; u dawn jiena ttamajt li nippreservahom, biex inkun nista’ nwarrab frotthom għalija, bi tħejjija għall‑istaġun. Iżda, ara, huma saru bħas‑siġra taż‑żebbuġ selvaġġa, ma jiswew għal xejn ħlief biex jitqaċċtu u jinxteħtu fin‑nar; u nħossni nitnikket li se jkolli nitlifhom.

47 Iżda xi stajt nagħmel aktar fl‑għalqa tiegħi? Tgħid żammejt idi dgħajfa wisq, li ma mantnejthiex? Le, jiena mantnejtha, u għażaqtilha madwarha, u żbartha, u tajtha d‑demel; u middejt idi kważi l‑jum kollu, u t‑tmiem qed joqrob. U nħossni nitnikket li se jkolli nqaċċat is‑siġar kollha tal‑għalqa tiegħi, u nixħethom fin‑nar sabiex jinħarqu. Min ħassar l‑għalqa tiegħi?

48 U ġara li l‑qaddej qal lil sidu: Mhijiex il‑kburija tal‑għalqa tiegħek—ma kinux il‑friegħi tagħha li għelbu l‑għeruq it‑tajbin? U peress li l‑friegħi għelbu l‑għeruq tagħha, ara huma kibru aktar malajr mis‑saħħa tal‑għeruq, fejn spiċċaw huma stess b’saħħithom. Ara, jiena ngħid, mhijiex din il‑kawża għalfejn is‑siġar tal‑għalqa tiegħek spiċċaw tħassru?

49 U ġara li Sid il‑għalqa qal lill‑qaddej: Ejja mmorru u nqaċċtu s‑siġar tal‑għalqa u nixħtuhom fin‑nar, biex ma jingumbrawx l‑art tal‑għalqa, għax jien għamilt dak kollu li stajt. Xi stajt nagħmel aktar għall‑għalqa tiegħi?

50 Iżda, ara, il‑qaddej qal lil Sid il‑għalqa: Agħtiha ftit ċans ieħor.

51 U s‑Sid qal: Iva, jiena se nagħtiha ftit ċans ieħor, għax inħossni nitnikket li jkolli nitlef is‑siġar tal‑għalqa tiegħi.

52 Għalhekk, ejja nieħdu ftit minn dawn il‑friegħi li jien ħawwilt fl‑inħawi l‑aktar imbiegħda tal‑għalqa tiegħi, u ejja nlaqqmuhom fis‑siġra li minnha huma ġew; u ejja naqtgħu mis‑siġra dawk il‑friegħi li frotthom hu mill‑aktar morr, u minflokhom inlaqqmu l‑friegħi naturali tas‑siġra.

53 U jien nagħmel dan biex is‑siġra ma tmutx, biex forsi nkun nista’ nippreserva għalija għeruqha għall‑għan proprju tiegħi.

54 U, ara, l‑għeruq tal‑friegħi naturali tas‑siġra li jien ħawwilt f’kull post li stajt inħawwel għadhom ħajjin; għalhekk, biex jien nippreservahom ukoll għall‑għan proprju tiegħi, jien se nieħu mill‑friegħi ta’ dis‑siġra, u se nlaqqamhom fihom. Iva, jien se nlaqqam fihom il‑friegħi tas‑siġra l‑omm li ħarġu minnha, ħalli nkun nista’ nippreserva wkoll il‑friegħi għalija stess, biex meta jkunu b’saħħithom biżżejjed forsi jkunu jistgħu jagħtuni frott tajjeb, u forsi għad hemm ċans li jiena ngawdi l‑frott tal‑għalqa tiegħi.

55 U ġara li huma ħadu l‑friegħi mis‑siġra naturali li kienet saret selvaġġa, u laqqmuhom fis‑siġar naturali, li wkoll kienu saru selvaġġi.

56 U ħadu wkoll il‑friegħi mis‑siġar naturali li kienu saru selvaġġi, u laqqmuhom fis‑siġra l‑omm li minnha kienu ħarġu.

57 U Sid il‑għalqa qal lill‑qaddej: Taqtax il‑friegħi selvaġġ mis‑siġar, ħlief dawk li huma l‑aktar morri; u fihom għandek tlaqqam il‑friegħi skont kif għidtlek jien.

58 U mbagħad nerġgħu nmantnu s‑siġar tal‑għalqa, u niżbru l‑friegħi tagħhom; u naqtgħu mis‑siġar dawk il‑friegħi misjura żżejjed, li jeħtieġ li jmutu, u nixħtuhom fin‑nar.

59 U jiena se nagħmel dan biex forsi l‑għeruq tagħhom ikunu jistgħu jissaħħu minħabba t‑tjubija tagħhom; u minħabba l‑iskambju tal‑friegħi, ħalli t‑tajjeb ikun jista’ jegħleb lill‑ħażin.

60 U minħabba li jiena ppreservajt il‑friegħi naturali u l‑għeruq tagħhom, u erġajt laqqamt il‑friegħi naturali fis‑siġra omm li ħarġu minnha, u ppreservajt l‑għeruq tas‑siġra omm li ħarġu minnha, biex forsi s‑siġar tal‑għalqa tiegħi jkunu jistgħu jerġgħu jagħmlu frott tajjeb; u sabiex jiena nkun nista’ ngawdi għal darb’oħra l‑frott tal‑għalqa tiegħi, u forsi nkun nista’ nithenna bil‑kbir minħabba li nkun ippreservajt l‑għeruq u l‑friegħi tal‑ewwel frott—

61 Għalhekk, morru, u sejħu lill‑qaddejja, ħalli bil‑qawwa kollha tagħna mmorru naħdmu qatigħ ġewwa l‑għalqa, biex nkunu nistgħu nħejju mod kif jiena nkun nista’ nerġa’ nipproduċi l‑frott naturali, liema frott naturali huwa tajjeb u aktar prezzjuż minn kull frott ieħor.

62 Għalhekk, għall‑aħħar darba ejja mmorru u naħdmu qatigħ, għax ara t‑tmiem qed joqrob, u din hi l‑aħħar darba li jiena se niżbor l‑għalqa tiegħi.

63 Laqqam il‑friegħi; ibda minn tal‑aħħar biex ikunu l‑ewwel, u biex tal‑ewwel ikunu l‑aħħar, u agħżaq madwar is‑siġar, kemm il‑maturi u kemm iż‑żgħar, kemm tal‑ewwel u kemm tal‑aħħar; u kemm tal‑aħħar u kemm tal‑ewwel, ħalli lkoll jerġgħu jiġu mantnuti għall‑aħħar darba.

64 Għalhekk, agħżqilhom madwarhom, u iżborhom, u erġa’ agħtihom id‑demel, għall‑aħħar darba, għax it‑tmiem qed joqrob. U jekk jiġri li dawn li tlaqqmu l‑aħħar jikbru, u jipproduċu l‑frott naturali, imbagħad għandek tħejji għalihom mod kif huma jkunu jistgħu jikbru.

65 U hekk kif jibdew jikbru għandek teħles mill‑friegħi li jagħmlu frott morr, skont is‑saħħa tat‑tajbin u d‑daqs tagħhom; u m’għandekx teħles mill‑ħżiena tagħhom f’daqqa, ma jmorrux l‑għeruq tagħhom ikunu b’saħħithom wisq għat‑tilqima, u t‑tilqima tagħhom tispiċċa tmut, u jiena nitlef is‑siġar tal‑għalqa tiegħi.

66 Għax inħossni nitnikket li jkolli nitlef is‑siġar tal‑għalqa tiegħi; għalhekk, hekk kif jikbru t‑tajbin għandek teħles mill‑ħżiena, biex l‑għerq u l‑quċċata jkunu tal‑istess saħħa, sakemm it‑tajbin jaslu biex jegħlbu lill‑ħżiena, u l‑ħżiena jitqaċċtu u jinxteħtu fin‑nar, biex ma jingumbrawx l‑art tal‑għalqa tiegħi; u b’hekk jiena nkun nista’ niknes il‑ħżiena ’l barra mill‑għalqa tiegħi.

67 U l‑friegħi tas‑siġra naturali nerġa’ nlaqqamhom fis‑siġra naturali;

68 U l‑friegħi tas‑siġra naturali nlaqqamhom fil‑friegħi naturali tas‑siġra; u b’dal‑mod jiena nerġa’ nlaqqagħhom flimkien, biex huma jkunu jistgħu jagħmlu l‑frott naturali, u jsiru ħaġa waħda.

69 U l‑ħżiena jintremew, iva, sewwasew ’il barra mill‑art tal‑għalqa tiegħi; għax ara, huwa biss din id‑darba li jiena se niżbor l‑għalqa tiegħi.

70 U ġara li Sid il‑għalqa talab lill‑qaddej biex imur; u l‑qaddej mar u għamel kif ordnalu Sidu, u ġab miegħu qaddejja oħra; u huma kienu ftit.

71 U Sid il‑għalqa qalilhom: Morru, u aħdmu qatigħ fil‑għalqa. Għax araw, din hi l‑aħħar darba li jien se nmantni l‑għalqa tiegħi; għax it‑tmiem jinsab fil‑qrib, u l‑istaġun mhux se jdum ma jiġi; u jekk taħdmu qatigħ miegħi intom għad tgawdu minħabba l‑frott li jien se nwarrab għalija bi tħejjija għaż‑żmien li dalwaqt għandu jiġi.

72 U ġara li l‑qaddejja marru u ħadmu qatigħ; u Sid il‑għalqa ħadem ukoll magħhom; u huma obdew il‑kmandamenti ta’ Sid il‑għalqa f’kollox.

73 U fl‑għalqa beda jfeġġ għal darb’oħra l‑frott naturali; u l‑friegħi naturali bdew jikbru u jiffjorixxu bil‑kbir; u l‑friegħi selvaġġ bdew jinqatgħu u jintremew; u huma raw li jżommu l‑għerq u l‑quċċata tagħhom indaqs, skont is‑saħħa tagħhom.

74 U hekk huma ħadmu, bir‑reqqa kollha, skont il‑kmandamenti ta’ Sid il‑għalqa, sewwasew sakemm il‑ħżiena spiċċaw intremew ’il barra mill‑għalqa, u s‑Sid ippreserva għalih is‑siġar naturali biex huma reġgħu saru l‑frott naturali; u huma saru bħallikieku kienu ġisem wieħed; u l‑frott kien kollu l‑istess; u Sid il‑għalqa ppreserva għalih il‑frott naturali, li mill‑bidu nett kien għalih l‑aktar wieħed prezzjuż.

75 U ġara li meta Sid il‑għalqa ra li l‑frott tiegħu kien tajjeb, u li l‑għalqa tiegħu ma kenitx aktar imħassra, huwa sejjaħ lill‑qaddejja tiegħu, u qalilhom: Araw, għal din l‑aħħar darba aħna mantnejna l‑għalqa tiegħi; u intom stajtu taraw li jien għamilt kollox skont ir‑rieda tiegħi; u jiena ppreservajt il‑frott naturali, li huwa tajjeb, sewwasew kif kien fil‑bidu. U henjin intom; għax peress li intom ħdimtu miegħi bir‑reqqa fl‑għalqa tiegħi, u ħaristu l‑kmandamenti tiegħi, u erġajtu għal darb’oħra ġibtuli l‑frott naturali, tant li l‑għalqa tiegħi m’għadhiex aktar mħassra, u l‑ħażin intrema, araw intom sejrin tgawdu miegħi minħabba l‑frott tal‑għalqa tiegħi.

76 Għax araw, għal żmien twil sejjer inwarrab għalija l‑frott tal‑għalqa tiegħi bi tħejjija għall‑istaġun, li dalwaqt se jasal; u għall‑aħħar darba jiena mantnejt l‑għalqa tiegħi, u żbartha, u għażaqtilha madwarha, u tajtha d‑demel; għalhekk jiena, għal żmien twil, se nwarrab għalija mill‑frott, skont dak li jiena kont għidt.

77 U meta jasal iż‑żmien li jerġa’ jitfaċċa l‑frott ħażin fl‑għalqa tiegħi, hemmhekk jiena nordna biex it‑tajjeb u l‑ħażin jinġabru t‑tnejn; u t‑tajjeb nippreservah għalija, u l‑ħażin narmih fil‑post li hemm lest għalih. U mbagħad jasal l‑istaġun u t‑tmiem; u jien nordna biex l‑għalqa tiegħi tingħata n‑nar.