1 Im kiiō ālikin men kein, ke jet iiō raar eļļā, eaar wōr juon em̧m̧aan ilubwiljin armej in Nipai ro, eo etan eaar Serem.

2 Im ālikin men kein, eaar jino kwaļo̧k naan ilubwiljin armej ro, im kwaļo̧k n̄an er bwe ej jab aikuj wōr Kraist. Im eaar kwaļo̧k elōn̄ men ko kar kāitok-limo in armej ro; im men in eaar kōm̧m̧an bwe en maron̄ anjo̧ ioon katak an Kraist.

3 Im eaar niknik jerbal bwe en maron̄ tōlļo̧k būruōn armej ro, jon̄an eaar tōlļo̧k elōn̄ bōro ko; im e ilo an jeļā ke n̄a, Jekab, eaar wōr aō tōmak ilo Kraist eo Enaaj itok, eaar pukot elōn̄ iien ko bwe en maron̄ itok n̄an ippa.

4 Im eaar rijeļāļo̧kjeņ, bwe eaar wōr an kanooj jeļā kajin eo an armej ro; kōn menin, emaron̄ kōjerbal eļap naan in etao, im eļap kajoor in kōnono, ekkar n̄an kajoor eo an devil.

5 Im eaar kōjatdikdik n̄an kōm̧akūt eō jān tōmak eo, mekarta elōn̄ revelesōn ko im elōn̄ men ko iaar loi kōn men kein; bwe em̧ool iaar lo enjeļ raņ, im raar jipan̄ eō. Im barāinwōt, iaar ron̄ ainikien Irooj ej kōnono n̄an eō ilo lukkuun naan, jān iien n̄an iien; kōn menin, iaar jab maron̄ em̧m̧akūt.

6 Im ālikin men kein, eaar itok n̄an eō, im en̄in ekōjkan an kar kōnono n̄an eō, im ba: Jeiū im jatū Jekab, iaar kappukot elōn̄ iien bwe in maron̄ kōnono n̄an eok; bwe iaar ron̄ im barāinwōt jeļā bwe eļap am̧ ito-itak, im kwaļo̧k men eo jej ņa etan gospel, ak katak ko an Kraist.

7 Im kwaar tōlļo̧k eļap iaan armej rein bwe ren kaankeke iaļ eo ejim̧we an Anij, im jab kōjparok kien Moses eo ej iaļ ejim̧we; im ukōt kien Moses n̄an kabun̄-jar n̄an juon eo kwōj ba enaaj itok elōn̄ bukwi iiō jān kiiō. Im kiiō lo, n̄a, Serem, im kwaļo̧k n̄an kwe bwe men in ej blaspim; bwe ejjeļo̧k armej e jeļā men rot kein; bwe e jab maron̄ ba kōn men ko rej itok. Im ilo wāween in Serem eaar akwāāl ippa.

8 A lo, Irooj Anij Eaar lutōkleplep Jetōb eo An ilo aō, jon̄an iaar kajook e ilo aolep naan ko an.

9 Im iba n̄an e: Kwōj kariab ke Kraist eo enaaj itok? Im eba: Eļan̄n̄e ej aikuj wōr juon Kraist, ijjamin kariab e; a ijeļā bwe ejjeļo̧k Kraist, im ekar ejjeļo̧k wōt, ak ejamin naaj wōr.

10 Im iba n̄an e: Kwōj tōmak ke ilo jeje ko rekwōjarjar? Im eba, Aaet.

11 Im iba n̄an e: Innām kwōj jab meļeļe jeje ko; bwe em̧ool rej kam̧ool kōn Kraist. Lo, ij ba n̄an eok bwe ejjeļo̧k juon iaan rikanaan ro eaar jeje, ak kanaan, ijello̧kun wōt n̄e raar kōnono kōn Kraist in.

12 Im ejjab aolepān in—kar kwaļo̧k n̄an eō, bwe iaar ron̄jake im loe; im e barāinwōt kar kwaļo̧k n̄an eō jān kajoor in Jetōb Kwōjarjar; kōn menin, ijeļā eļan̄n̄e eaar ejjeļo̧k pinmuur innām aolep armej ren kar jako.

13 Im ālikin men kein, eaar ba n̄an eō: Kwaļo̧k n̄an eō juon kakōļļe jān kajoor in an Jetōb Kwōjarjar in, eo kōn e eļap am jeļā.

14 Im iaar ba n̄an e: Ta n̄a bwe in kapo Anij n̄an kwaļo̧k n̄an eok juon kakōļļe ilo men eo kwo jeļā ke em̧ool? Mekarta kwōj kariab e, kōnke kwōj jān devil. Mekarta, ejjab ankilaō enaaj kōm̧m̧an; a eļan̄n̄e Anij Enaaj kaje eok, men in en kakōļļe eo n̄an kwe bwe E ewōr An kajoor, jim̧or ilo lan̄ im ilo laļ; im barāinwōt, bwe Kraist Enaaj itok. Im ankilam̧, O Irooj, en waļo̧k, im jab aō.

15 Im ālikin men kein, n̄a, Jekab, iaar kōnono naan kein, kajoor in Irooj eaar itok ioon ļeo, jon̄an eaar wōtlo̧k n̄an bwidej. Im ālikin men kein, kar naajdik e ium̧win elōn̄ raan ko.

16 Im ālikin men kein, eaar ba n̄an armej ro: kom̧in kobatok ilo raan eo ilju, bwe inaaj mej; kōn menin, ikōņaan kōnono n̄an armej rein m̧okta jān aō naaj mej.

17 Im ālikin men kein, ilo raan eo ilju jarlepju ko raar kobatok ippān doon; im eaar kōnono alikkar n̄an er im kariab men ko eaar katakin er, im kwaļo̧k būruōn ke ewōr Kraist, im kajoor in Jetōb Kwōjarjar, im jerbal an enjeļ raņ.

18 Im eaar alikkar an kōnono n̄an er, bwe eaar po jān kajoor in devil. Im eaar kōnono kōn hell, im kōn indeeo, im kōn kaje eo ejjeļo̧k jem̧ļo̧kin.

19 Im eaar ba: I lōļn̄o̧n̄ bwe iaar bōd juon jero̧wiwi jamin jeorļo̧k, bwe iaar riab n̄an Anij; bwe iaar kariab Kraist, im ba bwe iaar tōmak ilo jeje ko rekwōjarjar; im em̧ool rej kam̧ool kōn E. Im kōnke āindein iaar riab n̄an Anij ikanooj lōļn̄o̧n̄ eļan̄n̄e wāween in ņae eō enaaj nana; bwe iaar kwaļo̧k buruō n̄an Anij.

20 Im ālikin men kein, eaar ba naan kein eaar jab maron̄ bar kōnono, im eaar kōtļo̧k jetōb eo.

21 Im ke jarlepju ko raar kam̧ool bwe eaar kōnono men kein ke eaar nan̄in kōtļo̧k jetōb eo, raar kanooj bwilōn̄; jon̄an kajoor in Anij eaar wanlaļtak ioer, im raar obrak im raar wōtlo̧k n̄an bwidej.

22 Kiiō, men in eaar em̧m̧an n̄an eō, Jekab, bwe iaar kajjitōk ippān Jema eo ilo lan̄; bwe Eaar ron̄ aō kūr im kar uwaak aō jar.

23 Im ālikin men kein, aenōm̧m̧an im iakwe an Anij eaar bar jepļaak ilubwiljin armej ro; im raar lin̄ōri jeje ko rekwōjarjar, im kar jab bar eo̧ron̄ naan ko an ļein enana.

24 Im ālikin men kein, elōn̄ wāween ko kar karōki n̄an kōro̧o̧ltok im kōjepļaaktok riLeman ro n̄an jeļā kōn m̧ool eo; ak eaar aolep ilo waan, bwe raar m̧ōņōņō ilo tariņae ko im kōto̧o̧rļo̧k bōtōktōk, im eaar wōr juon aer dike ejjeļo̧k jem̧ļo̧kin ņae kōm, ro jeir im jatier. Im raar pukot kōn kajoor in kein tariņae ko aer n̄an ko̧kkure kōm iien otemjej.

25 Kōn menin, armej in Nipai raar kōkajoor jikier ņae er kōn kein tariņae ko aer, im kōn aolep aer kajoor, lōke Anij im aer ejm̧aan in lo̧mo̧o̧r; kōn menin, raar wōr, rianjo̧ ioon rikōjdat ro aer.

26 Im ālikin men kein, n̄a, Jekab, iaar jino bwijwoļā; im ļo̧o̧k eo an armej rein kar pād ioon pileij ko jet an Nipai, kōn menin, ij kōjjem̧ļo̧k ļo̧o̧k in, im kwaļo̧k bwe iaar jeje ekkar n̄an jeļā eo aō eļaptata, jān aō ba bwe iien eaar ilo̧k jān kōj, im barāinwōt mour ko ad raar ilo̧k āinwōt n̄e eaar juon tōņak, kōj juon armej eo eajjimakeke im ejjeļo̧k kōjak ippāer, ripeto-petak, joļo̧k er jān Jerusalem, ļotak ilo en̄taan, ilo juon āne jem̧aden, im ro jeir im jatier raar dike er, eo eaar kōmour tariņae ko im aitwerōk ko; kōn menin kōm ar mour ilo kabbūrom̧ōjm̧ōj.

27 Im n̄a, Jekab, iaar lo bwe ij aikuj wanlaļļo̧k n̄an lōb eo aō ej jab to; kōn menin, iaar ba n̄an ļeo nejū Inōs: Kwōn bōk pileij kein. Im iaar jiron̄ e men ko ļeo jeiū Nipai eaar jiron̄ eō, im eaar kallim̧ur n̄an pokaki naan in jiron̄ kein. Im ij kōm̧m̧an juon jem̧ļo̧kin aō jeje ioon pileij kein, jeje ko raar iiet; im n̄an rikōnono jāni ij iakiakwe kom̧, im kōjatdikdik bwe elōn̄ iaan ro jeiū im jatū remaron̄ kōnono ilo naan kein aō. Ro jeiū im jatū, bar iakwe.