1 Ac inge nga sramsramkihn pacptais. Liye, elder, mwet tol, ac mwet luti uh pacptaislac; ac elos tiac pacptaislac sahyacn na elos use fahko wo in ahkkahlwemye lah elos fal in pacptaislac.

2 Elos tiac pac eis kuhtwena mwet in pacptaislac sahyacn na elos tuhkuh ke sie inse muhsahl ac toasr in nguhn, ac ahkkahlwemye nuh sin alu uh lah elos auliyak na pwacye ke ma koluk nuhkwewa lalos.

3 Ac wacngihn kuhtwena mwet eisyuck in pacptaislac sahyacn na elos eis nuh faclos inen Kraist, insacnweacng in kuhlwacnsapwacl ne ke na sahflah.

4 Ac tukun elos tuh eisyuck in pacptaislac, ac mokleyuck ac ahknwacsnwacsyeyucklac ke kuh luhn Nguhn Muhtahl, elos oacwaclah inmahsrlon mwet luhn alu luhn Kraist; ac inelos eisyuck, tuh elos in kuh in esamyuck ac karihngihnyuckyang ke kahs wo luhn God, in liyaclosyang in muhta na ke inkacnek pwacye, in liyaclosyang pacl nuhkwewa ke pruhe, muhngnguh muhkwena nuh ke orekma wo luhn Kraist, suc pa mwet sihm ac mwet ahksuwohsye luhlahlfongi lalos.

5 Ac alu uh tuh toeni nuh sie ke pacl pucspucs, in lalo ac in pruhe, ac in sramsram sie nuh sin siepac ke ohiyac wo luhn nguhnalos.

6 Ac elos tuh toeni nuh sie pacl pucspucs in ipeis ke puhret ac wine, in esam Leum Jisus.

7 Ac elos karuhnguhnwacng na in liyacacng tuh in wacngihn ma koluk inmahsrlolos; ac el suc konweyuckyak in oruh ma koluk, ac mwet loh tolu luhn alu uh kaelos ye muhtuhn elder uh, ac elos fin tiac auliyak, ac tiac taltal, inelos ac iyucklac, ac elos tiac oacwaclah inmahsrlon mwet luhn Kraist.

8 Tuhsruhk ke elos auliyak ac suk nuhnakmuhnahs, ke inse pwacye, elos tuhlweyucklac.

9 Ac toeni lalos uh kolyuck sin alu oacna ohiyacn orekma luhn Nguhn, ac ke kuh luhn Nguhn Muhtahl; tuh ke kuh luhn Nguhn Muhtahl kohlohlos lah elos in luti, kuh in kwacfe, kuh in pruhe kwacfe, kuh in pruhe siyuck ke inse puhsisacl, kuh in on, elos oruh ohinge.