1 Kʼad shí, Moroni, yáʼátʼééh nisinígíí nááhídéesoh; dóó bił háíjééʼ bichʼįʼ éʼéshłééh, Laman bidineʼé; dóó díí éí bił béédahózin doo nisin dį́įʼdi neeznádiin dóó baʼaan naadiin éí biláahgo nááhai ńléí Christ doogááł haʼníigo haʼoodzíʼę́ędą́ą́ʼ dóó wóshdę́ę́ʼ.

2 Dóó díí haneʼígíí éí ahéshjéeʼgo áshłééh, áłtsʼíísígo saad bee nichʼįʼ hanáánáásdzííʼ dóó baa nanihisískango.

3 Jó, díí baa nánihooshkąąh díí deínóhłtaʼgo, Diyin God díí nihichʼįʼ kóyiilaago deínóhłtaʼdą́ą́ʼ, éí díí béédaohłniih dooleeł, ńléí Adam ábiʼdiilyaa yę́ędą́ą́ʼ dóó wóshdę́ę́ʼ díí haneʼ ńdadooʼą́ąjįʼ éí Bóhólníihii tsʼídá bílaʼashdlaʼii baʼáłchíní ayóó áyóʼnínígíí, dóó tsʼídá yéigo nihijéí biyiʼjįʼ díí baa ntsídaahkees doo.

4 Dóó díí shóisoołtʼeʼgo, shí ánihidishníigo éí Diyin God, Hoolʼáágóó aTaaʼ nilíinii, Christ bízhiʼ binahjįʼ, jó díí tʼáá aaníí átʼéhígíí baa naʼídídóołkił; dóó nihijéí bee tʼáá aaníí ádóhníigo, índa Christ yinohdlą́ągo, Iiʼsizį́ Diyinii binahjįʼ tʼáá aaníinii nihił ííshją́ą́ íidoolííł.

5 Dóó Iiʼsizį́ Diyinii bibee adziil binahjįʼ tʼáá ałtsoní tʼáá aaníinii nihił bééhodoozįįł.

6 Dóó tʼáá ałtsoní yáʼátʼéehii éí tʼáá ákótʼé dóó tʼáá aaníí; ákohgo, tʼáá ałtsoní yáʼátʼéhígíí éí doo Christ nahjįʼ kwííłʼį́į da, ndi tʼóó tʼáá aaníí hólǫ́ǫgo ííshjání áyósin.

7 Dóó Iiʼsizį́ Diyinii binahjįʼ, éí hólónígíí nihił bééhodoozįįł; ákohgo baa nánihooshkąąh Diyin God bibee adziilii tʼáadoo bikʼijįʼ nohłíní; háálá adziilii, éí bílaʼashdlaʼii baʼáłchíní beʼoodląʼígíí yinahjįʼ naalnish, díí jį́ dóó yiską́ą́dóó, dóó tʼáá ákótʼéego ahoolʼá.

8 Dóó nááná, díí baa nánihooshkąąh, shikʼisóó nohłíinii, tʼáadoo Diyin God bibee aʼiilyéii nahjįʼ kódaʼohłʼíní; háálá éí tʼóó ahayóí, dóó éí tʼáá Diyin God bitsʼą́ą́dę́ę́ʼ hólǫ́. Dóó díkwííshį́į́ ałʼąą átʼéego éí haa dahalyé; ndi tʼáá Diyin God éí díí tʼáá ałtso yee yikʼijídlí; dóó díí éí Diyin God biiʼSizíinii haa dahalyéhígíí hoł ííshją́ą́ ádeileʼ, háká adoolwoł biniiyé.

9 Jó áko, łaʼ éí Diyin God biiʼSizíinii, bitsʼą́ą́dóó saad bee hódzáanii yee naʼnitin dooleeł;

10 Dóó náánáłaʼ, éí saad bee bééhózinii neinitin dooleeł tʼáá éí Iiʼsizíinii bitsʼą́ą́dóó;

11 Dóó náánáłaʼ, éí oodląʼ tʼáá íiyisíí ląʼígo bee hólǫ́; dóó náánáłaʼ, éí haałtʼé ánáʼoolnííł aa dahalyéii tʼáá éí Iiʼsizíinii bitsʼą́ą́dóó;

12 Dóó nááná, łaʼígíí éí bichʼįʼ, ayóó álílee ayóó ádaatʼéhígíí ííłʼį́į dooleeł;

13 Dóó nááná, łaʼígíí éí bichʼįʼ, tʼáá ałtsoní náásgóó ádahodooníłígíí yaa halneʼii nilį́į dooleeł;

14 Dóó nááná, łaʼígíí éí bichʼįʼ, diyin yá naalʼaʼii dóó iiʼsizį́ áká ańdaajahii yooʼį́į dooleeł;

15 Dóó nááná, łaʼígíí éí bichʼįʼ, saad ałʼąą ádaatʼéego yee yáłtiʼ dooleeł biniiyé;

16 Dóó nááná, łaʼígíí éí bichʼįʼ, saad ałʼąą ádaatʼéii dóó ałʼąą dahólóonii yá ataʼ halneʼ dooleeł;

17 Dóó díí aa halyéii éí tʼáá ałtso Christ biiʼSizíinii binahjįʼ bee hakʼidahojídlí; dóó íinízinígíí bikʼehgo, éí diné tʼáá ałtso baa dahalyé.

18 Dóó baa nánihooshkąąh, shikʼisóó ayóí ánihííníshʼníinii, béédaohłniih tsʼídá tʼáá ałtso yáʼádaatʼéehii Christ tʼéiyá bitsʼą́ą́dę́ę́ʼ.

19 Dóó baa nánihooshkąąh, shikʼisóó ayóí ánihííníshʼníinii, díí béédaohłniih dooleeł Christ éí adą́ą́dą́ą́ʼ, dóó dííshjį́, dóó hoolʼáágóó, doo łahgo ánááʼníił da, dóó díí tʼáá ałtso bibee akʼihojídlí baa nahosisneʼígíí, éí dadiyin, dóó doo ndahidootʼih da, éí díí nahasdzáán siʼą́ bijį́įjįʼ ndi, doo nááhididoolyéeł da, tʼáá hazhóʼó bílaʼashdlaʼii baʼáłchíní doo daʼoosdląądgóó tʼéiyá.

20 Ákohgo, oodląʼ éí hólǫ́ǫ doo; dóó oodląʼ hólǫ́ǫgo chohooʼį́į́dóʼ hólǫ́ǫ doo; dóó chohooʼį́ hólǫ́ǫgo éí diyingo ayóó óʼóʼníinii ałdóʼ hólǫ́ǫ doo.

21 Dóó tʼáá hazhóʼó diyingo ayóó óʼóʼníinii nihee hólǫ́ǫgo tʼéiyá Diyin God bił hazʼą́ądi yisdáńdoohdááł; dóó ałdóʼ oodląʼ nihee ádingo éí doo yisdáńdoohdáał da, nááná doo nihił chohooʼį́įgo ałdóʼ ndagaʼ.

22 Dóó doo nihił chohooʼį́į́góó éí nihił chohooʼį́ ádin; dóó chohooʼį́ ádinígíí éí bąąhági átʼéii bitsʼą́ą́dę́ę́ʼ nihwiileeh.

23 Dóó Christ éí tʼáá aaníí kóníigo nihizhéʼé yichʼįʼ haadzííʼ: Niheʼoodląʼ hólǫ́ǫgo éí tʼáá ałtsoní yáʼátʼéehii nihá nisinígíí ádoohłííł.

24 Dóó kʼad éí tʼáá ałtso nihookááʼ dineʼé bichʼįʼ haasdziih—háadida Diyin God bibee adziil dóó bibee aʼiilyéii nihitahgóó ásdįįdgo, éí éí doo daʼiinohdlą́ dasoolį́ʼígíí biniinaa dooleeł.

25 Dóó yíi ákóhóótʼį́įdgo, háálá tsʼídá diné tʼááłáʼí ndi, doo yáʼátʼéehgo naaghá silį́įʼgo; éí tsʼídá bílaʼashdlaʼii baʼáłchíní doo bá yáʼátʼéeh da dooleeł. Háálá tsʼídá tʼááłáʼí ndi yáʼátʼéehgo naagháago, éí Diyin God bibee adziil dóó bibee aʼiilyéii yikʼehgo naalnish dooleeł.

26 Dóó yíi háíshį́į́ díí nahjįʼ kodajiilaaígíí dazneeznáago doo há yáʼátʼéeh da dooleeł, háálá bąąhági átʼéii baa jookahgo dazneezná, dóó Diyin God bił hazʼą́ądi yisdánáhizhdookahgo éí doo bíighah da; dóó díí éí Christ ánínígíí bikʼehgo yáshtiʼ; dóó doo éí shiyoochʼíid da.

27 Dóó nánihooshkąąhgo ánihidishní, díí béédaohłniih; háálá tsxį́įłgo bichʼįʼ hoolzhish díí doo shiyoochʼídígíí nihił béédahodoozįįłjįʼ, háálá Diyin God bibee ánihwiitʼaahdi dasitánígíí dashiidoołtsééł; dóó Bóhólníihii God ánihididooniił: Nihichʼįʼ haasdzíiʼ neʼ yaʼ, díí diné nááyíizo neʼ, daneeznánę́ę bitahdę́ę́ʼ diitsʼaʼ nahalingo, aooʼ, índa łeeyiʼdę́ę́ʼ yáłtiʼ nahalingo yaʼ?

28 Díí bee yáshtiʼ náasdi ádahodoonííł haʼnínę́ę biʼdoolnííł biniiyé. Jó áádóó, Diyin God hoolʼáágóó hólóonii éí bizééʼdę́ę́ʼ yee hadoodzih; dóó bizaad éí oochííłdę́ę́ʼ dóó oochíiłgo hiss diitsʼaʼ dooleeł.

29 Dóó Diyin God nááházooígíí tʼáá aaníinii átʼéego, nihił ííshją́ą́ íidoolííł.

30 Dóó nááná baa nánihooshkąąh Christ baa hohkááh, dóó aʼiilyé yáʼádaatʼéehii tʼáá ałtso daoohłtsóód, dóó doo yáʼátʼéehii aʼiilyéhígíí bídadohłchid lágo, dóó bąąhági ádaatʼéhígíí ałdóʼ dooda.

31 Dóó chʼéénídzííd, dóó łeeshtahdóó ńdiiʼnééh, O Jerusalem; aooʼ, dóó niʼééʼ nizhónígíí biih nínááh, O Zion bichʼéʼé nilíinii; dóó hoolʼáágóó níbaal bistake ádaatʼéhígíí daniłdzilgo ádanileʼ dóó hótsaago áhólééh hoolʼáágóó, áko doo nihił náádahalą́ą da dooleeł, áko Hoolʼáágóó aTaaʼ nilíinii nił ahadaʼdeetʼánę́ę, O Israel bighandóó danohłíinii, éí biʼdoolnííł.

32 Aooʼ, wóshdę́ę́ʼ Christ baa hohkááh, dóó binahjįʼ hadanołtʼéego adanihiʼdilneʼ, dóó bąąhági átʼéii átsʼádahidohtʼaah; dóó tʼáá aaníí bąąhági átʼéii atsʼádahisidohtʼą́ągo, dóó niheʼadziilii, dóó nihintsékees, dóó tʼáá átʼé bee, nihiDiyin God ayóí íínóhʼníigo, áko éí bidiyingo joobaʼ nihikʼéstiʼ, áko bidiyingo joobaʼ binahjįʼ Christ biiʼ hadanołtʼéego ánihidiʼdoolnííł; dóó Diyin God bidiyingo joobaʼ bee Christ biiʼ hadanołtʼéego ánihiʼdiilyaago, éí tsʼídá Diyin God bibee adziilii doo yidoohdląąłígíí doo nihá bíighah da.

33 Dóó nááná, Christ binahjįʼ dóó Diyin God bidiyingo joobaʼ bee Christ biiʼ hadanołtʼé ánánihiʼdiilyaago, dóó beʼadziilii doo nahjįʼ kódaahłéehgo, áko índa Diyin God bidiyingo joobaʼ bee Christ biiʼ doo nihąąh chingóó ánihidiʼdoolnííł, Christ bidił deeznaʼą́ą biníkááʼ góneʼ, díí éí aTaaʼ ahaʼdeetʼánę́ę biiʼ nihibąąhági átʼéii bee nihá ńdadidootʼááł, áko doo nihąąh chingóó, dinohyin dooleeł.

34 Dóó kʼad tʼáá ánółtso, hágoóneeʼ, nihidishní. Hodíinaʼgo Diyin God bihózhǫ́ǫdi háádeeshyįh, shiiʼsizíinii dóó shitsʼíís ahíináátʼáazhjįʼ, dóó níłchʼi biyiʼ ayóó áníshtʼéego shił chʼéédohtʼash, ayóó átʼéii Jehovah bibee ánihwiitʼaah dasitáanii hózhǫ́ǫdi bidááhdóó náánihiideestsééł, éí dahinánígíí dóó daneesnánígíí tʼáá áła Hooláágóó Ánihwiiʼaahii nilį́. Amen.