1 Iwe non ewe fansoun pwan non chok ena ier a poputa ne wor ew maun sefan nefinen ekkewe chon Nifai me ekkewe chon Leiman. Iwe inamo ngang emon chok serafo, ua watte non pekin inis; iei minne ekkewe aramasen Nifai ra finieita pwe upwe nour sou emmwen, are ewe sou emmwenin nour kewe sounfiu.

2 Iei minne non ewe fansoun pwe non ai engon me wonu ier ua feino me mwen ew mwichen sounfiun ekkewe chon Nifai, ne ungeni ekkewe chon Leiman; iei minne wunupuku rue me wonu ier a wesino.

3 Iwe non ewe fansoun pwe non ewe wunupuku rue me fisu ier ekkewe chon Leiman ra feito wom ren fokkun pochokun mi napanap, ina popun pwe ra anuokusu nei kewe sounfiu; iei minne rese mochen fiu, iwe ra poputa ne marsefan ngeni ekkewe fonu ennefen.

4 Iwe non ewe fansoun pwe am aua feito ngeni ewe teninimwen Ankola, iwe am aua nenieni ewe teninimw, me for amonnetan am aupwe eppeti inisim seni ekkewe chon Leiman. Iwe non ewe fansoun pwe am aua apochokunano ewe teninimw ren am pochokun; nge me nukun am kewe tittin eppet meinisin ekkewe chon Leiman ra feito wom me asukemiu seni ewe teninimw.

5 Iwe ra pwan asukemiu seni ewe fonuen David.

6 Iwe am aua fetano me feito ngeni ewe fonuen Joshua, minne a nom non ekkewe kia notou unukun oressetin ewe fonu.

7 Iwe non ewe fansoun pwe am aua mwitir ionanong nöum kewe aramas ren am tongeni, pwe am aupwe tongeni ionfengenirenong non ew mwicheich.

8 Nge nengeni, ewe fonu a ureno ren chon sona me ren ekkewe chon Leiman; iwe me nukun ewe pochokunen tatakis minne a nonnom won nei kewe aramas, rese aier seni ar kewe foffor mi ngaw; iei minne a wor cha me watten ninnino ra cheewno won unusen unungen ewe fonu, won kinikinin ekkewe chon Nifai me pwan won kinikinin ekkewe chon Leiman; iwe a ew unusochun ungeni won unusen unungen ewe fonu.

9 Iwe iei, a wor noun ekkewe chon Leiman emon king, iwe itan Aaron; iwe a feito ungenikem ren ew mwichen sounfiun faik me ruanu ngerou.

10 Iwe non ewe fansoun pwe ekkewe chon Nifai ra poputa ne aier seni ar kewe angangangaw, me poputa ne puchor usun chok a fen pin osini me ren Samuel ewe soufos; pun nengeni ese wor emon a tongeni amwochu met minne pwisin an, pun ekkewe chon sona, me ekkewe chon angemwan, me ekkewe chon nii manau, me ewe angangen magic, me ewe angangen pout ra nom non ewe fonu.

11 Iei a poputa ne wor ew netipeta me ew nonien non unusen ewe fonu pokiten ekkei mettoch, iwe akkaewin me nein ekkewe aramasen Nifai.

12 Iwe non ewe fansoun pwe nupwen ngang, Mormon, ua kuna ar nonien me ar netipeta me ar netipechou me mwen ewe Samon, netipei a poputa ne pwapwa non ngang, pokiten ua sinei ekkewe umoumoch me engino an ewe Samon, iei minne ua ekieki pwe i epwe uren umoumoch ngeni ir pwe repwe winiti sefan ew aramas tupwon.

13 Nge nengeni ai pwapwa a namotmwan, pun ar netipechou esap ngeni aier, pokiten kirekirochun Kot; nge a fen netipechoun ekkewe mi poutmwanino, pokiten esap fansoun meinisin ewe Samon epwe mutireta ar repwe pwapwa non tipis.

14 Iwe rese feito ngeni Jises ren netipechou me netip niemam, nge ra kapas mi ngawei Kot, me anean pwe repwe mano. Nge inamo repwe fen fiu ren ewe ketinas fan iten manauer.

15 Iwe non ewe fansoun pwe ai netipechou a niwin sefan ngeniei, iwe ua kuna pwe ewe ranin chen a nuuno seni ir, non pekin inis me ngun; pun ua kuna ngorowun me neir ra pokupokutiw non ungeni mi pwápwáno ngeni ar Kot, me ra chukuchukuta usun koiasi won unungen ewe fonu. Iwe iei wunupuku faik me ruanu ier a wesino.

16 Iwe non ewe fansoun pwe non ewe wunupuku faik me nimuen ier ekkewe chon Nifai ra poputa ne su me mwen ekkewe chon Leiman; iwe ra tapwer tori ar feito pwan mwo ngeni ewe fonu Jeson, mwen an epwe tufich ar repwe akkounor non ar marsefan.

17 Iwe iei, ewe teninimwen Jeson a arap ngeni ewe fonu ikewe Ammaron a opano ekkewe uruo ngeni ewe Samon, pwe resap tongeni tano. Iwe nengeni ua fen feino anongonong won ewe kapas an Ammaron, me angei ekkewe seleichen Nifai, me ua fori ew uruo anongonong won ekkewe kapas an Ammaron.

18 Iwe won ekkewe seleichen Nifai ua fori ew unusochun uruon ekkewe fofforungaw me angang anieput meinisin; nge won ekkei seleich ua kouno ne fori ew unusochun uruon ar kewe fofforungaw me angang anieput, pun nengeni, ew soposoponon mwokutukutun fofforungaw me angang anieput a fen fis me mwen mesei seni ewe fansoun ua tongeni weweiti mwokutukutun aramas.

19 Iwe riaffou ngang pokiten ar fofforungaw; pun netipei a fen uren netipechou pokiten ar fofforungaw, unusen rani kewe; nge inamo, ngang mi sinei pwe upwe seikita non ewe ranin soponon.

20 Iwe non ewe fansoun pwe non ei ier ekkewe chon Leiman ra kutta me asueno ekkewe aramasen Nifai. Iwe non ewe fansoun pwe am aua suno tori am aua feito ennefen ngeni ewe fonu minne a iteni Shem.

21 Iwe non ewe fansoun pwe am aua apochokunano ewe teninimwen Shem, me am aua ionanong nöum kewe aramas ren ukukun am tongeni, pwe eni am aupwe tongeni tummunur seni ninnino.

22 Iwe non ewe fansoun non ewe wunupuku faik me wonu ier ra poputa ne feito wom sefan.

23 Iwe non ewe fansoun pwe ua kapas ngeni nei kewe aramas, me peser ren watten pochokun, pwe repwe mochen uta pwaracho me mwen ekkewe chon Leiman me fiu fan iten punuwer kewe, me nour kewe, me imwer kewe, me nenier kewe.

24 Iwe ai kewe kapas ra ekis amwasangereta ngeni pochokun, ina popun pwe rese su me mwen ekkewe chon Leiman, nge ra uta ren pwaracho ngeni ir.

25 Iwe non ewe fansoun pwe am aua fiu ren ew mwichen sounfiun inik ngorow ngeni ew mwichen sounfiun nime ngorow. Iwe non ewe fansoun pwe am aua uta me mwer fiti watten nukuchar ina popun pwe ra su me mwem.

26 Iwe non ewe fansoun pwe nupwen ra fen su am aua tapwer ren noum kewe sounfiu, me am ua churir sefan, me akkufur; nge inamo ewe pochokunen ewe Samon ese nom rem; ewer, am aua chok pwisin won am, pwe ewe Ngunun ewe Samon ese nonnom non am; iei minne am aua apwangapwangeno usun chok pwim kewe.

27 Iwe netipei a netipechou pokiten ei weiresin osukosuken nei kei aramas, pokiten ar fofforungaw me angang mi anieput. Nge nengeni, am aua feino ungeni ekkewe chon Leiman me ekkewe chon sonan Katianton, tori am aua angei sefan ekkewe fonuen am kewe neuo.

28 Iwe ewe wunupuku faik me tiu ier a wesino. Iwe non ewe wunupuku nime ier am aua fori ew pung ngeni ekkewe chon Leiman me ekkewe chon sonan Katianton, non minne am aua eineti ekkewe fonuen am kewe neuo.

29 Iwe ekkewe chon Leiman ra ngenikem ewe fonu ennefen, ewer, pwan mwo ngeni ewe aukukkunun aan minne a aaneno ngeni ewe fonu eor.