E Buki Di Moroni

1 Awor ami, Moroni, despues di a kaba di kompendiá e relato di e pueblo di Jared, mi a imaginá pa no skirbi mas, pero mi no a peresé ainda; i mi no ta duna mi mes na konosé na e lamanitanan pa nan no destruimi.

2 Pasobra ata’ki, nan gueranan ta hopi salvahe entre nan mes; i pa motibu di nan odio nan ta mata tur nefita ku no ta ninga Cristo.

3 I ami, Moroni, no ta bai ninga Cristo; di manera ku, mi ta vaga bai unda ku mi por pa siguridat di mi mes bida.

4 Asina anto, mi ta skirbi algun kos mas, kontrali na loke mi a imaginá; pasobra mi a pensa pa no skirbi mas; pero mi ta skirbi algun kos mas, ku kisas nan lo por ta di balor na mi rumannan, e lamanitanan, den algun dia futuro, segun e boluntat di Señor.