Ko e Tohi ʻa Molonaí

1 Ko ʻeni ko au, Molonai, hili ʻeku fakaʻosi ʻa e hiki fakanounou ʻo e fakamatala ʻo e kakai ʻo Sēletí, naʻá ku mahalo ʻe ʻikai te u tohi mo ha toe meʻa kehe, ka ʻoku teʻeki ai te u mate; pea ʻoku ʻikai te u fakahā au ki he kau Leimaná telia naʻa nau fakaʻauha au.

2 He vakai, ko ʻenau ngaahi fetauʻakí ʻoku fuʻu fakamanavahē ʻaupito ʻiate kinautolu; pea koeʻuhi ko ʻenau tāufehiʻá ʻoku nau tāmateʻi ai ʻa e Nīfai kotoa pē ʻe ʻikai te ne fakaʻikaiʻi ʻa Kalaisí.

3 Pea ko au, Molonai, ʻe ʻikai te u fakaʻikaiʻi ʻa e Kalaisí; ko ia, ʻoku ou hē hē holo ki ha potu pē ʻoku ou faʻa ʻalu ki aí ke maluʻi ʻa ʻeku moʻui ʻaʻakú.

4 Ko ia, ʻoku ou tohi mo ha ngaahi meʻa siʻi ʻe niʻihi, ʻo kehe mei he meʻa ʻa ia naʻe totonu ke u faí; he naʻá ku ʻamanaki ʻe ʻikai te u tohi mo ha toe meʻa kehe; ka ʻoku ou tohi mo ha ngaahi meʻa siʻi ʻe niʻihi, heiʻilo naʻa ʻaonga ʻapē ia ki hoku kāinga, ko e kau Leimaná, ʻi ha ʻaho ʻamui, ʻo fakatatau mo e finangalo ʻo e ʻEikí.