Puk lal Jarom

1 Inge liye, nga, Jarom, sihmihs kahs puh fal nuh ke masap luhn pahpah tuhmuhk, Enos, tuh tahk in sucu lasr in karihngihnyuck.

2 Ac ke plwet inge srihk, ac ke ma inge sihmlac in ma ahkoeyucklac wo se nuh sin mwet wiyacsr mwet Laman, ohinge, enenuh se tuh nga in sihmihs kuhtuh srihsrihk; tuhsruhk nga fah tiac sihmihs ke pahluh luhk, kuh ke fwackyuck luhk. Tuh meac nga kuh in sihmihs yohk liki ma pahpah tuhmuhk suhmuhslah? Tuh yac elos tiac ahkkahlwemye tari plwacn in molwelah? Nga fahk nuh sum, Ahok; ac ma inge fal sihk.

3 Liye, ac ma wo se tuh yohk ma enenuh in oreklac inmahsrlon mwet inge, ke srihpen kwekwe luhn insiaclos, ac sohlohng kahs luhn insrwaclos, ac kun luhn nuhnak lalos, ac kwekwe luhn kwacwaclos; ne ohinge, God El arulacna pahkotwen nuh selos, ac soenna kuhnaoseloslac liki fin acn uh.

4 Ac puhkantwen inmahsrlosr suc oasr fwackyuck pucspucs la, tuh elos nohfohn tiac lihkkeke. Ac elos suc tiac lihkkeke ac tuh oasr luhlahlfongi la, sramsram nuh sin Nguhn Muhtahl, suc ahkkahlwemye nuh sin tuhlihk nuhtin mwet, fal nuh ke luhlahlfongi lalos.

5 Ac inge, liye, yac lofoko somlah, ac mwet lal Nephi elos fokokoi fin acn uh. Elos akihlen in karihngihn in liyacacng masap lal Moses ac lwen sahpuht in ahkmuhtahlyeyuck nuh sin Leum. Ac elos tiac ahklusrohngtwen; oacyacpac elos tiac kahs kohu. Ac masap fin acn uh arulacna upac.

6 Ac elos fahsrelihk nuh ke inkaiyacn acn uh, ac mwet Laman pac. Ac elos arulacna puhkantwen liki na mwet Nephi; ac elos luhngse ahkmas ac nihm srah ke kosro suhlallacl.

7 Ac tukun ma inge elos tuhkuh pacl pucspucs lain kuht, mwet Nephi, in mweun. Tuhsruhk tohkohsrah lasr ac mwet kol lasr elos mwet na fokoko in luhlahlfongi ke Leum; ac elos luti mwet ah ke ohiyac luhn Leum; ohinge, kuht kuh liki mwet Laman ac ukwaclosyak liki acn lasr, ac muhtwacwacack in muhsah luhsruhngwack siti sesr, kuh oacna sie acn in usru lasr.

8 Ac kuht arulacna puhseni, ac fahsrelihk nuh fin acn uh, ac arulacna kahsruhpi ke kol, ac ke selfuh, ac ke ma sacohk, ac ke lwemlwem in tuhfahlfahl ke sahk, ke lohm, ac ke insin, ac oacyacpac ke osra ac copper, ac prahs ac stil, oraclah kain in kuhfwen orekma nuhkwewa ke kain atac nuhkwewa in sang kihlihng infohk uh, ac kuhfwen mwe mweun—ahok, suhkan pihsr kohsroh, ac mwe nein suhkan pihsr, ac osra in fakfuhk, ac osra in sisi, ac kwewana ma ahkoeyucklac nuh ke mweun.

9 Ac ohinge ke ahkolah in ohsun nuh sin mwet Laman, elos tiac kuhtangkuhtlac. Tuh kahs luhn Leum ahkpwacyeiyeyuck, suc El sramsram nuh sin pahpah tuhmwacsr, fahk lah: Ke kowos liyacacng masap Luhk kowos fah kapkapwack fin acn uh.

10 Ac tukun ma inge mwet pahluh luhn Leum elos kai mwet lal Nephi, fal nuh ke kahs luhn God, tuh elos fin tiac liyacacng masap, tuhsruhk puhtatlac in tahfonglac, elos fah kuhnausyucklac liki fin acn uh.

11 Ohinge, mwet pahluh, ac mwet tol, ac mwet luti, elos kuhlwacnsap insacnweacng, kwacfe ke muhtweng nuhkwewa tuh mwet ah in insacnweacng; luti masap lal Moses, ac ke srihpac suc oruh ituckyang; kihfucsuhlos in ngwet nuh met nuh yohrohl Messiah, ac luhlahlfongel Elan tuhkuh in oacna El tuhkuh tari. Ac tukun ohiyac se inge elos lotwelos.

12 Ac tukun ma inge tuh in oruh ohinge elos karuhnguhnuhlos in tiac kuhnanuclac fin acn uh; tuh elos fakihsyac insiaclos ke kahs uh, sikalweni in moklwelos in auliyak.

13 Ac tukun ma inge yac lofoko ac tolngoul ac alkosr somlah—tukun ohiyac luhn mweun, ac fohs, ac akuhkuhin, ke lusen inkaiyacn puhluhn pacl se.

14 Ac nga, Jarom, tilac sifil sihm, tuh plwet uh srihk. Tuhsruhk liye, mwet wiyuck, kowos kuh in som nuh ke kuhtuh pac plwet lal Nephi; tuh liye, ma sihmlac ke mweun lasr taflweyucklac kac, fal nuh ke sihm luhn tohkohsra, kuh elos suc ma oruh in sihmihsyucklac.

15 Ac nga uslah plwet inge nuh in poun wen nuhtihk Omni, tuh in karihngihnyuck fal nuh ke masap luhn pahpah tuhmuhk.