1 Ac inge, liye, mwet wiyuck, ke nga fahk nuh suwos lah nga ac palye, liye, pa inge pahluh luhk—lah ma suc mwet pahluh Zenos se inge el sramsramkihn, ke mwet Israel, suc el luhmahlos nuh ke sahk in olive oa, enenuh in sihkyak na pwacye.

2 Ac lwen se El fah sifil likiyac pahol pacl se ahkluo in fohlohkohnwack mwet Lal, pa lwen se, ahok, finne ke pacl sahflah, suc mwet kuhlwacnsap luhn Leum fah fahsr nuh met ke kuh Lal, in ahkmongoi ac kihfi imac in grape Lal; ac tohkohyang sahflahiyac tuhkuh tiac paht.

3 Ac fuhkah insewowo nuh selos suc kwacfeacng in orekma ke imac in grape Lal; ac fuhkah selngawi nuh selos suc fah sisilac nuh ke acn lalos sifacna! Ac facluh fah fihrihryak ke e.

4 Ac fuhkah pahkomuhta luhn God lasr nuh sesr, tuh El esam mwet Israel, kwewana okah ac lah; ac El ahsroelihk pahol nuh selos ke lwen fohn; ac elos mwet lihkkeke ac seahkos; tuhsruhk puhs mwet suc fah tiac oruh in upac insiaclos fah moullac ke tohkohsrahi luhn God.

5 Ohinge, mwet sacohk wiyuck, nga ngihsre suwos ke kahs muhlahlah tuh kowos in auliyak, ac tuhkuh ke srihpac nwacnwaclah luhn insiac, ac fungyang nuh sin God ke El fungwot nuh suwos. Ac ke paho pahkotwen Lal ahsroeyuckwot nuh yuruwos ke kahlwem luhn lwen, nikmet ahkkwekweye insiowos.

6 Ahok, mihsenge, kowos fin lohng puhsrwacl, nikmet oruh in upac insiowos; tuh efuh kowos fah misac?

7 Tuh liye, tukun kowos ahkmongoiyuck ke kahs wowo luhn God lwen fohn, yac kowos fah sang fahko koluk, tuh kowos fah pakpucki ac sisiyang nuh in e uh?

8 Liye, yac kowos fah lain kahs inge? Yac kowos fah lain kahs luhn mwet pahluh; ac yac kowos fah lain kahs nuhkwewa ma sruhmuhn ke Kraist, tukun mwet puhs sruhmuhn Kacl; ac lahfwekihn kahs wowo luhn Kraist, ac kuh luhn God, ac mwe sang luhn Nguhn Muhtahl, ac kutongyac Nguhn Muhtahl, ac orek ahksruhksruhkye plwacn in molwelah, ma tuh akwucki nuh suwos?

9 Kowos tiac etuh tuh kowos fin ac oruh ma inge, tuh kuh luhn molwelah ac moulyak, suc oasr in Kraist, fah us kowos in tu ke mwekihn ac mwacta koluk ye nuhnuhnkuh luhn God?

10 Ac fal nuh ke kuh luhn nuhnuhnkuh suwohs, tuh nuhnuhnkuh suwohs tiac kuh in lahfwekihnyuck, kowos fah som nuh ke inluhluh in e ac yot fol, ma fihrihr kac tiac kuh in tiloki, ac fofosr kac som nuh lucng ne tok ma pahtpaht, suc inluhluh in e ac yot fol pa mwe ahkkweok wacngihn sahflahiyac.

11 O na, mwet sacohk wiyuck, kowos auliyak, ac ilyak nuh ke muhtuhn pot oasrihksrihk, ac kwacfeacng nuh ke inkacnek oasrihksrihk, ne ke na kowos fah eis moul ma pahtpaht.

12 O oruh kowos in lahlmwetmwet; meac pac nga kuh in sifilpac fahk?

13 Sahflah, nga wihlkacs nuh suwos, ne ke na nga fah ohsun nuh suwos ye nuhnuhnkuh wolacna luhn God, suc nuhnuhnkuh eislah mwet koluk ke fosrngah upac ac mwe ahksahngweng. Amen.