1 Thiab nim no kuv sau kaw kuv phau ceev xwm txheej txog txoj kev puas tsuaj ntawm kuv cov neeg, cov Neeg Nifais. Thiab tau muaj tias peb tau tawm mus ua ntej cov Neeg Lamas.

2 Thiab kuv, Maumoos, tau sau ib tsab ntawv mus rau tus vaj ntxwv ntawm cov Neeg Lamas, thiab tau xav kom nws yuav pub rau peb kom peb yuav sib sau tau peb cov neeg ua ke mus rau thaj av Khumaulas, ze ib lub roob uas hu ua Khumaulas, thiab peb yuav ua rog nyob rau qhov ntawd.

3 Thiab tau muaj tias tus vaj ntxwv ntawm cov Neeg Lamas tau pub rau kuv yam uas kuv xav tau.

4 Thiab tau muaj tias peb tau tawm mus rau thaj av Khumaulas, thiab peb tau rub peb tej tsev pheeb suab ntaub ncig lub roob Khumaulas; thiab nws tau nyob hauv ib thaj av uas muaj dej ntau, muaj tej dej ntws, thiab tej qhov dej txhawv; thiab ntawm no peb tau cia siab tias yuav kov yeej cov Neeg Lamas.

5 Thiab thaum peb puas thiab yim caum thiab plaub xyoos tau dhau mus, peb tau sau ua ke tag nrho cov seem tshuav ntawm peb cov neeg mus rau thaj av Khumaulas.

6 Thiab tau muaj tias thaum peb tau sib sau tag nrho peb cov neeg ua ke rau hauv thaj av Khumaulas, saib seb kuv, Maumoos, tau pib laus lawm; thiab tau paub tias nws yuav yog kev sib ntswg zaum kawg ntawm kuv cov neeg, thiab tau raug txib los ntawm tus Tswv kom kuv yuav tsum tsis txhob cia tej ceev xwm txheej uas tau cev nqis los ntawm peb tej yawg koob, uas dawb ceev, kom poob rau hauv cov Neeg Lamas tes, (vim cov Neeg Lamas yuav ua kom lawv puas tsuaj) yog li ntawd kuv tau ua phau ceev xwm txheej no tawm ntawm Nifais cov phiaj, thiab tau muab zais rau hauv Khumaulas tag nrho tej ceev xwm txheej uas tau raug muab rau kuv los ntawm tus Tswv txhais tes, tsuas tshuav cov phiaj tsawg no uas kuv tau muab rau kuv tus tub Maulaunais.

7 Thiab tau muaj tias kuv cov neeg, nrog lawv tej poj niam thiab lawv tej me nyuam, nim no tau pom cov Neeg Lamas tab tom tuaj ncaj nraim rau lawv; thiab nrog txoj kev ntshai heev ntawm txoj kev tuag uas tau puv tej siab ntawm tag nrho tej neeg phem, lawv tau tos ntsoov txais lawv.

8 Thiab tau muaj tias lawv tau tuaj ua rog tawm tsam peb, thiab txhua tus puav leej muaj txoj kev txhawj puv nkaus vim yog txoj kev coob ntawm lawv cov neeg.

9 Thiab tau muaj tias lawv tau tua kuv cov neeg nrog ntaj, nrog hneev, thiab nrog xub, thiab nrog taus, thiab nrog tag nrho txhua yam cuab yeej ua rog.

10 Thiab tau muaj tias kuv cov neeg tau raug txiav vau, muaj tseeb tiag, kuv kaum txhiab leej uas tau nrog kuv, thiab kuv tau vau raug mob nyob hauv nruab nrab; thiab lawv tau hla kuv mus tsis tau muab qhov kawg rau kuv txoj sia.

11 Thiab thaum lawv tau mus dhau thiab tau txiav vau tag nrho kuv cov neeg tsuas tshuav peb nees nkaum thiab plaub leeg xwb, (nyob hauv tau muaj kuv tus tub Maulaunais) thiab peb tau dim txoj kev tuag ntawm peb cov neeg, tau pom nyob rau tag kis, thaum cov Neeg Lamas tau rov qab saum ncov roob Khumaulas mus rau hauv lawv tej yeej, kaum txhiab leej ntawm kuv cov neeg uas tau raug txiav vau, uas kuv tau ua tus coj ua ntej.

12 Thiab peb kuj tau pom kaum txhiab leej ntawm kuv cov neeg uas tau raug coj los ntawm kuv tus tub Maulaunais.

13 Thiab saib seb, kaum txhiab leej ntawm Nkikhidoonas tau vau, thiab nws kuj tau vau rau hauv nruab nrab.

14 Thiab Lamaj tau vau nrog nws kaum txhiaj leej; thiab Kilakas tau vau nrog nws kaum txhiab leej; thiab Leehas tau vau nrog nws kaum txhiab leej; thiab Yenias tau vau nrog nws kaum txhiab leej; thiab Koomunaihas, thiab Maulaunaihas, thiab Eethi-onas, thiab Sinploos, thiab Sees, thiab Yos, tau vau nrog lawv kaum txhiab leej.

15 Thiab tau muaj tias tau muaj kaum tus ntxiv uas tau vau los ntawm ntaj, nrog lawv ib leeg kaum txhiab leej; muaj tseeb tiag, twb tag nrho kuv cov neeg tau vau, tsuas yog tshuav neeg nkaum thiab plaub leeg uas tau nrog kuv, thiab ob peb tug uas tau khiav dim mus rau tej teb chaws qab teb, thiab ib txhia uas tau mus zwm rau cov Neeg Lamas lawm xwb; thiab lawv tej nqaij, thiab tej pob txha, thiab tej ntshav tso cia rau saum tej av, tau raug tso tseg los ntawm cov uas tau tua lawv kom lwj rau saum thaj av, thiab kom ntsoog thiab rov qab mus rau lawv leej niam av.

16 Thiab kuv tus ntsuj plig tau ntuag nrog txoj kev mob heev, vim yog txoj kev tua tuag ntawm kuv cov neeg, thiab kuv tau quaj qw nrov nrov tias:

17 Au nej cov uas zoo nkauj zoo nraug es, vim li cas nej thiaj li tau ncaim ntawm tus Tswv tej kev! Au nej cov uas zoo nkauj zoo nraug es, vim li cas nej thiaj li tau tsis kam lees yuav tus Yexus ntawd, tus uas tau sawv ntsug qhib caj npab lug tos txais nej!

18 Saib seb, yog nej tsis tau ua li no, nej yeej yuav tsis tau vau. Tiam sis saib seb, nej raug vau, thiab kuv quaj ntsuag rau nej txoj kev ploj.

19 Au nej cov tub zoo nraug thiab cov ntxhais zoo nkauj, nej cov txiv thiab cov niam, nej cov ua txiv thiab poj niam, nej cov uas zoo es, vim li cas nej thiaj li tau vau!

20 Tiam sis saib seb, nej tau mus lawm, thiab kuv tej kev tu siab tsis muaj peev xwm yuav coj tau nej rov qab los.

21 Thiab tsis ntev hnub ntawd yuav los uas nej tej cev uas txawj ploj tuag yuav tsum tau hnav tej cev uas tsis txawj ploj tuag, thiab tej cev uas nim no tab tom lwj tsus no tsis ntev yuav tsum rais los mus uas tej cev uas tsis txawj lwj; thiab thaum ntawd nej yuav tsum tau sawv ua ntej ntawm Khetos lub rooj txiav txim, raug txiav txim mus raws li nej tej hauj lwm; thiab yog hais tias nej ho yog neeg ncaj ncees, ces thaum ntawd nej yuav tau koob hmoov nrog nej tej yawg koob uas tau ua nej ntej mus lawm.

22 Au kheev lam nej tau hloov siab lees txim ua ntej txoj kev puas tsuaj loj no tau los rau saum nej. Tiam sis saib seb, nej twb mus lawm, thiab Leej Txiv, muaj tseeb tiag, Leej Txiv uas nyob mus ib txhis saum ntuj ceeb tsheej, yeej paub nej zoo li cas; thiab nws yuav ua rau nej raws li nws txoj kev ncaj ncees thiab txoj kev hlub tshua.