1 Shiyeʼ ayóí ííníshʼníinii, nichʼįʼ ánáánáshdlééh áko tʼahdii hinishnánígíí nił bééhózin dooleeł biniiyé, ndi díí tsʼídá baa yíníłígíí baa naʼaso dooleeł.

2 Jó áko, Laman bidineʼé tsʼídá yéigo bił daʼahiigą́ą́ʼ, dóó nihikʼeh dadeesdlį́į́ʼ; dóó Archeantus, dóó ałdóʼ Luram, dóó Emron éí bééshhał yee daneezná; aooʼ, diné yáʼádaatʼéehii tʼóó ahayóí nihitsʼą́ą́ʼ ndaaztseed.

3 Jó dóó kʼad, shiyeʼ, díí éí binásdzid háálá díí Nephi bidineʼé doo iiná łahgo áńdeidlééhgóó biniinaa, Laman bidineʼé ałtso ndabidoołtsił shaʼshin nisin, dóó Satan beʼiiníziinii éí tʼáá áłahjįʼ ałchʼįʼ yiłʼáago daʼahigą́.

4 Jó, shí éí tʼáá áłahájįʼ bił ndaashnish; dóó Diyin God bizaad tʼáá aaníí átʼéhígíí tsʼídá yéigo bee bichʼįʼ yáshtiʼgo bitah dahodiiłnááʼ dóó shichʼįʼ bá ńdahachįįh; dóó tʼáá hazhóʼógo bichʼįʼ hanásdziihgo éí tʼóó bijéí yikʼijįʼ ndeiłtłʼis; ákohgo, Bóhólníihii biiʼSizíinii éí kʼad doo bił dahólǫ́ǫ da nisingo tʼóó binásdzid.

5 Háálá tsʼídá tʼóó báhádzidgo bá ńdahachįįh áko dadootsaałjįʼ ndi doo yéédaaldzid da nahalin; dóó ayóó óʼóʼní bitahgóó ásdįįd, dóó dił yíká ádáátʼį́ dóó áká ndeeʼáh tʼéiyá danízin.

6 Dóó kʼad, shiyeʼ ayóí ííníshʼníinii, azhą́ doo daʼíístsʼą́ąʼ da ndi, tsʼídá yéigo ndaniitin doo; háálá niʼkwíidzaago éí, nihikʼijįʼ saad siʼą́ą doo; háálá nahasdzáán bikáaʼgi neidáago éí nihinaanish hólǫ́, éí éí yáʼátʼéehii yikʼijįʼ naanishígíí bikʼeh didiidleeł, dóó áko Diyin God bił hazʼą́ądi hádiilyįh.

7 Dóó kʼad éí díí diné tiʼdahooníhígíí nínáhásoh dooleeł. Háálá ééhózinígíí Amoron yee shił hoolneʼę́ę, jó, Laman bidineʼé éí tsʼídá tʼóó ahayóí diné yił ndayizdéél, éí Sherrizah hódah dahazkándóó yił ndahaazdéél; diné, dóó asdzání, dóó áłchíní danilį́įgo.

8 Dóó áłchíní dabizhéʼé yę́ę dóó asdzání badahastiin yę́ę éí ndeistseed; dóó badahastiin yę́ę bitsįʼ deiyiyísą́ą́ʼ, dóó áłchíní dabizhéʼé yę́ę bitsįʼ deiyiyísą́ą́ʼ; tó éí ádin, áłchʼį́į́dígo tʼéiyá, yaa ńdeikáahgo.

9 Dóó azhą́ Laman bidineʼé tsʼídá aláahdi joodláhígíí yaa naakai ndi, nihidineʼé Moriantumdi kéédahatʼínígíí éí díí yiláahgo ádáádzaa. Jó háálá, Laman bidineʼé bitsiʼ tʼóó ahayóí yił ndayiizdéél; dóó bikʼijįʼ tsʼídá ayóí ádayóʼnínę́ę dóó tsʼídá tʼáá ałtsoní biláahdi ílíinii yę́ę neʼ yaa náádeidiidlaʼ, éí éiyá doo adilyéí dóó atsʼíís doo bąąh chin álnéhę́ę—

10 Dóó kódeileʼgo, tsʼídá yéigo yichʼįʼ ndahwiiłnáago ndeistseed, áádóó ndeiłtseedgo, deilghał naaldlooshii bádahadzidii daʼayánígi átʼéego, háálá bijéí tsé ntłʼizí nahalin daazlį́ʼígíí biniinaa; dóó díí éí tʼáadoo binásdzidí da daaníigo ákódaatʼį́.

11 O shiyeʼ ayóí ííníshʼníinii, haashį́į́ yitʼáo díí diné, doo ntsídaakees da nahalin silį́į́ʼ—

12 (Dóó tʼáá díkwíhíyeeʼ nááhai yę́ędą́ą́ʼ nizhónígo dóó diné bá dahózhóonii danilį́įgo kéédahatʼíi neʼ)

13 Ndi O shiyeʼ, haash yitʼáo diné díigi ádaatʼéego, tʼóó ahayóí tsʼídá aláahdi joodláhígíí tʼéiyá yaa bił dahoneeni—

14 Haash yitʼéego éí Diyin God doo bílaʼ yee nihá ńdidooʼáał da?

15 Jó, shijéí éí yícha: Yíi díí diné bichʼįʼ. Kʼad bá nihoníʼaah, O Diyin God, ndaʼiisíʼígíí, dóó bibąąhági átʼéii, dóó tsʼídá aláahdi joodláhígíí nidááhdóó nahjįʼ ńdíłʼįįh!

16 Dóó nááná, shiyeʼ, asdzání ádahasdįįdii dóó dabichʼéʼé tʼóó ahayóí tʼahdii Sherrizahdi; dóó bidaʼiináanii Laman bidineʼé tʼáadoo dah deidiijahą́ʼígíí éí, Zenephi bá ndaabaahii ałtso dah deidiijaaʼ, áko éí tʼáá bíhólníihgo chʼiyáán hadeinitáago ádayiilaa; áko tʼóó ahayóí sáanii tʼáá ákǫ́ǫ́ bił chʼaa dahazlį́į́ʼ dóó náádahidiilyá.

17 Dóó ndaabaahii bił naashkaigíí éí chʼééh deeskai; dóó Laman bidineʼé bindaabaahii éí shí dóó Sherrizah bitaʼgi dah yinééł; dóó tʼóó ahayóí éí Aaron bindaabaahii dah yinéłígíí bichʼįʼ adahineezhchą́ą́ʼ éí kʼasdą́ą́ʼ ałtso ndeistseed.

18 O shidineʼé yę́ę tʼóó baaʼihgo deeskai! Kʼé hwiinidzinę́ę ádin dóó ajoobaʼą́ądóʼ ádin. Jó, shí éí tʼáá diné nishłį́, dóó tʼáá dinégi átʼáo shidziil, dóó shá ndaabaahą́ą doo dasíístsʼą́ąʼ da daazlį́į́ʼ.

19 Dóó tsʼídá tʼóó baaʼihgo deeskai; índa tʼáá aheełtʼéego doo daatsʼíid da silį́į́ʼ, tsʼídá tʼáá ałtso ndeiłtseed, hadaastihígíí dóó áłchíní yázhí ndi, áádóó doo yáʼátʼéehii tʼéí yaa bił dahoneeni; dóó nihidaʼasdzánę́ę dóó nihadaʼáłchíní yę́ę tʼáá ałtsogóó tsʼídá yiláahgo tiʼdahoonííh; aooʼ, doo baa hojoolneʼígi átʼáo, dóó doodzoh ndi doo bíighah da.

20 Dóó kʼad, shiyeʼ, díí tʼóó baaʼihgo nihił áhootʼéhígíí éí tʼáá ákódígo baa hodeeshnih. Jó, díí diné bąąhági átʼéii yaa deeskaígíí éí nił bééhózin; nił bééhózingo atłʼáahdi siláí yee dabidziil yę́ę éí ádin, dóó beʼajoobaʼą́ą ałdóʼ ádin; dóó Laman bidineʼé yiláahgo bąąhági átʼéii yaa deeskai.

21 Jó, shiyeʼ, Diyin God bichʼįʼ bá hadeesdzihígíí éí doo shá bíighah da éí atídashidoolíiłii nisingo.

22 Jó ndi, shiyeʼ, Diyin God éí bichʼįʼ yáʼátʼéehgo ná hadeesdzih, dóó Christ éí baʼííníshłíigo áko yisdáńdíídááł; dóó Diyin God tʼah hiníná ánósingo ná sodiszin, áko bidineʼé Diyin God yaa ńdookah, éí doodago ałtso dínóonéłígíí yidííłtsééł dishní; háálá shí éí shił bééhózin éí nahjįʼ kobiʼdidoolnííł tʼáá hazhóʼó beʼiinaʼ łahgo áńdeidléehgo dóó yichʼįʼ náhákáahgo tʼéiyá.

23 Dóó daneeznáago éí Jared bidineʼé ásdįįdę́ę nahalin doo, háálá hodiyeeshééł dóó doo hańdiníʼą́ą da haʼnínígíí tʼéiyá, bijéí biyiʼ dadineesdlį́į́ʼ.

24 Dóó daneeznáadą́ą́ʼ, nihí éí nihił bééhózingo tʼóó ahayóí nihidineʼé Nephi bidineʼé éí Laman bidineʼé yichʼįʼ adahineestʼį́į́ʼ, áádóó tʼóó ahayóí ałdóʼ áájígo anáádahidínóotʼį́į́ł; ákohgo, éí łahjįʼ baa naʼízo dooleeł, yínísdzíʼdą́ą́ʼ dóó shí éí nááshiʼdiilyáago dóó doo naaniiłtsą́ą́góó, ndi átʼahígo náániideestsééł nisin; háálá haneʼ diyinii hadadiilyaaígíí naa deeshnił.

25 Shiyeʼ, Christ yínídlą́; dóó tʼáadoo leʼé nááházooígíí tʼáadoo ayóó baa yínííł níníziní, bikééʼ kódoohníiłgo niyółhééł lágo; ndi Christ beʼadziil nił hólǫ́ǫ doo, dóó tiʼhoozniiʼígíí dóó daaztsánígíí, dóó bitsʼíís yee nihizhéʼé yę́ę yichʼįʼ ííshjání áʼdiilyaa yę́ę, dóó beʼajoobaʼii dóó bee haʼólníinii, dóó beʼayóó átʼéii dóó iiná doo ninítʼiʼii bíká choʼooʼíinii, hoolʼáágóó nihintsékees biiʼ hólǫ́ǫ doo.

26 Dóó Diyin God yáʼąąshdi tsʼídá aláahdi hazʼánígíí, dóó Jesus Christ nihiBóhólníihii, bibee adziilii nishʼnáájígo dah sidáhígíí, tsʼídá tʼáá ałtsoní bee bíhólnííh silį́įʼjįʼ, bidiyingo joobaʼ, éí, dóó hoolʼáágóó nił hólǫ́ǫ doo. Amen.