1 Iwe iei non ewe fansoun pwe non ewe wunupuku wone me unungat ier ekkewe chon Nifai ra feita fiti nour kewe sounfiu ne maun ngeni ekkewe chon Leiman, seni ewe fonu Tatakis.

2 Iwe non ewe fansoun pwe ekkewe chon Leiman ra asusefani ekkewe sounfiun chon Nifai ngeni ewe fonuen Tatakis. Iwe nupwen ir mi chok apwangapwang, ew minafon mwichen sounfiun ekkewe chon Leiman ra feito wor; iwe ra fori ew eriaffoun maun, ina popun pwe ekkewe chon Leiman ra angei nemenem won ewe teninimw Tatakis, iwe ra nieno chommong me nein ekkewe chon Nifai, me angei chommong chon kanapus.

3 Iwe ekkewe nussun ra suno me choni ekkewe aramasen ewe teninimwen Tiankam. Iei ewe teninimw Tiankam a nom non ekkewe kia arap ngeni oressetin ewe fonu; me a pwan arap ngeni ewe teninimw Tatakis.

4 Iwe ina pokiten an ekkewe sounfiun ekkewe chon Nifai feita ngeni ekkewe chon Leiman ina ra poputa ne wichiwich; pun are esap ren ena, ekkewe chon Leiman resap tongeni wor ar nemenem wor.

5 Nge, nengeni, ekkewe kapung an Kot epwe fis ngeni ekkewe aramas mi ngaw; iwe me ren ekkewe aramas mi ngaw ina ekkewe aramas mi ngaw ra riaffou; pun ina ekkewe aramas mi ngaw ir ra amwasangata netipen ekkewe noun aramas ngeni assuku cha.

6 Iwe non ewe fansoun pwe ekkewe chon Leiman ra for amonnetan ar repwe feito ungeni ewe teninimw Tiankam.

7 Iwe non ewe fansoun non ewe wunupuku wone me ruanu ier ekkewe chon Leiman ra feito ungeni ewe teninimw Tiankam, pwe repwe tongeni pwan angei nemenem won ewe teninimw Tiankam.

8 Iwe non ewe fansoun pwe ra marsefan me susefan me ren ekkewe chon Nifai. Iwe nupwen ekkewe chon Nifai ra kuna pwe ra fen asueno ekkewe chon Leiman ra pwan sikaseni pwisin non ar pochokun; iwe ra feino non pwisin ar pochokun, me angei nemenem sefan won ewe teninimw Tatakis.

9 Iwe iei ekkei mettoch meinisin ra fen wesino, iwe a fen ngerou ra ninnino me ruepek, ekkewe chon Nifai me pwan ekkewe chon Leiman.

10 Iwe non ewe fansoun pwe ewe wunupuku wone me wonu ier a wesino, iwe ekkewe chon Leiman ra feita sefan won ekkewe chon Nifai ne maun; iwe inamo ekkewe chon Nifai rese aier seni ewe ngaw ra fen fori, nge soposopono non ar fofforungaw.

11 Iwe ese tufich an ewe channaw epwe anapanapa, are an aramas epwe makkei ew unusochun napanapen ewe mwokutukutun cha me watten ninnino minne a fis nein ekkewe aramas, ekkewe chon Nifai me pwan ekkewe chon Leiman; iwe meinisin netip ra pochokununo, ina popun pwe ra soposopono ne pwapwa non assukun cha

12 Iwe esamwo fifis akkom fokkun fofforungaw napanap me nein noun Liai kewe meinisin, are fen nein ewe imwen Israel meinisin, anongonong won ekkewe kapas an ewe Samon, usun nein ekkei aramas.

13 Iwe non ewe fansoun pwe ekkewe chon Leiman ra angei nemenem won ewe teninimw Tatakis, iwe ei pokiten chochor a nap seni chochon ekkewe chon Nifai.

14 Iwe ra pwan karis ngeni ewe teninimw Tiankam, me ra asueu aramasan kewe me non, me angei chommong chon kanapus fefin me pwan semirit, me asorereta pwe asor ngeni nour kewe koten niosun anu muan.

15 Iwe non ewe fansoun pwe non ewe wunupuku wone me fisu ier, ekkewe chon Nifai ra song pokiten ekkewe chon Leiman ra asorata nour kewe fefin me nour kewe semirit, ina popun ra feino ungeni ekkewe chon Leiman ren fokkun rochongawen song, ina minne pwe ra akkufu sefani ekkewe chon Leiman, me asureu seni non fonuer kewe.

16 Iwe ekkewe chon Leiman rese feito sefan ne ungeni ekkewe chon Nifai tori ewe wunupuku fik me nimu ier.

17 Iwe non ei ier ra feitiw ne ungeni ekkewe chon Nifai ren unusen ar pochokun; iwe ese nea iteiter pokiten watten chochor.

18 Iwe seni ei fansoun feino ekkewe chon Nifai rese chiwen wor ar pochokun won ekkewe chon Leiman, nge ra poputa ne rosotiw me rer usun ew omwurenipwin me mwen ewe akkar.

19 Iwe non ewe fansoun pwe ekkewe chon Leiman ra feitiw ngeni ewe teninimw Tatakis; iwe a fis ew fokkun eriaffoun maun me non ewe fonu Tatakis, non minne ra akkufu ekkewe chon Nifai.

20 Iwe ra su sefan me mwer, iwe ra feito ngeni ewe teninimw Boaz; iwe ikewe ra uta ne ungeni ekkewe chon Leiman ren fokkun pwaracho, ina popun pwe ekkewe chon Leiman rese akkufur tori ar ra feito sefan ewe aruwen fansoun.

21 Iwe nupwen ar feito ewe aruwen fansoun, ekkewe chon Nifai ra suno me ninnino ren ew fokkun wachemuken ninnino; nour kewe fefin me nour kewe semirit ra pwan asoreta ngeni niosun anu muan.

22 Iwe non ewe fansoun pwe ekkewe chon Nifai ra pwan su sefan me mwer, ra uwei ekkewe aramas meinisin, non ekkewe town me sopw.

23 Iwe iei ngang, Mormon, pokiten ua eteneki pwe ekkewe chon Leiman ita repwene atano ewe fonu, iei minne ngang ua feino ngeni ewe chukuchukuta Sim, me angei ekkewe uruo meinisin minne Ammaron a fen opareno ngeni ewe Samon.