1 Saib seb kuv, Maulaunais, yuav sau kuv txiv, Maumoos, phau ceev xwm txheej kom tag. Saib seb, kuv tsuas muaj ob peb yam yuav sau, tej yam uas kuv tau raug txib los ntawm kuv txiv.

2 Thiab nim no tau muaj tias tom qab uas tau muaj npluav rog loj thiab hnyav heev nyob saum Khumaulas, saib seb, cov Neeg Nifais uas tau khiav dim mus rau lub teb chaws qab teb tau raug plob tua los ntawm cov Neeg Lamas, mus txog thaum lawv sawv daws tau puas tsuaj huv tib si.

3 Thiab kuv txiv los kuj tau raug tua tuag los ntawm lawv, thiab tau tshuav kuv tib leeg sau zaj dab neeg tu siab txog txoj kev puas tsuaj ntawm kuv cov neeg. Tiam sis saib seb, lawv twb mus lawm, thiab kuv ua kom muaj puv npo li txoj lus txib ntawm kuv txiv. Thiab xyov lawv yuav tua kuv, los kuv tsis paub.

4 Yog li ntawd kuv yuav sau thiab muab tej ceev xwm txheej zais rau hauv av; thiab txawm kuv yuav mus qhov twg los tsis ua li cas.

5 Saib seb, kuv txiv tau ua phau ceev xwm txheej no, thiab nws tau sau tej ntsiab rau hauv. Thiab saib seb, kuv kuj yuav sau tej ntawd thiab yog tus kuv muaj chaw nyob saum tej phiaj, tiam sis kuv tsis muaj; thiab kuv tsis muaj tej quav hlau, vim kuv tib leeg xwb. Kuv txiv tau raug tua tuag hauv hav rog, thiab tag nrho kuv tej neeg txheeb ze, thiab kuv tsis muaj phooj ywg thiab tsis pom qab yuav mus qhov twg; thiab tus Tswv yuav cia kom kuv muaj sia nyob ntev npaum li cas los kuv tsis paub.

6 Saib seb, plaub puas xyoo tau dhau mus txij li thaum peb tus Tswv thiab tus Cawm Seeg tau los.

7 Thiab saib seb, cov Neeg Lamas tau plob tua kuv cov neeg, cov Neeg Nifais, nqis ib lub nroog dhau ib lub nroog thiab dhau ib qho chaw rau ib qho chaw, twb mus txog thaum tsis muaj lawv tas; thiab lawv txoj kev poob tau loj; muaj tseeb tiag, kuv cov neeg, cov Neeg Nifais, txoj kev puas tsuaj tau loj thiab phem heev.

8 Thiab saib seb, twb yog tus Tswv txhais tes uas tau ua qhov ntawd. Thiab kuj saib seb, cov Neeg Lamas ib leeg kuj ua rog nrog ib leeg; thiab tag nrho saum thaj av no yog kev tua neeg thiab txo ntshav uas ncig mus tsis tu ncua; thiab tsis muaj leej twg paub qhov kawg ntawm npluav rog.

9 Thiab nim no, saib seb, kuv tsis hais txog lawv ntxiv lawm, vim twb tsis tshuav ib tug li lawm tsuas yog tshuav cov Neeg Lamas thiab cov tub sab thiaj tseem muaj nyob rau saum thaj av xwb.

10 Thiab twb tsis muaj ib tug li lawm uas paub tus Vajtswv tseeb tsuas yog Yexus cov pab coj xwb, uas tau nyob hauv thaj av mus txog thaum txoj kev phem ntawm cov neeg tau phem heev kawg tias tus Tswv tsis kam cia lawv nyob nrog cov neeg; thiab xyov lawv tseem nyob saum thaj av los tsis nyob tsis muaj neeg paub.

11 Tiam sis saib seb, kuv txiv thiab kuv tau pom lawv, thiab lawv tau pab wb.

12 Thiab tus uas txais yuav phau ceev xwm txheej no, thiab yuav tsis rhuav nws vim yog tej kev tsis zoo tag nrho uas nyob hauv nws, tus ntawd yuav paub tej yam loj dua li tej yam no. Saib seb, kuv yog Maulaunais; thiab kheev lam yog ua tau, kuv twb yuav ua tag nrho txhua yam los rau nej paub lawm.

13 Saib seb, kuv xaus hais txog cov neeg no. Kuv yog Maumoos tus tub, thiab kuv txiv tau yog ib tug xeeb ntxwv ntawm Nifais.

14 Thiab kuv yog tib tug uas zais phau ceev xwm txheej no rau tus Tswv; cov phiaj ntawd tsis muaj nuj nqis dab tsi, vim yog txoj lus txib ntawm tus Tswv. Vim nws tau hais tseeb tias tsis muaj ib tug twg uas yuav tau lawv kom nplua nuj; tiam sis cov xwm txheej uas nyob hauv muaj nuj nqis heev; thiab tus uas yuav coj nws los rau qhov kaj, tus ntawd tus Tswv yuav foom koob hmoov rau.

15 Vim tsis muaj ib tug muaj peev xwm muaj hwj chim coj tau nws los rau qhov kaj tsuas yog Vajtswv muab rau nws xwb; vim Vajtswv xav kom tej ntawd yuav raug ua nrog ib lub qhov muag ntsia ntsoov rau nws lub yeeb koob, los sis rau txoj kev nyab xeeb ntawm cov neeg txheej thaum ub thiab tus Tswv cov neeg sib khi lus uas tau tawg ri niab los ntev lawm.

16 Thiab tus uas yuav coj tej yam no los rau qhov kaj yuav tau koob hmoov; vim nws yuav raug coj tawm ntawm qhov tsaus ntuj mus rau qhov kaj, raws li Vajtswv txoj lus; muaj tseeb tiag, nws yuav raug coj tawm hauv av los, thiab nws yuav ci tawm mus ntawm qhov tsaus ntuj, thiab los mus rau txoj kev paub ntawm cov neeg; thiab nws yuav raug ua los ntawm Vajtswv lub hwj chim.

17 Thiab yog muaj tej tsis yog ces lawv tsuas yog tej kev tsis yog ntawm tib neeg xwb. Tiam sis saib seb, peb paub tias tsis muaj qhov tsis yog; txawm li ntawd los Vajtswv yeej paub tag nrho txhua yam; yog li ntawd, tus uas tsis pom zoo, tus ntawd yuav tsum ceev faj nyob tsam nws yuav raug teeb meem ntawm ntuj txiag teb tsaus tej hluav taws.

18 Thiab tus uas hais tias: Muab rau kuv saib soj, los sis nej yuav raug nplawm—tus ntawd yuav tsum ceev faj nyob tsam nws txib ua tej uas raug txwv los ntawm tus Tswv.

19 Vim saib seb, tus uas maj txiav txim rau lwm tus yeej yuav raug rov maj txiav txim rau; vim nws yeej yuav tau txais nqi zog raws li nws tej hauj lwm; yog li ntawd, tus uas ntaus lwm tus yeej yuav rov raug ntaus, los ntawm tus Tswv.

20 Saib seb vajlugkub hais li cas—tib neeg yuav tsum tsis txhob ntaus lwm tus, thiab nws yuav tsum tsis txhob txiav txim; vim txoj kev txiav txim yog kuv li, tus Tswv hais li, thiab txoj kev pauj txiaj ntsig kuj yog kuv li, thiab kuv mam pauj rov qab.

21 Thiab tus uas yuav ua npau taws thiab cam tawm tsam tus Tswv txoj hauj lwm, thiab tawm tsam tus Tswv cov neeg khi lus uas yog tsev neeg Ixayees, thiab yuav hais tias: Peb yuav rhuav tus Tswv txoj hauj lwm kom puas tsuaj, thiab tus Tswv yuav tsis nco qab txoj kev khi lus uas nws tau khi rau tsev neeg Ixayees—tus ntawd yuav muaj xwm raug ntov vau thiab pov rau hauv hluav taws;

22 Vim tej ntsiab uas nyob mus ib txhis ntawm tus Tswv yeej yuav dov mus, kom txog thaum tag nrho nws tej lus cog tseg yuav muaj puv npo.

23 Cia li nrhiav kawm tej kev qhia tej uas yuav muaj los yav tom ntej ntawm Yaxayas. Saib seb, kuv tsis muaj peev xwm muab lawv sau. Muaj tseeb tiag, saib seb kuv hais rau nej, tias cov ntseeg ntawd uas tau mus ua ntej kuv lawm, cov uas tau nyob hauv thaj av no, yuav quaj, muaj tseeb tiag, lawv twb yuav quaj tawm hauv av tuaj rau tus Tswv; thiab ib yam li tus Tswv tseem muaj sia nyob nws yuav nco ntsoov txoj kev khi lus uas nws tau khi rau lawv lawm.

24 Thiab nws paub lawv tej kev thov, tias lawv yog kev txhawb nqa rau lawv tej kwv tij. Thiab nws paub lawv tej kev ntseeg, vim los ntawm nws lub npe lawv muaj peev xwm tshem tau tej roob; thiab los ntawm nws lub npe lawv muaj peev xwm ua kom tej av co qeeg nkaws; thiab los ntawm lub hwj chim ntawm nws txoj lus lawv tau ua tej qhov taub vau rau hauv av; muaj tseeb tiag, tej qhov cub kub kub twb ua tsis tau lawv mob, los sis tej tsiaj qus thiab tej nab muaj taug, vim yog lub hwj chim ntawm nws txoj lus.

25 Thiab saib seb, lawv tej kev thov kuj yog kev txhawb nqa rau nws tus uas tus Tswv yuav cia coj tej yam no los.

26 Thiab ib tug tsis tas yuav hais tias tej no yuav tsis muaj los, vim lawv yeej yuav los tiag tiag, vim tus Tswv tau hais li ntawd; vim lawv yuav tawm hauv tej av, los ntawm tus Tswv txhais tes, thiab tsis muaj leej twg yuav muaj peev xwm txwv nws tau; thiab nws yuav los nyob hauv ib hnub thaum uas neeg yuav hais tias tej txuj ci tseem ceeb twb tag tsis muaj lawm; thiab nws yuav los zoo ib yam li ib tug hais tawm hauv qhov tuag los.

27 Thiab nws yuav los nyob hauv ib hnub thaum uas tej ntshav ntawm cov ntseeg yuav quaj thov rau tus Tswv, vim yog tej kev tuav hauv thiab tej hauj lwm ntawm txoj kev tsaus ntuj.

28 Muaj tseeb tiag, nws yuav los nyob hauv ib hnub thaum Vajtswv lub hwj chim yuav raug tsis kam lees yuav, thiab tej koom txoos yuav rais los ua phem ua qias thiab raug nqa siab nyob hauv txoj kev khav ntawm lawv tej siab; muaj tseeb tiag, twb yuav nyob hauv ib hnub thaum uas tej thawj coj ntawm tej koom txoos thiab tej xib hwb yuav sawv nyob hauv txoj kev khav ntawm lawv tej siab, mus txog qhov uas ntshaw kav lawv cov uas zwm rau lawv tej koom txoos.

29 Muaj tseeb tiag, nws yuav los nyob hauv ib hnub thaum yuav hnov muaj hluav taws, thiab tej cua daj cua dub, thiab tej pa hluav taws nyob rau lwm thaj av;

30 Thiab kuj yuav hnov tej kev ua rog, tej lus paj lus cua txog kev ua rog, thiab tej kev av qeeg nyob ntau qhov chaw.

31 Muaj tseeb tiag, nws yuav los nyob hauv ib hnub thaum yuav muaj kev vuab tsuab loj heev nyob rau saum lub ntiaj teb; yuav muaj tej kev tua neeg, thiab kev ua tub sab, thiab kev dag, thiab tej kev ntxias, thiab tej kev sib daj sib deev, thiab tag nrho txhua yam kev qias; thaum uas yuav muaj coob leej uas yuav hais tias, Cia li ua qhov no, los sis ua qhov tod, thiab nws yuav tsis ua li cas, vim tus Tswv yuav kam tej zoo li ntawd nyob hauv hnub kawg. Tiam sis kev txom nyem yuav raug rau cov hais li ntawd, vim lawv tab tom nyob hauv tus kwj tob ntawm txoj kev iab thiab nyob hauv tej kev raug txim ntawm txoj kev tsis ncaj.

32 Muaj tseeb tiag, nws yuav los nyob hauv ib hnub thaum uas yuav muaj tej koom txoos tau tsa uas yuav hais tias: Cia li los cuag kuv, thiab vim nej tej nyiaj nej yuav raug zam nej tej kev txhaum.

33 Au nej cov neeg phem thiab lim hiam thiab tawv ncauj es, vim li cas nej thiaj tau tsa tej koom txoos rau nej tus kheej kom nplua nuj? Vim li cas nej thiaj tau hloov Vajtswv txoj lus dawb huv, xwv kom nej yuav coj tau txoj kev raug txim los rau saum nej tej ntsuj plig? Saib seb, nej cia li ntsia rau Vajtswv tej kev tshwm sim; vim saib seb, lub sij hawm yuav los nyob rau hnub ntawd thaum tag nrho tej yam no yuav tsum muaj puv npo.

34 Saib seb, tus Tswv tau ua rau kuv paub tej kev loj thiab tej yam tseem ceeb xav tsis thoob txog tej uas yuav tsum muaj los tsis ntev, nyob rau hnub ntawd thaum tej yam no yuav muaj los nyob hauv nej.

35 Saib seb, kuv hais rau nej ib yam li nej nyob ntawm no, thiab tiam sis nej tsis nyob. Tiam sis saib seb, Yexus Khetos tau ua nej rau kuv paub, thiab kuv paub tej uas nej ua.

36 Thiab kuv paub tias nej yeej mus hauv txoj kev khav ntawm nej tej siab; thiab twb tsis muaj li tsuas tshuav ob peb leeg xwb uas tsis tau tsa lawv tus kheej siab nyob hauv txoj kev khav ntawm lawv tej siab, mus rau txoj kev hnav tej tsoos zoo zoo, rau txoj kev ntshaw luag tug, thiab tej kev cam ncauj, thiab txoj kev xav ua kom lwm tus puas tsuaj, thiab tej kev tsim txom, thiab tag nrho txhua yam kev tsis ncaj; thiab nej tej koom txoos, muaj tseeb tiag, twb tag nrho txhua lub, tau rais los mus vuab tsuab vim yog txoj kev khav ntawm nej tej siab.

37 Vim saib seb, nej yeej hlub nyiaj, thiab nej tej toob xib, thiab nej tej ris tsho zoo, thiab txoj kev ua zoo nkauj ntawm nej tej koom txoos, ntau tshaj li nej hlub tej neeg pluag thiab tej neeg xav tau kev pab, tej neeg mob thiab tej neeg raug txom nyem.

38 Au nej cov neeg vuab tsuab es, nej cov neeg siab phem, nej cov xib hwb, uas muag nej tus kheej rau tej uas yuav lwj siab, vim li cas nej thiaj tau ua vuab tsuab rau Vajtswv lub koom txoos dawb huv? Vim li cas nej thiaj txaj muag ris Khetos lub npe rau saum nej? Vim li cas nej ho tsis xav tias qhov zoo dua yog qhov nuj nqis ntawm ib txoj kev zoo siab uas tsis muaj qhov kawg dua li txoj kev txom nyem uas tsis txawj tuag—vim yog txoj kev qhuas ntawm neeg ntiaj teb los?

39 Vim li cas nej ho tsab zam rau nej tus kheej nrog tej uas tsis muaj sia, thiab ho cia tej neeg tshaib plab, thiab tej neeg xav tau kev pab, thiab tej neeg liab qab, thiab tej neeg muaj mob thiab tej neeg raug txom nyem hla dhau ntawm nej, thiab tsis pom lawv?

40 Muaj tseeb tiag, vim li cas nej thiaj tsa nej tej kev tuav hauv kom nplua nuj, thiab ua kom tej poj ntsuam quaj ntsuag rau tus Tswv, thiab kuj ua tej me nyuam ntsuag quaj ntsuag rau tus Tswv, thiab ua kom tej ntshav ntawm lawv txiv thiab lawv tej txiv quaj tawm hauv av rau tus Tswv, rau txoj kev pauj txiaj ntsig rau saum nej tej taub hau?

41 Saib seb, rab ntaj ntawm txoj kev pauj txiaj ntsig dai rawv rau saum nej; thiab tsis ntev lub sij hawm yuav los kom nws yuav pauj txiaj ntsig rau tej ntshav ntawm cov ntseeg rau saum nej, vim nws nyiaj tsis taus lawv tej kev quaj ntev ntxiv lawm.