1 Pea ko ʻeni, vakai, ʻe hoku kāinga, hangē ko ʻeku pehē kiate kimoutolu te u kikité, vakai, ko ʻeku kikité ʻeni—ko e ngaahi meʻa naʻe lea ki ai ʻa e palōfita ko ʻeni ko Seinosi, ʻo kau ki he fale ʻo ʻIsilelí, ʻa ia naʻá ne fakatatau ai ʻa kinautolu ki ha fuʻu ʻōlive koló, kuo pau ke hoko moʻoni ia.

2 Pea ko e ʻaho ʻe ala mai ai ʻa hono toʻukupú ko hono tuʻo ua ke fakahaofi ʻa hono kakaí, ko e ʻahó ia, ʻio, ko hono fakaʻosi ia, ʻo e ʻalu atu ʻa e kau tamaioʻeiki ʻa e ʻEiki ʻi hono mālohí, ke tauhi mo ʻauhani ʻa ʻene ngoue vainé; pea hili ia ʻe hoko vave mai leva ʻa e ngataʻangá.

3 Pea ʻoku monūʻia ʻaupito ʻa kinautolu ʻa ia kuo ngāue faivelenga ʻi heʻene ngoue vainé; pea ʻoku malaʻia ʻa kinautolu ʻa ia ʻe kapusi ki tuʻa ki honau potu ʻonautolú! Pea ʻe tutu ʻa māmaní ʻaki ʻa e afi.

4 Pea ʻoku ʻaloʻofa lahi ʻa hotau ʻOtuá kiate kitautolu, he ʻokú ne manatuʻi ʻa e fale ʻo ʻIsilelí, ʻa hono ngaahi aká mo e ngaahi vaʻa fakatouʻosi; pea ʻoku mafao atu ʻa hono toʻukupú kiate kinautolu ʻi hono kotoa ʻo e ʻahó; pea ko ha kakai kia-kekeva mo faʻa talangataʻa ʻa kinautolu; ka ko kinautolu kotoa pē ʻe ʻikai fakafefeka honau lotó ʻe fakamoʻui ʻa kinautolu ʻi he puleʻanga ʻo e ʻOtuá.

5 Ko ia, ʻe hoku kāinga ʻofeina, ʻoku ou kole fakamoʻomoʻoni kiate kimoutolu ʻi he ngaahi lea fakamātoato ke mou fakatomala, pea haʻu ʻi he loto-fakamātoato moʻoni, ʻo pīkitai ki he ʻOtuá ʻo hangē ko ʻene pīkitai kiate kimoutolú. Pea lolotonga ʻa e kei mafao atu ʻa hono toʻukupu ʻo e ʻaloʻofá kiate kimoutolu ʻi he maama ʻo e ʻahó, ʻoua te mou fakafefeka ʻa homou lotó.

6 ʻIo, ko e ʻahó ni, kapau te mou fanongo ki hono leʻó, ʻoua te mou fakafefeka ʻa homou lotó, he ko e hā te mou fie mate aí?

7 He vakai, ʻo ka hili hono fafanga ʻaki ʻa kimoutolu ʻa e folofola lelei ʻa e ʻOtuá ʻi hono kotoa ʻo e ʻahó, te mou fua ʻaki koā ha fua ʻoku kovi, koeʻuhi ke tā hifo ʻo laku ʻa kimoutolu ki he afí?

8 Vakai, te mou liʻaki koā ʻa e ngaahi leá ni? Te mou liʻaki koā ʻa e ngaahi lea ʻa e kau palōfitá; pea te mou liʻaki koā ʻa e ngaahi lea kotoa pē ʻa ia kuo lea ʻaki ʻo kau kia Kalaisí, hili ʻa e lea ha fuʻu tokolahi pehē ʻo kau kiate ia; pea fakaʻikaiʻi ʻa e folofola lelei ʻa Kalaisí, mo e mālohi ʻo e ʻOtuá, mo e meʻafoaki ʻo e Laumālie Māʻoniʻoní, pea taʻofi ʻa e mālohi ʻo e Laumālie Māʻoniʻoní, ʻo taukae ki he palani lahi ʻo e huhuʻí, ʻa ia kuo teuteuʻi maʻamoutolú?

9 ʻOku mou ʻilo koā kapau te mou fai ʻa e ngaahi meʻá ni, ʻe hanga ʻe he mālohi ʻo e huhuʻí mo e toetuʻú, ʻa ia ʻoku ʻia Kalaisí, ʻo ʻomi kimoutolu ke mou tuʻu ʻi he mā pea mo e ongoʻi ʻo e halaia fakamanavahē ʻi he fakamaau ʻo e ʻOtuá?

10 Pea hangē ko e mālohi ʻo e fakamaau totonú, he ʻoku ʻikai faʻa lava ʻo taʻofi ʻa e fakamaau totonú, kuo pau ke mou ʻalu atu ki he ano ʻo e afi mo e maka-vela ʻa ia ʻoku ʻikai faʻa tāmateʻi ʻa hono ngaahi uló, pea ʻoku ʻalu hake ʻa hono kohú ʻo taʻengata pea taʻengata, pea ko e ano ʻo e afi mo e maka-vela ko iá ko e fakamamahi taʻengata.

11 ʻOiauē kapau ko ia, ʻe hoku kāinga ʻofeina, mou fakatomala, pea hū ʻi he matapā fāsiʻí, pea ʻalu atu ʻi he hala ʻa ia ʻoku lausiʻí kae ʻoua ke mou maʻu ʻa e moʻui taʻengatá.

12 ʻOiauē mou fakapotopoto; ko e hā ha meʻa ke u toe leaʻaki atu kiate kimoutolú?

13 Ko hono fakaʻosí, ʻoku ou lea māvae kiate kimoutolu kae ʻoua ke tau feʻiloaki ʻi he ʻao ʻo e fakamaau lelei ʻo e ʻOtuá, ʻa ia ko e fakamaauʻanga ʻoku taaʻi ʻaki ʻa e kau fai angahala ʻa e ilifia mo e manavahē fakaʻulia. ʻĒmeni.