Ang Libro ni Jarom

1 Karon tan-awa, ako, si Jarom, nagasulat sing pila ka mga pulong suno sa kasugoan sang akon amay nga si Enos agud nga ang amon lista sang kaliwatan mahimo nga maamligan.

2 Kag bangod ining mga lamina magagmay, kag bangod ining mga butang ginsulat para sa katuyoan sang pagbenepisyo sa amon mga kauturan nga mga Lamanhon, gani, kinahanglanon gid nga magsulat ako sing diutay; apang indi ako magsulat sang mga butang parte sa akon pagpropesiya, ukon parte sa akon mga rebelasyon. Kay ano pa ang akon dugang nga masulat sangsa nasulat na sang akon mga amay? Kay wala bala nila pag-ipahayag ang plano sang kaluwasan? Ginasiling ko sa inyo, Huo; kag ini tama na sa akon.

3 Tan-awa, ginakinahanglan nga madamo ang dapat himuon sa tunga sining katawhan, tungod sang katig-a sang ila mga tagipusuon, kag sang kabungol sang ila mga dulunggan, kag sang kabulag sang ila mga kaisipan, kag sang katiskog sang ila mga liog; bisan pa amo sini, ang Dios tuman kamaluluy-on sa ila, kag wala pa sila pagpanilhiga halin sa ibabaw sang duta.

4 Kag madamo sa amon ang nakaangkon sing madamo nga rebelasyon, kay indi man sila tanan batinggilan. Kag ang tanan nga indi batinggilan kag may pagtuo, may pagpakig-angot sa Balaan nga Espiritu, nga nagapahayag sa mga anak sang katawhan, suno sa ila pagtuo.

5 Kag karon, tan-awa, duha ka gatos ka tuig ang naglabay, kag ang katawhan ni Nefi nagbakod sa duta. Nagtinguha sila sa pagtuman sang layi ni Moises kag sang adlaw nga inugpahuway nga balaan sa Ginuo. Kag wala sila nagpamuyayaw; kag wala man sila nagpasipala. Kag ang mga layi sang duta tuman kaistrikto.

6 Kag naglinapta sila sa madamo nga bahin sa ibabaw sang duta, kag ang mga Lamanhon man. Kag mas tuman sila kadamo sangsa mga Nefinhon; kag maluyagon sila sa pagpamatay kag nagainom sang dugo sang mga sapat.

7 Kag natabo ini nga nagsalakay sila sing madamo nga beses batok sa amon, nga mga Nefinhon, sa pagpakig-away. Apang ang amon mga hari kag ang amon mga lideres mga gamhanan nga mga tawo sa pagtuo sa Ginuo; kag gintudloan nila ang katawhan sang mga paagi sang Ginuo; gani, ginbatoan namon ang mga Lamanhon kag gintabog sila pagwa sa amon kadutaan, kag nagsugod sa pagpabakod sang amon mga siyudad, ukon bisan ano nga lugar nga amon palanublion.

8 Kag nagdamo kami sing tuman, kag naglapta sa ibabaw sang duta, kag nangin tuman kamanggaranon sa bulawan, kag sa pilak, kag sa malahalon nga mga butang, kag sa pulido nga pagpanghimo sang kahoy, sa mga bilding, kag sa makinarya, kag amo man sa salsalon kag tumbaga, kag saway kag asero, nga nagahimo sang tanan nga sari sang mga galamiton sang tagsa ka sahi sa pag-uma sang duta, kag mga armas sa giyera—huo, ang matalom, mataliwis nga baslay, kag ang suludlan sang baslay, kag ang pana, kag ang sibat, kag tanan nga mga pagpanghanda para sa giyera.

9 Kag gani kay nakahanda sa pagsugata sang mga Lamanhon, wala sila nag-uswag batok sa amon. Kundi nga ang mga pulong sang Ginuo napamatud-an, nga iya ginhambal sa aton mga amay nga nagasiling nga: Kon magtuman kamo sang akon mga kasugoan magauswag kamo sa duta.

10 Kag natabo ini nga ginpaandaman sang mga propeta sang Ginuo ang katawhan ni Nefi, suno sa pulong sang Dios, nga kon indi sila magtuman sang mga kasugoan, kundi nga mahulog sa kalapasan, pat-od gid nga malaglag sila halin sa ibabaw sang duta.

11 Gani, ang mga propeta kag ang mga pari, kag ang mga manunudlo, nagpangabudlay sing matutum, nga nagalaygay nga may lubos nga pagkamainantuson sa katawhan nga magtutum; nga nagatudlo sang layi ni Moises, kag sang tuyo sa paghatag sini; nga nagakumbinsi sa ila sa pagpaabot gid sa Mesias, kag magpati nga magaabot na sia nga daw yara na sia. Kag sa amo nga paagi sila nagpanudlo sa ila.

12 Kag natabo ini nga paagi sa paghimo sini napunggan nila sila nga malaglag sa ibabaw sang duta; kay gintublok nila ang ila mga tagipusuon sang pulong, nga dalayon nga nagapukaw sa ila sa paghinulsol.

13 Kag natabo ini nga duha ka gatos kag treinta kag walo ka tuig ang naglabay—sang mga giyera, kag mga pagbinaisay, kag mga pag-ilinaway sa sulod sang malawig nga panahon.

14 Kag karon, ako, si Jarom, indi na magsulat sing dugang pa kay magagmay ining mga lamina. Apang tan-awa, mga kauturan ko, mahimo kamo nga magtan-aw sa iban pa nga mga lamina ni Nefi; kay tan-awa, sa mga ini nakurit ang mga kasulatan sang aton mga giyera, suno sa mga sinulatan sang mga hari, ukon yadtong ginpasulat nila.

15 Kag ginatugyan ko ining mga lamina sa mga kamot sang akon anak nga lalaki nga si Omni agud nga maamligan ang mga ini suno sa mga kasugoan sang akon mga amay.