1 Pea ko ʻeni ko au, Molonai, ʻoku ou tohi ʻa e meʻa ʻe niʻihi ʻa ia ʻoku ou pehē ʻoku lelei; peá u tohi ki hoku kāinga, ko e kau Leimaná; pea ʻoku ou fakaʻamu ke nau ʻiloʻi kuo ʻosi atu ʻa e taʻu ʻe fāngeau uofulu tupu talu mei he fakahā mai ʻo e fakaʻilonga ʻo e hāʻele mai ʻa Kalaisí.

2 Pea ʻoku ou fakamaʻu ʻa e ngaahi lekōtí ni, hili haʻaku lea ʻaki ha ngaahi lea ʻe niʻihi ʻi he naʻinaʻi kiate kimoutolu.

3 Vakai, ʻoku ou fie naʻinaʻi kiate kimoutolu, ʻo ka mou ka lau ʻa e ngaahi meʻá ni, kapau ko e finangalo poto ʻo e ʻOtuá ʻoku totonu ke mou lau ia, ke mou manatuʻi hono lahi ʻo e ʻaloʻofa ʻa e ʻEikí ki he fānau ʻa e tangatá, talu mei he fakatupu ʻo ʻĀtamá ʻo aʻu mai ki he taimi te mou maʻu ai ʻa e ngaahi meʻa ní, pea mou fakalaulauloto ki ai ʻi homou lotó.

4 Pea ʻi hoʻomou maʻu ʻa e ngaahi meʻa ní, ʻoku ou fie naʻinaʻi kiate kimoutolu ke mou kole ki he ʻOtua, ko e Tamai Taʻengatá, ʻi he huafa ʻo Kalaisí, pe ʻoku ʻikai ke moʻoni ʻa e ngaahi meʻá ni; pea kapau te mou kole ʻi he loto-fakamātoato, mo e loto-moʻoni, ʻo maʻu ʻa tui kia Kalaisi, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.

5 Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.

6 Pea ʻilonga ha meʻa ʻoku lelei ʻoku totonu mo moʻoni ia; ko ia, ʻoku ʻikai ha meʻa ʻoku lelei ʻe fakaʻikaiʻi ʻa Kalaisi, ka ʻoku fakahā ʻokú ne ʻi ai.

7 Pea te mou lava ke ʻiloʻi ʻokú ne ʻi ai, ʻi he mālohi ʻo e Laumālie Māʻoniʻoní; ko ia ʻoku ou fie naʻinaʻi kiate kimoutolu ke ʻoua naʻa mou fakaʻikaiʻi ʻa e mālohi ʻo e ʻOtuá; he ʻokú ne ngāue ʻi he mālohi, ʻo fakatatau ki he tui ʻa e fānau ʻa e tangatá, ʻo tatau ʻi he ʻahó ni, mo e ʻapongipongí, pea taʻengata.

8 Pea ko e tahá, ʻoku ou naʻinaʻi kiate kimoutolu, ʻe hoku kāinga, ke ʻoua naʻa mou fakaʻikaiʻi ʻa e ngaahi meʻafoaki ʻa e ʻOtuá, he ʻoku nau lahi; pea ʻoku nau tupu mei he ʻOtua tatau pē. Pea ʻoku ʻi ai ʻa e ngaahi founga kehekehe ʻoku foaki mai ai ʻa e ngaahi meʻafoakí ni; ka ko e ʻOtua tatau pē ʻokú ne foaki ʻa e ngaahi meʻafoaki kotoa pē ki he kakai fulipē; pea ʻoku foaki mai ia ʻi he ngaahi fakahā ʻa e Laumālie ʻo e ʻOtuá ki he kakaí, ke ʻaonga kiate kinautolu.

9 He vakai, ʻoku foaki ki he taha ʻi he Laumālie ʻo e ʻOtuá, ke ne akonaki ʻaki ʻa e lea ʻo e potó;

10 Pea ki he taha, ke ne akonaki ʻaki ʻa e lea ʻo e ʻiló ʻi he Laumālie pē ko iá;

11 Pea ki he taha, ʻa e fuʻu tui lahi; pea ki he taha, ʻa e ngaahi meʻafoaki ʻo e fakamoʻuí ʻi he Laumālie pē ko iá;

12 Pea ko e tahá, ki he taha, ke ne fai ʻa e ngaahi fuʻu mana lalahi;

13 Pea ko e tahá, ki he taha, ke ne kikite ʻo kau ki he ngaahi meʻa kotoa pē;

14 Pea ko e tahá, ki he taha, ke ne mamata ki he kau ʻāngelo, mo e ngaahi laumālie talafekaú;

15 Pea ko e taha, ki he taha, ʻa e ngaahi faʻahinga lea kehekehe kotoa pē;

16 Pea ko e tahá, ki he taha, hono fakamatalaʻi ʻo e ngaahi leá mo e ngaahi faʻahinga lea kehekehé.

17 Pea ʻoku ʻomai ʻa e ngaahi meʻafoakí ni kotoa ʻi he Laumālie ʻo Kalaisí; pea ʻoku maʻu ʻe he tangata taki taha ha meʻafoaki kehekehe, ʻo fakatatau ki hono finangaló.

18 Pea ʻoku ou fie naʻinaʻi kiate kimoutolu, ʻe hoku kāinga ʻofeina, ke mou manatuʻi ʻoku tupu meia Kalaisi ʻa e meʻafoaki lelei kotoa pē;

19 Pea ʻoku ou fie naʻinaʻi kiate kimoutolu, ʻe hoku kāinga ʻofeina, ke mou manatuʻi ʻokú ne tatau ʻi he ʻaneafí, ʻahó ni, pea taʻengatá, pea ko e ngaahi meʻafoaki kotoa pē kuó u lau ki aí, ʻa ia ʻoku fakalaumālié, ʻe ʻikai ai pe toe ʻave ia, lolotonga ʻa e kei tuʻu ʻa e māmaní, ka ʻe fakatatau pē mo e taʻetui ʻa e fānau ʻa e tangatá.

20 Ko ia, kuo pau ke ʻi ai ʻa e tuí; pea kapau ʻoku pau ke ʻi ai ʻa e tuí ʻoku pau ke ʻi ai foki mo e ʻamanakí; pea kapau ʻoku pau ke ʻi ai ʻa e ʻamanakí ʻoku pau ke ʻi ai foki mo e manavaʻofá.

21 Pea kapau ʻe ʻikai te mou maʻu ʻa e manavaʻofá ʻe ʻikai teitei faʻa fakamoʻui ʻa kimoutolu ʻi he puleʻanga ʻo e ʻOtuá; pea ʻe ʻikai foki faʻa fakamoʻui ʻa kimoutolu ʻi he puleʻanga ʻo e ʻOtuá kapau ʻoku ʻikai te mou maʻu ʻa e tuí; pe ʻoku ʻikai foki ke faʻa fakamoʻui ʻa kimoutolu kapau ʻoku ʻikai te mou maʻu ʻa e ʻamanakí.

22 Pea kapau ʻoku ʻikai te mou maʻu ʻa e ʻamanakí kuo pau ke mou loto-foʻi; pea ʻoku tupu ʻa e loto-foʻí koeʻuhi ko e angahalá.

23 Pea naʻe folofola moʻoni ʻa Kalaisi ki heʻetau ngaahi tamaí: Kapau ʻoku mou maʻu ʻa e tuí te mou lava ʻo fai ʻa e meʻa kotoa pē ʻoku totonu ʻiate aú.

24 Pea ko ʻeni ʻoku ou lea ki he ngaahi ngataʻanga kotoa pē ʻo e māmaní—kapau ʻe hoko ʻa e ʻaho ʻe toʻo atu ai ʻa e mālohi mo e ngaahi meʻafoaki ʻa e ʻOtuá meiate kimoutolu, ʻe hoko ia koeʻuhi ko e taʻetuí.

25 Pea ʻe malaʻia ʻa e fānau ʻa e tangatá ʻo ka hoko ʻeni; he ʻe ʻikai ke ʻi ai hamou tokotaha ʻoku failelei ʻiate kimoutolu; ʻe ʻikai ha taha. He kapau ʻoku ʻi ai ha taha ʻiate kimoutolu ʻoku failelei, te ne ngāue ʻaki ʻa e mālohi mo e ngaahi meʻafoaki ʻa e ʻOtuá.

26 Pea ʻe malaʻia ʻa kinautolu te nau liʻaki ʻa e ngaahi meʻá ni pea nau maté, he ʻoku nau mate ʻi heʻenau ngaahi angahalá, pea ʻe ʻikai faʻa fakamoʻui ʻa kinautolu ʻi he puleʻanga ʻo e ʻOtuá; pea ʻoku ou lea ʻaki ia ʻo fakatatau mo e ngaahi folofola ʻa Kalaisí; pea ʻoku ʻikai te u loi.

27 Pea ʻoku ou naʻinaʻi kiate kimoutolu ke mou manatuʻi ʻa e ngaahi meʻá ni; he ʻoku vave mai ʻa e taimi te mou ʻiloʻi ai ʻoku ʻikai te u loi, he te mou mamata kiate au ʻi he nofoʻanga fakamaau ʻo e ʻOtuá; pea ʻe folofola atu ʻa e ʻEiki ko e ʻOtuá kiate kimoutolu: ʻIkai naʻá ku fakahā ʻa ʻeku ngaahi leá kiate kimoutolu, ʻa ia naʻe tohi ʻe he tangata ko ʻení, ʻo hangē ko ha taha ʻoku kalanga mei he maté, ʻio, ʻo hangē ko ha taha ʻoku lea mei he efú?

28 ʻOku ou fakahā ʻa e ngaahi meʻá ni koeʻuhí ke fakamoʻoniʻi ʻa e ngaahi kikité. Pea vakai, ʻe ʻalu atu ia mei he fofonga ʻo e ʻOtua lauikuongá; pea ʻe ʻalu atu ʻi he mālohi ʻa ʻene folofolá mei he toʻu tangata ki he toʻu tangata.

29 Pea ʻe fakahā ʻe he ʻOtuá kiate kimoutolu, ko e meʻa kuó u tohí ʻoku moʻoni ia.

30 Pea ʻoku ou toe fie naʻinaʻi kiate kimoutolu ke mou haʻu kia Kalaisi, pea piki maʻu ki he meʻafoaki lelei kotoa pē, pea ʻikai ala ki he meʻafoaki ʻoku koví, pe ko e meʻa ʻoku taʻemaʻá.

31 Pea ʻā hake, pea tuʻu hake mei he efú, ʻE Selusalema; ʻio, pea ʻai ho ngaahi kofu matamataleleí, ʻE ʻofefine ʻo Saione; pea fakamālohiʻi ho ngaahi tuki poupoú pea fakalahi ho ngaahi ngataʻangá ʻo taʻengata, koeʻuhi ke ʻoua naʻa toe veuveuki koe, pea ko e ngaahi fuakava kuo fai ʻe he Tamai Taʻengatá mo koé, ʻE fale ʻo ʻIsileli, ke fakamoʻoniʻi ia.

32 ʻIo, haʻu kia Kalaisi, pea hoko ʻo haohaoa ʻiate ia, pea fakafisi ʻa kimoutolu mei he anga taʻe-māʻoniʻoni kotoa pē; pea kapau te mou fakafisi ʻa kimoutolu mei he anga taʻe-māʻoniʻoni kotoa pē, pea ʻofa ki he ʻOtuá ʻaki homou iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate kimoutolu, koeʻuhi ke tupu ʻi heʻene ʻaloʻofá ʻa hoʻomou haohaoa ʻia Kalaisí; pea kapau ʻoku tupu ʻi he ʻaloʻofa ʻa e ʻOtuá ʻa hoʻomou haohaoa ʻia Kalaisí, ʻoku ʻikai te mou teitei lava ke fakaʻikaiʻi ʻa e māfimafi ʻo e ʻOtuá.

33 Pea ko e tahá, kapau ʻoku tupu ʻi he ʻofa ʻa e ʻOtuá ʻa hoʻomou haohaoa ʻia Kalaisí, ʻo ʻikai fakaʻikaiʻi hono mālohi, ʻoku toki fakamāʻoniʻoniʻi ʻa kimoutolu ʻia Kalaisi ʻi he ʻofa ʻa e ʻOtuá, ʻi he lilingi ʻo e taʻataʻa ʻo Kalaisí, ʻa ia ʻoku ʻi he fuakava ʻa e Tamaí ke fakamolemoleʻi hoʻomou ngaahi angahalá, ke mou hoko ʻo māʻoniʻoni, taʻe-ha-ʻila.

34 Pea ko ʻeni, ʻoku ou lea māvae ki he kakai fulipē. ʻOku vave ke u ʻalu ʻo mālōlō ʻi he palataisi ʻo e ʻOtuá, kae ʻoua ke toe fakataha ʻa hoku laumālié mo e sinó, pea ʻomi au kuó u ikuna ʻi he ʻataá, ke fetaulaki mo kimoutolu ʻi he ʻao ʻo e fakamaau lelei ʻo Sihova māfimafi, ko e Fakamaau Taʻengata ʻo e moʻuí mo e maté fakatouʻosi. ʻĒmeni.